ꓢꓲ ꓒ ꓬꓰ‐ꓢꓴ ꓐꓰ ꓜꓲ_ ꓟ ꓗ, ꓛꓲ ꓟ ꓓꓳꓽ ꓔꓯ ꓚꓺ ꓒꓬꓱ ꓓꓴ ꓬꓰ ꓡꓯ꓾

ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ ꓥꓳ ꓡꓳ. ꓓꓴ ꓙꓴ‐ꓐꓲ‐ꓡꓲ ꓘꓳꓼ ꓑꓮꓲ ꓔꓯ ꓬꓰ ꓔꓬ ꓟ ꓞꓳ ꓫꓵ ꓐꓴ ꓜꓴꓻ ꓐꓴ ꓔꓯ ꓕꓳ ꓶ ꓕꓲ ꓚꓳ. ꓦ ꓩꓴ ꓗꓷ ꓟ ꓥꓳ꓿

10 ꓦ ꓟ 16 ꓠꓬꓲ ꓠꓽ ꓡꓲ. ꓠꓬꓲ ꓐꓳ ꓩꓴ ꓗꓷ ꓟ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓬꓲ ꓠꓲ, ꓡꓶꓽ ꓔꓯ ꓝꓮꓲ ꓐꓯ ꓔꓱ, ꓗꓷ ꓟ ꓥꓳ꓿ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓙꓴ‐ꓐꓲ‐ꓡꓲ ꓑꓮꓲ ꓔꓯ ꓙ ꓖꓶ_ ꓕꓯ “ꓘꓴ ꓜꓲꓼ ꓞꓳ ꓬꓲ ꓒꓳ, ꓒꓳ, ꓗꓪ ꓐꓰ ꓐꓲ ꓜꓲꓼ_ ꓟ꓾ ꓙꓲ ꓢꓴ ꓢꓲ ꓤ ꓤꓶꓻ ꓫꓬ, ꓦꓵ ꓟ꓾ ꓬꓲ   ꓤꓶꓻ ꓬꓲ ꓘꓳꓼ ꓐꓰ ꓤꓶꓻ ꓚꓱ, ꓮ ꓟꓬ, ꓗꓪ ꓐꓰ ꓘꓴ ꓜꓲꓼ ꓞꓳ ꓐꓲ ꓜꓲꓼ ꓟ ꓔꓯ ꓟ. ꓖꓶ ꓗꓷ ꓟ ꓥꓳ꓾” ꓖꓳ ꓗꓪ ꓠꓬ ꓕꓲ ꓦꓲꓻ ꓢꓴ꓾ ꓤ ꓠꓱ ꓤ꓾ ꓞꓳ ꓡꓯ.꓾ ꓞꓲꓼ ꓪꓴ ꓢꓴ꓾ ꓔꓲꓺ ꓒ꓾ ꓡ ꓞꓳ꓾ ꓘꓴ ꓜꓲꓼ ꓞꓳ ꓐꓰ ꓚꓳ. ꓡꓳ ꓗꓪ ꓟꓬꓱꓽ ꓙ ꓔꓬ ꓢꓴ ꓐꓴ ꓐ_ ꓡꓳ꓿

  “ꓣꓳ ꓠꓬ ꓢꓲ ꓫꓬ_ ꓟ ꓗ ꓘꓶꓽ ꓔꓯ ꓓꓵꓽ ꓡꓰ ꓔꓬ ꓕꓯ꓾ ꓡꓳ. ꓐꓲ_ ꓟ ꓪꓽ ꓘꓴ ꓦꓲꓻ ꓘꓴ ꓗꓪ ꓓꓵ_ ꓟ ꓬꓲ ꓔꓯ ꓥꓳꓽ ꓕꓲ ꓟ ꓬꓰ_ ꓟ ꓓꓰ ꓢ ꓣꓳ ꓚꓲ ꓛꓬ ꓚꓵ ꓚꓵ ꓧꓪ ꓔꓬ ꓟ ꓠꓬ ꓪꓴ‐ꓢ ꓠꓵꓻ ꓠꓲ, ꓬꓲ ꓚꓰ ꓥ ꓟ ꓡꓯ ꓐꓳ ꓔꓶ. ꓓꓴ ꓕꓯ ꓢꓲ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓬꓲ ꓠꓲꓺ ꓖꓴ ꓗꓪ ꓐꓰ ꓙꓵꓻ ꓠꓲ, ꓐꓰ ꓓꓵꓽ ꓠ, ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿

“ꓕꓱ ꓙꓵꓻ ꓠꓲ, ꓗꓪ ꓐꓰ ꓣꓳ ꓠꓬ ꓬꓲꓼ ꓠꓬꓲ ꓤ ꓥ ꓡꓳ꓾ ꓕꓲ ꓟ ꓡꓰ ꓕꓲ ꓠꓲ, ꓕꓲ ꓪ ꓥ ꓡꓳ꓾ ꓣꓳ ꓚꓲ ꓛꓬ ꓫ ꓓꓴ ꓟꓷꓼ ꓓꓴ ꓙꓳ ꓥ ꓟꓲ꓾ ꓢꓲ ꓫꓬ ꓟ ꓘꓳꓼ ꓗꓪ ꓐꓰ ꓥꓳ ꓡꓳ. ꓓꓴ ꓐꓰ ꓡ ꓠ, ꓟ ꓤꓶꓻ ꓔꓯ ꓗꓳ. ꓙꓰ ꓐ ꓡ ꓠ, ꓟ ꓐꓱ ꓶ ꓣꓳ ꓚꓺ ꓟꓲꓽ ꓚꓱ, ꓐꓰ ꓮ ꓟꓶ ꓤꓶꓻ ꓔꓯ ꓙꓵꓻ ꓚꓱ, ꓗꓪ ꓐꓰ ꓝꓮꓲ ꓔꓱ, ꓕ ꓠ, ꓟ ꓥ ꓡꓳ꓾”

“ꓣꓳ ꓞꓳ ꓫꓵ ꓜꓴꓻ ꓐꓴ ꓔꓳ, ꓜꓳ ꓡꓰ ꓟ ꓟꓶ ꓫꓵ ꓗꓷ ꓡꓰ ꓟ ꓶꓼ ꓓꓳ ꓫꓱ, ꓓꓳ ꓛꓱ ꓓꓳ ꓡꓰ ꓠ, ꓟ ꓚꓺ ꓟꓲꓽ ꓠꓬ ꓠꓬꓲ ꓟꓳ ꓓꓴ ꓐꓰ ꓠꓯ ꓞꓲ, ꓟ ꓠꓬꓲ ꓫꓵ ꓡꓱꓼ ꓐꓰ ꓐꓲ ꓞ, ꓔꓬ ꓟ ꓥꓳ꓾” ꓢꓔ. ꓮꓴꓖꓴꓢꓔꓲꓠꓰ ꓔꓯ ꓟꓳ. ꓶꓼ ꓓꓳ ꓫꓱ, ꓓꓳ ꓗ, ꓛꓲ_ ꓟ ꓓꓳꓽ ꓔꓯ ꓚꓺ ꓖꓶ ꓢꓴ ꓠꓬ ꓬꓲ ꓐꓯ ꓘꓶꓽ ꓐꓰ ꓟꓽ ꓫꓱ, ꓥ ꓟꓲ “ꓪꓴ‐ꓢ ꓬꓲ ꓚꓲ ꓛꓬ ꓐꓰ ꓶꓼ ꓤ ꓫꓱ. ꓤ ꓔꓯ ꓖꓶ_ ꓡꓳ꓾” ꓐꓰ ꓐꓯ ꓔ ꓡꓳ꓿

ꓖꓳ ꓟ ꓑꓶ ꓓꓴ ꓕꓱ ꓙꓴ‐ꓐꓲ‐ꓡꓲ ꓘꓳꓼ ꓗꓪ “ꓣꓳ ꓠꓶꓽ ꓛꓳ ꓕꓲ ꓛꓳ ꓐꓴ ꓔꓯ ꓠꓲ, ꓟ ꓘꓴꓽ ꓗꓪ ꓐꓰ ꓖꓽ ꓖꓶ ꓠ, ꓟ” ꓣꓳ ꓚꓺ ꓟꓲꓽ ꓐꓰ ꓝꓮꓲ ꓫꓱ, ꓠ, ꓟ ꓪꓴ‐ꓢ ꓫꓱ. ꓤ ꓠꓲ, ꓐꓱ ꓶ ꓫ ꓟꓳ ꓠ, ꓟ ꓬꓲ ꓙꓵ, ꓥ ꓡꓳ꓿ ꓪꓴ‐ꓢ ꓬꓲ ꓢꓯꓼ ꓪ ꓔꓯ ꓣꓳ ꓙꓵꓻ ꓕꓯ ꓢꓲ ꓪꓴ‐ꓢ ꓞꓳ ꓫꓵ ꓐꓰ ꓚꓵ ꓚꓵ ꓒꓬꓱꓼ ꓡ ꓟ ꓥꓳ꓿ ꓪꓴ‐ꓢ ꓠꓬ “ꓬꓲ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ ꓬꓲ. ꓫꓵ. ꓔꓯ ꓡ꓾ꓽ ꓒꓰꓼ ꓚꓱ, ꓮ ꓙꓵ ꓠꓯꓼ ꓗꓪ ꓔꓶꓻ ꓔ ꓡꓳ꓾” ꓕꓱ ꓬꓲ ꓫꓵ. ꓠꓬ ꓬꓲ ꓚꓱ, ꓫꓵꓼ ꓐꓰ ꓓꓱꓼ ꓡ ꓝꓲ ꓠ ꓔ ꓡꓳ꓾ ꓐꓰ ꓢꓲ ꓫꓬ ꓢꓴ ꓙꓳꓧꓠ ꓑꓮꓴꓡ ꓐꓯ ꓘꓶꓽ ꓗꓪ ꓐꓰ ꓐꓯ ꓔ ꓡꓳ꓿ “ꓶꓼ ꓓꓳ ꓫꓱ, ꓓꓳ ꓢꓯꓼ ꓪ ꓠꓬ ꓮ ꓡꓰ ꓗꓪ ꓥ ꓟꓲ ꓒꓳ, ꓡꓶ. ꓢꓲ ꓝꓮꓲ ꓦꓵ ꓓꓳ ꓖꓶ ꓡ ꓥꓳ꓾” ꓖꓪ ꓙꓱ ꓡꓯ ꓘꓳ_ ꓟ꓾ ꓜꓲ ꓡꓯ ꓘꓳ_ ꓟ ꓠꓬ “ ꓙꓲ ꓢꓴ ꓢꓲ ꓤ ꓐꓴ ꓞꓳ ꓫꓵ ꓮ ꓙꓵ ꓔꓯ ꓖꓶ_ ꓟ ꓐꓲ ꓜꓲꓼ ꓟ ꓤꓶꓻ “ ꓔꓯ ꓧꓪ ꓟꓳ ꓡ ꓥꓳ꓾ ꓐꓰ ꓐꓯ ꓔ ꓡꓳ꓿

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓬꓲ ꓠꓲ, ꓠꓵꓻ ꓟ ꓕꓲ ꓘꓶꓽ ꓕꓯ ꓟ. ꓖꓶ_ ꓡꓳ꓾ ꓕꓱ ꓟ ꓠꓬ (parrhesia) ꓥ ꓢꓲ꓾ “ꓙꓳꓺ ꓓꓴ ꓟꓽ ꓙꓳ ꓙꓳ ꓠꓲ, ꓟ ꓔꓯ ꓗ, ꓛꓲ ꓛꓲ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓔꓯ ꓚꓺ ꓒꓬꓱꓽ ꓠ, ꓟ ꓐꓱ ꓶ ꓣꓳ ꓠꓬ ꓚꓲ ꓛꓬ ꓗꓳ. ꓙꓰ ꓔꓬ ꓟ ꓗꓪ ꓐꓰ ꓡꓲ, ꓙꓰ ꓠ, ꓟ ꓢꓯꓼ ꓕꓵꓼ ꓟ” ꓥ ꓡꓳ꓿

ꓞꓳ ꓫꓵ ꓐꓴ ꓚꓲ ꓛꓬ ꓡꓲ ꓒꓰꓼ ꓚꓱ,꓾ ꓙꓲ ꓢꓴ ꓢꓲ ꓤ ꓚꓱ, ꓔꓯ ꓟꓳ. ꓢꓯꓼ ꓪ ꓐꓰ ꓗ, ꓛꓲ ꓟ ꓐꓰ ꓟ. ꓖꓶ ꓠ ꓔ ꓡꓳ꓿ ꓘꓴ ꓜꓲꓼ ꓞꓳ ꓠꓬ꓾ “ꓕꓲ ꓞꓲꓼ ꓕꓲ ꓑ ꓟ ꓪꓴ‐ꓢ꓾ ꓥꓪ ꓠꓴ ꓠꓬ ꓪꓴ‐ꓢ ꓔꓯ ꓫꓱ. ꓖꓶ_ ꓡꓳ꓾ ꓪꓴ‐ꓢ ꓠꓯꓼ ꓗꓪ ꓥꓪ ꓠꓴ ꓫꓱ. ꓖꓶ_ ꓟ ꓛꓲ ꓡꓰ ꓝꓲ” ꓐꓰ ꓮ ꓙꓵ ꓫꓱ. ꓖꓶ ꓔꓬ ꓟ ꓢꓯꓼ ꓗꓪ ꓐꓰ ꓐꓲ ꓜꓲꓼ ꓡꓰ ꓟ ꓥꓳ ꓐꓰ ꓐꓯ ꓔ ꓡꓳ꓿

ꓕꓱ ꓕꓳ ꓶ ꓠꓬ ꓢ‐ꓢꓲ‐ꓠ ꓟꓬꓱꓽ ꓙꓵ ꓪ ꓔꓯ ꓝꓮꓲ ꓢꓯꓼ ꓪ ꓙꓳ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ ꓘꓶꓽ ꓐꓰ ꓬꓲ ꓟꓶꓽ ꓢꓰꓼ ꓗꓷ ꓟ ꓥꓳ꓿ “ꓙꓰ ꓢꓲ ꓞꓳ ꓫꓵ ꓮ ꓙꓵ ꓔꓯ ꓛꓳ ꓫꓱ ꓠ, ꓟ꓾ ꓪꓴ‐ꓢ ꓔꓯ ꓠꓲ, ꓟ ꓘꓴꓽ ꓗꓪ ꓐꓰ ꓜꓲ ꓗꓷ ꓟ ꓗꓪ ꓐꓰ ꓒꓬꓱꓼ ꓡ ꓟ ꓗ, ꓛꓲ ꓓꓴ ꓔꓯ ꓚꓺ ꓒꓬꓱꓽ ꓓꓴ ꓬꓰ ꓡꓯ꓿”