ꓢꓲꓽ ꓫꓬ ꓕꓳ ꓶ ꓐꓳ ꓢꓴ ꓢꓲꓽ ꓫꓬ ꓢꓴ ꓡꓴ‐ꓘ ꓚꓺ ꓟꓲꓽ (St. Luke)
ꓢꓲꓽ ꓫꓬ ꓕꓳ ꓶ ꓐꓳ ꓒꓽ ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓠꓯ, ꓞꓲꓼ ꓟ. ꓒ ꓓꓽ ꓕꓲ ꓣꓳ ꓥ ꓢꓲ ꓠꓬꓲ ꓬꓲ ꓠꓬ ꓞꓳ ꓐꓬꓱ ꓐꓳ ꓟ ꓔꓯ ꓥ ꓟꓲ ꓮ ꓘꓶ. ꓓꓽ ꓟ ꓪꓴ‐ꓢ ꓡꓯ ꓘꓳ, ꓣꓴ ꓪ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓮ‐ꓔꓲ‐ꓬ ꓡꓳ ꓒꓱ ꓗꓪ ꓠꓯ, ꓞꓲꓼ ꓟ. ꓒꓽ ꓓꓽ ꓕꓲ ꓣꓳ ꓥ ꓡꓳ꓿ ꓝꓮꓲ ꓬꓲ ꓠꓬ ꓠꓯ, ꓞꓲꓼ ꓟ. ꓒꓽ ꓡꓰ ꓟꓽ ꓞꓲ ꓬꓲ ꓠꓬ ꓞꓳ ꓐꓬꓱ ꓐꓳ ꓟ ꓢꓷ. ꓠꓲ, ꓔꓯ ꓥ ꓟꓲ ꓮ ꓘꓶ. ꓓꓽ ꓪꓴ ꓕꓲ ꓣꓳ ꓥ ꓡꓳ꓿ ꓝꓮꓲ ꓚꓺ ꓟꓲꓽ ꓕꓳ ꓶ ꓒꓽ ꓓꓽ ꓕꓲ ꓣꓳ ꓟꓲ ꓥ ꓡꓳ ꓐꓰ ꓢꓷ. ꓪ ꓟ ꓥ ꓡꓳ꓿
ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓢꓲꓺ ꓒ ꓬꓰ‐ꓢꓴ ꓟ, ꓟ ꓥ ꓟ ꓟ, ꓟ ꓟ‐ꓡꓲ ꓐꓬꓱꓽ ꓔꓯ ꓓꓽ ꓪꓴ ꓐꓳ ꓖꓶ ꓢꓴ ꓫꓱꓺ ꓖꓶ ꓢꓴ ꓥ ꓡꓳ꓿ ꓬꓲ ꓡꓰ ꓡ ꓞꓳ ꓐꓬꓱꓽ ꓐꓳ ꓔ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓡ ꓞꓳ ꓮ ꓟꓬ, ꓬꓲ ꓠꓯ, ꓗꓪ ꓐꓬꓱ ꓐꓳ ꓟ ꓢꓷ. ꓠꓲ, ꓔꓯ ꓢꓳꓻ ꓣꓴ ꓗꓷ ꓟ ꓥ ꓡꓳ꓿
ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓮ‐ꓠꓱ ꓙꓲ‐ꓢꓴ ꓢꓲꓺ ꓤ ꓐꓴ ꓘꓴꓽ ꓗꓳ ꓡꓳ ꓗꓪ ꓐꓰ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓘꓴꓽ ꓗꓪ ꓐꓰ ꓓꓽ ꓪꓴ. ꓘꓳ, ꓣꓴ ꓢꓴ ꓐꓴ ꓠꓯ, ꓗꓪ ꓐꓽ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓝꓲ ꓓꓴ ꓒꓳ‐ꓡꓳ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓗꓷ ꓟ ꓙ ꓖꓴ ꓗꓪ ꓠꓬꓲꓽ ꓧꓪꓽ ꓐꓰ ꓢꓽ ꓧꓪꓽ ꓙꓰ ꓟ ꓙꓵ, ꓕꓯ ꓙꓰ ꓢꓴ ꓥ ꓡꓳ꓿ ꓬꓲ ꓠꓬ ꓝꓲ ꓓꓴ ꓒꓳ‐ꓡꓳ ꓬꓲ ꓛꓳꓽ ꓒꓯ, ꓐꓰ ꓝꓲ ꓓꓴ ꓒꓳ‐ꓡꓳ ꓔꓯ ꓬꓰ ꓙ ꓢꓴ ꓟꓲꓽ ꓥ ꓡꓳ꓿
ꓣꓳ‐ꓟ ꓪ ꓔꓲ ꓥ ꓟ ꓩꓴ‐ꓡꓲ ꓪ ꓔꓲ ꓠꓬ ꓝꓲ ꓓꓴ ꓒꓳ‐ꓡꓳ ꓔꓯ ꓣꓳ‐ꓟ ꓡꓳ ꓒꓱ ꓗꓪ ꓞꓳꓻ ꓧꓳꓽ ꓙꓰ ꓟ ꓙꓵ, ꓕꓯ ꓥ ꓟꓲ ꓢꓲꓽ ꓫꓬ ꓢꓴ ꓡꓴ‐ꓘ ꓐ ꓟ ꓥ ꓡꓳ꓿ ꓐꓱ ꓓꓵ ꓔꓳ ꓦꓲꓻ ꓗꓪ ꓮ ꓡꓰ ꓐꓰ ꓔꓬ ꓗꓷ ꓟ ꓚꓺ ꓔꓯ ꓝꓲ ꓓꓴ ꓒꓳ‐ꓡꓳ ꓡꓰ ꓔꓲ‐ꓟꓳ‐ꓔꓲ‐ꓪꓴ ꓠꓯ, ꓗꓪ ꓐꓳ ꓔ ꓟ (2ꓔꓲ 4ꓽ11) ꓝꓲ. ꓗꓪ ꓡꓳ. ꓟꓳ ꓓꓼ ꓟ ꓥ ꓡꓳ꓿
ꓝꓲ ꓓꓴ ꓒꓳ‐ꓡꓳ ꓔꓯ ꓮꓓ (64) ꓘꓳꓼ ꓕꓯ ꓩꓴ‐ꓡꓲ ꓪ ꓔꓲ ꓡꓰ ꓢꓰꓼ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓦꓲ‐ꓡꓰ ꓗꓴꓷꓼ ꓐꓯ ꓟ (ꓖꓣꓰꓰꓗ) ꓗꓴꓷꓼ ꓗꓪ ꓡ ꓙꓰ ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓶꓼ ꓓꓳ ꓫꓱ, ꓓꓳꓽ ꓢꓲꓽ ꓫꓬ ꓕꓳ ꓶ ꓔꓯ ꓐꓳ ꓗꓷ ꓟ ꓥ ꓡꓳ꓿
ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓟꓲ ꓠꓯ ꓢꓷ. ꓠꓲ, ꓮ ꓘꓶ. ꓓꓽ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓡꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓠꓬ ꓮ ꓘꓶ. ꓛꓲ ꓜꓳꓽ ꓟ ꓐꓰ ꓢꓲꓽ ꓫꓬ ꓕꓳ ꓶ ꓔꓯ ꓵꓻ ꓢꓴ ꓐꓴ ꓥ ꓟꓲ ꓢꓽ ꓢꓽ ꓐꓰ ꓢꓷ. ꓪ ꓓꓽ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓐꓳ ꓢꓴ ꓥ ꓟ ꓶꓼ ꓓꓳꓽ ꓫꓱ, ꓓꓳꓽ ꓐꓳ ꓢꓴ ꓡꓲ. ꓣꓳ ꓘꓴꓽ ꓗꓪ ꓐꓰ ꓢꓲꓽ ꓫꓬ ꓢꓴ ꓡꓴ‐ꓘ ꓡꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓟ, ꓟ ꓟ‐ꓡꓲ ꓔꓯ ꓟꓴ ꓗꓪ ꓝꓲ ꓓꓴ ꓚꓬ‐ꓑꓷ‐ꓡꓰ ꓐꓯ ꓘꓶꓽ ꓟ. ꓖꓶ ꓟ ꓚꓱ, ꓝꓮꓲ ꓟ‐ꓡꓲ ꓠꓬ ꓬꓲ‐ꓡꓲ‐ꓫ‐ꓑꓷ ꓔꓬ ꓗꓪ ꓙꓰ ꓢꓲ ꓠꓬꓲ ꓟꓬꓱꓽ ꓬꓰ ꓙ ꓟ ꓚꓱ, ꓔꓯ ꓐꓲ ꓐꓲ ꓜꓲꓼ ꓜꓲꓼ ꓐꓳ ꓔ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿
ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓦꓲ‐ꓡꓰ ꓥꓳ ꓐꓰ ꓡ‐ꓔꓲꓠ ꓥꓳꓽ ꓔꓯ ꓮ ꓘꓶ. ꓛꓲ ꓢꓷ. ꓢꓴ ꓥ ꓡꓳ꓿ ꓢꓲꓽ ꓫꓬ ꓢꓴ ꓡꓴ‐ꓘ ꓠꓬ ꓬꓲ ꓞꓲ (84) ꓘꓳꓼ ꓕꓯ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ ꓬꓰ ꓟ ꓥ ꓡꓳ꓿ ꓢꓲꓽ ꓫꓬ ꓢꓴ ꓡꓴ‐ꓘ ꓪꓴꓽ ꓔꓳ ꓔꓯ ꓮ ꓟꓶ ꓟ ꓙꓵ, ꓗꓪ ꓔꓴꓣꓗꓰꓬ ꓗꓴꓷꓼ ꓲꓢꓔꓮꓠꓐꓴꓡ ꓡꓳ ꓒꓱ ꓥ ꓟ ꓗꓳ. ꓗꓷ ꓟ ꓙꓵ, ꓕꓯ ꓚꓳꓠꓢꓔꓮꓠꓔꓲꓠꓳꓑꓡꓰ ꓐꓰ ꓟꓬꓱ ꓔ ꓟ ꓪꓽ ꓘꓴ ꓦꓲꓻ ꓝꓲ ꓓꓴ ꓪꓽ ꓘꓴ ꓦꓲꓻ ꓐꓰ ꓟꓬꓱꓽ ꓔ ꓟ ꓪꓽ ꓘꓴ ꓦꓲꓻ ꓗꓪ ꓙꓳ ꓟ ꓥ ꓡꓳ꓿
