ꓟꓲ‐ꓚꓲ‐ꓠ ꓢ‐ꓢꓲ‐ꓠ ꓘꓴꓽ ꓤ ꓠꓱ ꓤ ꓐꓴ ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓐꓱ ꓶ ꓣꓳ‐ꓢ‐ꓡꓲ ꓪꓽ ꓘꓴ ꓟ ꓓꓳꓽ
10 ꓦ ꓟ 11 ꓠꓬꓲ 2025 ꓘꓳꓼ ꓕꓯ ꓟꓲ‐ꓚꓲ‐ꓠ ꓢ‐ꓢꓲ‐ꓠ ꓘꓴꓽ ꓗꓪ ꓐꓰ ꓤ ꓠꓱ ꓤ (400) ꓣꓳ ꓐꓴ ꓠꓬ ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓐꓱ ꓶ ꓮꓴꓠꓠꓖ‐ꓠ ꓙꓲꓻ ꓫꓬ ꓢꓴ ꓚꓳꓡꓴꓟꓐꓮꓠ ꓪꓽ ꓘꓴ ꓦꓲꓻ ꓗꓪ ꓣꓳꓢꓮꓣꓬ ꓪꓽ ꓘꓴ ꓟ ꓔꓯ ꓬꓰ ꓗꓷ ꓟ ꓥ ꓡꓳ꓿
ꓟꓲ‐ꓚꓲ‐ꓠ ꓔꓲꓺ ꓒ ꓓꓽ ꓙꓵꓽ ꓔꓶ. ꓘꓴꓽ ꓗꓪ ꓙꓳ ꓟ ꓔꓲꓺ ꓒ ꓙꓵꓽ ꓔꓶ. ꓮ ꓙꓵꓽ ꓗꓪ ꓥ ꓟꓲ One Million Children Prayer Service” ꓤ ꓠꓱ ꓤ ꓐꓴ ꓣꓳꓢꓮꓣꓣꓬ ꓪꓽ ꓘꓴ ꓓꓴ ꓔꓯ ꓬꓰ ꓗꓷ ꓟ ꓥ ꓡꓳ꓿ ꓤ ꓠꓱ ꓤ ꓐꓴ ꓔꓱ ꓚꓵˍ ꓟ ꓙꓵꓻ ꓠꓲ, ꓗꓪ ꓐꓰ ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓐꓰ ꓟꓬ‐ꓟ ꓗꓴꓷꓼ ꓢꓲ ꓡꓲ ꓟꓶ ꓠ, ꓟ ꓮ ꓘꓶ. ꓛꓲ ꓪꓽ ꓘꓴ ꓗꓷꓳ꓿
ꓢ‐ꓢꓲ‐ꓠ ꓤ ꓠꓱ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓟ. ꓟ ꓣꓳꓜꓮ ꓛꓬ‐ꓘꓳ ꓡꓰ ꓤ ꓠꓱ ꓤ ꓐꓴ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓟꓲ ꓠꓯ ꓢꓲ ꓡꓲ ꓟꓶ ꓠ, ꓟ ꓪꓽ ꓘꓴ ꓙꓵ, ꓔꓯ ꓪꓽ ꓘꓴ ꓪ ꓡꓰ ꓟ ꓪꓴ. ꓠꓬꓲ ꓪꓴ‐ꓢ ꓔꓯ ꓫ. ꓟꓳ ꓐꓰ ꓫ. ꓕꓱ ꓗꓷꓳ ꓟ ꓥ ꓡꓳ꓿
ꓝꓮꓲ ꓤ ꓠꓱ ꓤ ꓐꓴ ꓔꓯ ꓔꓲꓺ ꓒ ꓠꓮꓪ‐ꓡꓮꓪꓠ ꓐꓰ ꓔꓲꓺ ꓒ ꓑꓮꓴꓡ ꓜꓮꓪꓠ ꓧꓗꓮꓴꓠ ꓐꓴ ꓡꓰ ꓙꓵꓻ ꓠꓲ, ꓠꓬ ꓮ ꓘꓶ. ꓛꓲ ꓣꓳ ꓚꓵ, ꓟ ꓚꓱ, ꓔꓯ ꓤ ꓠꓱ ꓤ ꓐꓴ ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿
ꓝꓮꓲ ꓣꓳꓢꓮꓣꓣꓬ ꓪꓽ ꓘꓴ ꓓꓴ ꓗꓪ ꓐ ꓗꓷ ꓟ ꓤ ꓠꓱ ꓕꓲ ꓣꓳ ꓗꓪ ꓐꓰ ꓮ ꓟꓶ ꓪꓽ ꓘꓴ ꓗꓷ ꓟ ꓟꓲ ꓠꓯ ꓢꓲ ꓡꓲ ꓠ, ꓟ ꓪꓽ ꓘꓴ ꓙꓵ, ꓐꓰ ꓟꓬ‐ꓟ ꓗꓴꓷꓼ ꓢꓲ ꓡꓲ ꓟꓶ ꓠ, ꓟ ꓪꓽ ꓘꓴ ꓟ ꓣꓳꓢꓮꓣꓣꓬ ꓪꓽ ꓘꓴ ꓓꓴ ꓔꓯ ꓮ ꓘꓶ. ꓛꓲ ꓬꓰ ꓒꓴ ꓟ ꓥ ꓡꓳ꓿ ꓤ ꓠꓱ ꓤ ꓐꓴ ꓪꓽ ꓘꓴ ꓘꓶꓽ ꓔꓯ ꓐ, ꓐ ꓪꓴ‐ꓢ ꓠ ꓡꓳ ꓖꓶ ꓝꓲ ꓐꓰ ꓫ. ꓕꓱ ꓗꓷ ꓟ ꓥ ꓡꓳ꓿
ꓟꓵꓽ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓪꓴ. ꓠꓬꓲ ꓫ. ꓔꓬ ꓢꓴ ꓐꓴ ꓮ ꓙꓵꓽ ꓐꓰ ꓟꓬ‐ꓟ ꓗꓴꓷꓼ ꓢꓲ ꓡꓲ ꓟꓶ ꓠ, ꓟ ꓐꓱ ꓶ ꓣꓳꓢꓮꓣꓣꓬ ꓪꓽ ꓘꓴ ꓖꓶ ꓗꓷꓳ ꓐꓰ ꓣꓦꓮ ꓗꓮꓚꓧꓲꓠ ꓓꓳꓽ ꓗꓪ ꓐꓰ ꓢꓷ. ꓪ ꓡꓳ
