ꓝꓲ ꓓꓴ ꓒꓲ‐ꓕꓱ ꓐ ꓝꓲ ꓓꓴ ꓒꓳ‐ꓡꓳ ꓔꓯ ꓩꓴ‐ꓡꓲ ꓪ ꓔꓲ ꓡꓰ ꓢꓰꓼ ꓗꓷ ꓟ (Martyrdom of Peter and Paul)
ꓮꓓ (64) ꓘꓳꓼ ꓕꓯ ꓣꓳ‐ꓟ ꓗꓴꓷꓼ ꓗꓪ ꓮ ꓘꓶ. ꓪꓴꓽ ꓟ ꓮ ꓔꓳ. ꓐꓬ ꓡꓰ ꓟ ꓫꓵꓽ ꓪꓴꓽ ꓒꓬꓱꓼ ꓡꓰ ꓟ ꓥ ꓡꓳ꓿ ꓕꓱ ꓡꓱ ꓗꓷ ꓡꓰ ꓟ ꓠꓬ ꓬꓴ‐ꓔ ꓞꓳ ꓫꓵꓽ ꓪꓴ ꓔꓬ ꓟ ꓔꓶ. ꓗꓪ ꓐꓰ ꓬꓲ ꓪꓴ. ꓔꓴ ꓢꓲ ꓠꓬꓲ ꓮ. ꓔꓳ ꓐꓬ ꓡꓰ ꓟ ꓥ ꓡꓳ꓿ ꓕꓱ ꓮ. ꓔꓳ ꓐꓬ ꓡꓰ ꓟ ꓠꓬ ꓣꓳ‐ꓟ ꓡꓳ ꓒꓱ ꓮ ꓙꓵꓽ ꓐꓬ ꓡꓰ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓢꓴ ꓠꓬ ꓪ ꓔꓲ ꓩꓴ‐ꓡꓲ ꓥ ꓡꓳ꓿ ꓩꓴ‐ꓡꓲ ꓪ ꓔꓲ ꓠꓬ ꓮ. ꓔꓳ ꓔꓯ ꓬꓲ ꓚꓲ. ꓛꓬ ꓛꓴˍ ꓢꓴ ꓠꓬ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓮ. ꓔꓳ ꓛꓴꓽ ꓠꓬ ꓐꓯ ꓠꓬ ꓬꓲ ꓪ ꓠꓬ ꓦꓲꓻ ꓓꓽ ꓟ ꓫꓬ, ꓠꓲ, ꓫꓵˍ ꓟ ꓪꓴ. ꓠꓬꓲ ꓥ ꓡꓳ꓿
ꓕꓱ ꓡꓱ ꓐꓰ ꓮ. ꓔꓳ ꓐꓬ ꓡꓰ ꓟ ꓪꓴ. ꓠꓬꓲ ꓣꓳ‐ꓟ ꓑ ꓫꓬ ꓐꓴ ꓠꓬ ꓮ ꓙꓵꓽ ꓛꓲ ꓠꓲ, ꓟ ꓩꓴ. ꓗꓷ ꓟ ꓥ ꓡꓳ ꓿ ꓪ ꓔꓲ ꓩꓴ‐ꓡꓲ ꓠꓬ ꓣꓳ‐ꓟ ꓗꓴꓷꓼ ꓗꓪ ꓣꓳ‐ꓟ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓮ. ꓔꓳ ꓛꓴˍ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓮ. ꓔꓳ ꓔꓯ ꓟꓽ ꓛꓴˍ ꓟ ꓪꓴ. ꓠꓬꓲ ꓮ. ꓔꓳ ꓐꓬ ꓡꓰ ꓟ ꓚꓱ, ꓔꓯ ꓚꓲ. ꓚꓺ ꓟꓽ ꓪ ꓟ ꓥ ꓡꓳ꓿
ꓣꓳ‐ꓟ ꓗꓴꓷꓼ ꓗꓪ ꓮ. ꓔꓳ ꓛꓴˍ ꓢꓴ ꓠꓬ ꓗꓴꓷꓼ ꓗꓪ ꓛꓴꓽ ꓙꓳ ꓢꓴ ꓥ ꓡꓳ ꓐꓰ ꓪ ꓔꓲ ꓡꓰ ꓝꓴꓲ. ꓓꓲ. ꓟ ꓥ ꓡꓳ꓿ ꓕꓱ ꓡꓰ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓠꓬ ꓟꓽ ꓔꓱ, ꓟꓽ ꓜꓳꓽ ꓚꓱ, ꓗꓪ ꓐꓰ ꓝꓴꓲ. ꓮ ꓟꓬ, ꓫꓵꓽ ꓖꓶ ꓟ ꓪꓴ. ꓠꓬꓲ ꓫ. ꓓꓴ ꓟꓷꓼ ꓓꓴ ꓮ ꓟꓬ, ꓔꓳ, ꓜꓳ ꓡꓰ ꓟ ꓥ ꓡꓳ꓿
ꓣꓳ‐ꓟ ꓗꓴꓷꓼ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓴꓲ ꓓꓲˍ ꓢꓲ ꓠꓬꓲ ꓢꓰꓼ ꓟ ꓠꓬ ꓪ ꓔꓲ ꓩꓴ‐ꓡꓲ ꓫꓵꓻ ꓟ ꓕꓲ ꓠꓬꓲ ꓗꓪ ꓛꓲ ꓥ ꓡꓳ꓿ ꓪ ꓔꓲ ꓩꓴ‐ꓡꓲ ꓠꓬ ꓮꓓ (68) ꓘꓳꓼ ꓕꓯ ꓫꓵꓻ ꓡꓰ ꓟ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓗꓪ ꓮ. ꓔꓳ ꓐꓬ ꓡꓰ ꓟ ꓪꓴ. ꓠꓬꓲ ꓙꓲ‐ꓢꓴ ꓢꓲꓺꓤ ꓐꓴ ꓔꓯ ꓝꓴꓲ ꓟꓽ ꓙꓳ ꓥ ꓟꓲ ꓡ ꓞꓳ ꓮ ꓟꓬ, ꓔꓬ ꓟ ꓔꓶ. ꓗꓪ ꓝꓴꓲ. ꓮ ꓟꓬ, ꓖꓶ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓔꓯ ꓦꓻ ꓡꓰ ꓢꓴ ꓐꓴ ꓔꓯ ꓙꓱ ꓤ ꓔꓯ ꓖꓶ ꓜꓽ ꓗꓷ ꓟ꓾ ꓮ ꓟꓬ, ꓛꓲ ꓞ ꓟ ꓮ. ꓔꓳ ꓐꓬꓱ ꓗꓪ ꓛꓴ ꓢꓰꓼ ꓗꓷ ꓟ ꓮ ꓟꓬ, ꓫꓵꓽ ꓔꓯ ꓬꓰ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓙꓲ‐ꓢꓴ ꓢꓲꓺꓤ ꓐꓴ ꓔꓯ ꓢꓰꓼ ꓟ ꓙꓵ, ꓕꓯ ꓝꓲ ꓓꓴ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓒ ꓕꓲ ꓗꓪ ꓔꓬ ꓗꓷ ꓢꓲ ꓠꓬꓲ ꓢꓯꓼ ꓪ ꓖꓶ ꓗꓷꓳ꓿
ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓐꓴ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓐꓱ ꓶ ꓬꓲ ꓪ ꓢꓯꓼ ꓟꓬ ꓔꓯ ꓖꓶ ꓗꓷ ꓟ ꓥ ꓡꓳ꓿
