ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓬꓯ‐ꓢꓲ‐ꓡꓰ ꓐꓰ ꓖ‐ꓜ ꓟꓵꓽ ꓗꓪ ꓢꓲ ꓡꓲ, ꓟꓶ ꓟ ꓔꓯ ꓘꓳ, ꓣꓴ ꓟ ꓐꓰ ꓴꓗꓣꓮꓲꓠꓰ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷ ꓟ ꓓꓳꓽ
10 ꓦ ꓟ 12 ꓠꓬꓲ 2025 ꓘꓳꓼ ꓢꓲꓺ ꓒ ꓦꓬꓼ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓦꓮꓔꓲꓚꓮꓠ ꓗꓴꓷꓼ ꓗꓪ ꓙꓳ ꓟ ꓝꓲ ꓓꓴ ꓒꓲ‐ꓕꓱ ꓪꓽ ꓘꓴ ꓦꓲꓻ ꓗꓪ ꓢꓲꓺ ꓒ ꓦꓬꓼ ꓠꓬꓲ ꓟꓲ‐ꓢ ꓔꓲ ꓖꓶ ꓟ ꓙꓵ, ꓕꓯ ꓬꓯ‐ꓢꓲ‐ꓡꓰ ꓐꓰ ꓧꓮꓟꓮꓢ ꓜꓴꓻ ꓐꓴ ꓢꓲ ꓡꓲ, ꓟꓶ ꓟ ꓪꓴ. ꓠꓬꓲ ꓘꓳ, ꓣꓴ ꓟ ꓐꓰ ꓝ. ꓢꓲ ꓠꓬꓲ ꓴꓗꓣꓮꓲꓠꓰ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓮ ꓟꓶ ꓟ ꓙꓵ, ꓗꓪ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓑ ꓫꓬ ꓐꓴ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓴꓗꓣꓮꓲꓠꓰ ꓗꓴꓷꓼ ꓐꓰ ꓑꓲꓣꓴ ꓗꓴꓷꓼ ꓐꓱ ꓶ ꓥ ꓟꓲ ꓪꓽ ꓘꓴ ꓙ ꓖꓶ ꓗꓷꓳ꓿
ꓝꓮꓲ ꓔꓲꓺ ꓒ ꓪ ꓔꓲ ꓠꓬ ꓖ‐ꓜ ꓟꓵꓽ ꓗꓪ ꓢꓲ ꓡꓲ, ꓟꓶ ꓟ ꓪꓴ. ꓠꓬꓲ ꓢꓲ ꓡꓲ, ꓟꓶ ꓠ, ꓟ ꓟꓬꓱꓽ ꓬꓰ ꓢꓴ ꓮ ꓙꓵꓽ ꓔꓯ ꓪꓴ‐ꓢ ꓡꓰ ꓶꓼ ꓥꓳꓽ ꓙꓱ ꓖꓶ ꓠ, ꓟ ꓪꓽ ꓘꓴ ꓙ ꓖꓶ ꓗꓷꓳ꓿ ꓣꓳ ꓠꓬ ꓢꓲꓺ ꓒ ꓠꓯꓼ ꓗꓪ ꓥꓳ ꓡꓳ. ꓟ ꓔꓯ ꓮ ꓡꓰꓳ ꓫꓵꓽ ꓔꓳ, ꓜꓳ ꓡ ꓥ ꓟꓲ ꓠꓲ, ꓟ ꓟꓽ ꓐꓬ ꓡꓰ ꓥꓳ ꓡꓳ. ꓓꓴ ꓙꓳ ꓠ, ꓟ ꓐꓰ ꓜꓰ ꓞ, ꓟ ꓢꓲ ꓡꓲ, ꓓꓴ ꓒꓬꓱꓼ ꓡ ꓠ, ꓟ ꓪꓽ ꓘꓴ ꓠ, ꓟ ꓐꓯ ꓔ ꓡꓳ꓿
ꓝꓮꓲ ꓝ ꓢꓲ ꓠꓬꓲ ꓥ ꓟꓲ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓴꓗꓣꓮꓲꓠꓰ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷꓳ꓿ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓝꓴꓲ. ꓟꓽ ꓙꓳ ꓟ ꓤ ꓠꓱ ꓤ ꓐꓴ ꓐꓰ ꓞꓲꓼ ꓪꓴꓽ ꓟ ꓞꓳ ꓟꓳ ꓐꓴ ꓠꓲ, ꓫ. ꓟꓬ ꓫ. ꓓꓴ ꓮ ꓟꓶ ꓔꓳ, ꓜꓳ ꓔꓬ ꓟ ꓪꓴ. ꓠꓬꓲ ꓢꓲ ꓡꓲ, ꓟꓶ ꓠ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓥꓪ ꓠꓲ, ꓟ ꓠꓬ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓑ ꓫꓬ ꓐꓴ ꓐꓰ ꓕꓲ ꓪ ꓙꓳ ꓡꓳ ꓐꓰ ꓫ. ꓕꓱ ꓔ ꓟ ꓥ ꓡꓳ꓿ ꓝꓮꓲ ꓮ ꓟꓶ ꓟ ꓙꓵ, ꓗꓪ ꓑꓲ‐ꓣꓴ ꓗꓴꓷꓼ ꓘꓴꓽ ꓗꓪ ꓗꓴꓷꓼ ꓢꓲ ꓡꓲ, ꓓꓴ ꓟꓽ ꓙꓳ ꓟ ꓪꓴ. ꓠꓬꓲ ꓫ. ꓔꓬ ꓟ ꓑ ꓫꓬ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓔꓬ ꓟ ꓥ ꓡꓳ꓿ ꓗꓴꓷꓼ ꓘꓴꓽ ꓗꓪ ꓪꓽ ꓡꓯꓽ ꓘꓳ ꓢꓲ ꓠꓬꓲ ꓗ, ꓛꓲ ꓢꓲ ꓡꓲ, ꓟ ꓗꓴꓷꓼ ꓒꓬꓱꓼ ꓠ, ꓟ ꓪꓽ ꓘꓴ ꓙ ꓖꓶ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫ. ꓕꓱ ꓔ ꓡꓳ ꓐꓰ (ꓦꓮꓔꓲꓚꓮꓠ) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
