ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓲꓔꓮꓲꓡꓬ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ, ꓔꓬ ꓢꓴ ꓐꓴ ꓔꓲꓺ ꓒ ꓐꓴ ꓐꓰ ꓜꓲꓼ ꓡꓯꓽ ꓘꓳ, ꓟ ꓓꓳꓽ
10 ꓦ ꓟ 11 ꓠꓬꓲ 2025 ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓲꓔꓮꓡꓬ ꓗꓴꓷꓼ ꓗꓪ ꓟꓵꓽ ꓗꓪ ꓔꓬ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓜꓴꓻ ꓐꓴ ꓔꓯ ꓜꓲꓼ ꓗꓷ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓐꓰ ꓜꓲꓼ ꓡꓯꓽ ꓘꓳ, ꓗꓷ ꓟ ꓔꓲꓺ ꓒ ꓐꓴ ꓠꓬ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓴ ꓐꓱ ꓶ ꓙꓴ‐ꓐꓲ‐ꓡꓲ ꓑꓮꓲꓽ ꓓꓽ ꓬꓰ ꓖꓶ ꓗꓷ ꓟ ꓙꓵ, ꓕꓯ ꓜꓲꓼ ꓡꓯꓽ ꓘꓳ ꓗꓷ ꓟ ꓥ ꓡꓳ꓿
ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓔꓲꓺ ꓒ ꓜꓴꓻ ꓐꓴ ꓔꓯ ꓢꓯꓼ ꓖꓶ ꓗꓷ ꓟ ꓠꓬ ꓪꓴ‐ꓢ ꓐꓰ ꓮ ꓕꓯ ꓥ ꓟꓲ ꓬꓲ ꓙꓵ, ꓣꓴ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓠ, ꓟ꓾ ꓥꓳꓽ ꓡꓳ ꓓꓴ ꓥ ꓚꓬꓴ ꓢꓲꓺ ꓒ ꓬꓰ‐ꓢꓴ ꓐꓰ ꓕꓲ ꓪ ꓮ ꓕꓯ ꓥ ꓟꓲ ꓪꓴ‐ꓢ ꓟꓬꓱꓽ ꓗꓪ ꓠꓲ, ꓟ ꓟꓽ ꓐꓬ ꓡꓰ ꓢꓯꓼ ꓕꓵꓼ ꓠ, ꓟ ꓐꓰ ꓪꓴ‐ꓢ ꓐꓰ ꓙ ꓡꓯꓽ ꓘꓳ, ꓠ, ꓟ ꓫ. ꓕꓱ ꓗꓷ ꓟ ꓥ ꓡꓳ꓿
ꓟꓲ ꓠꓯ ꓗꓪ ꓟꓰꓓꓲꓮ ꓐꓰ ꓟꓲ ꓠꓯ ꓢꓷ. ꓠꓲ, ꓐꓰ ꓟꓲ ꓠꓯ ꓞꓳ ꓤ ꓐꓴ ꓠꓬ ꓪꓴ‐ꓢ ꓐꓰ ꓮ ꓤ ꓤ ꓶꓻ ꓤ ꓗꓪ ꓗꓷ ꓡꓰ ꓟ ꓙꓵ, ꓕꓯ ꓪꓴ‐ꓢ ꓟꓬꓱꓽ ꓟꓯ ꓢꓴ ꓔꓲꓺ ꓒ ꓐꓴ ꓠꓬ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓢꓴ ꓝꓮꓲ ꓚꓲ. ꓛꓬ ꓤꓶꓻ ꓔꓯ ꓪꓴ‐ꓢ ꓐꓱ ꓶ ꓖꓶ ꓔ ꓢꓴ ꓐꓴ ꓐꓰ ꓚꓲ. ꓛꓬ ꓧꓪꓽ ꓖꓳ ꓓꓱ ꓘꓴꓽ ꓗꓪ ꓢꓲ ꓡꓲ ꓟ ꓟꓶ ꓢꓴ ꓐꓴ ꓬꓰ ꓠ, ꓟ ꓮ ꓘꓶ. ꓣꓳ ꓚꓵ. ꓟ ꓚꓱ, ꓔꓯ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓗꓷ ꓟ ꓥ ꓡꓳ꓿
ꓣꓳ‐ꓟ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓬꓰ ꓔꓬ ꓟ ꓔꓲꓺ ꓒ ꓜꓴꓻ ꓐꓴ ꓔꓯ ꓘꓴ ꓜꓲꓼ ꓞꓳ ꓔꓯ ꓮ ꓘꓶ. ꓛꓲ ꓙꓲ ꓟ ꓕꓲ ꓒꓳ, ꓗꓪ ꓧꓳꓽ ꓪꓴ. ꓟꓴ ꓠ, ꓟ ꓢꓷ. ꓠꓲ, ꓖꓶ ꓠ, ꓟ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓗꓪ ꓞꓳ ꓫꓱ, ꓐ ꓡ ꓠ, ꓟ ꓮ ꓘꓶ. ꓛꓲ ꓪꓽ ꓘꓴ ꓙ ꓠ, ꓟ ꓓꓰꓽ ꓔ ꓟ ꓥ ꓡꓳ꓿
ꓟꓵꓽ ꓗꓪ ꓔꓬ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓔꓬ ꓟ ꓔꓲꓺ ꓒ ꓜꓴꓻ ꓠꓬ ꓘꓴ ꓜꓲꓼ ꓞꓳ ꓗꓪ ꓮ ꓟꓬ, ꓛꓲ ꓣꓳ ꓚꓵ, ꓟ ꓔꓲꓺ ꓒ ꓜꓴꓻ ꓥ ꓟ ꓔꓯ ꓫ. ꓕꓱ ꓗꓷꓳ꓿ ꓝꓮꓲ ꓪꓽ ꓡꓯꓽ ꓘꓳ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓕꓲ ꓠꓲ, ꓕꓲ ꓪ ꓬꓰ ꓠ, ꓟ ꓔꓲꓺ ꓒ ꓜꓴꓻ ꓐꓴ ꓮ ꓙꓵꓽ ꓔꓯ ꓢꓯꓼ ꓖꓶ ꓪ ꓖꓶ ꓗꓷꓳ ꓐꓰ ꓦꓮꓔꓲꓚꓮꓠ ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
