ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓡꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟ. ꓖꓶ ꓔ ꓟ ꓚꓱ, (Environment)
ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓡꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟ. ꓖꓶ ꓔ ꓟ ꓚꓱ, ꓥ ꓡꓳ꓿ ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓠꓬ ꓝꓲ ꓓꓴ ꓒꓲ‐ꓕꓱ ꓬꓲ ꓚꓵ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ (264) ꓣꓳ ꓟ ꓔꓲꓺ ꓒ ꓪ ꓔꓲ ꓥ ꓡꓳ꓿ ꓬꓲ ꓠꓬ ꓝꓲ ꓓꓴ ꓐꓴ ꓡꓰ ꓢ‐ꓢꓲ‐ꓠ ꓟꓬꓱꓽ ꓔꓯ ꓮ ꓟꓬ, ꓗꓪ ꓛꓲ ꓬꓰ ꓗꓷ ꓡ? ꓣꓳ ꓐꓴ ꓡꓳ. ꓠꓬꓲ ꓓꓴ ꓬꓰ ꓡꓯ꓿
1917 ꓘꓳꓼ ꓕꓯ ꓘꓴ ꓜꓲꓼ ꓞꓳ ꓡꓰ ꓛ ꓔ ꓟ ꓕꓳ ꓶ ꓗꓪ ꓐꓰ ꓝ. ꓢꓲ ꓠꓬꓲ ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ (2) ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓕꓳ ꓶ ꓮ ꓟꓬ, ꓔꓯ ꓐꓳ ꓖꓶ ꓔ ꓟ ꓥ ꓡꓳ꓿
ꓕꓱ ꓕꓳ ꓶ ꓠꓬ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ, ꓡ ꓟ ꓚꓱ, ꓥ ꓢꓲ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓚꓱ, ꓟꓲ ꓥ ꓡꓳ꓿ 1990 ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓠꓬ Peace with God (Peace with all Creatorꓢ) ꓕꓳ ꓶ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓔꓯ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓡꓳ ꓒꓱ ꓓꓽ ꓮ ꓟꓬ, ꓗꓪ ꓡ ꓞꓳ ꓮ ꓟꓬ, ꓔꓬ ꓡ ꓟ ꓑꓶ. ꓓꓴ ꓠꓬꓲ. ꓠꓬꓲ ꓮ. ꓔꓳ ꓢꓯꓼ ꓮ ꓟꓬ, ꓣꓱ ꓬꓯꓼ ꓟ ꓙꓳ ꓡ ꓢꓲ ꓠꓬꓲ GasHouse ꓐꓯ ꓟ ꓟꓲ ꓠꓯ ꓞ, ꓡ ꓝꓲ ꓟ ꓐꓰ ꓳ‐ꓜꓳ ꓐꓯ ꓟ ꓟꓲ ꓠꓯ ꓟꓵꓽ ꓘꓴꓽ ꓔꓳ, ꓟ ꓔꓯ ꓗꓽ ꓕꓽ ꓖꓶ ꓟ ꓔꓯ ꓐꓽ ꓐ ꓤ ꓗꓷ ꓡꓰ ꓝꓲ ꓟ ꓪꓴ. ꓠꓬꓲ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ, ꓡ ꓓꓴ ꓙꓳ ꓟ ꓥ ꓡꓳ꓿
ꓙꓼ ꓮ ꓟꓬ, ꓣꓱ ꓟ ꓪꓴ. ꓠꓬꓲ ꓟꓽ ꓙꓲ ꓟ ꓟꓴ ꓘꓴꓽ ꓮ ꓟꓬ, ꓓꓳ ꓡ ꓟ ꓥ ꓡꓳ꓿ ꓝꓮꓲ ꓟꓵꓽ ꓘꓳꓼ ꓔꓯ ꓐꓬ ꓡꓰ ꓝꓲ ꓟ ꓠꓬ ꓢꓲ, ꓜꓶ ꓔꓯ ꓘꓶ ꓗꓷ ꓟ ꓐꓰ ꓙꓼ ꓮ ꓟꓬ, ꓣꓱ ꓢꓲ ꓠꓬꓲ ꓟꓬꓱꓽ ꓓꓽ ꓟ ꓬꓰ ꓟ ꓑꓶ. ꓓꓴ ꓟꓵꓽ ꓘꓳꓼ ꓔꓯ ꓐꓬ ꓡꓰ ꓒꓳ, ꓡꓰ ꓝꓲ ꓟ ꓫꓵꓽ ꓪꓴꓽ ꓒꓬꓱꓼ ꓡ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓕꓱ ꓫꓵꓽ ꓪꓴꓽ ꓔꓯ ꓤ ꓟꓳ ꓠ, ꓟ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓠ, ꓟ ꓟ ꓠꓬ ꓠꓬꓲ. ꓠꓬꓲ ꓗꓪ ꓟꓵꓽ ꓘꓳꓼ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ, ꓡ ꓟ ꓐꓰ ꓟꓲ ꓠꓯ ꓡ ꓞꓳ ꓐꓴ ꓔꓯ ꓮ ꓘꓶ. ꓫ. ꓡꓰ ꓝꓲ ꓟ ꓫꓵꓽ ꓪꓴꓽ ꓓꓽ ꓟ ꓥ ꓡꓳ꓿
ꓟꓵ ꓗꓳ, ꓓꓵ ꓓꓵ ꓗꓪ ꓔꓬ ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓔꓯ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓠꓲ, ꓠꓵ ꓠ, ꓟ ꓔꓲꓺ ꓒ ꓪ ꓔꓲ ꓬꓳ‐ꓦ ꓒꓳ‐ꓡꓳ ꓠꓬꓲꓽ ꓡꓰ ꓫ. ꓕꓱ ꓔ ꓟ ꓥ ꓡꓳ ꓐꓰ ꓢꓷ. ꓪ ꓡꓳ꓿
