ꓑꓮꓔꓧꓰꓲꓠ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓚꓲ. ꓙꓰ ꓔꓬ ꓢꓴ ꓐꓴ ꓙꓴ‐ꓐꓲ‐ꓡꓲ ꓟꓲ‐ꓢ ꓔꓯ ꓬꓰ_ ꓟ꓾
ꓑꓮꓔꓧꓰꓲꓠ ꓔꓲꓺ ꓒ ꓓꓽ ꓙꓵꓽ ꓔꓶ. ꓗꓪ ꓚꓲ. ꓙꓰ ꓔꓬ ꓢꓴ ꓐꓴ ꓙꓴ‐ꓐꓲ‐ꓡꓲ ꓟ‐ꓢ ꓪꓽ ꓘꓴ ꓙꓵ, ꓔꓯ 10 ꓦ ꓟ 5 ꓠꓬꓲ ꓕꓯ ꓢꓔ. ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓬꓰ ꓖꓶ ꓢꓲ ꓠꓬꓲ ꓟꓵꓽ ꓗꓳ. ꓓꓵ ꓓꓵ ꓗꓪ ꓐꓰ ꓚꓲ. ꓡꓰ ꓔꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ ꓟ ꓗꓪ ꓙꓲ ꓢꓴ ꓢꓲ ꓤ ꓐꓴ ꓕꓲ ꓠꓲ, ꓕꓲ ꓪ ꓥ ꓟ “ꓥꓳ ꓡꓳ. ꓓꓴ ꓐꓰ ꓢ‐ꓢꓲ‐ꓠ ꓟꓬꓱꓽ” ꓬꓰ_ ꓟ ꓬꓲ. ꓒꓳ, ꓔꓯ ꓐꓯ ꓖꓶ ꓗꓷ ꓟ ꓥꓳ꓿
ꓔꓲꓺ ꓒ ꓓꓽ Henry Eikhlein ꓡꓰ ꓧꓳꓽ ꓪꓴ. ꓟꓴ ꓢꓲ ꓔꓲꓺ ꓒ ꓥꓪꓽ ꓣꓳ ꓐꓴ ꓐꓰ ꓢꓔ. ꓝꓣꓮꓠꓚꓲꓢ ꓫꓮꓦꓲꓰꓣ ꓔꓲꓺ ꓟ ꓜꓴꓻ ꓐꓴ꓾ ꓐꓣꓳꓔꓧꓰꓣ ꓐꓴ ꓐꓰ ꓙꓲ ꓢꓴ ꓢꓲ ꓤ ꓐꓴ ꓐꓰ ꓕꓲ ꓪ ꓬꓰ ꓓꓳ ꓡꓰ ꓟ ꓥꓳ꓿
ꓠꓯꓼ ꓠꓯꓼ 7 ꓙꓵ, ꓕꓯ ꓬꓰ_ ꓟ ꓟꓲ‐ꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓓꓽ ꓡꓰ ꓶꓼ ꓓꓳ ꓫꓱ, ꓓꓳ ꓚꓺ ꓟ ꓗꓪ ꓕꓱ ꓡꓱ ꓚꓲ. ꓙꓰ ꓔꓬ ꓢꓴ ꓔꓯ ꓞꓳ ꓚꓱ, ꓪ ꓚꓱ, ꓐꓰ ꓙꓲ ꓢꓴ ꓢꓲ ꓤ ꓐꓴ ꓬꓲ ꓚꓱ, ꓕꓲꓽ ꓟ ꓐꓰ ꓟ. ꓖꓶ ꓗꓷ ꓟ ꓥꓳ꓿ “ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓙꓻ ꓫꓱꓽ ꓔꓬ ꓟ ꓘꓴ ꓜꓲꓼ ꓞꓳ ꓥ ꓡꓳ꓾ ꓕꓱ ꓟ ꓡꓰ ꓐꓰ ꓘꓴ ꓜꓲꓼ ꓞꓳ ꓠꓬ ꓥꓳ ꓡꓳ. ꓓꓴ ꓐꓰ ꓙꓻ ꓫꓱꓽ ꓟ ꓥ ꓡꓳ꓾ ꓣꓳ ꓮ ꓙꓵ ꓠꓬ ꓙꓻ ꓫꓱꓽ ꓢꓴ ꓡꓰ ꓥꓳ꓾” ꓐꓰ ꓐꓯ ꓔ ꓡꓳ꓿ “ꓬꓲ. ꓟꓶꓽ ꓕꓲ ꓠꓬꓲ ꓗꓪ ꓠꓬ ꓪꓴ‐ꓢ ꓐꓰ ꓕꓲ ꓠꓲ, ꓕꓲ ꓪ ꓗꓷ ꓡꓰ ꓠ, ꓟ ꓥꓳ꓾”
ꓦ ꓕꓲ ꓒꓳ, ꓙꓻ ꓫꓱꓽ ꓚꓱ, ꓗꓪ ꓟꓵꓽ ꓗꓳ. ꓓꓵ ꓓꓵ ꓟꓬꓱꓽ ꓬꓰ ꓚꓲ. ꓙꓰ ꓔꓬ ꓢꓴ ꓐꓰ ꓫ. ꓔꓬ ꓢꓴ ꓐꓴ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓟꓽ ꓟꓲ ꓔꓬ ꓟ ꓔꓯ ꓐꓯ ꓔ ꓡꓳ꓿ 2024 ꓘꓳꓼ ꓟꓵꓽ ꓗꓳ. ꓓꓵ ꓓꓵ ꓜꓴꓻ ꓗꓪ ꓐꓰ ꓐꓯ ꓑꓶ ꓔ ꓟ ꓗꓪ ꓡ ꓞꓳ 300 ꓫꓬ, ꓐꓰ 400 ꓫꓬ, ꓛꓲ ꓠꓬ ꓚꓲ ꓛꓬ ꓔꓬ ꓟꓵꓽ ꓗꓪ ꓐꓰ ꓘꓰ, ꓙꓰ ꓔ ꓟ ꓚꓱ, ꓔꓯ ꓟꓳ. ꓔꓲꓺ ꓒ ꓓꓽ ꓡꓰ ꓕꓱ ꓡꓱ ꓚꓲ. ꓙꓰ ꓔꓬ ꓢꓴ ꓐꓴ ꓘꓳ, ꓣꓴ ꓠ, ꓟ ꓢꓯꓼ ꓖꓶ ꓔ ꓡꓳ꓿ ꓖꓳ ꓟ ꓡꓰ ꓐꓰ ꓕꓱ ꓟꓲ ꓠꓯ ꓔꓯ “ꓟꓲ ꓠꓯ ꓡ ꓞꓳ ꓮ ꓙꓵ ꓔꓬ ꓟ ꓔꓬ ꓦꓲꓻ ꓐꓰ ꓟ. ꓖꓶ_ ꓟ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓐꓯ ꓑꓶ ꓔ ꓟ Laudato Si’ ꓗꓪ ꓐꓰ ꓣꓴ ꓢꓲ ꓐꓯ ꓖꓶ ꓗꓷ ꓟ ꓥꓳ꓿”
ꓟꓲ‐ꓢ ꓓꓳ ꓡꓰ ꓗ. ꓠꓯ. ꓑꓮꓲ ꓔꓯ ꓝ. ꓢꓲ ꓫ. ꓕꓱ_ ꓟ꓾ ꓟꓴ ꓖꓪꓽ ꓐꓰ ꓢꓷ. ꓡꓰ ꓝꓲ ꓓꓴ ꓗꓪ ꓐꓰ ꓬꓰ ꓗꓷ ꓟ ꓥꓳ꓿
ꓒꓴ ꓘꓶꓽ ꓗꓪ ꓠꓬ ꓔꓲꓺ ꓒ ꓓꓽ ꓡꓰ ꓙꓵꓻ ꓠꓲ, ꓚꓱ, ꓪꓴꓽ ꓟꓴ ꓡ ꓚꓱ, ꓐꓱ ꓶ ꓣꓳ. ꓚꓵ_ ꓟ ꓔꓯ ꓐꓯ ꓖꓶ ꓗꓷ ꓟ ꓥꓳ꓿ ꓟꓬ‐ꓟ ꓗꓴꓷꓼ ꓗꓪ ꓥ ꓟꓲ ꓚꓲ. ꓙꓰ ꓔꓬ ꓢꓴ ꓐꓴ ꓮ ꓟꓬ, ꓔꓬ ꓟ ꓥ ꓡꓳ꓾ “ꓣꓳ ꓮ ꓙꓵ ꓥ ꓟꓲ ꓚꓲ. ꓙꓰ ꓔꓬ ꓢꓴ ꓐꓴ ꓐꓰ ꓕꓲ ꓪ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿ ꓕꓲ ꓦꓲꓻ ꓡ ꓞꓳ ꓐꓴ ꓔꓯ ꓤ ꓠꓱ ꓤ ꓐꓴ ꓔꓯ ꓙꓵꓻ ꓠꓲ, ꓚꓱ, ꓟ. ꓖꓶ ꓠ, ꓟ ꓢꓯꓼ ꓖꓶ_ ꓡꓳ꓾ ꓕꓱ ꓟ ꓡꓰ ꓐꓰ ꓬꓲ ꓪ ꓠꓱ. ꓐꓯꓼ ꓗꓴꓷꓼ ꓗꓪ ꓟꓬꓱꓽ ꓬꓰ ꓙꓰ ꓕꓯ ꓕꓱ ꓙꓵꓻ ꓠꓲ, ꓠꓬ ꓬꓲ ꓪ ꓐꓰ ꓕꓲ ꓪ ꓐ ꓙꓰ ꓟ ꓥꓳ꓾ ꓐꓰ ꓢꓯꓼ ꓖꓶ_ ꓡꓳ꓿
ꓕꓱ ꓟ ꓗꓪ ꓚꓲ. ꓙꓰ ꓔꓬ ꓢꓴ ꓐꓴ ꓟꓬꓱꓽ ꓚꓱ, ꓐꓰ ꓞꓳ ꓙꓳ ꓚꓱ, ꓔꓯ ꓟꓳ. ꓟ. ꓒ Nicolas ꓡꓰ ꓜꓲꓼ ꓡ ꓢꓴ ꓐꓴ ꓔꓯ ꓫ. ꓕꓱ ꓗꓷ ꓟ ꓥꓳ꓿ ꓝꓮꓲ ꓲꓠꓔꓰꓣꓠꓮꓔꓲꓳꓠꓮꓡ ꓳꓣꓖꓮꓠꓲꓜꓮꓔꓲꓳꓠ ꓝꓳꓣ ꓟꓲꓖꓣꓮꓔꓲꓳꓠ (ꓲꓳꓟ) ꓞꓳ ꓵꓻ ꓣꓳ ꓔꓯ ꓥ ꓟꓲ ꓟ. ꓖꓶ ꓗꓷ ꓢꓲ ꓠꓬꓲ 2030 ꓘꓳꓼ ꓕꓯ ꓟꓬ‐ꓟ ꓞꓳ ꓤ ꓐꓴ ꓠꓬ ꓡꓳ ꓒꓱ ꓐꓰ ꓞꓳ ꓘ, ꓗꓪ ꓕꓲ ꓪ ꓔꓬ ꓡ ꓥꓳ ꓐꓰ ꓢꓪꓼ ꓔ ꓡꓳ꓿ ꓞꓳ ꓘ, ꓗꓪ ꓐꓰ ꓚꓲ. ꓡꓰ ꓢꓴ ꓔꓶꓺ ꓜ ꓔꓶꓺ ꓓꓴ ꓐꓰ ꓫꓳꓼ ꓩꓴ ꓗꓷ_ ꓟ ꓟꓬꓱꓽ ꓗꓪ ꓔꓳ, ꓟ ꓔꓯ ꓢꓯꓼ ꓕꓵꓼ ꓓꓴ ꓥ ꓟ꓾ ꓐꓰ ꓗꓴꓷꓼ ꓘꓴ ꓗꓪ ꓟꓬꓱꓽ ꓬꓰ ꓚꓱ, ꓐꓰ ꓠꓱ. ꓐꓯꓼ ꓗꓴꓷꓼ ꓟꓬꓱꓽ ꓬꓰ ꓚꓱ, ꓕꓱ ꓠꓬꓲꓽ ꓟ ꓔꓯ ꓐꓯ ꓖꓶ ꓗꓷ ꓟ ꓥꓳ꓿
ꓦꓲꓻ ꓢꓲ ꓒ ꓗꓴꓷꓼ ꓐꓴ ꓬꓲ ꓪ ꓙꓵꓽ ꓗ꓾ ꓙꓵꓽ ꓚꓱ, ꓐꓰ ꓡꓲꓽ ꓒꓰꓼ ꓐꓴ ꓔꓯ ꓛꓳꓽ ꓒꓵꓽ ꓛꓳ ꓫꓱꓽ_ ꓟ ꓠꓬ ꓙꓲ_ ꓟ ꓚꓲ. ꓙꓰ ꓔꓬ ꓢꓴ ꓐꓴ ꓥ ꓡꓳ꓾ ꓐꓰ ꓬꓲ ꓡꓰ ꓐꓯ ꓔ ꓡꓳ꓿ ꓖꓳ ꓕꓯ ꓢꓲ ꓙꓚꓲ. ꓡꓰ ꓔꓬ ꓢꓴ ꓐꓴ ꓠꓯꓼ ꓗꓪ ꓙꓲ ꓣꓴ ꓓꓴ ꓟꓽ ꓙꓳ ꓔꓬ ꓟꓶ ꓡ ꓥꓳ꓾ ꓬꓲ ꓟꓬꓱꓽ꓾ ꓢꓷ. ꓠꓲ, ꓢꓳꓺ ꓣꓴ ꓚꓱ,꓾ ꓟꓽ ꓥ ꓠꓬ ꓙꓰ ꓚꓳ ꓠ, ꓟ ꓐꓱ ꓶ ꓠꓬ ꓗꓴꓷꓼ ꓗꓪ ꓐꓰ ꓙꓵꓽ ꓪ ꓖꓶ_ ꓟ ꓑꓮꓢꓢꓑꓳꓣꓔ ꓐꓰ ꓦꓲꓢꓮ ꓣꓳ. ꓚꓵ_ ꓟ ꓚꓱ, ꓔꓯ ꓟꓳ. ꓐꓯ ꓖꓶ ꓗꓷ ꓟ ꓥꓳ꓿
