ꓮꓓ (258) ꓘꓳꓼ ꓕꓯ ꓘꓴ ꓜꓲꓼ ꓞꓳ ꓔꓯ ꓬꓰ ꓙ ꓢꓴ ꓙꓲꓻ ꓫꓬ ꓢꓬ ꓚꓬꓑꓣꓲꓮꓠ ꓚꓱ, ꓥ ꓡꓳ꓿ ꓙꓲꓻ ꓫꓬ ꓢꓬ ꓚꓬꓑꓣꓲꓮꓠ ꓔꓯ ꓚꓮꓣꓔꓧꓮꓖꓰ ꓡꓳ ꓒꓱ ꓗꓪ ꓐꓰ ꓒꓴ ꓫꓵꓺ ꓮ ꓟꓬ, ꓙꓳ ꓟ ꓕꓲ ꓦꓲꓻ ꓗꓪ ꓐꓰ ꓬꓲ ꓔꓯ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓟꓲ ꓠꓯ ꓢꓷ. ꓠꓲ, ꓔꓯ ꓢꓳꓻ ꓣꓴ ꓟꓶ ꓡꓰ ꓗ. ꓠꓯ ꓮ ꓘꓶ. ꓛꓲ ꓓꓽ ꓟ ꓟ. ꓒ ꓓꓽ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ꓿
ꓚꓮꓣꓔꓧꓮꓖꓰ ꓡꓳ ꓒꓱ ꓗꓪ ꓐꓰ ꓙꓲꓻ ꓫꓬ ꓢꓬ ꓚꓬꓑꓣꓲꓮꓠ ꓠꓬ ꓮꓓ 248 ꓘꓳꓼ ꓕꓯ ꓪꓴ‐ꓢ ꓦꓻ ꓡꓱ ꓡ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓙꓲꓻ ꓫꓬ ꓢꓬ ꓚꓬꓑꓣꓲꓮꓠ ꓠꓬ ꓬꓲ ꓠꓯ, ꓗꓪ ꓙꓳ ꓟ ꓮ ꓙꓵꓽ ꓔꓯ ꓪꓴꓽ ꓗꓷ ꓢꓲ ꓠꓬꓲ ꓒꓴ ꓫꓵꓺ ꓔꓯ ꓫ. ꓢꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓗꓷ ꓟ ꓥ ꓡꓳ꓿ ꓒꓴ ꓫꓵꓺ ꓕꓲ ꓐꓱ ꓔꓯ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓣꓱ ꓬꓯꓼ ꓔꓬ ꓟ ꓔꓶ. ꓗꓪ ꓣꓱ ꓗꓷ ꓟ ꓥ ꓡꓳ꓿
ꓬꓲ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓣꓳꓻ ꓣꓴ ꓟꓶ ꓡꓰ ꓗ. ꓠꓯ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓪ꓿ ꓝꓮꓲ ꓙꓲꓻ ꓫꓬ ꓢꓬ ꓚꓬꓑꓣꓲꓮꓠ ꓠꓬ ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓗ. ꓠꓯ ꓮꓓ (249) ꓘꓳꓼ ꓕꓯ ꓚꓮꓣꓔꓧꓮꓖꓰ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓒꓬꓱꓼ ꓡ ꓪ꓿ ꓬꓲ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓐꓰ ꓕꓳ ꓶ ꓐꓳ ꓒꓽ ꓓꓽ ꓕꓲ ꓪ ꓥ ꓟ ꓔꓮꓣꓴꓡꓲꓮ ꓡꓰ ꓐꓳ ꓔꓯ ꓕꓳ ꓶ ꓮ ꓟꓬ, ꓔꓯ ꓵꓻ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷꓳ꓿
ꓕꓳ ꓶ ꓐꓳ ꓒꓽ ꓔꓮꓣꓔꓴꓡꓲꓮꓠ ꓠꓬ ꓬꓲ ꓟ. ꓒꓽ ꓓꓽ ꓟꓲ ꓥ ꓡꓳ꓿ ꓙꓲꓻ ꓫꓬ ꓢꓬ ꓚꓬꓑꓣꓲꓮꓠ ꓡꓰ ꓐꓳ ꓔ ꓟ ꓕꓳ ꓶ ꓗꓪ ꓘꓴ ꓜꓲꓼ ꓞꓳ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓕꓯ ꓥ ꓟꓲ ꓪꓽ ꓡꓯꓽ ꓘꓳ ꓟ ꓚꓱ, ꓔꓯ ꓐꓳ ꓔ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓔꓶ. ꓔ ꓟ ꓘꓴ ꓜꓲꓼ ꓞꓳ ꓠꓬ ꓮ ꓘꓶ. ꓣꓳꓺ ꓚꓵˍ ꓟ ꓚꓱ, ꓔꓯ ꓥ ꓟꓲ ꓕꓳ ꓶ ꓗꓪ ꓐꓳ ꓔ ꓟ ꓥꓡꓳ꓿
ꓢꓲꓺ ꓒ ꓬꓰ‐ꓢꓴ ꓚꓱ, ꓔꓯ ꓟꓲ ꓠꓯ ꓡ ꓞꓳ ꓐꓴ ꓢꓷ. ꓡꓰ ꓠ, ꓟ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓟ. ꓖꓶ ꓗꓷꓳ꓿ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓪꓴ‐ꓢ ꓐꓯ ꓘꓶꓽ ꓟ. ꓖꓶ ꓟ ꓕꓳ ꓶ ꓮ ꓟꓬ, ꓐꓷꓠ ꓥ ꓟꓲ ꓐꓳ ꓖꓶ ꓗꓷꓳ꓿ ꓬꓲ ꓔꓯ ꓟꓽ ꓙꓲ ꓢꓴ ꓐꓴ ꓡꓰ ꓢꓯꓼ ꓗꓷ ꓟ ꓥ ꓡꓳ꓿ ꓚꓮꓣꓔꓧꓮꓖꓰ ꓡꓳ ꓒꓱ ꓗꓪ ꓮ ꓟꓶ ꓟ ꓙꓵ, ꓗꓪ ꓮꓝꓣꓲꓚꓮꓠ ꓗꓴꓷꓼ ꓗꓪ ꓐꓰ ꓡꓳ ꓒꓱ ꓓꓽ ꓕꓲ ꓡꓳ ꓒꓱ ꓥ ꓡꓳ꓿
