ꓮꓢꓲꓮ ꓕꓲꓽ ꓛꓱ ꓟꓲꓽ ꓦꓲ ꓕꓳꓽ ꓥꓳꓽ ꓓꓽ ꓟ ꓔꓳꓹ ꓜꓳ ꓔꓬ ꓢꓴ ꓐꓴ ꓐꓱ ꓶ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓖꓶ_ ꓟ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓑꓧꓲꓡꓲꓑꓑꓲꓠꓰꓢ꓾ ꓔꓮꓲꓪꓮꓠ꓾ ꓧꓳꓠꓖ ꓗꓳꓠꓖ꓾ ꓦꓲꓰꓔꓠꓮꓟ ꓐꓰ ꓧꓶꓽ ꓟꓵꓽ ꓕꓲ ꓚꓳ ꓡꓳ ꓗꓪ ꓓꓵꓽ ꓡꓰ ꓔꓬ ꓟ ꓔꓬꓑꓧꓳꓳꓠ ꓟꓲꓽ ꓦꓲ ꓕꓳꓽ ꓥꓳꓽ ꓓꓽ ꓟ ꓔꓳꓹ ꓜꓳ ꓔꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ ꓗꓷ ꓟ ꓥꓳ=
ꓘꓴ ꓜꓲꓼ ꓞꓳ ꓟꓸ ꓒꓽ ꓟꓸ ꓟ ꓐꓴ ꓙꓴ-ꓐꓲ-ꓡꓲ ꓑꓮꓲ ꓐꓱ ꓶ ꓬꓰ ꓟ ꓟꓲ-ꓢ ꓪꓽ ꓘꓴ ꓙꓵꓹ ꓬꓲꓸ ꓟꓶꓽ ꓙꓵꓹ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓟꓽ ꓬꓰ ꓢꓰ ꓟ ꓟꓲꓽ ꓕꓯ ꓗꓪ ꓔꓲꓺ ꓒ ꓪ ꓔꓲ ꓡꓰ ꓢꓔꓸ ꓑꓰꓔꓰꓣ ꓪꓽ ꓘꓴ ꓦꓲꓻ ꓓꓽ ꓗꓪ ꓜꓲꓼ ꓡ ꓟ ꓙꓲ ꓢꓴ ꓢꓲ ꓤ ꓐꓴ ꓔꓯ “ꓮ ꓘꓶꓸ ꓢꓯꓼ ꓙꓳ_ ꓟ ꓔꓬꓑꓧꓳꓳꓠ ꓟꓲꓽ ꓦꓲꓻ ꓕꓳꓽ ꓥꓳꓽ ꓠꓬ ꓮꓢꓲꓮ ꓕꓲ ꓛꓱ ꓬꓲ ꓔꓶꓸ ꓮ ꓟꓬꓹ ꓗꓪ ꓙꓱꓼ ꓡ ꓟ꓾ ꓟꓬ ꓠꓬꓲ ꓠꓬ ꓑꓧꓲꓡꓲꓑꓑꓲꓠꓰꓢ꓾ ꓔꓮꓲꓪꓮꓠ꓾ ꓧꓳꓠꓖ ꓗꓳꓠꓖ꓾ ꓖꓴꓮꓠꓖꓓꓳꓠꓖ ꓐꓰ ꓦꓲꓰꓔꓠꓮꓟ ꓗꓪ ꓙꓱꓼ ꓡ ꓟ ꓥ ꓡꓳ=
ꓕꓱ ꓡꓱ ꓫꓸ ꓓꓴ ꓔꓳꓹ ꓜꓳ ꓡꓰ ꓟ꓾ ꓟꓬ ꓠꓬꓲ ꓮ ꓘꓶꓸ ꓫꓸ ꓔꓬ ꓢꓴ ꓐꓴ ꓔꓯ ꓣꓳ ꓐ ꓡ ꓟꓬ ꓛꓲ ꓪꓽ ꓘꓴ ꓙ ꓖꓶ ꓢꓲ ꓕꓲ ꓪꓽ ꓔꓬ ꓟ ꓔꓯ ꓟꓸ ꓖꓶ ꓢꓲ ꓠꓬꓲ꓾ ꓫꓵꓻ ꓡꓰ ꓢꓴ꓾ ꓟꓶꓽ ꓡꓰ ꓢꓴ ꓬꓲꓸ ꓔꓶꓸ ꓘꓰꓹ ꓠ ꓗꓷ ꓡꓰ ꓢꓴ ꓫꓸ ꓙꓵ ꓟꓶꓼ ꓙꓵ ꓔꓳꓹ ꓜꓳ ꓔꓬ ꓢꓴ ꓬꓰ ꓙ ꓔꓳꓹ ꓙ ꓔꓬ ꓢꓴ ꓐꓴ ꓐꓰ ꓙꓵꓽ ꓪ ꓙꓳ ꓢꓴ ꓐꓱ ꓶ ꓥ ꓟꓲ ꓪꓽ ꓘꓴ ꓙ ꓔꓬ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=
“ꓮ ꓙꓵ ꓠꓬ ꓪꓴ-ꓢ ꓔꓯ ꓠꓲꓹ ꓡꓱ ꓡꓱ ꓙꓵꓻ ꓠꓹ ꓟ ꓐꓰ ꓕꓲ ꓣꓳ ꓐꓰ ꓕꓲ ꓣꓳ ꓕꓲ ꓪꓽ ꓫꓱꓹ ꓡꓯꓽ ꓘꓳ_ ꓟ ꓔꓯ ꓟꓸ ꓖꓶ ꓠꓹ ꓟ ꓢꓯꓼ ꓖꓶ_ ꓡꓳ꓾ ꓫꓸ ꓙꓵ ꓟꓶꓼ ꓙꓵ ꓓꓴ ꓮ ꓙꓵ ꓔꓯ ꓗꓳꓸ ꓙꓰ ꓐ ꓡ ꓠꓹ ꓟ ꓐꓱ ꓶ ꓪꓴ-ꓢ ꓠꓯꓼ ꓗꓪ ꓐꓰ ꓢꓯꓼ ꓪ ꓖꓶ ꓟꓶ ꓝꓲ꓾”
ꓕꓱ ꓕꓲ ꓘꓳꓼ ꓢꓯꓼ ꓓꓽ ꓟ ꓙꓳ_ ꓟ ꓣꓮꓖꓮꓢꓮ ꓔꓬꓑꓧꓳꓳꓠ ꓟꓲꓽ ꓦꓲ ꓕꓳꓽ ꓥꓳꓽ ꓠꓬ ꓧꓶꓽ ꓟꓵꓽ ꓕꓲ ꓔꓶꓸ ꓗꓪ ꓡꓰ ꓞꓳ ꓤ 20 ꓫꓬꓹ ꓛꓲ ꓔꓯ ꓘꓰꓹ ꓡꓰ ꓝꓲ ꓢꓲ꓾ ꓐꓬ ꓡꓰ ꓓꓴ ꓮ ꓘꓶꓸ ꓙꓳ ꓡꓰ ꓟ꓾ ꓬꓲꓻ ꓙꓬ ꓙꓵ_ ꓟ꓾ ꓡꓽ ꓧꓳꓹ ꓧꓳꓹ ꓡꓰ ꓓꓴ ꓗꓷ ꓡꓰ ꓟ ꓡꓰ ꓟ ꓞꓲ꓾ ꓑꓧꓲꓡꓲꓑꓑꓲꓠꓰꓢ ꓗꓪ ꓡ ꓞꓳ 25 ꓣꓳ ꓟꓽ ꓞꓲ ꓐꓰ ꓔꓮꓲꓪꓮꓠ ꓗꓪ 14 ꓣꓳ ꓫꓵꓻ ꓡꓰ ꓝꓲ ꓟ ꓥ ꓡꓳ꓾ ꓐꓰ ꓦꓮꓔꓲꓚꓮꓠ ꓓꓳꓽ ꓗꓪ ꓐꓰ ꓐꓯ ꓑꓶ ꓔ ꓡꓳ=
