ꓟꓵꓽ ꓗꓳ, ꓓꓵ ꓓꓵ ꓗꓪ ꓟ ꓘꓴ ꓜꓲꓼ ꓞꓳ ꓟ. ꓒ(Catechists) ꓐꓴ ꓣꓳ‐ꓟ ꓡꓳ ꓒꓱ ꓗꓪ ꓜꓲꓼ ꓡꓳꓽ ꓔꓬ ꓕꓯ ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ ꓙꓴꓐꓲꓡꓰꓰ ꓑ ꓫꓬꓼ ꓐꓰ ꓜꓲ ꓡꓯ ꓘꓳˍ ꓟ ꓬꓰ ꓗꓷ ꓢꓲ꓾ ‘sensus fidei’ ꓐꓰ ꓘꓴˍ ꓟ ꓪꓴ‐ꓢ ꓐꓰ ꓗꓴ. ꓙꓲꓽ ꓙꓳˍ ꓟ ꓐꓱ ꓶ ꓞꓳ ꓔꓱ, ꓐꓴ ꓬꓲ ꓪ ꓙꓵꓻ ꓠꓲ, ꓠꓬ ꓘꓴ ꓜꓲꓼ ꓞꓳ ꓔꓯ ꓬꓲ ꓫꓵꓼ ꓟ ꓙ ꓖꓴ ꓗꓪ ꓟꓲꓽ ꓕꓯꓽ ꓢꓲ ꓙꓰ ꓠ, ꓟ ꓢꓯꓼ ꓪ ꓖꓶ ꓔꓬ ꓡꓳ꓾ ꓐꓰ ꓐꓯ ꓗꓷꓳ꓿
9 ꓦ (26) ꓠꓬꓲ ꓗꓪ ꓐꓰ (28) ꓠꓬꓲ ꓗꓪ ꓛꓲ ꓬꓰˍ ꓟ ꓘꓴ ꓜꓲꓼ ꓞꓳ ꓟ. ꓒ ꓐꓴ ꓙꓴꓐꓲꓡꓰꓰ ꓗꓪ ꓘꓴ ꓜꓲꓼ ꓞꓳ ꓟ. ꓒ ꓬꓲ ꓔꓴꓺ ꓣꓳ ꓛꓲ ꓠꓬ ꓑꓮꓲꓽ ꓗꓪ ꓛꓲ ꓡ ꓕꓯ꓾ ꓔꓲꓺ ꓒ ꓪ ꓔꓲ. ꓡꓰꓳ (14) ꓠꓬ ꓠꓽ ꓛꓳꓼ ꓠꓬꓲ ꓕꓯ St. Peter Square ꓗꓪ ꓙꓴꓐꓲꓡꓰꓰ ꓑ ꓫꓬꓼ ꓐꓴ ꓐꓰ ꓜꓲ ꓡꓯ ꓘꓳ ꓗꓷꓳ꓿
ꓔꓲꓺ ꓒ ꓪ ꓔꓲ. ꓠꓬ ‘sensus fidei’ ꓚꓱ, ꓔꓯ ꓟꓳ. ꓬꓲ ꓟ. ꓟꓲꓽ ꓒꓶ ꓟ. ꓖꓶ ꓗꓷ ꓢꓲ꓾ ꓕꓱ ꓟ ꓠꓬ “ꓪꓴ‐ꓢ ꓐꓰ ꓗꓴ. ꓙꓲꓽ ꓙꓳˍ ꓟ ꓐꓱ ꓶ ꓞꓳ ꓔꓱ, ꓐꓴ ꓬꓲ ꓪ ꓦ ꓐꓬꓱꓽ ꓟꓳˍ ꓟ ꓡꓰ ꓐꓰ ꓗ, ꓡꓳ” ꓐꓰ ꓐꓯ ꓖꓶ ꓗꓷ ꓢꓲ ꓠꓬꓲ꓾ “ꓪꓴ‐ꓢ ꓠꓬ ꓔꓱ, ꓜꓳꓽ ꓢꓴ ꓥ ꓢꓲ ꓠꓬꓲ ꓞꓳ ꓔꓱ, ꓐꓴ ꓔꓯ ꓬꓲ ꓚꓲ. ꓛꓬ ꓟꓳ. ꓖꓶˍ ꓡꓳ” “ꓕꓱ ꓟ ꓪꓴ. ꓠꓬꓲ ꓪꓴ‐ꓢ ꓬꓲ ꓡ ꓞꓳ ꓐꓴ ꓠꓯꓸꓼ ꓗꓪ ꓙꓵꓻ ꓠꓲ, ꓗꓪ ꓞꓳ. ꓡꓰ ꓓꓴ ꓟꓽ ꓙꓳ ꓟ (infallibility) ꓠꓬ ꓙꓳ ꓔꓬ ꓟ ꓥ ꓢꓲ꓾ ꓔꓲꓺ ꓒ ꓪ ꓔꓲ. ꓬꓲ ꓞꓳ. ꓡꓰˍ ꓟ ꓟꓽ ꓙꓳ ꓟ ꓠꓬ ꓖꓳ ꓟ ꓔꓯ ꓟꓳ. ꓖꓶˍ ꓟ ꓕꓲ ꓟ ꓐꓰ꓾ ꓪꓴ‐ꓢ ꓟꓬꓱꓽ ꓬꓰˍ ꓟ ꓕꓲ ꓟ ꓥ ꓡꓳ”꓿
ꓔꓲꓺ ꓒ ꓪ ꓔꓲ. ꓡꓰꓳ (14) ꓠꓬ ꓙꓲꓻ ꓫꓬ ꓢꓴ ꓯ‐ꓐ‐ꓣꓳ.‐ꓢꓶ (St. Ambrose) ꓟ. ꓟꓲꓽ ꓔꓯ ꓐꓯ ꓟ. ꓖꓶ ꓗꓷꓳ꓿ ꓦꓬꓼ ꓠꓬꓲ ꓖꓳ ꓟ ꓗꓪ ꓙꓲꓻ ꓫꓬ ꓢꓴ ꓯ‐ꓐ‐ꓣꓳ.‐ꓢꓶ ꓠꓬ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓫꓵꓽ ꓪꓴ ꓓꓽ ꓟ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓟꓲ‐ꓡꓯ ꓡꓳ ꓒꓱ ꓔꓯ ꓙꓵꓽ ꓢꓴ ꓕꓲ ꓣꓳ ꓥ ꓡꓳ꓿
ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓥ ꓟ ꓬꓲ ꓠꓬ ꓟꓲ‐ꓡꓯ ꓔꓲꓺ ꓒ ꓓꓽ ꓬꓲ ꓫꓵꓼ ꓢꓲꓺˍ ꓟ ꓑꓮꓲꓽ ꓗꓪ ꓬꓳ. ꓚꓰꓽ ꓢꓴ ꓕꓲ ꓣꓳ ꓥ ꓢꓲ ꓠꓬꓲ꓾ ꓙꓵꓻ ꓢꓴ ꓐꓴ ꓠꓬꓲꓽ ꓗꓴ. ꓚꓸꓼ ꓗꓪ ꓢꓲ ꓡꓲ ꓟ ꓙꓳ ꓠ, ꓟ ꓠ ꓠ, ꓖꓶˍ ꓟ ꓐꓰ꓾ ꓠꓬꓲꓽ ꓗꓴ. ꓚꓸꓼ ꓗꓪ ꓧꓳ, ꓡꓯ ꓘꓳ ꓝꓲ ꓓꓴ ꓔꓯ ꓬꓰ ꓖꓶ ꓗꓷꓳ꓿
ꓟꓷꓽ ꓠꓷ, ꓗꓪ ꓐꓰ ꓐꓯ ꓩꓴ ꓡˍ ꓟ ꓕꓲ ꓫꓵꓽ ꓠꓬ꓾ ꓤ ꓠꓱ ꓤ ꓕꓲ ꓣꓳ ꓡꓰ “ꓯ‐ꓐ‐ꓣꓳ.‐ꓢꓶ ꓔꓲꓺ ꓒ ꓓꓽ” ꓐꓰ ꓘꓴꓻ ꓔꓴ ꓡˍ ꓕꓯ ꓑ ꓫꓬꓼ ꓮ ꓙꓵꓽ ꓥˍ ꓟꓲ ꓬꓲ ꓔꓯ ꓢꓷ. ꓙ ꓟꓳ ꓙ ꓗꓷꓳ꓾ ꓐꓰ ꓐꓯ ꓔˍ ꓡꓳ꓿
ꓖꓳ ꓕꓲ ꓙꓵ, ꓕꓯ ꓙꓲꓻ ꓫꓬ ꓢꓴ ꓯ‐ꓐ‐ꓣꓳ.‐ꓢꓶ ꓠꓬ ꓖꓳ ꓓꓱꓽ ꓟꓽ ꓔꓲ, ꓗꓷ ꓢꓰꓽ꓿ ꓬꓲ ꓠꓬ ꓖꓳ ꓓꓱꓽ ꓔꓲ, ꓠ, ꓟ ꓐꓱ ꓶ ꓙꓽ ꓖꓶ ꓔꓬ ꓢꓴ ꓕꓲ ꓣꓳˍ ꓡꓰꓽ ꓥ ꓢꓰꓽ ꓡꓳ꓿ ꓖꓳ ꓡꓱ ꓥˍ ꓟꓲ ꓑ ꓫꓬꓼ ꓡꓰ ꓙꓲꓻ ꓫꓬ ꓢꓴ ꓯ‐ꓐ‐ꓣꓳ.‐ꓢꓶ ꓠꓯꓸꓼ ꓗꓪ ꓪꓽ ꓠꓬꓲˍ ꓟ ꓕꓲ ꓫꓵꓽ ꓔꓯ ꓟꓳ ꓡꓰ ꓢꓲ ꓬꓲ ꓔꓯ ꓢꓲꓺ ꓗꓷ ꓟ ꓥ ꓡꓳ꓿
ꓖꓳ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓪꓴꓽ ꓓꓰ ꓡꓰˍ ꓟ ꓔꓲꓺ ꓒ ꓓꓽ ꓕꓲ ꓣꓳ꓾ ꓘꓴ ꓜꓲꓼ ꓞꓳ ꓗꓪ ꓢꓷ. ꓠꓲ, ꓢꓷ. ꓢꓴ ꓔꓲꓺ ꓒ ꓓꓽ (Doctor of the Church) ꓕꓲ ꓣꓳ ꓟꓶ ꓡꓰ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ. ꓡꓰꓳ ꓡꓰ꓾ ꓯ‐ꓐ‐ꓣꓳ.‐ꓢꓶ ꓠꓬ ꓪꓴ‐ꓢ ꓡꓰ ꓘꓴˍ ꓟ ꓥ ꓟ ꓔꓯ ꓬꓲ ꓟꓽ ꓙꓽ ꓜꓲꓼ ꓢꓰꓽ ꓕꓯ ꓬꓲ ꓠꓬ ꓡꓳ ꓒꓱ ꓗꓪ ꓐꓰ ꓔꓷ, ꓛꓰ, ꓙꓰ ꓡꓳ꓾ ꓗ ꓠꓯ. ꓕꓯ ꓡꓰꓽ ꓖꓳ ꓓꓱꓽ ꓔꓲ, ꓗꓷ ꓢꓲ꓾ ꓔꓲꓺ ꓒ ꓓꓽ ꓙꓵꓽ ꓪ ꓖꓶ ꓠ, ꓟ ꓘꓳ ꓣꓴ ꓗꓷ ꓟ ꓥ ꓡꓳ꓾ ꓐꓰ ꓐꓯˍ ꓡꓳ꓿
ꓤ ꓠꓱ ꓤ ꓕꓲ ꓣꓳ ꓡꓰ “ꓯ‐ꓐ‐ꓣꓳ.‐ꓢꓶ ꓔꓲꓺ ꓒ ꓓꓽ” ꓐꓰ ꓘꓴ ꓗꓷ ꓟ ꓔꓯ ꓡꓳ. ꓢꓲ ꓔꓲꓺ ꓒ ꓪ ꓔꓲ. ꓠꓬ “ꓤ ꓠꓱ ꓤ” ꓐꓴ ꓠꓬ ꓘꓴ ꓜꓲꓼ ꓞꓳ ꓔꓯ ꓖꓶ ꓗꓷ ꓟ ꓪꓴꓽ ꓓꓰ ꓡꓰˍ ꓟ ꓡꓯꓼ ꓜꓴ ꓔꓯ ꓬꓲ ꓓꓵꓽ ꓙꓽ ꓟꓶˍ ꓡꓳ ꓐꓰ ꓐꓯ ꓖꓶ ꓗꓷ ꓢꓲ꓾ “ꓮ ꓟꓶ ꓟ ꓦꓬꓼ ꓠꓬꓲ ꓗꓪˍ ꓟꓲ ꓕꓱ ꓟ ꓠꓬ ꓣꓳ ꓓꓰꓽ ꓠ ꓔˍ ꓟ ꓣꓱꓽ ꓛꓰꓽ ꓥ ꓡꓳ꓾ ꓣꓳ ꓪꓴ‐ꓢ ꓟꓬꓱꓽ ꓬꓰ ꓔꓬ ꓟ ꓚꓱ, ꓗꓪ ꓞꓳ ꓙꓳ ꓢꓲ ꓠꓬꓲ ꓔꓱ, ꓜꓳꓽˍ ꓟ ꓙꓲ‐ꓢꓴ ꓢꓲ ꓤ ꓒꓬꓱꓼ ꓡ ꓠ, ꓟ ꓥ ꓡꓳ” ꓐꓰ ꓐꓯ ꓖꓶ ꓗꓷꓳ꓿
ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ꓾ ꓶꓻ ꓡꓯꓼ ꓟꓬꓱꓽ ꓬꓰ ꓢꓴ ꓐꓴ꓾ ꓟ. ꓒ ꓐꓴ꓾ ꓔꓲꓺ ꓒ ꓐꓴ ꓥ ꓠꓬ ꓪꓴ‐ꓢ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓠꓬ꓾ ꓮ ꓙꓵꓽ ꓠꓬ ꓚꓲ. ꓛꓬ ꓢꓲꓺ ꓔˍ ꓟ ꓙ ꓖꓴ ꓗꓪ ꓐꓰ ꓕꓲ ꓝ. ꓙꓲ‐ꓢꓴ ꓢꓲ ꓤ ꓒꓬꓱꓼ ꓡ ꓠ, ꓟ ꓘꓴꓻ ꓔ ꓟꓶˍ ꓟ ꓔꓯ ꓔꓲꓺ ꓒ ꓪ ꓔꓲ. ꓡꓰ ꓢꓷ. ꓙ ꓟꓳ ꓙ ꓗꓷ ꓢꓲ꓾ ꓣꓳ ꓠꓬ ꓚꓵ ꓚꓵ ꓙꓲ‐ꓢꓴ ꓢꓲ ꓤ ꓒꓬꓱꓼ ꓡˍ ꓡ꓾ ꓟꓽ ꓒꓬꓱꓼ ꓡ ꓡ꓾ ꓐꓯˍ ꓟ ꓔꓯ ꓞꓳ ꓤ ꓐꓴ ꓠꓬ ꓡꓳ. ꓢꓷ. ꓐ ꓡˍ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ. ꓡꓰ ꓝ. ꓢꓲ ꓐꓯ ꓖꓶ ꓗꓷꓳ꓿
ꓬꓲ ꓔꓯ ꓪꓴ‐ꓢ ꓘꓴꓻ ꓔˍ ꓟ ꓗꓪ ꓘꓳ ꓣꓴ ꓗꓷ ꓗ ꓠꓯ. ꓙꓲꓻ ꓫꓬ ꓢꓴ ꓯ‐ꓐ‐ꓣꓳ.‐ꓢꓶ ꓠꓬ ꓬꓲ ꓙꓵꓻ ꓠꓲ, ꓔꓯ ꓟꓬꓽ ꓠꓬꓲ ꓪꓴꓽ ꓡ ꓠ ꓬꓰ ꓢꓲ ꓟꓴ ꓖꓪ ꓐꓰ ꓓꓴ ꓟꓴ, ꓟꓴ ꓗꓪ ꓖꓪˍ ꓟ꓾ ꓪꓽ ꓘꓴˍ ꓟ ꓐꓰ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓚꓱ, ꓐꓱ ꓶ ꓬꓲ ꓚꓱ, ꓬꓲ ꓫꓵꓼ ꓔꓯ ꓡꓶ. ꓖꓶ ꓗꓷ ꓢꓲ꓾ ꓙꓲꓻ ꓫꓬ ꓢꓴ ꓯ‐ꓐ‐ꓣꓳ.‐ꓢꓶ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓗꓪ ꓐꓰ ꓡꓳ, ꓬꓰˍ ꓕꓯ ꓔꓲꓺ ꓒ ꓓꓽ ꓒꓬꓱꓼ ꓡ ꓢꓴ ꓙꓲꓻ ꓫꓬ ꓢꓴ Augustine ꓔꓯ ꓥˍ ꓟꓲ ꓠꓲ, ꓟ ꓒꓳ, ꓡꓶ. ꓡ ꓝꓲꓳ꓿
ꓡꓳ, ꓬꓰˍ ꓕꓯ ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ꓾ ꓪꓴ‐ꓢ ꓠꓬ ꓘꓴ ꓜꓲꓼ ꓞꓳ ꓔꓯ ꓟꓲꓽ ꓙꓬ ꓢꓲ ꓗꓪ ꓙꓰ ꓔꓬ ꓝꓲ ꓢꓲ ꓪꓴ‐ꓢ ꓬꓲ ꓡ ꓞꓳ ꓐꓴ ꓙꓵꓻ ꓠꓲ, ꓥ ꓟ ‘sensus fidei’ ꓗꓪ ꓐꓰ ꓕꓲ ꓝ. ꓙ ꓖꓴ ꓬꓲ ꓫꓵꓼ ꓔꓯ ꓖꓴ ꓟꓳ. ꓖꓶˍ ꓥꓳ꓾ ꓐꓰ ꓐꓯ ꓖꓶ ꓗꓷꓳ꓿
“ꓬꓲ ꓓꓻ ꓬꓲ ꓢꓷ.ˍ ꓟ꓾ ꓡꓳ. ꓢꓷ. ꓡꓰˍ ꓟ ꓐꓯˍ ꓟ ꓠꓬ ꓡ ꓠ, ꓟ ꓟꓴ ꓗꓪ ꓗꓴꓷꓼ ꓐꓱ ꓶ ꓔꓱ, ꓜꓳꓽ ꓢꓴ ꓐꓴ ꓬꓲ ꓫꓱ, ꓥ ꓡꓳ” “ꓕꓱ ꓙꓴꓐꓲꓡꓰꓰ ꓠꓬ ꓪꓴ‐ꓢ ꓬꓲ ꓠꓲ, ꓡꓶ ꓔꓯ ꓡꓳ. ꓢꓷ. ꓡꓰ ꓠ, ꓟ ꓐꓰ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓶꓼ ꓓꓳꓽ ꓫꓱ, ꓓꓳꓽ ꓙꓳˍ ꓟ ꓡꓰ ꓐꓰ ꓔꓱ, ꓜꓳꓽ ꓢꓴ꓾ ꓞꓳ ꓔꓱ, ꓐꓴ ꓒꓬꓱꓼ ꓡ ꓠ, ꓟ ꓣꓳ ꓐꓴ ꓔꓯ ꓬꓰ ꓙ ꓡ ꓝꓲ” ꓐꓰ ꓬꓲ ꓟꓶꓽ ꓢꓰꓼ ꓔ ꓟ ꓥ ꓡꓳ꓿
News: Vatican News
