ꓞꓳ ꓐꓳˍ ꓐꓰ ꓡ‐ꓢ‐ꓣꓴ ꓟ. ꓟꓲꓽ (Sunday reflection) 28.9.2025
ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓗꓪ (26) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺꓒ ꓦꓬꓼ ꓠꓬꓲ
ꓗꓪ ꓵꓻ ꓠ, ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 16ꓽ19‐31 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓞꓳ ꓐꓳˍ ꓕꓲ ꓣꓳ
ꓐꓰ ꓡ‐ꓢ‐ꓣꓴ ꓟ. ꓟꓲꓽ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓮꓽ ꓠꓱ ꓕꓯ ꓞꓳ ꓐꓳ ꓕꓲ ꓣꓳ ꓔꓬ ꓡꓳ꓿
ꓬꓲ ꓠꓬꓲ ꓠꓲ ꓛꓵꓽ ꓟ ꓟꓶˍ
ꓐꓰ ꓪꓰ ꓜꓲꓽ ꓟꓶ ꓐꓵ ꓞꓶꓽ ꓖꓪꓽ ꓢꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓐꓳ ꓓꓳ ꓐꓳ ꓢꓲ ꓜꓽ ꓢ ꓔꓬ ꓢ ꓡꓳ꓿ ꓝꓮꓲ ꓕꓲ ꓖꓳ ꓕꓱ ꓓꓱꓽ
ꓐꓶ ꓠ ꓛꓲ. ꓓꓲˍ ꓟ ꓡ‐ꓢ‐ꓣꓴ ꓟꓬꓱꓽ ꓔ ꓟ ꓜ ꓓꓰꓽ ꓢꓴ ꓕꓲ ꓣꓳ ꓔꓯ ꓞꓳ ꓐꓳ ꓖꓳ ꓕꓲ ꓣꓳ ꓗ ꓘꓶꓽ ꓓꓴꓽ ꓗꓪ ꓧꓳꓽ ꓔ ꓢꓲ
ꓖꓳ ꓗꓪ ꓓꓳꓽ ꓞ, ꓝꓲˍ ꓡꓳ꓿ ꓞꓳ ꓐꓳ ꓢꓽ ꓡ ꓗꓪ ꓐꓰ ꓞꓰ ꓡꓰ ꓟ ꓜ ꓟꓰꓽ ꓖꓳ ꓜꓽ ꓟꓶ ꓡꓰ ꓝꓲ ꓠꓲ, ꓫꓵˍ ꓡꓳ꓿ ꓮ. ꓠꓽ ꓟꓲ
ꓬꓲ ꓐꓶꓻ ꓠꓻ ꓔꓯ ꓡꓷꓼ ꓡˍ ꓡꓳ꓿ ꓞꓳ ꓐꓳ ꓠꓬ ꓫꓵꓻ ꓡꓰ ꓗ. ꓠꓯ ꓛꓬ ꓟꓵꓽ ꓗꓪ ꓛꓲ ꓡꓰꓳ꓿ ꓢ‐ꓡ‐ꓣꓴ ꓠꓬ ꓮ‐ꓐ‐ꓡ‐ꓦ ꓔꓬ
ꓟ ꓟꓴ ꓗꓪ ꓗꓴꓷꓼ ꓛꓲ ꓡꓰ ꓟ ꓥ ꓡꓳ꓿
ꓠꓬꓲ. ꓠꓬꓲ ꓗꓪ ꓣꓳ ꓡꓳ. ꓟꓳ ꓗꓷ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓪꓴ‐ꓢ ꓡꓰ ꓖꓶ ꓡ ꓟ ꓶꓻ ꓤ
ꓫꓱ. ꓤ ꓐꓰ ꓒꓴ ꓫꓵˍ ꓔꓯ ꓫ. ꓓꓴ ꓟꓷ ꓢꓴ ꓐꓴ ꓐꓰ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓥ ꓡꓳ꓿ ꓖꓳ ꓕꓲ ꓣꓳ
ꓐꓱ ꓶ ꓡꓰ ꓟꓽ ꓣꓱ ꓠ, ꓟ ꓥ ꓡꓳ꓿ꓣꓳ ꓕꓲ ꓣꓳ ꓐꓱ ꓶ ꓣꓱ ꓟ ꓠꓬ ꓝꓴꓲ ꓓꓽ ꓟ ꓥ ꓟ ꓐꓰ ꓣꓳ ꓦꓬꓼ ꓠꓬꓲ ꓖꓴ ꓡꓰ ꓟ ꓦꓬꓼ
ꓠꓬꓲ ꓗꓪ ꓪꓴ‐ꓢ ꓐꓯ ꓘꓶꓽ ꓔꓶ. ꓗꓪ ꓞꓳ ꓐꓳ ꓡꓰ ꓐꓰ ꓔꓳ, ꓜꓳ ꓡ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓞꓳ ꓐꓳ ꓐꓰ ꓡ‐ꓢ‐ꓣꓴ ꓔꓯ ꓥꓳꓽ ꓔꓯ ꓣꓳ ꓡꓳ. ꓟꓳ ꓗꓷ ꓟ ꓥ ꓡꓳ꓿ ꓡ‐ꓢ‐ꓣꓴ ꓠꓬ ꓮ ꓘꓶ. ꓛꓲ ꓫ. ꓓꓴ ꓟꓷ ꓓꓴ ꓔꓳ,
ꓜꓳ ꓔꓬ ꓢꓴ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓬ ꓟ ꓙꓵ, ꓕꓯ ꓟ. ꓒꓽ ꓓꓽ ꓐꓴ ꓥ ꓟ ꓑ‐ꓡꓲ‐ꓢꓷ ꓐꓴ ꓠꓬ ꓞꓳ ꓐꓳ ꓒꓴ ꓫꓵꓽ ꓙꓳ
ꓟ ꓠꓬ ꓮ ꓘꓶ. ꓛꓲ ꓔꓱ, ꓚꓵ ꓟ ꓢꓷ. ꓡꓲ ꓓꓴ ꓕꓲ ꓫꓵꓽ ꓥ ꓟ ꓔꓯ ꓘꓳ, ꓣꓴ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ
ꓕꓱ ꓥꓳꓽ ꓡꓰ ꓟ ꓓꓴꓽ ꓙ ꓚꓱ, ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓬ ꓡꓰ ꓝꓲ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓞꓳ ꓐꓳ ꓐꓰ
ꓡ‐ꓢ‐ꓣꓴ ꓔꓯꓽ ꓥꓳꓽ ꓔꓯ ꓟ. ꓖꓶ ꓟ ꓥ ꓡꓳ꓿ ꓞꓳ ꓐꓳ ꓠꓬ ꓕꓲ ꓞꓲ ꓛꓬ ꓟꓵꓽ ꓗꓪ ꓞꓰ ꓡ ꓢꓲ ꓠꓬꓲ ꓡ‐ꓢ‐ꓣꓴ ꓠꓬ ꓟꓴ ꓗꓪ
ꓗꓴꓷꓼ ꓗꓪ ꓛꓲ ꓡꓰ ꓟ ꓥ ꓡꓳ꓿
ꓦꓓꓢQꓦꓦ
ꓞꓳ ꓐꓳ ꓛꓬ ꓟꓵꓽ ꓗꓪ ꓞꓰ ꓡꓰ ꓟ ꓬꓲ ꓚꓱ, ꓠꓬ ꓬꓲ ꓠꓯ, ꓗꓪ ꓙꓳ ꓟ ꓒꓴ ꓫꓵˍ ꓐꓰ ꓶꓻ ꓤ ꓡꓰ ꓟꓽ ꓥ꓿ ꓬꓲ ꓠꓬ ꓠꓲ, ꓟ
ꓟꓽ ꓙꓲ ꓟ ꓪꓴ. ꓠꓬꓲ ꓥ ꓡꓳ꓿ ꓬꓲ ꓠꓯ, ꓗꓪ ꓙꓳ ꓟ ꓜꓽ ꓓꓴ ꓓꓳ ꓓꓴ ꓔꓯ ꓡ‐ꓢ‐ꓣꓴ ꓔꓯ ꓟꓽ ꓖꓶ ꓜꓽ ꓜꓽ ꓔꓬ ꓟ ꓪꓴ.
ꓠꓬꓲ ꓛꓬ ꓟꓵꓽ ꓗꓪ ꓛꓬ ꓡꓰ ꓟ ꓥ ꓡꓳ꓿
ꓞꓳ ꓐꓳ ꓠꓬ ꓬꓲ ꓠꓯ, ꓗꓪ ꓙꓳ ꓟ ꓒꓴ ꓫꓵˍ ꓐꓰ ꓶꓻ ꓤ ꓮ ꓟꓬ, ꓙꓳ ꓥ ꓟꓲ ꓫ. ꓓꓴ ꓟꓷꓼ ꓢꓴ ꓡ‐ꓢ‐ꓣꓴ ꓔꓯ ꓟꓽ ꓖꓶ ꓜꓽ
ꓬꓲ ꓠꓬ ꓮ ꓘꓶ. ꓛꓲ ꓞꓲꓻ ꓠꓲ, ꓟ ꓙꓳ ꓟ ꓪꓴ. ꓠꓬꓲ ꓛꓬ ꓟꓵꓽ ꓗꓪ ꓙꓰ ꓡꓰ ꓝꓲ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓒꓴ ꓫꓵ ꓐꓰ ꓣꓳ
ꓘꓳ, ꓣꓴ ꓪ ꓟ ꓢꓷ. ꓠꓲ, ꓮ ꓟꓬ, ꓙꓳˍ ꓟ ꓔꓯ ꓣꓳ ꓐꓱ ꓶ ꓡꓰ ꓣꓴ ꓓꓴ ꓟꓽ ꓥ꓿ ꓣꓳ ꓒ ꓕꓲ ꓗꓪ ꓔꓬ ꓢꓴ ꓫ. ꓓꓴ ꓟꓷ
ꓢꓴ ꓐꓴ ꓐꓰ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓐꓱ ꓶ ꓣꓱ ꓙ ꓠ, ꓟ ꓬꓰ ꓙ ꓠ, ꓟ ꓥ ꓡꓳ꓿ ꓕꓱ ꓡꓰ ꓐꓰ ꓣꓳ ꓠꓯ, ꓗꓪ ꓙꓳ ꓟ
ꓒꓴ ꓫꓵˍ ꓐꓰ ꓣꓳ ꓘꓳ, ꓣꓴ ꓪ ꓟ ꓣꓱ ꓛꓰ ꓔꓯ ꓮ ꓡꓰ ꓐꓰ ꓣꓱ ꓔꓬ ꓟ ꓔꓯ ꓚꓲ. ꓛꓬ ꓤ ꓟꓳ ꓠ, ꓟ ꓣꓳ ꓔꓯ ꓟ. ꓖꓶ ꓔ
ꓟ ꓥ ꓡꓳ꓿
ꓣꓳ ꓮ ꓙꓵꓽ ꓠꓬ ꓒꓴ ꓫꓵ ꓮ ꓟꓬ, ꓙꓳ ꓟ ꓞꓳ ꓐꓴ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓣꓳ ꓢꓷ. ꓟ ꓢꓷ. ꓠꓲ, ꓝꓮꓲ ꓣꓳ ꓘꓳ, ꓣꓴ
ꓪ ꓟ ꓖꓳ ꓓꓱ ꓔꓬ ꓠ, ꓟ ꓮ ꓙꓵꓽ ꓠꓬ ꓪꓴ‐ꓢ ꓡꓰ ꓖꓶ ꓔ ꓟ ꓔꓯ ꓣꓳ ꓓꓴ ꓙ ꓠ, ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ
ꓣꓳ ꓬꓰ ꓐ ꓡ ꓟ ꓟꓬꓱꓽ ꓔꓯ ꓙꓲ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓐꓰ ꓣꓱ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓣꓳ ꓶ ꓙꓳ ꓟ ꓥ
ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓘꓳ, ꓣꓴ ꓪ ꓟ ꓣꓱ ꓛꓰ ꓡꓯ ꓫꓴ ꓔꓯ ꓣꓳ ꓚꓲ. ꓛꓬ ꓐꓱ ꓡ ꓡꓰ ꓟꓽ ꓣꓱ ꓠ, ꓟ ꓐꓰ ꓣꓳ ꓒ ꓕꓲ ꓗꓪ
ꓔꓬ ꓢꓴ ꓐꓴ ꓐꓱ ꓶ ꓣꓱ ꓠ, ꓟ ꓣꓳ ꓔꓯ ꓢꓲꓺ ꓒ ꓡꓰ ꓐꓯ ꓔ ꓟ ꓥ ꓡꓳ꓿ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓐꓱ ꓶ ꓐ ꓡ ꓟ ꓕꓲ ꓒꓳ,
ꓗꓪ ꓐꓰ ꓬꓰ ꓙ ꓓꓴ ꓬꓰ ꓡꓯ꓿ ꓖꓶ ꓜ ꓖꓶ ꓓꓳ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓵꓻ ꓠꓲ, ꓔꓯ ꓟ. ꓖꓶ ꓓꓴ ꓬꓰ ꓡꓯ꓿ ꓕꓱ ꓡꓱ ꓬꓰ
ꓠꓬ ꓣꓳ ꓟꓲ ꓠꓯ ꓗꓪ ꓦꓬꓼ ꓠꓬꓲ ꓖꓴ ꓡꓰ ꓟ ꓕꓲ ꓠꓬꓲ ꓐ, ꓐ ꓠꓯ, ꓗꓪ ꓛꓲ ꓓꓴ ꓥꓳ꓿ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓓꓴ
ꓥꓳ꓿
ꓠꓴ ꓥꓪ ꓔꓯ ꓣꓳ ꓦꓬꓼ ꓠꓬꓲ ꓖꓴ ꓡꓰ ꓟ ꓕꓲ ꓠꓬꓲ ꓗꓪ ꓣꓳ ꓟꓲ ꓠꓯ ꓗꓪ ꓔꓬ ꓟ ꓙꓵ, ꓕꓯ ꓣꓳ ꓔꓯ ꓮ ꓫꓵꓽ ꓬꓰ ꓗꓷ ꓟ
ꓐ, ꓐ ꓪꓴ‐ꓢ ꓡꓰ ꓠ, ꓠꓬꓲˍ ꓡ ꓓꓴ ꓥꓳ꓿ ꓙꓲ ꓟ ꓟꓬꓱꓽ ꓮ ꓫꓵꓽ ꓣꓳ ꓬꓰ ꓗꓷ ꓡ꓿ ꓜ ꓓꓴ ꓓꓳ ꓓꓴ ꓔꓯ ꓫ. ꓓꓴ ꓟꓷ ꓢꓴ
ꓐꓴ ꓔꓯ ꓬꓰ ꓙ ꓗꓷ ꓡ? ꓐꓵ ꓞꓶꓽ ꓟꓽ ꓙꓳ ꓢꓴ ꓐꓴ ꓔꓯ ꓬꓰ ꓙ ꓗꓷ ꓡ? ꓣꓳ ꓠꓲ ꓛꓳ ꓕꓲ ꓛꓳ ꓔꓯ ꓠꓲ, ꓠꓵ ꓗꓷ ꓡ? ꓣꓳꓺ ꓓꓰ
ꓡꓰ ꓢꓴ ꓐꓴ ꓔꓯ ꓠꓲ, ꓠꓵ ꓗꓷ ꓡ? ꓐꓰ ꓣꓳ ꓔꓯ ꓠꓻ ꓠꓬꓲ ꓡ ꓓꓴ ꓙꓳ ꓟ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓢꓲꓺ ꓒ
ꓬꓰ‐ꓢꓴ ꓠꓬ ꓫ. ꓢꓴ ꓟꓷꓽ ꓢꓴ ꓐꓴ ꓔꓯ ꓬꓰ ꓙ ꓟ ꓠꓬ ꓬꓲ ꓔꓯ ꓬꓰ ꓙ ꓟ ꓐꓰ ꓕꓲ ꓡꓰ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓣꓳ ꓬꓰ ꓔꓬ ꓟ ꓟꓬꓱꓽ ꓣꓳ ꓙ ꓫꓱ, ꓔꓬ ꓟ ꓮ ꓙꓵꓽ ꓠꓬ ꓣꓳ ꓦꓬꓼ ꓠꓬꓲ ꓖꓴ ꓡꓰ ꓟ ꓙꓵ, ꓕꓯ ꓣꓳ ꓮ ꓡꓰ ꓗꓪ ꓙꓰ ꓠ, ꓟ
ꓔꓯ ꓣꓳ ꓬꓰ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓐꓯ ꓘꓶꓽ ꓔꓯ ꓠ ꓡꓳ ꓓꓴ ꓬꓰ ꓡꓯ꓿ ꓣꓳ ꓠꓯ, ꓗꓪ ꓙꓳ ꓟ
ꓒꓴ ꓫꓵ꓾ ꓢꓷ. ꓠꓲ, ꓣꓳ ꓬꓰ ꓐ ꓡ ꓟ ꓮ ꓙꓵꓽ ꓔꓯ ꓙꓲ ꓟ ꓟꓬꓱꓽ ꓗꓪ ꓠꓵꓻ ꓠꓲ, ꓡꓰ ꓢꓲꓺ ꓒ ꓠꓲ, ꓒꓴ ꓟ ꓚꓱ, ꓗꓪ ꓬꓰ ꓐ
ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
