ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ꓾ ꓪꓴ‐ꓢ ꓬꓲ ꓢꓲ ꓡꓲ ꓟ ꓡꓯꓼ ꓫꓴ ꓔꓯ ꓓꓰꓽ ꓠ, ꓟ ꓐꓱ ꓶ (10) ꓦ ꓘꓴꓽ ꓗꓪ ꓣꓳ‐ꓢ‐ꓡꓲ ꓪꓽ ꓘꓴ ꓠ, ꓟ ꓗ‐ꓔꓳ‐ꓡꓲꓗ ꓢꓲ ꓤ ꓐꓴ ꓔꓯ ꓕꓵꓼ ꓪ ꓖꓶ ꓗꓷ ꓢꓲ꓾ ꓟ, ꓟ ꓟ‐ꓡꓲ ꓔꓯ ꓦ ꓡꓱ ꓐꓳ ꓒꓵꓽ ꓗ ꓬꓰˍ ꓟ ꓙꓴ‐ꓐꓲ‐ꓡꓲ ꓑꓮꓲꓽ ꓬꓲ ꓡꓯꓼ ꓗ. ꓕꓲ ꓟ ꓐꓯ ꓢꓲ (10) ꓦ (11) ꓠꓬꓲ ꓕꓯ St. Peter Square ꓗꓪ ꓣꓳ‐ꓢ‐ꓣꓲ ꓪꓽ ꓘꓴˍ ꓟ ꓬꓰˍ ꓥꓳ꓾ ꓐꓰ ꓐꓯ ꓑꓶ ꓗꓷꓳ꓿

ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓢꓲꓽ ꓫꓬˍ ꓟ ꓣꓳ‐ꓢ‐ꓣꓲ ꓪꓽ ꓘꓴˍ ꓟ ꓔꓶꓻ ꓙꓱꓼ ꓗꓶ ꓔˍ ꓟ 10 ꓦ ꓗꓪ ꓟꓬꓽ ꓠꓬꓲ ꓠꓬ ꓟꓯꓼ ꓢꓰꓼ ꓡꓯ ꓘꓳ ꓔꓬ ꓟ ꓟꓵꓽ ꓐꓴ ꓗꓪ ꓢꓲ ꓡꓲ ꓟ ꓙꓳ ꓡ ꓠ, ꓟ ꓐꓱ ꓶ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓣꓳ‐ꓢ‐ꓣꓲ ꓪꓽ ꓘꓴˍ ꓟ ꓗꓪ ꓐꓰ ꓕꓲ ꓠꓲ, ꓕꓲ ꓪ ꓬꓰ ꓠ, ꓟ ꓥ ꓡꓳ꓿

ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ ꓕꓲ ꓠꓽ ꓡꓰ ꓕꓲ ꓠꓽ ꓠꓽ‐ꓢꓽ‐ꓠꓬꓲ ꓗꓪ ꓑ ꓫꓬꓼ ꓐꓴ ꓐꓰ ꓜꓲ ꓡꓯ ꓘꓳˍ ꓟ ꓗꓪ ꓕꓱ ꓟ ꓔꓯ ꓐꓯ ꓑꓶ ꓗꓷ ꓟ ꓥ ꓡꓳ꓿

ꓣꓳ‐ꓟ ꓡꓳ ꓒꓱ ꓗꓪ ꓟ ꓙꓵꓻ ꓢꓴ ꓐꓴ ꓠꓬ 2025 ꓘꓳꓼ꓾ 10 ꓦ (11) ꓠꓬꓲ꓾ ꓟꓶꓽ ꓘꓶꓼ (6) ꓙꓵ, ꓕꓯ ꓙꓲꓺ ꓫꓬ ꓢꓴ ꓒꓲ‐ꓕꓱ ꓑ, (St. Peter Square) ꓗꓪ ꓣꓳ‐ꓢ‐ꓣꓲ ꓪꓽ ꓘꓴ ꓠ, ꓟ꓾ “ꓛꓲ ꓡˍ ꓟ ꓕꓲ ꓦ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓕꓲ ꓣꓳ ꓗꓪ ꓐꓰ ꓥˍ ꓟꓲ꓾ ꓕꓲ ꓦꓲ ꓢꓴ ꓗꓪ ꓐꓰ ꓥˍ ꓟꓲ꓾ ꓬꓲ ꓜꓴꓻ ꓕꓲ ꓜꓴꓻ ꓗꓪ ꓐꓰ ꓥˍ ꓟꓲ ꓢꓲ ꓡꓲ ꓟ ꓐꓱ ꓶ ꓣꓳ‐ꓢ‐ꓣꓲ ꓪꓽ ꓘꓴ ꓠ, ꓟ ꓞꓳ ꓤ ꓮ ꓙꓵꓽ ꓔꓯ ꓥꓪ ꓘꓴꓻˍ ꓡꓳ꓾” ꓐꓰ ꓐꓯ ꓔ ꓡꓳ꓿

ꓔꓲꓺ ꓒ ꓪ ꓔꓲ. ꓠꓬ Vatican ꓗꓪ ꓟꓬꓱꓽ ꓬꓰ ꓔꓬ ꓢꓴ ꓮ ꓙꓵꓽ ꓔꓯ ꓥˍ ꓟꓲ (10) ꓦ ꓕꓲ ꓦ ꓡꓱꓸꓼ ꓙꓲꓻ ꓫꓬ ꓢꓴ ꓒꓲ‐ꓕꓱ ꓑ, (St. Peter Square) ꓪꓽ ꓘꓴ ꓦꓲꓻ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓶꓽ ꓘꓶꓼ (7) ꓙꓵ, ꓕꓯ ꓣꓳ‐ꓢ‐ꓣꓲ ꓪꓽ ꓘꓴ ꓠ, ꓟ ꓘꓴ ꓔˍ ꓡꓳ꓿

ꓑꓳ‐ꓔꓴ‐ꓖꓲ ꓙꓵꓻ ꓢꓴ ꓐꓴ ꓔꓯ ꓥˍ ꓟꓲ ꓫ. ꓕꓱˍ ꓟ ꓗꓪ ꓔꓲꓺ ꓒ ꓪ ꓔꓲ. ꓡꓰꓳ ꓡꓰ “ꓫꓵꓻ ꓝꓲ ꓐ ꓡˍ ꓟ ꓟꓽ ꓧꓳ, ꓡꓯ ꓘꓳ ꓟ ꓠꓲ, ꓟ ꓗꓪ ꓐꓰ ꓒꓬꓱꓼ ꓡˍ ꓟ ꓐꓬ ꓡꓰ ꓓꓴ ꓐꓴ ꓔꓯ ꓠꓲ, ꓟ ꓫ. ꓡꓳ꓾” ꓐꓰ ꓐꓯ ꓖꓶ ꓗꓷꓳ꓿

“ꓞꓳ ꓫꓵꓽ ꓞꓳ ꓙꓰꓽ ꓐꓴ ꓔꓯ ꓠꓬꓲ ꓟꓳꓻ ꓓꓴ ꓗꓪ ꓧꓳꓽ ꓙꓰ ꓖꓶˍ ꓟ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓔꓯ ꓠꓱ. ꓐꓯ ꓢꓴ ꓔꓯ ꓖꓶ ꓠ, ꓟ ꓙꓲ‐ꓢꓴ ꓢꓲ ꓤ ꓮ ꓙꓵꓽ ꓔꓯˍ ꓟꓲ ꓘꓴꓻ ꓗꓷ ꓟ ꓥ ꓡꓳ꓿

ꓢꓲ ꓡꓲ ꓟ ꓐꓱ ꓶ ꓣꓳ‐ꓢ‐ꓣꓲ ꓪꓽ ꓘꓴˍ ꓟ ꓔꓯ 10 ꓦ (11) ꓠꓬꓲ ꓐꓰ (12) ꓠꓬꓲ ꓗꓪ ꓟ, ꓟ ꓟ‐ꓡꓲ ꓔꓯ ꓦ ꓡꓱ ꓐꓳ ꓒꓵꓽ ꓗ ꓬꓰˍ ꓟ ꓙꓴ‐ꓐꓲ‐ꓡꓲ ꓑꓮꓲꓽ ꓦꓬꓼ ꓠꓬꓲ ꓬꓲ ꓘꓴꓽ ꓗꓪ ꓬꓰ ꓓꓴ ꓥꓳ꓿

ꓖꓳ ꓕꓲ ꓠꓬꓲ ꓠꓬ 1962 ꓘꓳꓼ꓾ 10 ꓦ (11) ꓠꓬꓲ ꓕꓯ ꓔꓲꓺ ꓒ ꓪ ꓔꓲ. St. John (23) ꓡꓰ ꓒꓴ ꓗꓷ ꓟ ꓠꓬꓲꓽ ꓧꓪ, ꓕꓲ ꓧꓪ, ꓟ Vatican Council ꓒꓴ ꓑꓮꓲꓽ (63) ꓘꓳꓼ ꓐꓲˍ ꓟ ꓘꓳꓼ ꓚꓳ ꓠꓬꓲˍ ꓟꓲ ꓥ ꓡꓳ꓿

ꓩ‐ꓔꓲ‐ꓟ ꓟ, ꓟ ꓐꓬꓱꓽ ꓔꓯ ꓣꓳ‐ꓢ‐ꓣꓲ ꓪꓽ ꓘꓴˍ ꓟ ꓐꓰ ꓟ, ꓟ ꓟ‐ꓡꓲ ꓔꓯ ꓦ ꓡꓱ ꓐꓳ ꓒꓵꓽ ꓗ ꓬꓰˍ ꓟ ꓙꓴ‐ꓐꓲ‐ꓡꓲ ꓑꓮꓲꓽ ꓐꓱ ꓶ ꓙꓲꓻ ꓫꓬ ꓢꓴ ꓒꓲ‐ꓕꓱ ꓑ, (St. Peter Square) ꓗꓪ ꓗꓶ ꓔ ꓓꓴ ꓥꓳ꓾ ꓐꓰ Vatican ꓓꓳꓽ ꓐꓯ ꓑꓶ ꓔꓶ. ꓗꓪ ꓐꓰ ꓐꓯ ꓑꓶ ꓔ ꓡꓳ꓿

News and Photo: Vatican News