ꓗ‐ꓔꓳ‐ꓡꓲ ꓘꓴ ꓜꓲꓼ ꓞꓳ ꓢꓲ ꓤ 700 ꓣꓳ ꓟꓽ ꓞꓲꓺ ꓠꓬ 2025 ꓘꓳꓼ 9 ꓦ 20 ꓠꓬꓲ ꓕꓯ ꓑꓬꓲ‐ꓳ‐ꓡꓪꓲꓠ ꓡꓳ ꓒꓱ꓾ ꓢꓲꓠ‐ꓡꓯ, ꓞꓳ ꓘ, ꓗꓪ ꓙꓳˍ ꓟ “ꓙꓲꓻ ꓫꓬ ꓢꓴ Padre Pio ꓔꓯ ꓒꓵꓽ ꓗ ꓬꓰˍ ꓟ ꓓꓴ ꓓꓳ ꓖꓴ” ꓐꓰ ꓢꓷ. ꓙ ꓟꓳ ꓙ ꓔˍ ꓟ ꓗꓪ ꓜꓲꓼ ꓡꓳꓽ ꓗꓷꓳ꓿
ꓟ‐ꓓ‐ꓡꓰ, ꓗ‐ꓔꓳ‐ꓡꓲꓗ ꓔꓲꓺ ꓒ ꓓꓽ Marco Tin Win ꓡꓰ ꓧꓳꓽ ꓪꓴ. ꓟꓴˍ ꓟ ꓢꓲꓽ ꓫꓬˍ ꓟ ꓟꓲ‐ꓢ ꓪꓽ ꓘꓴˍ ꓟ ꓠꓬ ꓟꓬ‐ꓟ ꓕꓲ ꓗꓴꓷꓼ ꓡꓱꓸꓼ ꓗꓪ ꓐꓰ ꓛꓲ ꓡ ꓗꓷ ꓟ ꓙꓵꓻ ꓢꓴ ꓢꓲ ꓤ ꓐꓴ ꓐꓱ ꓶ ꓪꓽ ꓘꓴˍ ꓟ ꓐꓰ ꓓꓵꓽ ꓙꓽ ꓠꓬꓲˍ ꓟ ꓗꓪ ꓬꓳ. ꓚꓰꓽˍ ꓟ ꓬꓲ ꓙꓵ, ꓕꓲ ꓙꓵ, ꓒꓬꓱꓼ ꓡ ꓗꓷꓳ꓿
ꓔꓲꓺ ꓒ ꓓꓽ Marco Tin Win ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓙꓲꓻ ꓫꓬ ꓢꓴ Padre Pio ꓔꓳ, ꓜꓳꓽ ꓗꓳ. ꓗꓷ ꓟ ꓫ. ꓙꓵ ꓓꓴ ꓐꓰ ꓟꓬ‐ꓟ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓫ. ꓙꓵ ꓓꓴ ꓔꓯ ꓔꓯꓺ ꓢꓲ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓗꓷꓳ꓿ ꓔꓲꓺ ꓒ ꓓꓽ ꓠꓬ ꓪꓽ ꓘꓴ ꓡ ꓢꓴ ꓐꓴ ꓔꓯ “ꓪꓽ ꓘꓴ꓾ ꓥꓳ ꓡꓳ. ꓓꓴ ꓔꓯˍ ꓟꓲ ꓕꓽ ꓒꓲꓼ ꓡꓰ ꓝꓲ” ꓐꓰ ꓐꓯˍ ꓟ ꓙꓲꓻ ꓫꓬ ꓢꓴ Padre Pio ꓬꓲ ꓐꓯ ꓘꓶꓽ ꓔꓯ ꓑ ꓫꓬ ꓐꓴ ꓙꓵꓻ ꓠꓲ, ꓔꓯ ꓠꓲ, ꓪꓴꓽ ꓪꓴꓽ ꓡꓰꓽ ꓛꓳ ꓫꓱꓽ ꓠ, ꓟ ꓬꓲꓼ ꓠꓬꓲ. ꓖꓶ ꓗꓷꓳ꓿
Padre Pio ꓠꓬ ꓐꓯ ꓘꓶꓽ ꓗꓪ ꓐꓰˍ ꓡꓰꓽ ꓟꓽ ꓞꓲꓺ ꓬꓲ ꓕꓲ ꓠꓲ, ꓟ ꓡꓱꓸꓼ ꓗꓪ ꓐꓰˍ ꓟꓲ ꓪꓽ ꓘꓴ ꓗꓷꓳ” ꓐꓰ ꓔꓲꓺ ꓒ ꓓꓽ ꓡꓰ ꓐꓯ ꓗꓷꓳ꓿ “ꓬꓲ ꓕꓲ ꓤꓶꓻ ꓡꓱꓸꓼ ꓗꓪ ꓬꓲ ꓔꓯ ꓗꓽ ꓕ. ꓓꓴ ꓮ ꓟꓬ, ꓙꓳˍ ꓥ ꓟꓲ꓾ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓯꓼ ꓐꓳ ꓔꓶ. ꓓꓴ ꓗꓪ ꓟꓶˍ ꓟ ꓠꓻ ꓓꓴ ꓑ ꓐꓰ ꓕꓲ ꓡꓰ, ꓠꓻ ꓓꓴ ꓟꓶ ꓡꓰ ꓢꓲ ꓠꓬꓲ ꓬꓲ ꓖꓳ ꓓꓱꓽ ꓐꓰ ꓠꓲ, ꓟ ꓫ. ꓙꓵ ꓓꓴ ꓮ ꓙꓵꓽ ꓔꓯ ꓜꓲꓽ ꓗꓷ ꓢꓲ ꓕꓶꓺ ꓕꓶꓺ ꓡꓰꓽ ꓦꓰꓼ ꓞ, ꓗꓷꓳ꓿”
ꓔꓲꓺ ꓒ ꓓꓽ Marco ꓡꓰ ꓔꓯꓺ ꓢꓳ ꓓꓴ ꓕꓱ ꓟ ꓠꓬ ꓮ ꓟꓶ ꓕꓲ ꓞꓲꓼ ꓗꓪ ꓮ ꓘꓶ. ꓬꓳ. ꓚꓰꓽˍ ꓡꓳ꓾ ꓐꓰ ꓐꓯˍ ꓡꓳ꓿ “ꓐꓯ ꓘꓶꓽ ꓕꓱ ꓟ ꓠꓬ ꓣꓳ ꓔꓯ ꓣꓳ ꓙꓲ‐ꓢꓴ ꓢꓲ ꓤ ꓙꓵꓻ ꓠꓲ, ꓔꓯ ꓠꓲ, ꓪꓴꓽ ꓪꓴꓽ ꓡꓰ ꓛꓳꓻ ꓫꓱꓽ ꓠ, ꓟ ꓝ. ꓢꓲ ꓬꓲ ꓚꓱ, ꓟ. ꓖꓶ ꓔꓬ ꓡꓳ” ꓐꓰ ꓬꓲ ꓡꓰ ꓐꓯˍ ꓡꓳ꓿ Padre Pio ꓡꓰ ꓐꓰ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓔꓳ, ꓜꓳꓽ ꓔꓬ ꓪˍ ꓟ ꓫ. ꓙꓵ ꓓꓴ ꓔꓯ ꓙꓵꓻ ꓠꓲ, ꓗꓪ ꓐꓰ ꓡꓯꓼ ꓫꓵ ꓡꓯꓼ ꓙꓱ ꓠ, ꓟ꓾ ꓫꓱ. ꓤ ꓠꓲ, ꓦꓵꓻ ꓠ, ꓟ ꓐꓰ ꓪꓽ ꓘꓴˍ ꓟ ꓗꓪ ꓣꓳ ꓗꓶ ꓔ ꓟ ꓪꓵꓼ ꓙꓱꓼ ꓘꓶꓽ ꓔꓯ ꓛꓳꓻ ꓫꓱꓽ ꓠ, ꓟ ꓘꓴ ꓔ ꓟ ꓟꓶˍ ꓡꓳ꓿”
ꓑꓮꓲꓽ ꓕꓱ ꓟ ꓗꓪ ꓙꓲꓻ ꓫꓬ ꓢꓴ Padre Pio ꓪꓽ ꓘꓴ ꓙ ꓖꓶˍ ꓟ ꓗꓪ ꓐꓰ ꓟꓬ ꓢꓶꓽ ꓠꓻ ꓫꓬ, ꓗꓷ ꓢꓲ ꓓꓻ ꓡꓰ ꓗꓷ ꓟ ꓞꓳ ꓔꓲꓺ ꓟ Anthony Ma ꓥ ꓟꓲ ꓢꓷ. ꓙ ꓟꓳ ꓙ ꓗꓷꓳ꓿
ꓠꓱ. ꓐꓯ ꓕꓲ ꓣꓳ ꓥ ꓟ ꓞꓳ ꓔꓲꓺ ꓟ Maria Lu Bu ꓠꓬ꓾ “ꓥꓪ ꓠꓬ Padre Pio ꓔꓯ ꓪꓽ ꓘꓴˍ ꓕ ꓑꓳꓸꓼ ꓥꓪ ꓪꓽ ꓘꓴ ꓘꓶꓽ ꓠꓬ ꓐꓲꓻ ꓜꓲꓼ ꓡꓰˍ ꓡꓳ” ꓐꓰ ꓐꓯ ꓢꓲ꓾ ꓬꓲ ꓙꓵꓻ ꓠꓲ, ꓚꓱ, ꓔꓯ ꓐꓯ ꓟ. ꓖꓶ ꓗꓷꓳ꓿
ꓢꓲꓠ‐ꓡꓯ, ꓞꓳ ꓘ, ꓗꓪ ꓙꓳˍ ꓟ ꓪꓽ ꓘꓴ ꓦꓲꓻ ꓐꓰ ꓙꓲꓻ ꓫꓬ ꓢꓴ Padre Pio ꓔꓯ ꓒꓵꓽ ꓗ ꓬꓰˍ ꓟ ꓓꓴ ꓓꓳ ꓖꓴ ꓔꓯ 2022 ꓘꓳꓼ ꓗꓪ ꓐꓰ 2024 ꓘꓳꓼ ꓘꓴꓽ ꓗꓪ ꓡ‐ꓫꓬꓳ ꓡꓳ ꓒꓱ ꓗꓪ ꓐꓰ U Da Shi Awng Htun꓾ Daw Teresa Hwng Nan ꓐꓰ ꓬꓲ ꓪ ꓮ. ꓟꓲꓽ ꓐꓴ ꓥ ꓟ Seng Nu Mai ꓐꓰ Agatha May Seng Htoi ꓐꓴ ꓡꓰ ꓬꓰ ꓙ ꓔꓳ, ꓙ ꓢꓲ ꓫꓬ, ꓔˍ ꓟ ꓥ ꓡꓳ꓿
ꓢꓲꓠ‐ꓡꓯ, ꓔꓲꓺ ꓒ ꓥ ꓟ La Salette ꓜꓴ ꓔꓲꓺ ꓒ Lucas Swin Za Lian ꓡꓰ ꓑꓮꓲꓽ ꓔꓯ ꓧꓪ. ꓧꓪꓸꓼˍ ꓐꓰ ꓬꓰ ꓓꓳ ꓡꓰ ꓟ ꓑꓶ. ꓓꓴ ꓫ. ꓟꓳ ꓘꓶꓽ ꓫ. ꓕꓱ ꓗꓷꓳ꓿ ꓟ‐ꓓ‐ꓡꓰ, ꓢꓽ‐ꓢꓶꓽ‐ꓠ ꓘꓴꓽ ꓗꓪ “ꓙꓲꓻ ꓫꓬ ꓢꓴ Padre Pio ꓔꓯ ꓒꓵꓽ ꓗ ꓬꓰˍ ꓟ ꓓꓴ ꓓꓳ ꓖꓴ” ꓕꓲ ꓟ ꓫꓬ, ꓔꓶ ꓐ ꓡˍ ꓟ ꓪꓴ. ꓠꓬꓲ ꓥꓪ ꓮ ꓘꓶ. ꓗ, ꓛꓲꓽˍ ꓡꓳ” ꓐꓰ ꓬꓲ ꓡꓰ ꓐꓯ ꓢꓲ꓾ ꓒꓴ ꓗꓪ ꓐꓰ ꓬꓰ ꓙ ꓔꓳ, ꓙ ꓡ ꓢꓴ꓾ ꓖꓳ ꓓꓱꓽ ꓗꓪ ꓐꓰ ꓬꓰ ꓙ ꓢꓴ ꓐꓰ ꓪꓽ ꓘꓴ ꓡ ꓢꓴ ꓢꓲ ꓤ ꓐꓴ ꓮ ꓙꓵꓽ ꓔꓯ ꓫ. ꓟꓳ ꓘꓶꓽ ꓫ. ꓕꓰ ꓗꓷꓳ꓿
ꓙꓲꓻ ꓫꓬ ꓢꓴ Padre Pio ꓑꓮꓲꓽ ꓠꓬ 9 ꓦ (23) ꓕꓯ ꓬꓯꓼˍ ꓡꓳ ꓐꓯˍ ꓥ ꓟꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓱ ꓶ ꓓꓵꓽ ꓙꓽ ꓢꓴ 9 ꓦ (20) ꓠꓬꓲ ꓠꓽ ꓛꓳꓼ ꓠꓬꓲ ꓕꓯ ꓬꓰ ꓗꓷ ꓟ ꓥ ꓡꓳ꓿
credit to RVA Myanmar
