ꓟꓬ ꓠꓬꓲ ꓔꓱꓹ ꓜꓳ_ ꓟ꓾ ꓬꓲꓸ ꓚꓱꓹ ꓙꓳ_ ꓟ ꓟꓲ ꓠꓯ ꓗꓷ ꓡꓰ ꓠꓹ ꓟ ꓪꓴ-ꓢ ꓣꓱ ꓛꓰ ꓔꓯ ꓣꓱꓽ ꓓꓴ ꓬꓰ ꓡꓯ꓾
ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ_ ꓟ ꓙꓵꓹ ꓐꓰ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓟꓽ ꓔꓱꓹ ꓟ ꓦꓲ ꓙꓵꓽ ꓢꓴ ꓔꓯ ꓥꓳꓽ ꓗꓪ ꓐꓰ ꓪꓴ-ꓢ ꓗꓪ ꓐꓰ ꓪ ꓟꓶ_ ꓟ ꓡꓯꓽ ꓫꓴꓻ ꓐꓰ ꓮ ꓙꓵ ꓟ ꓓꓰ ꓢ ꓒꓵꓽ ꓓꓰ ꓪꓴꓽ ꓓꓰ ꓡꓰ ꓟ ꓚꓲ ꓛꓬ ꓤꓶꓻ ꓔꓯ ꓮ ꓡꓰ ꓐꓰ ꓙ ꓘꓶꓽ ꓢꓲ ꓙꓵꓽ ꓔꓬ ꓟ ꓔꓯ ꓪꓽ ꓘꓴ ꓜꓲꓼ ꓡ ꓢꓴ ꓙꓲ ꓢꓴ ꓢꓲꓺ ꓤ ꓐꓴ ꓔꓯ ꓚꓲ ꓛꓬ ꓔꓱꓹ ꓚꓲ ꓛꓬ ꓔꓱꓹ ꓕ ꓠꓬꓲ ꓠꓹ ꓟ ꓐꓯ ꓔ ꓡꓳ=
ꓣꓳ ꓠꓬ ꓣꓳ ꓚꓲ ꓛꓬ ꓤꓶꓻ ꓢꓲ ꓒꓽ ꓟꓽ ꓥ ꓟ ꓡꓰ ꓐꓰ ꓣꓳ ꓣꓱꓽ ꓔꓬ ꓟ ꓖꓴ ꓙꓴ ꓠꓲꓹ ꓫꓬꓹ ꓢꓲ ꓒꓽ ꓥ ꓟꓲ ꓟꓽ ꓥ꓾ꓣꓳ ꓠꓯꓼ ꓗꓪ ꓙꓳ ꓟ ꓠꓬ ꓪꓴ-ꓢ ꓣꓱ ꓛꓰ ꓥ ꓢꓲ ꓠꓬꓲ ꓕꓱ ꓟ ꓠꓬ ꓣꓳ ꓠꓬꓲ ꓙ ꓡꓳꓸ ꓙ ꓟ꓾ ꓣꓳ ꓠꓯꓼ ꓗꓪ ꓪꓴ-ꓢ ꓡꓰ ꓡꓯꓼ ꓙꓱ ꓔ ꓟ ꓡꓰ ꓥ ꓡꓳ= ꓟꓽ ꓔꓱꓹ ꓟ꓾ ꓕꓲ ꓑꓹ ꓞ ꓡꓰ ꓥ ꓟ ꓟꓲ ꓠꓯ ꓒꓴ ꓫꓵꓺ ꓐꓰ ꓙꓻ ꓡꓯꓽ ꓘꓳ ꓢꓲ ꓕꓱ ꓟ ꓗꓪ ꓐꓰ ꓬꓲ ꓙꓵꓹ ꓖꓴ ꓡꓰ ꓕꓯ ꓣꓳ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓐꓰ ꓘꓳꓹ ꓣꓴ ꓠꓹ ꓟ꓾ ꓢꓲ ꓒ ꓬꓰ-ꓢꓴ ꓡꓰ ꓘꓴ ꓔ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=
ꓕꓱ ꓟꓲ ꓠꓯ ꓖꓴ ꓙꓴ ꓠꓲꓹ ꓫꓬꓹ ꓠꓬ ꓕꓲ ꓑꓹ ꓞꓹ ꓡꓰ ꓥ ꓡꓳ꓾ ꓕꓱ ꓟꓽ ꓔꓱꓹ ꓟ ꓦꓲꓻ ꓙꓵꓽ ꓢꓴ ꓠꓬ ꓟꓽ ꓔꓱꓹ ꓔꓱꓹ ꓬꓰ ꓔ ꓟ ꓬꓲ ꓶ ꓡꓯꓼ ꓢꓪꓸ ꓔꓯ ꓟꓸ ꓝꓲ_ ꓟ ꓕꓲ ꓠꓬꓲ ꓬꓲ ꓔꓯ ꓟꓬꓱꓽ ꓗꓪ ꓐꓰ ꓓꓳ ꓙꓰ ꓟ ꓗꓪ ꓛꓲ ꓬꓲ ꓚꓲ ꓛꓬ ꓐꓱ ꓶ ꓡꓰ ꓓꓵꓽ ꓙ ꓔ ꓟ ꓥ ꓡꓳ=ꓕꓱ ꓡꓱ ꓗꓷ ꓡꓰ ꓕꓯ ꓢꓲ ꓬꓲ ꓡ ꓠꓹ ꓟ ꓤꓶꓻ ꓐꓱ ꓶ ꓮ ꓡꓰ ꓦꓰꓼ ꓞꓹ ꓫꓬꓹ ꓔꓶꓻ ꓠꓹ ꓟ ꓔꓯ ꓓꓵꓽ ꓙ ꓔ ꓡꓳ꓾ ꓟꓲ ꓠꓯ ꓒꓴ ꓫꓵꓻ ꓠꓬ ꓕꓲ ꓑꓹ ꓞ ꓡꓰ ꓥ ꓟ꓾ ꓬꓲ ꓒꓵꓽ ꓪꓴꓽ ꓓꓰ ꓡꓰ ꓟ ꓟꓽ ꓥ ꓟ ꓔꓯ ꓬꓲ ꓢꓷꓸ ꓡꓰ ꓟ ꓥ ꓡꓳ=
ꓬꓲ ꓕꓱ ꓡꓱ ꓫꓸ ꓔꓬ ꓟ ꓙꓵꓹ ꓗꓪ ꓬꓲ ꓔꓯ ꓬꓰ ꓙ ꓡ ꓢꓴ ꓛꓳ ꓒꓯꓹ ꓪ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓥ ꓡꓳ=ꓕꓱ ꓡꓱ ꓕꓲ ꓑꓹ ꓞ ꓡꓰ ꓥ ꓟꓲ ꓟꓲ ꓠꓯ ꓒꓴ ꓫꓵꓻ ꓔꓯ ꓣꓱ ꓢꓲ ꓠꓬꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓪ ꓟꓶ ꓠꓹ ꓟ ꓢꓯꓼ ꓕꓵꓼ ꓠ ꓔ ꓡꓳ= ꓕꓲ ꓣꓳ ꓐꓰ ꓕꓲ ꓣꓳ ꓙꓻ ꓡꓯ ꓘꓳ ꓢꓲ ꓪꓴ-ꓢ ꓐꓰ ꓙꓻ ꓡꓯ ꓘꓳ ꓟ ꓠꓬ ꓔꓱꓹ ꓟ ꓐꓳ ꓢ_ ꓟ ꓥ ꓡꓳ= ꓟꓽ ꓔꓱꓹ ꓟ ꓦꓲ ꓙꓵꓽ ꓢꓴ ꓡꓰ ꓬꓲ ꓔꓯ ꓬꓰ ꓙ ꓢꓴ ꓛꓳ ꓒꓯꓹ ꓧꓪ ꓘꓴ ꓠꓬ꓾ ꓕꓱ ꓟꓲ ꓠꓯ ꓗꓪ ꓣꓳ ꓠꓯꓼ ꓗꓪ ꓙꓳ_ ꓟ ꓔꓯ ꓣꓱꓽ ꓢꓲ ꓠꓶꓽ ꓛꓳ ꓕꓲ ꓛꓳ ꓐꓰ ꓛꓳ ꓒꓯꓹ ꓬꓰ ꓢꓲ꓾ ꓪꓴ-ꓢ ꓐꓰ ꓛꓳ ꓒꓯꓹ ꓗꓷ ꓠꓹ ꓟ ꓬꓰ ꓠ ꓔ ꓟ ꓥ ꓡꓳ=
ꓔꓲꓺ ꓒ ꓪ ꓔꓲ ꓡꓰ ꓬꓲꓸ ꓟꓶꓽ ꓗꓪ ꓐꓰ ꓕꓱ ꓟꓽ ꓔꓱꓹ ꓟ ꓦꓲ ꓙꓵꓽ ꓒꓽ ꓬꓲ ꓔꓯ ꓥꓳꓽ ꓠꓬ ꓣꓳ ꓠꓯꓼ ꓗꓪ ꓙꓳ_ ꓟ ꓪ ꓟꓶ ꓔ ꓟ ꓒꓴ ꓫꓵꓺ ꓔꓯ ꓮ ꓡꓰ ꓐꓰ ꓙ ꓖꓶ ꓔꓬ ꓟ ꓔꓯ ꓓꓵꓽ ꓙ ꓔꓱꓹ ꓕ ꓠꓹ ꓟ ꓘꓴ ꓔ ꓟ ꓥ ꓡꓳ=
ꓚꓲ ꓛꓬ ꓐꓱ ꓶ ꓡꓰ ꓓꓵ ꓙ ꓔ ꓡ꓾ ꓟꓽ ꓥ ꓠꓬ ꓕꓱ ꓟ ꓮ ꓙꓵ ꓠꓬ ꓪꓴ-ꓢ ꓠꓯꓼ ꓗꓪ ꓐꓰ ꓖꓶ ꓡ ꓟ ꓣꓱ ꓛꓰ ꓥꓳ ꓐꓰ ꓓꓵꓽ ꓙ ꓔꓬ ꓡ꓾ ꓕꓱ ꓟ ꓔꓯ ꓣꓱ ꓢꓲ ꓟꓬ ꓠꓬꓲ ꓔꓱꓹ ꓟ ꓬꓲ ꓚꓱꓹ ꓙꓳ_ ꓟ ꓟꓲ ꓠꓯ ꓔꓯ ꓫꓬꓹ ꓔꓶ ꓠꓹ ꓟ ꓣꓱ ꓔꓬ ꓡ ꓐꓰ ꓓꓵ ꓙ ꓠꓹ ꓟ ꓥ ꓡꓳ=
ꓪꓴ-ꓢ ꓡꓰ ꓖꓶ ꓔ ꓟ ꓶꓼ ꓤ ꓫꓱꓹ ꓤ ꓣꓱ ꓛꓰ ꓔꓯ ꓔꓱꓹ ꓟ ꓐꓰ ꓢꓷꓸ ꓗꓴꓸ_ ꓟ ꓗꓪ ꓙ ꓜꓲꓼ ꓗꓴꓸ ꓠꓹ ꓟ ꓔꓱꓹ ꓟ ꓦꓲ ꓙꓵꓽ ꓢꓴ ꓒꓬꓱꓼ ꓡꓰ ꓠꓹ ꓟ ꓟꓹ ꓟ ꓟ-ꓡꓲ ꓡꓰ ꓠꓬꓲ ꓗꓳꓸ ꓚꓸ ꓗꓪ ꓪꓽ ꓘꓴ ꓙ ꓖꓶ ꓓꓴ ꓪ ꓟꓶ ꓠꓹ ꓟ ꓟꓹ ꓟ ꓟ-ꓡꓲ ꓠꓯꓼ ꓗꓪ ꓪꓽ ꓘꓴ ꓠꓹ ꓟ ꓢꓯꓼ ꓖꓶ ꓔ ꓡꓳ=
