https://youtu.be/mstilZAlUyE

ꓣꓳ ꓤꓶꓻ ꓔꓯ ꓕꓲ ꓠꓬꓲ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓟ ꓚꓱ, ꓗꓪ ꓡꓰꓽ ꓙꓰ ꓔꓬ ꓥꓳ ꓐꓯ ꓠꓬ ꓕꓲ ꓖ ꓕꓲ ꓧꓪ, ꓗꓪ ꓐꓴ ꓓꓴ ꓒꓬꓱꓼ ꓡˍ ꓥꓳ꓿ ꓮ ꓟꓶ ꓣꓳ ꓞꓳ ꓙꓳ ꓔꓬ ꓟ ꓚꓱ, ꓠꓬ ꓟꓲꓽ ꓕꓯ ꓢꓲ ꓗꓪ ꓪꓴꓽ ꓟꓴ ꓡ ꓠ, ꓟ ꓐꓰ ꓣꓳ ꓤꓶꓻ ꓗꓪ ꓙꓲꓻ ꓓꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓬꓳ. ꓚꓰꓽˍ ꓟ ꓥ ꓡꓳ꓿ ꓖꓳ ꓟˍ ꓡꓰ ꓐꓰ ꓟꓲꓽ ꓕꓯ ꓢꓲ ꓟ ꓤꓶꓻ ꓐꓱ ꓶ ꓢꓰ ꓢꓰ ꓡꓰꓽ ꓓꓵꓽ ꓙ꓾ ꓢꓰ ꓢꓰ ꓡꓰꓽ ꓣꓱꓽ ꓬꓰˍ ꓟ ꓥ ꓟꓲ ꓢ ꓖꓶ ꓕꓯ ꓙꓲꓻ ꓖꓴ ꓙꓳ ꓠ, ꓟ ꓐꓱ ꓶ ꓬꓳ. ꓚꓰꓽˍ ꓟ ꓥ ꓡꓳ꓿ ꓮ ꓟꓶ ꓐꓰ ꓡ ꓠ, ꓟ ꓦꓬꓼ ꓠꓬꓲ꓾ ꓦꓬꓼ ꓠꓬꓲ ꓕꓱ ꓠꓬꓲꓽ ꓟ ꓔꓯ ꓔꓲ ꓟꓴ. ꓗꓷ ꓡꓰ ꓝꓲ ꓠ, ꓟˍ ꓟꓲ ꓬꓳ. ꓚꓰꓽˍ ꓡꓳ꓿ ꓣꓳ ꓤꓶꓻ ꓔꓯ ꓟꓽ ꓐꓴ ꓐꓴ ꓐꓰ ꓮ ꓕꓯ ꓟꓲ ꓬꓲ ꓫꓵꓼ ꓒꓬꓱꓼ ꓔꓬ ꓟ ꓚꓱ, ꓗꓪ ꓐꓰ ꓞꓳ ꓙꓳ ꓔꓬ ꓠꓲ, ꓫꓵˍ ꓥꓳ ꓐꓯ ꓠꓬ ꓮ ꓟꓶ ꓐꓯ ꓟ. ꓖꓶˍ ꓟ ꓚꓱ, ꓐꓴ ꓔꓯ ꓠ ꓠ, ꓢꓲ ꓕꓲ ꓡꓰ, ꓛꓳꓻ ꓫꓱꓽ ꓓꓴ ꓬꓰ ꓡꓯ꓿

• ꓬꓲ ꓙꓵ, ꓕꓲ ꓑ, ꓤ ꓖꓶ ꓢꓲ ꓠꓬꓲ ꓓꓵꓽ ꓙꓽ ꓠꓬꓲ꓾

ꓣꓳ ꓕꓲ ꓫꓵꓽ ꓫꓵꓽ ꓬꓰ ꓠ, ꓟ ꓓꓵꓽ ꓙ ꓞꓷ,ˍ ꓕꓯ ꓔꓱ, ꓔꓱ, ꓚꓵ ꓚꓵ ꓡꓰꓽ ꓓꓵꓽ ꓙꓽ ꓫꓪ. ꓠꓬꓲ ꓐ ꓡ ꓠ, ꓟ ꓐꓱ ꓶ ꓕꓲ ꓑ, ꓤ ꓬꓲ ꓙꓵ, ꓖꓶ ꓢꓲ ꓓꓵꓽ ꓙꓽ ꓠꓬꓲ ꓢꓲ ꓠꓬꓲ꓾ ꓚꓲ. ꓛꓬ ꓠꓲ, ꓟ ꓗꓪ ꓓꓳ ꓡˍ ꓟ ꓠꓲ, ꓡꓶꓽ ꓔꓯ ꓠ ꓠ, ꓠ ꓗ, ꓡꓳ꓿ ꓟꓬꓱꓽ ꓔꓯ ꓕꓲ ꓟ ꓗ ꓠꓯ. ꓕꓲ ꓟ ꓞꓼ ꓞꓼ ꓐꓰ ꓧꓶꓽ ꓧꓶꓽ ꓟꓽ ꓬꓰ ꓬꓰ ꓮ ꓤ ꓮ ꓤ ꓐꓰ ꓮ ꓡꓲ ꓬꓰ ꓠ ꓔˍ ꓡ ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ꓿ ꓮ ꓟꓶ ꓕꓲ ꓙꓵ, ꓗꓪ ꓚꓵ ꓚꓵ ꓬꓰ ꓠꓲ, ꓫꓵˍ ꓟ ꓠꓬ ꓮ ꓫꓵꓽ ꓥ ꓡ꓾ ꓐꓯˍ ꓟ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠ ꓠꓬꓲ ꓠꓬꓲ꓿ ꓕꓱ ꓟ ꓔꓯ ꓬꓰˍ ꓥꓳ ꓐꓰ ꓓꓵꓽ ꓙꓽ ꓞꓷ, ꓔˍ ꓟ ꓔꓯ ꓬꓰ ꓒꓬꓱꓼ ꓡ ꓠ, ꓟ ꓮ ꓡꓲ ꓬꓰ ꓠ ꓔˍ ꓟ ꓚꓱ, ꓔꓯ ꓥˍ ꓟꓲ ꓓꓵꓽ ꓙꓽ ꓠꓬꓲ꓿ ꓕꓲ ꓑ, ꓤ ꓬꓲ ꓙꓵ, ꓣꓴ ꓢꓲ ꓜꓲ ꓜꓲ ꓟꓵ ꓟꓵ ꓓꓵꓽ ꓙˍ ꓟ ꓠꓬ ꓠꓴ ꓔꓯ ꓔꓱ, ꓚꓵˍ ꓟ ꓚꓱ, ꓕꓲ ꓟ ꓔꓯ ꓧꓪ ꓟꓳꓻ ꓐ ꓡ ꓠ, ꓟ ꓬꓰ ꓙ ꓖꓶˍ ꓥꓳ꓿

• ꓠꓲ, ꓟ ꓓꓵꓽ ꓙꓽ ꓚꓱ,ꓡꓶ. ꓗꓷ꓾

ꓞꓳ ꓤ ꓤꓶꓻ ꓠꓬ ꓒꓬꓱꓽ ꓟꓬ ꓓꓴ ꓕꓲ ꓟ꓾ ꓟꓬ ꓐ ꓕꓲ ꓟˍ ꓡꓰ ꓐꓰ ꓥꓳ꓿ ꓠꓴ ꓓꓵꓽ ꓙꓽ ꓔˍ ꓟ ꓡꓰ ꓠꓴ ꓤꓶꓻ ꓗꓪ ꓒꓬꓱꓼ ꓡ ꓔꓬ ꓟ ꓥ ꓡꓳ꓿ ꓠꓴ ꓬꓲ ꓫꓱ, ꓡꓰ ꓐꓰ ꓤꓶꓻ ꓗꓪ ꓝ. ꓢꓲ ꓞꓳ ꓙꓳ ꓙꓰˍ ꓥꓳ ꓐꓯˍ ꓕꓯ ꓠꓽ ꓴꓠꓚꓳꓠꓚꓲꓳꓴꓢ ꓐꓰ ꓐꓯˍ ꓟ ꓣꓳ ꓟꓽ ꓚꓬ, ꓪ ꓔꓬ ꓟ ꓣꓳ ꓟꓽ ꓢꓷ. ꓢꓷ. ꓒꓬꓱꓼ ꓔꓬ ꓟ ꓠꓲ, ꓡꓶꓽ ꓔꓯ ꓟꓽ ꓟꓳꓻ ꓗꓷ ꓡꓰ ꓝꓲ ꓐ ꓡˍ ꓡꓳ꓿ (ꓦꓲꓓꓰꓳ ꓠꓬ, ꓤ ꓢꓯꓼ꓾ ꓟꓶꓽ ꓘꓶꓼ ꓢꓯꓼ ꓧꓳꓽ ꓠ, ꓟ) ꓠꓬꓲ. ꓠꓬꓲ ꓗꓪ ꓡꓰꓽ ꓬꓲ ꓙꓵ, ꓕꓲ ꓑ, ꓤ ꓣꓴ ꓢꓲ ꓓꓵꓽ ꓙꓽ ꓠꓬꓲ ꓡꓯ꓿ ꓟꓶꓽ ꓘꓶꓼ ꓟꓰ ꓡˍ ꓕꓯ ꓕꓲ ꓠꓬꓲ ꓡꓱꓸꓼ ꓣꓱꓽ ꓬꓰ ꓗꓷ ꓟ꓾ ꓞꓳ ꓙꓳ ꓗꓷ ꓟ ꓮ ꓙꓵꓽ ꓔꓯ ꓓꓵꓽ ꓙꓽ ꓠꓬꓲ= ꓕꓲ ꓫꓵꓽ ꓫꓵꓽ ꓔꓯ ꓠꓲ, ꓟ ꓟꓽ ꓢꓻ ꓓꓴ ꓙꓳˍ ꓕꓯ ꓠꓽ ꓖꓳ ꓟ ꓔꓯ ꓠꓴ ꓠꓲ, ꓟ ꓗꓪ ꓐꓰ ꓣꓴ ꓦ ꓗꓷ ꓢꓲ ꓕꓲ ꓠꓬꓲ ꓡꓱꓸꓼ ꓗꓪ ꓗ, ꓛꓲꓽ ꓗꓳ. ꓡ ꓟ ꓚꓱ, ꓔꓯ ꓓꓵꓽ ꓙꓽ ꓗꓷ꓿

• ꓡꓯꓼ ꓕꓲꓺ ꓣꓱꓽ ꓬꓰ ꓐ ꓡˍ ꓟ ꓚꓱ, ꓔꓯ ꓧꓪ ꓠꓬꓲ꓾

ꓟꓬꓱꓽ ꓓꓳ ꓙꓳˍ ꓟ ꓮ,‐ꓗ‐ꓢ, ꓬꓰ ꓢꓴ ꓐꓴ ꓠꓬ ꓬꓲ ꓪ ꓬꓰˍ ꓟ ꓟꓬꓱꓽ ꓗꓪ ꓧꓪ. ꓡꓰ ꓐ ꓡ ꓠ, ꓟ ꓐꓱ ꓶ ꓮ ꓟꓬ, ꓘꓳꓼ ꓬꓲ ꓪ ꓠꓲ, ꓟ ꓗꓪ ꓬꓲ ꓪ ꓮ ꓡꓲ ꓒꓬꓱꓼ ꓡ ꓠꓲ, ꓫꓵˍ ꓟ ꓔꓯ ꓧꓶ. ꓕꓯ ꓓꓵꓽ ꓙꓽˍ ꓟ ꓚꓱ, ꓔꓯ ꓣꓱꓽ ꓩꓴ ꓡ ꓗꓷ ꓟ ꓥ ꓡꓳ꓿ ꓣꓳ ꓥˍ ꓟꓲ ꓚꓱ, ꓕꓱ ꓟ ꓔꓯ ꓣꓱꓽ ꓢꓲ ꓠꓬꓲ꓾ ꓣꓳ ꓔꓶ ꓙꓱꓼ ꓔꓯ ꓠꓲ, ꓟ ꓗꓪ ꓓꓵꓽ ꓙꓽ ꓠꓬꓲ ꓢꓲ꓾ ꓡꓳꓽ ꓟꓲ ꓥꓳꓽ ꓗꓪ ꓐꓰ ꓠꓬ ꓢꓰꓲꓠ ꓗꓴ, ꓑꓳꓠ ꓒꓮꓪ ꓬꓰˍ ꓟ ꓗꓪ ꓐꓰ ꓣꓳ ꓤꓶꓻ ꓪꓴꓽ ꓡ ꓟꓴ ꓡ ꓠ ꓬꓰ ꓐ ꓡˍ ꓡꓳ꓿ ꓮ ꓟꓶ ꓕꓲ ꓙꓵ, ꓗꓪ ꓠꓲ, ꓫ. ꓓꓴ ꓔꓳ, ꓜꓳꓽ ꓔꓬ ꓪˍ ꓥ ꓟꓲ ꓣꓳ ꓓꓵꓽ ꓙꓽ ꓠꓬꓲ ꓡꓯ꓿ ꓣꓳ ꓤꓶꓻ ꓬꓲ ꓫꓵꓼ ꓔꓯ ꓓꓵꓽ ꓙꓽ ꓠꓬꓲ ꓢꓲ ꓔꓶ ꓙꓱꓼ ꓖꓳ ꓟ ꓗꓪ ꓛꓲ ꓬꓰ ꓠ, ꓟ ꓮ ꓡꓲ ꓐꓰ ꓬꓰ ꓠ ꓔˍ ꓟ ꓚꓱ, ꓔꓯ ꓥˍ ꓟꓲ ꓓꓵꓽ ꓙꓽ ꓠꓬꓲ꓿ ꓖꓳ ꓗ ꓠꓯ. ꓕꓯ ꓡꓯꓼ ꓕꓲꓺ ꓢꓯꓼ ꓕꓵꓼ꓿

• ꓣꓱꓽ ꓟꓽ ꓚꓳ, ꓟ꓾ ꓣꓱꓽ ꓟꓽ ꓬꓯꓼ ꓟ ꓔꓯ ꓫꓬꓽ ꓡꓰ ꓝꓲ꓾

ꓤꓶꓻ ꓗꓪ ꓣꓳ ꓔꓳ, ꓜꓳꓽ ꓡˍ ꓟ ꓬꓲ ꓫꓵꓼ ꓔꓯ ꓔꓬ ꓖꓴ ꓖꓶ ꓠ, ꓟ ꓐꓱ ꓶ ꓣꓱꓽ ꓟꓽ ꓚꓳ, ꓟ꓾ ꓣꓱꓽ ꓟꓽ ꓬꓯꓼ ꓗꓳ. ꓗꓷ ꓟ ꓫꓵꓽ ꓪꓴ ꓔꓯ ꓡꓳ ꓩꓴ ꓗꓷ꓿ ꓣꓳ ꓦꓲꓻ ꓗꓪ ꓶꓻ ꓤ ꓚꓬ ꓢꓲ. ꓬꓲ ꓫꓵꓼ ꓧꓳꓽ ꓠ, ꓟ ꓐꓱ ꓶ ꓬꓲ ꓐꓰꓽ ꓔꓯ ꓡꓳ ꓩꓴ ꓗꓷˍ ꓟ ꓡꓰ ꓐꓰ꓾ ꓞꓳ ꓤ ꓕꓲ ꓐꓱ ꓔꓯ ꓥˍ ꓟꓲ ꓣꓳ ꓤꓶꓻ ꓗꓪ ꓐꓰ ꓙꓰ ꓝꓲ ꓠ ꓗ, ꓡꓳ꓿ ꓣꓳ ꓤꓶꓻ ꓔꓯ ꓠꓬ ꓣꓳ ꓚꓲ. ꓛꓬ ꓡꓰꓽ ꓫꓬ, ꓜꓶ ꓠ ꓗ, ꓟ ꓑꓶ. ꓓꓴ ꓣꓳ ꓔꓯ ꓠꓻ ꓡꓰ ꓝꓲˍ ꓟ ꓣꓳ ꓒ ꓕꓲꓺ ꓗꓪ ꓟ ꓕꓲ ꓐꓱ ꓔꓯ ꓡꓳ ꓗꓷ ꓠ ꓗ, ꓡꓳ꓾ ꓒꓬ, ꓩꓴ ꓗꓷ ꓠ ꓗ, ꓡꓳ꓿ ꓣꓳ ꓤꓶꓻ ꓗꓪ ꓒꓬꓱꓼ ꓡˍ ꓟ ꓬꓲ ꓫꓵꓼ ꓬꓲ ꓫꓵꓼ ꓐꓴ ꓔꓯ ꓔꓬ, ꓖꓴ ꓖꓶ ꓠ, ꓟ ꓐꓱ ꓶ ꓬꓲ ꓐꓰꓽ ꓔꓯ ꓡꓳ ꓩꓴ ꓗꓷ ꓠ ꓔˍ ꓡꓳ꓿

• ꓔꓬ ꓖꓴ ꓡꓶ. ꓗꓷ꓾

ꓮ ꓟꓶ ꓣꓳ ꓔꓬ ꓟ ꓗꓪ ꓐꓰ ꓶꓻ ꓤ ꓗꓪ ꓙꓰ ꓠꓬꓲˍ ꓟ ꓠꓬ ꓣꓳ ꓔꓯ ꓮ ꓙꓵꓽ ꓔꓯ ꓟꓳꓻ ꓡꓰ ꓠ, ꓟ ꓬꓰ ꓙ ꓖꓶˍ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓣꓳ ꓟꓬꓱꓽ ꓬꓰ ꓖꓴ ꓗꓪ ꓙꓰˍ ꓕꓯ ꓦꓲꓻ ꓗꓪ ꓚꓳ. ꓟꓬꓱꓽ ꓬꓰ ꓖꓴ ꓗꓪ ꓔꓱ, ꓔꓱ, ꓡꓰꓽ ꓙꓰˍ ꓟ ꓔꓯ ꓟꓽ ꓬꓰ ꓬꓰ꓾ ꓟꓬꓱꓽ ꓬꓰ ꓖꓴ ꓖ ꓡꓯꓼ ꓖ ꓙꓲ ꓗꓪ ꓫꓵꓽ ꓫꓵ ꓕꓲ ꓐꓶꓽ ꓛꓲ ꓚꓳꓻ ꓙꓰ ꓠꓬꓲ꓿ ꓕꓲ ꓧꓪ, ꓟꓲ ꓟꓽ ꓛꓲ ꓬꓰ ꓠꓬꓲ ꓟ ꓢꓲ, ꓪꓰ ꓟꓲ ꓗꓪ ꓚꓳꓻ ꓙꓰˍ ꓟ ꓔꓯ ꓬꓰ ꓖꓶ꓿ ꓟꓽ ꓥ ꓠꓬ ꓬꓲ ꓙꓬ ꓡꓳ ꓐꓱ ꓔꓯ ꓡꓳ. ꓠꓬꓲ ꓟ ꓕꓱ ꓡꓱ ꓫꓵꓽ ꓬꓰ ꓖꓶ꓿ ꓕꓱ ꓡꓱ ꓬꓰˍ ꓟ ꓠꓬ ꓣꓳ ꓪꓴ. ꓠꓶ ꓔꓯ ꓬꓲ ꓫꓵꓼ ꓒꓬꓱꓼ ꓡ ꓝꓲ ꓢꓲ꓾ ꓟꓬꓱꓽ ꓬꓰˍ ꓟ ꓗꓪ ꓮ ꓟꓬ, ꓬꓰ ꓙ ꓔꓳ, ꓙ ꓖꓶ ꓡˍ ꓥꓳ꓿

• ꓕꓲ ꓧꓪ, ꓟꓲ ꓟꓽ ꓬꓰ ꓠꓬꓲ ꓟ ꓔꓯˍ ꓟꓲ ꓧꓪ ꓢꓲ ꓬꓰ꓾

ꓕꓲ ꓧꓪ,ˍ ꓟꓲ ꓟꓽ ꓬꓰ ꓠꓬꓲ ꓟ ꓟꓬꓱꓽ ꓔꓯ ꓬꓰ ꓠꓬꓲ꓿ ꓣꓳ ꓮ ꓕꓯ ꓟꓲ ꓬꓰ ꓔꓬ ꓟ ꓟꓬꓱꓽ ꓡꓰꓽ ꓟꓽ ꓞꓲ꓾ ꓣꓳ ꓕꓲ ꓧꓪ,ˍ ꓟꓲ ꓟꓽ ꓬꓰ ꓠꓬꓲ ꓟ ꓚꓱ, ꓐꓴ ꓔꓯ ꓬꓰ ꓠꓬꓲ ꓠ ꓗ, ꓡꓳ꓿ ꓔꓯꓺ ꓥꓳꓽ ꓠꓴ ꓠꓬ ꓜꓽ ꓓꓴ ꓔꓯ ꓧꓳ, ꓢꓴ ꓥ ꓕꓯ ꓠꓽ ꓜꓽ ꓓꓴ ꓚꓬ.ˍ ꓟ ꓚꓱ, ꓔꓯ ꓢꓳ ꓣꓴ ꓠꓬꓲ꓿ ꓟꓬꓱꓽ ꓠꓽ ꓠꓬꓲ ꓗꓪ ꓮꓽ ꓔꓳ ꓟ. ꓖꓶ ꓡˍ ꓟ ꓢꓳ ꓜꓲꓼ ꓓꓴ ꓗꓪ ꓙꓰ ꓢꓲ ꓢꓳ ꓣꓴ꓿ ꓕꓱ ꓡꓱ ꓬꓲ ꓫꓵꓼ ꓬꓲ ꓫꓵꓼ ꓔꓯ ꓢꓳ ꓣꓴˍ ꓟ ꓗꓪ ꓐꓰ ꓣꓳ ꓠꓲ, ꓟ ꓔꓯ ꓥˍ ꓟꓲ ꓬꓲ ꓫꓵꓼ ꓒꓬꓱꓼ ꓡ ꓝꓲˍꓟ ꓡꓰꓽ ꓟꓽ ꓞꓲꓺ ꓛꓳꓽ ꓒꓯ, ꓬꓲ ꓫꓵꓼ ꓔꓯ ꓥˍ ꓟꓲ ꓟꓶ ꓡˍ ꓥꓳ꓿ ꓪꓴ. ꓠꓶ. ꓓꓵꓽ ꓙꓽ ꓚꓱ, ꓥˍ ꓟꓲ ꓬꓲ ꓫꓵꓼ ꓒꓬꓱꓼ ꓡˍ ꓥꓳ꓿ ꓣꓳ ꓤꓶꓻ ꓗꓪ ꓔꓳ, ꓜꓳꓽ ꓡˍ ꓟ ꓒꓬꓱꓼ ꓡˍ ꓟ ꓚꓱ, ꓮ ꓙꓵꓽ ꓠꓬ ꓣꓳ ꓡꓰ ꓢꓲꓺ ꓣꓴ ꓔˍ ꓟ ꓪꓴ. ꓠꓬꓲ ꓒꓬꓱꓼ ꓡˍ ꓟ ꓥ ꓡꓳ ꓐꓯˍ ꓟ ꓔꓯ ꓕꓽ ꓟꓲ ꓡꓰ,꓿ ꓕꓲ ꓙꓵ, ꓡꓰ ꓕꓲ ꓙꓵ, ꓠꓬ ꓣꓳ ꓤꓶꓻ ꓔꓯ ꓣꓳ ꓠꓲ, ꓫꓵˍ ꓟ ꓡꓰ ꓫꓬ, ꓑꓵ, ꓠ, ꓟ ꓙꓵ, ꓥ ꓡꓳ꓿ ꓓꓵꓽ ꓙꓽ ꓚꓱ, ꓞꓳ ꓙꓳ ꓚꓱ, ꓔꓯ ꓒꓳ, ꓡꓶ. ꓗꓷ ꓐ ꓡˍ ꓟ ꓢꓯꓼ ꓪ ꓠꓬ ꓣꓳ ꓡꓯꓽ ꓒꓯ, ꓘꓴꓽ ꓗꓪ ꓡꓰꓽ ꓓ,ˍ ꓡꓳ꓿