ꓠꓰꓑꓮꓡ ꓗꓴꓷꓼ ꓛꓲ ꓡ ꓟ ꓙꓵ, ꓐꓱ ꓶ ꓞꓳ ꓡꓯ. ꓐꓴ ꓬꓰ ꓗꓷ ꓢꓯꓼ ꓔꓯ ꓘꓴ ꓜꓲꓼ ꓞꓳ ꓥ ꓟꓲ ꓠ ꓠ, ꓔꓬ ꓡꓳ ꓐꓰ ꓐꓯ ꓔ ꓟ ꓓꓳꓽ
9 ꓦ ꓟ 19 ꓠꓬꓲ 2025 ꓘꓳꓼ ꓔꓯ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓰꓑꓮꓡ ꓗꓴꓷꓼ ꓗꓪ ꓔꓲꓺ ꓒ ꓓꓽ ꓡꓰ ꓫ. ꓕꓱ ꓔ ꓟ ꓠꓬ ꓗꓳ. ꓗꓷ ꓟ ꓙꓵ, ꓕꓯ ꓗꓴꓷꓼ ꓘꓴꓽ ꓗꓪ ꓒꓬꓱꓼ ꓗꓷ ꓟ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓠꓬ ꓮ ꓟꓶ ꓟ ꓙꓵ, ꓗꓪ ꓮ ꓘꓶ. ꓟꓽ ꓙꓳ ꓡꓰ ꓢꓲ ꓠꓬꓲ ꓢꓲ ꓡꓲ, ꓗꓷ ꓡꓰ ꓟ ꓙꓵ, ꓛꓲ ꓡ ꓡꓳ ꓐꓰ ꓫ. ꓕꓱ ꓔ ꓡꓳ꓿ ꓗꓴꓷꓼ ꓘꓴꓽ ꓗꓪ ꓢꓳꓻ ꓦꓲꓻ ꓝꓮꓲ ꓒꓴ ꓖꓶ ꓗꓷꓳ꓿ ꓝꓮꓲ ꓗꓴꓷꓼ ꓙꓵꓽ ꓢꓴ ꓐꓴ ꓢꓲꓽ ꓒꓽ ꓬꓲ. ꓫꓵꓼ ꓐꓴ ꓔꓯ ꓑ ꓫꓬ ꓐꓴ ꓦꓻ ꓡꓱ ꓢꓲ ꓠꓬꓲ ꓗꓴꓷꓼ ꓔꓯ ꓢꓲ ꓡꓲ, ꓐꓰ ꓙꓵꓽ ꓔꓬ ꓡꓳ ꓐꓰ ꓔꓲꓺ ꓒ ꓓꓽ Sila Bogati ꓗꓪ ꓐꓰ ꓫ. ꓕꓱ ꓔ ꓟ ꓥ ꓡꓳ꓿
ꓠꓰꓑꓮꓡ ꓗꓴꓷꓼ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓡꓰ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓔꓯ ꓠꓲ, ꓠꓵ ꓢꓲ ꓠꓬꓲ ꓠꓲ, ꓘꓪ ꓫꓵˍ ꓡꓳ ꓐꓰ ꓫ. ꓕꓱ ꓔ ꓡꓳ꓿ ꓗꓴꓷꓼ ꓗꓪ ꓥ ꓟꓲ ꓒꓬꓱꓼ ꓔꓬ ꓟ ꓫꓵꓽ ꓪꓴꓽ ꓮ ꓟꓬ, ꓔꓯ ꓢꓲ ꓡꓲ, ꓐꓰ ꓠꓽ ꓡꓰ ꓢꓲ ꓠꓬꓲ ꓗ, ꓛꓲ ꓟ ꓗꓴꓷꓼ ꓒꓬꓱꓼ ꓡ ꓠ, ꓟ ꓑ ꓫꓬ ꓐꓴ ꓥꓳ ꓡꓳ. ꓔꓬ ꓟ ꓥ ꓡꓳ꓿
ꓠꓰꓑꓮꓡ ꓗꓴꓷꓼ ꓗꓪ ꓗꓴꓷꓼ ꓫꓵꓽ ꓪꓴꓽ ꓮ ꓟꓬ, ꓙꓳ ꓟ ꓪꓴ. ꓠꓬꓲ ꓞꓳ ꓡꓯ. ꓐꓴ ꓒꓳ, ꓔꓴ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓑ ꓫꓬ (72) ꓣꓳ ꓫꓵꓻ ꓡꓰ ꓢꓲ ꓠꓬꓲ ꓑ ꓫꓬ ꓮ ꓟꓬ, ꓥ ꓟꓲ ꓠꓻ ꓓꓴ ꓡꓰ ꓢꓴ ꓙꓳ ꓟ ꓪꓴ. ꓠꓬꓲ ꓠꓯꓺ ꓞꓲꓼ ꓦꓲꓻ ꓗꓪ ꓠꓻ ꓫꓬ, ꓔꓬ ꓟ ꓥ ꓡꓳ꓿ ꓠꓰꓑꓮꓡ ꓗꓴꓷꓼ ꓙꓵꓽ ꓢꓲꓽ ꓒꓽ ꓬꓲ ꓫꓵꓼ ꓥ ꓟ ꓗꓮꓣꓗꓲ ꓬꓲ ꓚꓲ. ꓛꓬ ꓑ ꓫꓬ ꓐꓴ ꓔꓯ ꓜꓲ ꓢꓲ ꓠꓬꓲ ꓫ. ꓕꓱ ꓟ ꓙꓵ, ꓕꓯ ꓟꓽ ꓪ ꓡꓯꓽ ꓘꓳ ꓟ ꓔꓯ ꓝꓮꓲ ꓫꓬ, ꓐꓱ ꓠ, ꓟ ꓐꓱ ꓶ ꓟꓬꓱꓽ ꓬꓰ ꓠ, ꓟ ꓙꓳ ꓡꓳ ꓐꓰ ꓫ. ꓕꓱ ꓗꓷ ꓟ ꓥ ꓡꓳ ꓐꓰ (Vatican News) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
