ꓧꓪ. ꓧꓪ ꓠꓬꓲ. ꓠꓬꓲ ꓝꓮꓲ ꓕꓲ ꓧꓪ ꓘꓴ ꓜꓲꓼ ꓞꓳ ꓚꓺ ꓟꓲꓽ ꓗꓪ ꓐꓰ ꓙꓵꓻ ꓠꓲ, ꓔꓯ ꓗꓽ ꓕꓽ ꓖꓶ ꓢꓴ ꓙꓲꓻ ꓫꓬ ꓢꓴ Athanasius ꓚꓺ ꓟꓲꓽ 2 ꓕꓱ, ꓔꓯ ꓝꓮꓲ ꓡꓳ. ꓠꓬꓲ ꓓꓴ ꓬꓰ ꓡꓯ꓿ ꓖꓳ ꓕꓲ ꓙꓵ, ꓗꓪ ꓟꓽ ꓔꓱ, ꓟꓽ ꓜꓳꓽ ꓟ ꓟ. ꓟꓲꓽ ꓚꓺ ꓢꓴ Arius ꓠꓬ ꓪ ꓔꓲ Constantine ꓔꓯ ꓔꓲꓺ ꓒ ꓓꓽ ꓮꓔꓧꓮꓠꓮꓢꓴꓲꓢ ꓟꓽ ꓙꓲ ꓟꓽ ꓙꓳ ꓟ ꓚꓱ, ꓮ ꓟꓬ, ꓔꓯ ꓕꓳ ꓶ ꓐꓳ ꓢꓲ ꓠꓬꓲ ꓗꓳꓻ ꓔ ꓟ ꓥ ꓡꓳ꓿
ꓪ ꓔꓲ ꓚꓳꓠꓢꓔꓮꓠꓔꓲꓠꓰ ꓥ ꓟꓲ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓴꓲꓢ ꓠꓬ ꓝꓴꓲ. ꓙꓳ ꓡꓳ ꓐꓰ ꓓꓴꓽ ꓙ ꓢꓲ ꓠꓬꓲ ꓬꓲ ꓔꓯ ꓟꓽ ꓔꓱ, ꓟ ꓫꓵꓽ ꓘꓶꓽ ꓗꓷ ꓟ ꓥ ꓡꓳ꓿ꓝꓮꓲ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓴꓲꓢ ꓔꓯ ꓔꓣꓮꓦꓰꓡ ꓟꓬꓱꓺ ꓔ ꓟ ꓟꓵꓽ ꓗꓪ ꓖꓼ ꓗꓷ ꓟ ꓥ ꓡꓳ꓿ ꓣꓳ‐ꓟ ꓪ ꓔꓲ ꓚꓳꓠꓔꓮꓠꓔꓲꓠꓰ ꓠꓬ ꓠꓻ ꓓꓴ ꓒꓬ ꓓꓴ ꓮ ꓟꓬ, ꓔꓳ, ꓜꓳ ꓡꓰ ꓢꓲ ꓠꓬꓲ ꓫꓵꓻ ꓘꓶꓽ ꓔꓯ ꓖꓳꓽ ꓓꓱ ꓔꓲ ꓟꓶ ꓡꓰ ꓟ ꓥ ꓡꓳ꓿ ꓟꓽ ꓔꓱ ꓟꓽ ꓜꓳ ꓟ ꓟ. ꓟꓲ ꓚꓺ ꓢꓴ ꓜꓴꓻ ꓥ ꓟ ꓮꓣꓲꓴꓢ ꓜꓴꓻ ꓠꓬ ꓚꓳꓠꓢꓔꓮꓠꓔꓲꓠꓰ ꓠꓳꓐꓡꓰ ꓡꓳ ꓒꓱ ꓓꓽ ꓗꓪ ꓔꓬ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓥ ꓟꓲ ꓬꓲ ꓪ ꓜꓴꓻ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓽ ꓠꓲ, ꓫꓵˍ ꓟ ꓥ ꓡꓳ꓿
ꓗ. ꓠꓯ ꓠꓬ ꓚꓳꓠꓢꓔꓮꓠꓔꓲꓠꓰ ꓠꓳꓐꓡꓰ ꓡꓳ ꓒꓱ ꓒꓽ ꓕꓲ ꓗꓪ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓲꓴꓢ ꓔꓬ ꓗꓷ ꓟ ꓥ ꓡꓳ꓿ ꓮꓓ 341 ꓘꓳꓼ ꓕꓯ ꓚꓳꓠꓢꓔꓮꓠꓔꓲꓠꓰ ꓠꓳꓐꓡꓰ ꓡꓳ ꓒꓱ ꓗꓪ ꓔꓬ ꓟ ꓔꓲꓺ ꓒ ꓓꓽ ꓔꓯ ꓗꓼ ꓓꓳ ꓗꓷ ꓢꓲ ꓠꓬꓲ ꓠꓱ. ꓐꓯꓼ ꓔꓲꓺ ꓒ ꓓꓽ ꓕꓲ ꓪ ꓔꓯ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓝꓲ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓴꓲꓢ ꓠꓬ ꓬꓲ ꓔꓯ ꓟꓽ ꓔꓱ, ꓟꓽ ꓜꓳ ꓚꓱ, ꓗꓪ ꓐꓰ ꓝꓴꓲ ꓓꓰ ꓔ ꓟ ꓔꓯ ꓔꓲꓺ ꓒ ꓪ ꓔꓲ ꓓꓰꓽ ꓗꓷ ꓟ ꓥ ꓡꓳ꓿ ꓫꓵꓽ ꓪꓴꓽ ꓔꓯ ꓫꓬ, ꓖꓶ ꓠ, ꓟ ꓓꓰꓽ ꓗꓷ ꓥ ꓟ ꓥ ꓡꓳ꓿
ꓮꓓ (346) ꓘꓳꓼ ꓕꓯ ꓪ ꓔꓲ ꓚꓳꓠꓢꓔꓮꓠꓔꓲꓠꓰ ꓬꓲ ꓤ ꓠꓬ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓴꓲꓢ ꓔꓯ ꓖꓣꓰꓰꓗ ꓗꓴꓷꓼ Alexandria ꓡꓳ ꓒꓱ ꓗꓪ ꓬꓯꓼ ꓡ ꓠ, ꓟ ꓐꓯ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓲꓴꓢ ꓠꓬ (10) ꓘꓳꓼ ꓗ, ꓛꓲ ꓛꓲ ꓡꓰ ꓪꓴ‐ꓢ ꓟꓬꓱꓽ ꓔꓯ ꓬꓰ ꓪ ꓡꓰ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓲꓴꓢ ꓠꓬ ꓪꓴ‐ꓢ ꓐꓯ ꓘꓶꓽ ꓮ ꓟꓬ, ꓟ. ꓖꓶ ꓢꓴ ꓥ ꓡꓳ꓿ ꓬꓲ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓪ ꓔꓲ ꓔꓯ ꓥ ꓟꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓢꓴ ꓥ ꓡꓳ꓿ ꓙꓲꓻ ꓢꓴ ꓢꓲꓺ ꓤ ꓐꓴ ꓮ ꓟꓬ, ꓥ ꓟꓲ ꓙꓲꓻ ꓫꓬ ꓢꓴ ꓮꓔꓧꓮꓠꓮꓢꓲꓴꓢ ꓡꓰ ꓟ. ꓖꓶ ꓔ ꓟ ꓚꓱ, ꓮ ꓘꓶ. ꓛꓲ ꓠꓻ ꓡꓳ ꓗꓷ ꓟ ꓥ ꓡꓳ ꓿ ꓬꓲ ꓫꓵꓻ ꓗꓪ ꓛꓲ ꓪꓴ‐ꓢ ꓟꓬꓱꓽ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿
