M: ꓔꓱ, ꓟ ꓦꓲ ꓙꓵꓽ ꓢꓴ ꓔꓯ ꓥꓳꓽ (Sunday reflection)
ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ ꓗꓪ ꓐꓰ (25) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ,ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 16ꓽ1‐13 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟꓽ ꓔꓱ, ꓟ ꓦꓲꓻ ꓙꓵꓽ ꓢꓴ ꓕꓲ ꓣꓳ ꓔꓯ ꓥꓳꓽ ꓥ ꓡꓳ꓿ ꓬꓲ ꓠꓬ ꓟꓽ ꓔꓱ, ꓟꓽ ꓜꓳ ꓟ ꓚꓱ, ꓗꓪ ꓐꓰ ꓬꓲ ꓢꓲꓺ ꓒ ꓒꓴ ꓤ ꓫꓵꓽ ꓤ ꓔꓯ ꓡꓳ ꓔꓬ ꓢꓴ ꓥ ꓡꓳ꓿ ꓟꓽ ꓔꓱ ꓟ ꓚꓱ, ꓗꓪ ꓐꓰ ꓬꓲ ꓔꓯ ꓐꓯ ꓔꓬ ꓟ ꓪꓴ. ꓠꓬꓲ ꓬꓲ ꓔꓯ ꓬꓲ ꓢꓲꓺ ꓒ ꓡꓰ ꓗꓼ ꓗꓷ ꓟ ꓥ ꓡꓳ꓿ ꓖꓳ ꓕꓯ ꓗꓳ. ꓗꓷ ꓟ ꓙꓵ, ꓕꓯ ꓬꓲ ꓢꓲꓺ ꓒ ꓔꓯ ꓶꓻ ꓡꓯꓼ ꓙꓳ ꓟ ꓢꓴ ꓠꓯ, ꓗꓪ ꓙꓰ ꓢꓲ ꓠꓬꓲ ꓕꓲ ꓒꓶ ꓐꓳ ꓔ ꓠ, ꓟ ꓐꓯ ꓟ. ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓡꓳ. ꓟꓳ ꓗꓷ ꓟ ꓟꓽ ꓔꓱ, ꓟ ꓦꓲꓻ ꓙꓵꓽ ꓢꓴ ꓕꓲ ꓣꓳ ꓔꓯ ꓣꓳ ꓡꓳ. ꓟꓳ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓟꓽ ꓔꓱ ꓥ ꓟꓲ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓮ ꓡꓰ ꓐꓰ ꓜ ꓠ, ꓟ ꓬꓰ ꓬꓰ ꓗꓴ ꓟ ꓪꓴ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓥ ꓟꓲ ꓕꓱ ꓟ ꓫꓵꓽ ꓢꓷ. ꓠꓲ, ꓐꓰ ꓙ ꓜꓲꓼ ꓠꓲ, ꓗꓪ ꓐꓰ ꓙꓲ ꓟ ꓟꓬꓱꓽ ꓔꓯ ꓬꓰ ꓢꓲ ꓠꓬꓲ ꓕꓲ ꓞꓲꓼ ꓢꓯꓼ ꓟꓬ, ꓟꓶ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓠꓬ ꓣꓳ ꓠꓯ ꓗꓪ ꓙꓳ ꓟ ꓒꓴ ꓫꓵˍ ꓐꓰ ꓢꓷ. ꓠꓲ, ꓔꓯ ꓣꓳ ꓕꓲ ꓣꓳ ꓐꓱ ꓶ ꓡꓰ ꓣꓱ ꓟ ꓟꓽ ꓥ ꓢꓴ ꓐꓱ ꓶ ꓣꓱ ꓬꓯꓼ ꓔꓬ ꓢꓴ ꓐꓴ ꓐꓱ ꓶ ꓣꓱ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓦꓲꓻ ꓙꓵꓽ ꓢꓴ ꓥ ꓟ ꓪꓴ. ꓠꓬꓲ ꓣꓳꓺ ꓓꓰ ꓟ ꓟꓬꓱꓽ ꓔꓯ ꓥ ꓟꓲ ꓢꓷ.ꓠꓲ, ꓙꓳ ꓙꓳ ꓡꓰ ꓣꓳ ꓔꓯ ꓬꓰ ꓠ, ꓟ ꓐꓯ ꓔ ꓟꓥ ꓡꓳ꓿
ꓲꓠꓓꓲꓮ ꓗꓴꓷꓼ ꓗꓪ ꓫ. ꓓꓴ ꓟꓷꓽ ꓢꓴ ꓐꓴ ꓔꓯ ꓬꓰ ꓙ ꓢꓴ ꓟꓳꓔꓧꓰꓣ ꓔꓰꓣꓰꓢꓮ ꓠꓬ ꓮ ꓘꓶ. ꓛꓲ ꓣꓳꓺ ꓓꓰ ꓟ ꓟꓬꓱꓽ ꓔꓯ ꓥ ꓟꓲ ꓠꓵꓻ ꓠꓲ, ꓡꓰ ꓬꓰ ꓟ ꓪꓴ. ꓠꓬꓲ ꓟꓲ ꓠꓯ ꓡ ꓞꓳ ꓮ ꓙꓵꓽ ꓢꓷ. ꓡꓰ ꓟ ꓪꓴ‐ꓢ ꓤ ꓠꓱ ꓕꓲ ꓣꓳ ꓥ ꓡꓳ꓿
ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓠꓲ, ꓫ. ꓟꓬ ꓫ. ꓔꓬ ꓢꓴ ꓐꓴ ꓔꓯ ꓢꓯꓼ ꓖꓶ ꓠ, ꓟ ꓝꓮꓲ ꓣꓱ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓘꓴꓽ ꓔꓬ ꓟ ꓥ ꓡꓳ꓿
ꓣꓳ ꓦꓻ ꓕꓲ ꓒꓳ, ꓗꓪ ꓥ ꓟꓲ ꓣꓳ ꓠꓯ, ꓗꓪ ꓙꓳ ꓟ ꓢꓯꓼ ꓪ ꓮ ꓙꓵꓽ ꓔꓯ ꓣꓱ ꓢꓲ ꓠꓬꓲ ꓢꓯꓼ ꓕꓵꓼ ꓠ, ꓟ ꓣꓳꓺ ꓚꓵ, ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓡꓳ. ꓟꓳ ꓗꓷꓟ ꓟꓽ ꓔꓱ, ꓟ ꓦꓲꓻ ꓙꓵꓽ ꓒ ꓠꓬ ꓬꓲ ꓢꓲꓺ ꓒ ꓡꓰ ꓗꓼ ꓗꓷ ꓥ ꓟꓲ ꓛꓲ ꓡ ꓟ ꓙꓵ, ꓕꓯ ꓬꓰ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓞꓳ ꓙꓳ ꓠ, ꓟ ꓓꓴꓽ ꓙ ꓔ ꓢꓲ ꓠꓬꓲ ꓟꓬꓱ ꓬꓰ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓣꓳ ꓦꓲꓻ ꓕꓲ ꓒꓳ, ꓐꓱ ꓶ ꓢꓷ. ꓠꓲ, ꓙꓳ ꓙꓳ ꓡꓰ ꓟꓬꓱꓽ ꓬꓰ ꓠ, ꓟ ꓥ ꓡꓳ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳꓽ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓥ ꓡꓳ꓿ ꓝꓮꓲ ꓢ‐ꓗ‐ꓟꓲ‐ꓔꓴ ꓣꓱ ꓛꓰ ꓡꓯꓼ ꓫꓴꓻ ꓔꓯ ꓘꓳ, ꓣꓴ ꓢꓲ ꓦꓻ ꓜ ꓓꓴ ꓐꓱ ꓶ ꓢꓯꓼ ꓕꓵꓼ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟꓽ ꓔꓱ ꓟ ꓦꓲꓻ ꓙꓵꓽ ꓢꓴ ꓠꓯ, ꓗꓪ ꓙꓳˍ ꓟ ꓢꓷ. ꓠꓲ, ꓔꓯ ꓟꓬꓱꓺ ꓓꓳꓽ ꓖꓶ ꓟ ꓥ ꓡꓳ꓿
ꓕꓱ ꓡꓱ ꓐꓰ ꓠꓴ ꓥꓪ ꓥ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓙꓰ ꓠ, ꓟ ꓙꓲ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓘꓴˍ ꓔꓬ ꓟ ꓥ ꓡꓳ꓿ ꓣꓳ ꓠꓬ ꓮ ꓡꓰ ꓕꓲ ꓑ ꓟ ꓣꓳ ꓦꓬꓼ ꓠꓬꓲ ꓖꓴ ꓡꓰ ꓡ ꓟꓽ ꓢꓷ. ꓟ ꓪꓴ. ꓠꓬꓲ ꓢꓲꓺ ꓒ ꓐꓯ ꓘꓶꓽ ꓕꓯ ꓒꓴ ꓛꓳꓽ ꓢꓲ ꓠꓬꓲ ꓢꓯ. ꓔꓬ ꓓꓴ ꓬꓰ ꓡꓯ꓿ ꓙꓲ ꓟ ꓟꓬꓱꓽ ꓔꓯ ꓢꓯꓼ ꓕꓵꓽ ꓢꓲ ꓠꓬꓲ ꓬꓰ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿
