1997 ꓘꓳꓼ ꓕꓯ ꓙꓮꓑꓮꓠ ꓗꓴꓷꓼ ꓗꓴꓷꓼ ꓔꓳꓗꓬꓳ ꓡꓳ ꓒꓱ ꓗꓪ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓖꓪꓽ ꓙꓱ ꓜꓲꓼ ꓓꓴ ꓬꓰ ꓗꓷ ꓟ ꓚꓱ, ꓥ ꓡꓳ꓿ 1997 ꓘꓳꓼ ꓕꓯ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓙꓮꓑꓮꓠ ꓗꓴꓷꓼ ꓔꓳꓗꓬꓳ ꓡꓳ ꓒꓱ ꓗꓪ ꓖꓪꓽ ꓙꓱ ꓜꓲꓼ ꓓꓴ ꓓꓽ ꓟ ꓕꓲ ꓟ ꓬꓰ ꓗꓷ ꓟ ꓥ ꓡꓳ꓿
ꓖꓳ ꓕꓲ ꓙꓵ, ꓗꓪ ꓴꓢꓮ ꓗꓴꓷꓼ ꓗꓪ ꓠꓬ ꓙꓼ ꓦꓲꓻ ꓓꓽ ꓙꓼ ꓣꓱ ꓢꓲ ꓠꓬꓲ ꓟꓬꓱꓽ ꓬꓰ ꓟ ꓬꓲ ꓜꓴꓻ ꓕꓲ ꓜꓴꓻ ꓒꓴ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓕꓱ ꓕꓲ ꓜꓴꓻ ꓠꓬ ꓖꓣꓰꓰꓠ ꓧꓳꓴꓢꓰ ꓐꓯ ꓟ ꓟꓲ ꓦꓲꓻ ꓔꓯ ꓟꓽ ꓢꓲꓽ ꓫꓬ ꓡꓰ ꓝꓲˍ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓔꓯ ꓟꓽ ꓬꓰ ꓠ, ꓟ ꓬꓰ ꓪ ꓜꓴꓻ ꓠꓬ ꓮ ꓘꓶ. ꓢꓯꓼ ꓕꓵꓼ ꓢꓲ ꓠꓬꓲ ꓟꓬꓱꓽ ꓬꓰ ꓗꓷꓳ꓿
ꓬꓲ ꓪ ꓜꓴꓻ ꓠꓬ ꓙꓼ ꓦꓲꓻ ꓣꓱ ꓢꓲ ꓠꓬꓲ ꓟꓬꓱꓽ ꓬꓰ ꓟ ꓙꓵ, ꓕꓯ ꓟꓲ ꓠꓯ ꓞꓳ ꓤ ꓔꓯ ꓟꓽ ꓙꓲ ꓟꓽ ꓗꓷ ꓡꓰ ꓟ ꓚꓱ, ꓔꓯ ꓢꓯ. ꓒꓬꓱ ꓮ ꓟꓬ, ꓓꓱ ꓢꓲ ꓠꓬꓲ ꓡ ꓞꓳ ꓔꓯ ꓟ. ꓖꓶ ꓠ ,ꓟ ꓟꓬꓱꓽ ꓔꓯ ꓬꓰ ꓢꓴ ꓐꓴ ꓥ ꓡꓳ꓿ ꓕꓱ ꓜꓴꓻ ꓠꓯ, ꓗꓪ ꓚꓳꓟꓑꓮꓠꓬ ꓓꓽ ꓐꓴ ꓮ ꓟꓬ, ꓐ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓴꓢꓮ ꓗꓴꓷꓼ ꓗꓪ ꓐꓰ ꓟꓳ‐ꓓꓳ ꓫꓬ ꓔ ꓟ ꓚꓳꓟꓮꓑꓮꓠꓬ ꓐꓴ ꓮ ꓟꓬ, ꓐ ꓟ ꓥ ꓡꓳ꓿
ꓬꓲ ꓪ ꓠꓬ ꓙꓼ ꓣꓱ ꓢꓲ ꓠꓬꓲ ꓟꓬꓱꓽ ꓬꓰ ꓟ ꓙꓵ, ꓕꓯ ꓟꓶꓽ ꓘꓴ ꓓꓳ ꓡ ꓟ ꓠꓬ ꓡ ꓞꓳ ꓔꓯ ꓠꓻ ꓓꓴ ꓟꓽ ꓙꓳ ꓟ ꓚꓱ, ꓔꓯ ꓝꓮꓲ ꓙꓼ ꓣꓱ ꓢꓲ ꓠꓬꓲ ꓟꓬꓱꓽ ꓟꓽ ꓬꓰ ꓠꓬ ꓟꓬꓱꓽ ꓮ ꓟꓬ, ꓠꓽ ꓡꓰ ꓡ ꓞꓳ ꓮ ꓟꓬ, ꓟꓬꓱꓽ ꓟꓽ ꓙꓳ ꓗꓷ ꓡꓰ ꓡ ꓓꓴ ꓥꓳ ꓐꓰ ꓬꓲ ꓪ ꓠꓬ ꓢꓪ ꓡꓰ ꓟ ꓥ ꓡꓳ꓿ ꓬꓲ ꓪ ꓜꓴꓻ ꓠꓬ ꓒꓴ ꓮ ꓟꓬ, ꓣꓱ ꓢꓲ ꓠꓬꓲ ꓢꓯ. ꓐꓬꓱ ꓓꓱ ꓢꓲ ꓠꓬꓲ ꓔꓳꓗꓬꓳ ꓖꓪ ꓙꓱ ꓜꓲꓼ ꓓꓴ ꓕꓯ ꓟꓽ ꓠꓲ, ꓫꓵˍ ꓟ ꓚꓱ, ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓮ ꓫꓵꓽ ꓪꓴ. ꓠꓬꓲ ꓟꓶꓽ ꓘꓴꓽ ꓓꓳ ꓢꓲ ꓠꓬꓲ ꓙꓼ ꓣꓱ ꓢꓲ ꓠꓬꓲ ꓟꓬꓱꓽ ꓟꓽ ꓬꓰ ꓠꓬ ꓬꓲ ꓪ ꓡꓰ ꓫꓬ ꓔ ꓟ ꓟꓳ‐ꓓꓳ ꓠꓬ ꓪꓴꓽ ꓜ ꓟꓽ ꓪ ꓐꓰ ꓬꓲ ꓪ ꓓꓴꓽ ꓙ ꓔ ꓟ ꓥ ꓡꓳ꓿ ꓬꓲ ꓪ ꓧꓪꓽ ꓞꓶ ꓪꓴꓽ ꓜꓽ ꓟꓽ ꓪ ꓐꓰ ꓕꓱ ꓡꓰ ꓗꓷ ꓡꓰ ꓡ ꓠ, ꓟ ꓔꓯ ꓙꓳꓺ ꓔꓬ ꓟ ꓪꓴ. ꓠꓬꓲ ꓬꓲ ꓪ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓔꓯ ꓟꓽ ꓠꓲ, ꓫꓵˍ ꓟ ꓥ ꓡꓳ꓿
ꓔꓳꓗꓬꓳ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓯ ꓑꓶ ꓗꓷ ꓡ ꓠꓬ ꓟꓬꓱꓽ ꓬꓰ ꓟ ꓚꓳꓟꓑꓮꓠꓬ ꓮ ꓟꓬ, ꓠꓬ ꓠꓽ ꓡꓰ ꓠ, ꓗꓷ ꓡꓰ ꓓꓴ ꓙꓳ ꓡꓳ ꓐꓰ ꓬꓲ ꓪ ꓠꓬ ꓓꓴꓽ ꓔ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓓꓳꓽ ꓫꓵꓽ ꓗꓪ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓡꓰ ꓮ ꓡꓰ ꓐꓯ ꓠꓬ ꓐꓯ ꓠꓬ ꓗꓴꓷꓼ ꓔꓯ ꓧꓳꓽ ꓪꓴ. ꓟꓴ ꓢꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓖꓪ ꓙꓱ ꓜꓲꓼ ꓓꓴ ꓬꓰ ꓟꓽ ꓛꓲ ꓐꓰ ꓐꓯ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓴꓢꓮ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓟ ꓔꓯ ꓟꓽ ꓪ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓙꓲ ꓟ ꓟꓬꓱꓽ ꓔꓯ ꓬꓰ ꓢꓴ ꓐꓴ ꓔꓯ ꓠꓲ, ꓐꓬ ꓡꓰ ꓠ, ꓟ ꓟꓬꓱꓽ ꓔꓯ ꓬꓰ ꓟ ꓥ ꓡꓳ꓿ ꓟꓵꓽ ꓘꓳꓼ ꓠꓬ ꓟꓲ ꓠꓯ ꓞꓳ ꓤ ꓮ ꓙꓵꓽ ꓐꓰ ꓶ ꓮ ꓘꓶ. ꓣꓳꓺ ꓚꓵ, ꓟ ꓥ ꓡꓳ꓿
