ꓠꓲꓹ ꓟ ꓗꓳꓸ ꓖꓶ ꓟꓶ ꓟ ꓣꓱ ꓛꓰ ꓠꓬ ꓕꓶꓻ ꓞꓹ ꓟ ꓙꓵꓻ ꓠꓲꓹ ꓗꓪ ꓡꓰ ꓡꓳꓸ ꓟꓳ ꓪ ꓡꓳ=
ꓠꓲꓹ ꓗꓳꓸ ꓟꓬ ꓗꓳꓸ ꓟꓶ_ ꓟ ꓣꓱ ꓛꓰ ꓙꓴ-ꓐꓲ-ꓡꓲ ꓑꓮꓲ ꓟꓲ-ꓢ ꓔꓯ ꓔꓲꓺ ꓒ ꓪ ꓔꓲ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓬꓰ-ꓢꓴ ꓙꓲ ꓢꓴ ꓠꓯꓼ ꓗꓪ ꓙꓵꓻ ꓠꓲꓹ ꓟꓶꓽ ꓡꓰ ꓔꓬ ꓢꓴ꓾ ꓢꓯꓸ ꓔꓬ ꓟ ꓤꓶꓻ ꓗꓪ ꓫꓸ ꓓꓴ ꓟꓷꓼ ꓓꓴ ꓮ ꓟꓬꓹ ꓔꓳꓹ ꓜꓳ ꓔꓬ ꓡꓰ ꓢꓴ ꓚꓲ ꓛꓬ ꓫꓸ ꓙꓵ ꓓꓴ ꓠꓬ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓕꓲ ꓒꓳꓹ ꓗꓪ ꓐꓰ ꓟꓽ ꓬꓰ ꓬꓰ ꓖꓽ ꓖꓶ ꓠꓲꓹ ꓠꓵꓻ ꓠꓲꓹ ꓠꓯꓼ ꓗꓪ ꓡꓰ ꓔꓬ ꓠꓹ ꓟ ꓢꓯꓼ ꓖꓶ ꓔ ꓡꓳ=
ꓡꓳꓹ ꓬꓰ ꓟ ꓠꓽ ꓕꓲꓽ ꓠꓬꓲ ꓟꓶꓽ ꓘꓶꓼ ꓙꓵꓹ ꓕꓯ ꓢꓔꓸ ꓑꓰꓔꓰꓣ ꓐꓮꓢꓲꓡꓲꓚꓮ ꓪꓽ ꓘꓴ ꓦꓲꓻ ꓓꓽ ꓗꓪ ꓢꓯꓸ ꓔꓬ ꓟ ꓤꓶꓻ ꓗꓪ ꓫꓸ ꓙꓵ ꓟꓷꓼ ꓙꓵ ꓔꓬ ꓟ꓾ ꓠꓲꓹ ꓟ ꓫꓸ ꓔꓬ ꓟ ꓐꓰ ꓔꓳꓹ ꓜꓳ ꓔꓬ ꓢꓴ ꓐꓴ ꓐꓱ ꓶ ꓔꓶꓻ ꓙꓱꓼ ꓐꓰ ꓬꓰ ꓖꓶ_ ꓟ ꓕꓱ ꓟꓲ-ꓢ ꓪꓽ ꓘꓴ ꓙꓵꓹ ꓗꓪ ꓙꓲ ꓢꓴ ꓢꓲ ꓤ ꓐꓴ 9000 ꓣꓳ ꓟꓽ ꓛꓲ ꓜꓲꓼ ꓡ ꓟ ꓥꓳ=
ꓕꓱ ꓟꓲ-ꓢ ꓙꓵꓹ ꓘꓴꓽ ꓗꓪ ꓠꓬ ꓣꓳ ꓠꓲꓹ ꓠꓵꓻ ꓢꓴ ꓔꓯ ꓟꓶꓽ ꓡꓰ ꓟ ꓑꓶ ꓓꓴ ꓙꓵꓻ ꓠꓲꓹ ꓟꓶꓽ ꓡꓰ ꓠ ꓗꓪ ꓛꓲ ꓠꓲꓹ ꓟ ꓠꓻ ꓓꓵ ꓡꓰ ꓢꓴ ꓤ ꓟꓶꓼ ꓤ ꓠꓬꓲꓽ ꓣꓳ ꓢꓷꓸ ꓙ ꓟꓳ ꓙ ꓔ ꓟ ꓥꓳ=
Diane Foley ꓐꓰ ꓟꓬꓱꓺ ꓔ ꓟ ꓤ ꓟꓶꓼ ꓤ ꓕꓲ ꓣꓳ ꓠꓬ ꓬꓲ ꓤ ꓮꓟꓰꓣꓲꓚꓮ ꓓꓳꓽ ꓫꓵ ꓣꓴ ꓢꓴ ꓕꓲ ꓣꓳ ꓥ ꓢꓲ James Foley ꓐꓰ ꓟꓬꓱꓺ ꓔ ꓢꓴ ꓔꓯ 2014 ꓘꓳꓼ ꓕꓯ ꓬꓲ ꓜꓴꓻ ꓕꓲ ꓜꓴ ꓗꓪ ꓐꓰ ꓢꓰꓼ ꓗꓷ ꓟ ꓚꓱꓹ ꓔꓯ ꓟꓳꓸ ꓬꓲ ꓙꓵꓻ ꓠꓲꓹ ꓐꓰ ꓢꓰꓼ ꓢꓴ ꓐꓴ ꓔꓯ ꓝꓮꓲ ꓖꓽ ꓖꓶ ꓐ ꓡꓰ ꓟ ꓚꓱꓹ ꓔꓯ ꓢꓷꓸ ꓙ ꓟꓳ ꓙ ꓟ ꓥꓳ=
Lucia Di Mauro Montanino ꓟꓬꓱꓺ ꓙꓳ_ ꓟ ꓤ ꓟꓶꓼ ꓤ ꓕꓲ ꓣꓳ ꓥ ꓟꓲ ꓲ-ꓔ-ꓡꓲ ꓗꓴꓷꓼ ꓠꓮꓑꓡꓰ ꓡꓳ ꓒꓱ ꓗꓪ ꓟꓬꓱꓽ ꓬꓰ ꓔꓬ ꓟ ꓬꓲ ꓦꓲꓻ ꓢꓲ ꓒꓽ ꓕꓲ ꓦꓲꓻ ꓢꓴ ꓔꓯ ꓞꓳ ꓡꓱ ꓤ ꓕꓲ ꓜꓴ ꓡꓰ ꓢꓰꓼ ꓗꓷ ꓟ ꓑꓶ ꓓꓴ ꓬꓲ ꓐꓰ ꓬꓲ ꓤꓼ ꓟꓶꓼ ꓐꓴ ꓔꓳꓹ ꓜꓳ ꓗꓷ ꓟ ꓫꓸ ꓙꓵ ꓟꓷꓼ ꓙꓵ ꓟ ꓔꓯ ꓥ ꓟꓲ ꓢꓷꓸ ꓙ ꓟꓳ ꓙ ꓗꓷ ꓟ ꓥꓳ=
ꓖꓳ ꓟ ꓡꓰ ꓐꓰ ꓔꓲꓺ ꓒ ꓪ ꓔꓲ ꓡꓰ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓡ ꓞꓳ ꓐꓴ ꓔꓳꓹ ꓜꓳ ꓔꓬ ꓟ ꓫꓸ ꓙꓵ ꓓꓴ ꓔꓯ ꓢꓰꓼ ꓡꓯ ꓘꓳ ꓓꓴ ꓗꓳ ꓡꓳ ꓗꓪ ꓐꓰ ꓫꓸ ꓔꓬ ꓢꓴ ꓐꓴ ꓠꓬ ꓠꓲꓹ ꓟ ꓗꓳꓸ ꓖꓶ ꓓꓴ ꓣꓱ ꓬꓯꓼ ꓔꓬ ꓟ꓾ ꓖꓳ ꓡꓱ ꓥ ꓟꓲ ꓕꓱ ꓡꓱ ꓠꓯ ꓞꓲꓹ ꓟ ꓙꓵꓹ ꓗꓪ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓟꓽ ꓡꓳ ꓒꓰꓹ ꓡꓰ꓾ ꓣꓳ ꓔꓯ ꓮ ꓕꓯ ꓟꓲ ꓟꓽ ꓒꓰꓹ ꓗꓷ ꓟ ꓚꓬꓴ ꓢꓲ ꓒꓽ ꓐꓰ ꓠꓶꓽ ꓞꓹ ꓢꓲ ꓣꓳ ꓥꓳ ꓡꓳꓸ ꓓꓴ ꓔꓯ ꓟꓽ ꓟꓶꓽ ꓡꓰ ꓠꓹ ꓟ ꓘꓴ ꓔꓬ ꓟ ꓥ ꓡꓳ=
ꓫꓸ ꓓꓴ ꓔꓳꓹ ꓜꓳ ꓔꓬ ꓟ ꓡ ꓞꓳ ꓕꓲ ꓣꓳ ꓠꓬ ꓬꓲ ꓔꓯ ꓠꓲꓹ ꓟ ꓗꓳꓸ ꓖꓶ ꓡ ꓢꓴ ꓔꓯ ꓧꓪ ꓥ ꓟꓲ ꓕꓲ ꓣꓳ ꓟꓲ ꓟꓽ ꓟꓳ꓾ ꓕꓱ ꓟꓲ ꓠꓯ ꓗꓪ ꓕꓱ ꓡꓱ ꓔꓳꓹ ꓜꓳ ꓔꓬ ꓟ ꓥꓳ꓾ꓖꓳ ꓟ ꓑꓶ ꓓꓴ ꓕꓲ ꓣꓳ ꓐꓰ ꓕꓲ ꓣꓳ ꓠꓲꓹ ꓟ ꓗꓳꓸ ꓖꓶ ꓠꓹ ꓟ ꓟꓽ ꓫꓸ ꓔꓳ꓾ ꓕꓽ ꓙꓳꓺ ꓓꓴ ꓬꓰ ꓡꓯ꓾ ꓠꓱꓸ ꓐꓯꓼ ꓢꓴ ꓔꓯ ꓠꓲꓹ ꓟ ꓗꓳꓸ ꓖꓶ ꓠꓹ ꓟ ꓫꓸ ꓔꓳ꓾ ꓙꓳꓺ ꓔꓬ ꓟ ꓠꓬ ꓣꓳ ꓠꓯꓼ ꓗꓪ ꓢꓯꓼ ꓐ_ ꓟ ꓠꓯꓼ ꓗꓪ ꓚꓬꓹ ꓖꓶ ꓔꓬ ꓟ ꓥ ꓡꓳ= ꓖꓳ ꓕꓲ ꓙꓵꓹ ꓠꓬ ꓙꓵꓻ ꓠꓲꓹ ꓙꓳ ꓢꓴ ꓙꓲ ꓢꓴ ꓢꓲ ꓤ ꓐꓴ ꓐꓱ ꓶ ꓚꓲ ꓛꓬ ꓙꓵꓻ ꓠꓲꓹ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓠꓲꓹ ꓟ ꓗꓳꓸ ꓖꓶ ꓓꓴ ꓗꓪ ꓐꓰ ꓚꓬꓹ ꓖꓶ ꓔ ꓟ ꓥ ꓡꓳ=
ꓟꓽ ꓙꓲ_ ꓟ ꓫ ꓓꓴ ꓔꓳꓹ ꓜꓳ ꓔꓬ ꓟ ꓙꓵꓹ ꓗꓪ ꓕꓱ ꓟ ꓔꓯ ꓗꓳꓸ ꓙꓰ ꓐ ꓡ ꓠꓹ ꓟ ꓬꓲ ꓙꓵꓹ ꓣꓴ ꓟ ꓗꓪ ꓐꓰ ꓟꓽ ꓥ꓾ ꓠꓲꓹ ꓟ ꓗꓳꓸ ꓖꓶ ꓓꓴ ꓔꓯ ꓧꓪ ꓠꓹ ꓟ ꓥ ꓡꓳ= Diane Foley ꓐꓰ Lucia Di Mauro Montanino ꓐꓴ ꓬꓲ ꓪ ꓔꓳꓹ ꓜꓳ ꓗꓷ ꓟ ꓫ ꓙꓵ ꓟꓷꓼ ꓙꓵ ꓓꓴ ꓠꓬ ꓮ ꓘꓶꓸ ꓛꓲ ꓫꓸ ꓙꓵ ꓥ ꓟꓲ ꓥꓶ_ ꓟ ꓔꓯ ꓟꓽ ꓟꓸ ꓖꓶ꓾ ꓠꓵꓻ ꓠꓲ ꓠꓬ ꓥꓶ_ ꓟ ꓔꓯ ꓗꓳꓸ ꓗꓷ ꓐ ꓡ ꓟ ꓔꓯ ꓟꓸ ꓖꓶ ꓗꓷ ꓟ ꓥꓳ=
ꓖꓽ ꓖꓶ_ ꓟ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓕꓱ ꓟꓲ ꓠꓯ ꓗꓪ ꓚꓬꓹ ꓖꓶ_ ꓟ꓾ ꓠꓲꓽ ꓢ-ꓓꓯ ꓤ ꓠꓬꓲ ꓡ ꓟ ꓔꓯ ꓧꓪꓸ ꓡꓰ ꓟ꓾ ꓪꓴ-ꓢ ꓫꓱꓸ ꓤ ꓠꓲꓹ ꓠꓯꓼ ꓗꓪ ꓔꓱꓹ ꓟ ꓔꓯ ꓫꓬꓹ ꓟ ꓥ ꓡꓳ꓾ ꓟꓽ ꓙꓲ_ ꓟ ꓐꓰ ꓐꓲ ꓞꓹ ꓔꓬ ꓟ ꓕꓱ ꓟꓲ ꓠꓯ ꓗꓪ ꓫ ꓙꓵ ꓟꓷꓼ ꓙꓵ ꓢꓴ ꓠꓲꓹ ꓟ ꓫꓸ ꓔꓬ ꓢꓴ ꓐꓴ ꓐꓱ ꓶ ꓢꓲ ꓡꓲꓹ ꓟ ꓔꓯ ꓫꓬꓹ ꓖꓶ ꓢꓲ ꓠꓲꓹ ꓟ ꓗꓳꓸ ꓖꓶ ꓢꓴ ꓒꓬꓱꓼ ꓡꓰ ꓠꓹ ꓟ ꓐꓱ ꓶ ꓪꓴ-ꓢ ꓠꓬ ꓣꓳ ꓠꓲꓹ ꓟ ꓣꓳ ꓡꓯ ꓒꓯꓹ ꓔꓯ ꓠꓬꓲ ꓟꓳ ꓓꓴ ꓖꓶ ꓢꓲ ꓣꓳ ꓔꓯ ꓣꓱꓽ ꓢꓴ ꓒꓬꓱꓼ ꓡ ꓝꓲ=
