ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓔ ꓟ ꓢꓯꓼ ꓓꓽ ꓟ ꓐꓰ ꓘꓴ ꓢꓯꓼ ꓠꓬ ꓢꓯꓼ ꓐ_ ꓟ ꓔꓯ ꓟꓸ ꓖꓶ_ ꓟ ꓟꓽ ꓥ꓾ ꓥꓳ ꓡꓳꓸ ꓟ ꓔꓯ ꓟꓸ ꓖꓶ ꓟ ꓡꓰ ꓥ ꓡꓳ=
ꓕꓲ ꓠꓽ ꓡꓲ ꓕꓲ ꓠꓽ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ ꓟ ꓙꓵꓹ꓾ ꓙꓵꓻ ꓠꓲꓹ ꓚꓱꓹ ꓟꓸ ꓖꓶ ꓟ ꓙꓵꓹ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓒ ꓬꓰ-ꓢꓴ ꓡꓯ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓟꓶ ꓗꓷ ꓟ꓾ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓐꓯ ꓘꓶꓽ꓾ ꓢꓲ ꓒ ꓬꓰ-ꓢꓴ ꓟꓲ ꓠꓯ ꓤꓶꓻ ꓬꓲ ꓟꓶꓽ ꓙꓵꓹ ꓐꓰ ꓢꓯꓼ ꓟꓬ ꓞꓷꓹ ꓡꓰ ꓟ ꓚꓱꓹ ꓔꓯ ꓟꓳꓸ ꓢꓯꓼ ꓖꓶ ꓗꓷ ꓟ ꓥ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓢꓲ ꓡꓲꓹ ꓐꓰ ꓢꓯꓼ ꓟꓬ ꓞꓷꓹ ꓡꓰ ꓫꓵ ꓟꓽ ꓥ꓾ ꓡꓯ ꓔꓬ ꓟ ꓠꓬꓲ ꓟꓳ ꓓꓴ ꓗꓪ ꓐꓰ ꓮ ꓜ ꓜ ꓟꓶꓽ ꓡꓰ ꓫꓵ ꓟꓲ ꓟꓽ ꓥ꓾ ꓚꓲ ꓛꓬ ꓢꓯꓼ ꓟꓬ ꓤꓶꓻ ꓔꓯ ꓡꓯꓼ ꓙꓱ ꓗꓷ ꓟ ꓬꓲ ꓟꓶꓽ ꓟ ꓢꓷꓸ ꓡꓰ ꓓꓴ ꓡꓰ ꓥ ꓡꓳ= ꓚꓲ ꓛꓬ ꓤꓶꓻ ꓔꓯ ꓟꓽ ꓡꓯ ꓙꓱ ꓢꓲ ꓕꓯ ꓠ ꓠꓬꓲ ꓘꓶꓽ ꓕꓲ ꓟ ꓐꓰ ꓡꓯ ꓙꓱ ꓗꓷ ꓟ ꓥꓳ= “ꓥꓪ ꓪꓴ-ꓢ꓾ꓳ ꓮ ꓫꓵ ꓑꓶ ꓓꓴ ꓥꓪ ꓔꓯ ꓒꓰꓹ ꓗꓷ ꓡ꓾ ꓐꓰ ꓥ ꓡꓳ=
ꓐꓹ ꓐꓽ ꓐꓰ ꓮ ꓕꓯ ꓟꓲ ꓟꓽ ꓧꓹ ꓙꓰ ꓔꓬ ꓟ ꓤ ꓔꓲ ꓠꓬ ꓬꓲ ꓠꓯꓹ ꓟ ꓫ ꓙꓵ ꓓꓴ ꓔꓯ ꓔꓳꓹ ꓜꓳ ꓠꓬꓲ ꓟ꓾ ꓬꓲ ꓑ ꓕꓲ ꓗꓪ ꓐꓹ ꓐ ꓟꓽ ꓔꓬ ꓟ꓾ ꓥꓳ ꓡꓳꓸ ꓓꓴ ꓟꓽ ꓙꓳ ꓬꓲ ꓔꓳꓹ ꓜꓳ ꓗꓷ ꓟ ꓥꓳ= ꓕꓱ ꓟ ꓠꓬ ꓙꓵꓻ ꓠꓲꓹ ꓠꓯ ꓞꓲꓹ ꓡꓰ ꓟ ꓟꓽ ꓥ꓾ ꓬꓲ ꓟꓶꓽ ꓗꓪ ꓛꓲ ꓔꓲꓻ ꓖꓶ ꓗꓷ ꓟ ꓪꓴꓽ ꓓꓰ ꓡꓰ ꓟ ꓠꓵꓻ ꓠꓲꓹ ꓔꓯ ꓟꓸ ꓖꓶ ꓗꓷ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓥ ꓡꓳ=
ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓢꓲ ꓒ ꓬꓰ-ꓢꓴ ꓘꓴ ꓢꓯꓼ ꓠꓬ ꓠꓲꓹ ꓟ ꓐꓬ ꓡꓰ ꓢꓲ ꓓꓳ ꓒꓲ ꓡ ꓟ ꓟꓽ ꓥ꓾ ꓥꓳ ꓡꓳꓸ ꓓꓴ ꓟꓶꓽ ꓡꓰ ꓔꓬ ꓟ ꓙꓵꓹ ꓗꓪ ꓥ ꓟꓲ ꓔꓳꓹ ꓐ ꓡ ꓟ ꓙꓵꓻ ꓠꓲꓹ꓾ ꓕꓱ ꓟ ꓔꓯ ꓘꓳꓹ ꓣꓴ ꓗꓷ ꓟ ꓐꓰ ꓢꓲ ꓢꓲ ꓫꓬ ꓫꓬ ꓐꓰ ꓓꓳ ꓡ ꓟ ꓢꓯꓼ ꓡꓰ ꓥ ꓡꓳ=ꓢꓲ ꓫꓬ ꓦꓲꓻ ꓠꓯꓼ ꓗꓪ ꓔꓶꓸ ꓔ ꓟ ꓗꓳꓹ ꓛ ꓓꓽ ꓟ_ ꓟꓲ ꓠꓬꓲꓽ ꓐꓶꓽ ꓧꓽ ꓡꓰ ꓟ꓾ ꓟꓵꓽ ꓛꓴ ꓙꓵꓹ ꓡꓰ ꓟ꓾ ꓟꓲꓽ ꓟꓲ ꓠꓯ ꓞꓲꓹ ꓡꓰ ꓟ꓾ ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓬꓲꓸ ꓟꓶꓽ ꓕꓲ ꓙꓵꓹ ꓕꓯ ꓪꓴ-ꓢ ꓡꓰ ꓚꓰꓼ ꓔ ꓟ ꓮ ꓙꓵ ꓥ ꓟꓲ ꓢꓲ ꓒ ꓬꓰ-ꓢꓴ ꓫꓸ ꓙꓵ ꓟꓷꓼ ꓙꓵ ꓓꓴ ꓠꓯꓼ ꓗꓪ ꓐ ꓗꓷ ꓟ ꓔꓯ ꓟꓸ ꓖꓶ ꓗꓷ ꓟ ꓥꓳ= ꓪꓴ-ꓢ ꓠꓬ ꓗ ꓠꓯꓸ ꓢꓲ ꓗꓪ ꓐꓰ ꓐꓲꓸ ꓞꓹ ꓢꓲ ꓔꓬ ꓟ ꓪꓴ-ꓢ ꓟꓽ ꓥ꓾ ꓪꓴ-ꓢ ꓐꓬꓱ ꓟꓬ ꓠꓬ ꓡꓯꓽ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓗꓷ ꓟ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓥ ꓟ ꓔꓯ ꓟꓸ ꓖꓶ ꓗꓷ ꓟ ꓥꓳ=
ꓠꓻ ꓓꓵ ꓮ ꓟꓬꓹ ꓐꓰ ꓡꓯꓽ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓖꓳ ꓓꓱ ꓠꓬ ꓪꓴꓽ ꓓꓰ ꓡꓰ ꓟ ꓠꓵꓻ ꓠꓲꓹ ꓔꓯ ꓟꓸ ꓖꓶ ꓗꓷ ꓟ ꓥꓳ= ꓪꓴ-ꓢ ꓠꓬ ꓟꓽ ꓟꓳ ꓟꓽ ꓢꓷꓸ ꓟ ꓶ ꓟ ꓗꓪ ꓔꓬ ꓟ ꓪꓴ-ꓢ ꓟꓽ ꓥ꓾ ꓣꓳ ꓤꓶꓻ ꓬꓲꓸ ꓟꓶꓽ ꓕꓲ ꓠꓬꓲ ꓗꓪ ꓛꓲ ꓣꓳ ꓐꓱ ꓶ ꓣꓳ ꓐꓰ ꓕꓲ ꓪ ꓫꓸ ꓙꓵ ꓓꓴ ꓔꓯ ꓘꓳꓹ ꓣꓴ ꓗꓷ ꓟ ꓪꓴ-ꓢ ꓥ ꓡꓳ=
ꓢꓲ ꓒ ꓬꓰ-ꓢꓴ ꓮ ꓡꓰ ꓐꓰ ꓫꓵꓻ ꓗꓷ ꓟ ꓔꓯ ꓡꓯ ꓐꓳ ꓔꓶꓸ ꓓꓴ ꓬꓲ ꓚꓰ ꓗꓪ ꓔꓬ ꓟ ꓡ ꓞꓳ ꓕꓲ ꓣꓳ ꓢꓷꓸ ꓔ ꓟ ꓥ ꓡꓳ꓾ ꓖꓳ ꓕꓲ ꓣꓳ ꓠꓬ ꓣꓳ-ꓟ ꓟꓯꓼ ꓟꓯꓼ ꓕꓲ ꓦ ꓣꓳ ꓔꓯ ꓙꓵꓽ ꓢꓴ ꓠꓲꓽ ꓔꓯ ꓙꓵꓻ ꓢꓴ ꓥ ꓢꓲ ꓠꓬꓲ ꓙꓲ ꓢꓴ ꓢꓲ ꓤ ꓕꓲ ꓣꓳ ꓒꓬꓱꓼ ꓡ ꓢꓲ ꓠꓬꓲ ꓢꓷꓸ ꓙ ꓟꓳ ꓙ ꓢꓴ ꓕꓲ ꓣꓳ ꓒꓬꓱꓼ ꓡ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓪꓴ ꓓꓰ ꓡꓰ ꓟ ꓠꓵꓻ ꓠꓲꓹ ꓐꓰ ꓒꓳꓹ ꓡꓲꓼ ꓡ ꓟ ꓖꓳ ꓕꓲ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓢꓯꓼ ꓟꓬ ꓞꓷꓹ ꓡꓰ ꓗ ꓠꓯꓸ ꓒꓳꓹ ꓡꓲꓼ ꓡ ꓢꓴ ꓬꓲꓸ ꓪꓴꓸ ꓕꓲ ꓣꓳ ꓟ ꓥ ꓡꓳ=
ꓣꓳ ꓐꓯ ꓘꓶꓽ ꓗꓪ ꓐꓰ ꓟꓸ ꓖꓶ ꓓꓴ ꓟꓽ ꓐ ꓡ ꓕꓯ ꓘꓴ ꓢꓯꓼ ꓓ ꓟ ꓗꓪ ꓐꓰ ꓣꓳ ꓐꓴ ꓟꓸ ꓖꓶ ꓔ ꓟ ꓥ ꓡꓳ= ꓠꓲꓹ ꓟ ꓗꓪ ꓐꓲ ꓞꓹ ꓔꓬ ꓕꓯ ꓢꓯꓼ ꓓꓽ ꓟ ꓓꓳ ꓡ ꓥꓳ꓾ ꓕꓱ ꓟ ꓠꓬ ꓢꓯꓼ ꓐ ꓟ ꓔꓯ ꓟꓸ ꓖꓶ ꓟ ꓟꓽ ꓥ꓾ ꓐꓰ ꓐꓯ ꓔ ꓡꓳ꓾ ꓐꓯ ꓘꓶꓽ ꓗꓪ ꓐꓰ ꓟꓸ ꓖꓶ ꓠꓹ ꓟ ꓟꓽ ꓡꓳꓼ_ ꓟ ꓙꓵꓹ ꓗꓪ ꓣꓳ ꓢꓯꓼ ꓓ ꓟ ꓡꓰ ꓦꓴ ꓢꓲ ꓘꓴ ꓢꓯꓼ ꓠꓬ ꓕꓲ ꓧꓪꓹ ꓧꓪꓹ ꓠꓬ ꓪꓽ ꓘꓴ ꓘꓶꓽ ꓕꓲ ꓟ ꓥ ꓡꓳ= ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓢꓲ ꓒ ꓬꓰ-ꓢꓴ ꓬꓲꓸ ꓟꓶꓽ ꓘꓴꓽ ꓢꓯꓼ ꓠꓬ ꓬꓲ ꓠꓯꓼ ꓗꓪ ꓔꓬ ꓟ ꓮ ꓙꓵ ꓔꓯ ꓖꓶ ꓗꓷ ꓟ ꓢꓯꓼ ꓡꓰ ꓥ ꓡꓳ=ꓕꓱ ꓢꓯꓼ ꓠꓬ ꓐꓹ ꓐ ꓔꓯ ꓔꓳꓹ ꓟ ꓢꓯꓼ ꓟꓽ ꓥ꓾ ꓬꓲ ꓕꓲ ꓤꓶꓻ ꓡꓱꓼ ꓡꓯꓼ ꓙꓱ ꓗꓷ ꓟ ꓢꓯꓼ ꓥ ꓡꓳ= ꓕꓱ ꓐꓲ ꓜꓲꓼ ꓟ ꓙꓵꓻ ꓠꓲꓹ ꓠꓬ ꓣꓳ ꓠꓯꓼ ꓗꓪ ꓮ ꓙꓵ ꓞꓳꓸ ꓡꓰ ꓕꓯ ꓥ ꓟꓲ ꓥꓳ ꓡꓳꓸ ꓓꓴ ꓐꓰ ꓙꓵꓻ ꓠꓲꓹ ꓠꓯꓼ ꓗꓪ ꓣꓳ ꓢꓯꓼ ꓓ ꓟ ꓐꓰ ꓘꓴ ꓐ ꓡ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓗꓷ ꓟ ꓥ ꓡꓳ=
ꓠꓲꓹ ꓟ ꓘꓴ ꓗꓪ ꓐꓰ ꓓꓳ ꓡ ꓟ ꓘꓴ ꓢꓯꓼ ꓠꓬ ꓪꓴ-ꓢ ꓔꓯ ꓥꓳ ꓡꓳꓸ ꓔ ꓟ ꓢꓷꓸ ꓡꓰ ꓓꓴ ꓥ ꓡꓳ= ꓘꓴ ꓢꓯꓼ ꓠꓬ ꓢꓯꓸ ꓔꓬ ꓡꓳ ꓐꓯ_ ꓟ ꓬꓲ ꓢꓷꓸ ꓡꓰ ꓓꓴ ꓥ ꓡꓳ= ꓖꓳ ꓟ ꓑꓶ ꓓꓴ ꓣꓳ ꓦꓵꓻ ꓡ ꓕꓯ ꓦꓴ ꓢꓯꓼ ꓗꓪ ꓐꓰ ꓥ ꓡꓳ=ꓢꓯꓼ ꓓ ꓟ ꓐꓰ ꓦꓴ ꓢꓯꓼ ꓘꓴ ꓢꓯꓼ ꓠꓬ ꓣꓳ ꓠꓯꓼ ꓗꓪ ꓕꓲ ꓫꓵ ꓫꓵ ꓬꓰ ꓐ ꓡꓰ ꓟ ꓙꓳ_ ꓡꓳ ꓐꓯ_ ꓟ ꓔꓯ ꓟꓸ ꓖꓶ_ ꓟ꓾ ꓢꓲ ꓡꓲꓹ ꓐꓰ ꓔꓬ ꓢꓲ ꓟꓶꓽ ꓡꓰ ꓠꓹ ꓟ ꓟꓽ ꓠꓲꓹ ꓫꓵ_ ꓟ꓾ ꓣꓳ ꓮꓽ ꓟ ꓥ ꓡ ꓐꓯ_ ꓟ ꓔꓯ ꓟꓸ ꓖꓶ_ ꓟ ꓥ ꓡꓳ=
ꓣꓳ ꓤꓶꓻ ꓠꓯ ꓞꓲꓹ ꓟ ꓙꓵꓹ ꓗꓪ ꓦ ꓟꓲ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓢꓲ ꓒ ꓬꓰ-ꓢꓴ ꓢꓯꓼ ꓓꓽ ꓟ ꓐꓰ ꓘꓴ ꓟ ꓡꓰ ꓐꓰ ꓘꓴ ꓠꓹ ꓟ ꓕꓽ ꓙꓳꓺ꓾ ꓕꓱ ꓟ ꓠꓬ ꓬꓲ ꓚꓱꓹ ꓟꓽ ꓙꓳ ꓮ ꓔꓳ ꓡꓰ ꓟꓽ ꓥ꓾ ꓠꓵꓻ ꓠꓲꓹ ꓕꓲ ꓟ ꓦꓵ ꓡ ꓓꓳ ꓡ ꓟ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓔꓯ ꓥꓳ ꓡꓳꓸ ꓔ ꓟ ꓥ ꓡꓳ꓾ ꓕꓱ ꓘꓴ_ ꓟ ꓢꓯꓼ ꓔꓯ ꓮ ꓕꓯ ꓥ ꓟꓲ ꓟꓽ ꓒꓰꓹ ꓗꓷ ꓡ꓾ ꓣꓳ ꓠꓯꓼ ꓗꓪ ꓠꓱꓸ ꓐꓯꓼ ꓤꓶꓻ ꓫꓵꓼ ꓙꓳ_ ꓟ ꓙꓵꓻ ꓠꓲꓹ ꓔꓯ ꓖꓶ ꓡ ꓟ ꓥꓳ=
ꓬꓲꓸ ꓟꓶꓽ ꓗꓪ ꓐꓰ ꓫ ꓙꓵ ꓓꓴ ꓐꓰ ꓔꓳꓹ ꓜꓳ ꓡ ꓕꓯ ꓠꓲꓹ ꓟ ꓘꓴꓽ ꓗꓪ ꓐꓰ ꓢꓯꓼ ꓓ ꓟ ꓐꓰ ꓘꓴ ꓠꓹ ꓟ꓾ ꓶꓼ ꓓꓰ ꓠꓹ ꓟ ꓣꓳ ꓠꓲꓹ ꓟ ꓔꓯ ꓒꓴ ꓢꓲ ꓘꓴ_ ꓟ ꓠꓬ ꓝꓮꓲ ꓬꓲ ꓫꓵꓼ ꓦꓵ ꓡ ꓟ ꓐꓰ ꓠꓬꓲ ꓟꓳ ꓓꓴ ꓬꓲ ꓫꓵꓼ ꓗꓪ ꓓꓵ ꓡꓰ ꓘꓴ ꓐ ꓡ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓯꓼ ꓖꓶ ꓗꓷ ꓟ ꓥꓳ=
