“ꓥꓪ ꓬꓲꓻ ꓙꓬ ꓢꓲꓼ_ ꓡꓳ꓾ ꓮ ꓙꓵ ꓬꓰ ꓓꓳ ꓡꓰꓳ”
ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓢ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ ꓟ꓾ ꓙꓵꓻ ꓠꓲꓹ ꓚꓱꓹ ꓟꓸ ꓖꓶ_ ꓟ ꓙꓵꓹ ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓶ ꓓꓳ ꓫꓱꓸ ꓓꓳ ꓬꓳ-ꓦ ꓕꓳ ꓶ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓬꓲ ꓟꓶꓽ ꓐꓯ ꓘꓶꓽ ꓥ ꓟ “ꓥꓪ ꓬꓲꓻ ꓙꓬ ꓢꓲꓼ_ ꓡꓳ꓾ ꓬꓰ ꓓꓳ ꓡꓰꓳ” ꓐꓯ_ ꓟ ꓐꓯ ꓘꓶꓽ ꓚꓱꓹ ꓔꓯ ꓟꓳꓸ ꓢꓯꓼ ꓖꓶ ꓗꓷ ꓟ ꓥꓳ=
ꓢꓲ ꓒ ꓬꓰ-ꓢꓴ ꓬꓲ ꓔꓯ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓚꓰꓹ ꓗꓷ ꓟ ꓙꓵꓹ ꓗꓪ ꓠꓯ ꓞꓲꓹ ꓓꓰ ꓡꓰ ꓟ ꓥ ꓥ ꓟꓲ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓠꓬ ꓠꓬꓲ ꓟꓳ ꓓꓴ ꓐꓬꓱꓼ ꓡꓱꓼ ꓡꓱꓼ ꓟ ꓬꓲ ꓙꓵꓹ ꓥ ꓡꓳ= ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓐꓯ ꓘꓶꓽ ꓠꓬ ꓪꓴ-ꓢ ꓤ ꓔꓲ ꓐꓰ ꓬꓲ ꓔꓬ ꓟ ꓚꓱꓹ ꓔꓯ ꓬꓲ ꓕꓲ ꓤꓶꓻ ꓡꓱꓼ ꓗꓪ ꓐꓰ ꓟꓸ ꓖꓶ ꓗꓷ ꓟ ꓥ ꓡꓳ=
ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓥꓪ ꓬꓲꓻ ꓙꓬ ꓢꓲꓼ_ ꓡꓳ꓾ ꓐꓯ_ ꓟ ꓘꓶꓽ ꓠꓬ ꓫ ꓙꓵ ꓟꓷꓼ ꓙꓵ ꓗꓷ ꓟ ꓧꓪ ꓖꓳ ꓓꓱ ꓐꓱ ꓶ ꓣꓱ ꓬꓯꓼ ꓟ ꓕꓲ ꓟ ꓡꓰ ꓟꓽ ꓥ꓾ ꓠꓵꓻ ꓠꓲꓹ꓾ ꓕꓲ ꓠꓲꓹ ꓕꓲ ꓪ ꓔꓬ ꓟ ꓐꓰ ꓙ ꓡꓯ ꓘꓳ ꓠꓹ ꓟ ꓔꓯ ꓟꓸ ꓖꓶ_ ꓟ ꓕꓲ ꓟ ꓟꓲ ꓟꓽ ꓥ꓾ ꓣꓳ ꓟꓲ ꓠꓯ ꓞꓳ ꓤ ꓚꓱꓹ ꓮ ꓙꓵ ꓔꓯ ꓟꓸ ꓖꓶ ꓠꓲꓹ ꓫꓵ_ ꓟ ꓠꓲꓹ ꓟ ꓐꓰ ꓢꓲ ꓡꓲꓹ ꓐꓰ ꓓꓳ ꓑꓶ ꓡ ꓟ ꓪꓴ-ꓢ ꓘꓴ ꓢꓯꓼ꓾ ꓕꓱ ꓦꓰꓼ ꓟꓷꓼ_ ꓟ ꓫ ꓙꓵ ꓓꓴ ꓔꓯ ꓬꓲ ꓚꓲ ꓛꓬ ꓔꓳꓹ ꓜꓳ ꓠꓬꓲ ꓟ ꓔꓯ ꓟꓸ ꓖꓶ_ ꓟ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=
ꓥꓪ ꓬꓲꓻ ꓙꓬ ꓢꓲꓼ_ ꓡꓳ꓾ ꓐꓯ ꓘꓶꓽ ꓠꓬ ꓣꓳ ꓚꓲ ꓛꓬ ꓔꓱꓹ ꓚꓲ ꓛꓬ ꓚꓬꓴ ꓙ ꓟꓽ ꓐ ꓡ꓾ ꓚꓲ ꓛꓬ ꓠꓲꓹ ꓘꓪ ꓫꓵ ꓠ ꓬꓰ ꓟꓽ ꓐ ꓡ꓾ ꓐꓯ_ ꓟ ꓬꓲꓻ ꓣꓳ ꓟꓵ ꓕꓲ ꓘꓴꓸ ꓟꓳꓼ ꓓꓻ ꓗꓪ ꓞꓳꓹ ꓢꓲ ꓬꓲꓻ ꓚꓱ ꓖꓳ ꓟ ꓔꓯ ꓓꓳ ꓓꓳ ꓡꓰ ꓠꓬ ꓬꓰ ꓓꓳ ꓡꓰꓳ ꓐꓰ ꓐꓯ_ ꓟ ꓐꓯ ꓘꓶꓽ ꓠꓬ ꓬꓲ ꓢꓷꓸ ꓡꓰ ꓓꓴ ꓒ ꓐꓲ ꓖꓶ ꓡꓳ= ꓠꓵꓻ ꓠꓲꓹ ꓠꓬ ꓬꓲ ꓚꓲ ꓛꓬ ꓣꓱ ꓬꓯꓼ ꓢꓴ ꓐꓰ ꓐꓯ ꓗꓷ ꓟ ꓥ ꓡꓳ= ꓕꓱ ꓔꓶꓻ ꓙꓱꓼ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓟꓬꓱꓽ ꓔꓯ ꓬꓰ ꓓꓳ ꓡꓰ ꓟ ꓥ ꓡꓳ=
ꓪꓴ-ꓢ ꓡꓰ ꓚꓬꓴ ꓙ ꓟ ꓐꓯ ꓟ ꓠꓬ ꓙꓲ ꓢꓴ ꓢꓲ ꓤ ꓐꓴ ꓣꓳ ꓚꓲ ꓛꓬ ꓢꓯꓼ ꓕꓵꓼ ꓢꓲ ꓪ ꓟꓶ ꓟ ꓟꓽ ꓥ꓾ ꓚꓲ ꓛꓬ ꓔꓯ ꓬꓰ ꓝꓲ ꓟ ꓡꓰ ꓥ ꓡꓳ= ꓡ ꓞꓳ ꓐꓴ ꓔꓯ ꓐꓲ ꓜꓲꓼ ꓡꓰ ꓝꓲ ꓟ ꓠꓬ ꓔꓱꓹ ꓟ ꓥꓳ ꓡꓳꓸ ꓓꓴ ꓗꓪ ꓛꓲ ꓒꓴ ꓖꓶ ꓔ ꓟ ꓙꓵꓻ ꓠꓲꓹ ꓗꓪ ꓡꓰ ꓧꓪ ꓟꓳ ꓟ ꓥ ꓡꓳ꓾ ꓖꓳ ꓟ ꓑꓶ ꓓꓴ ꓪꓴ-ꓢ ꓤ ꓔꓲ ꓠꓬ ꓬꓲ ꓚꓲ ꓛꓬ ꓐꓲ ꓜꓲꓼ ꓡꓰ ꓢꓴ ꓟꓽ ꓥ ꓐꓰ ꓔꓱꓹ ꓟ꓾ ꓐꓲ ꓜꓲꓼ ꓟ ꓬꓲ ꓢꓷꓸ ꓡꓰ ꓓꓴ ꓐꓰ ꓠꓵꓻ ꓠꓲꓹ ꓔꓯ ꓣꓱ ꓬꓯꓼ ꓔꓬ ꓡꓳ ꓐꓯ_ ꓟ ꓔꓯ ꓟꓸ ꓖꓶ ꓗꓷ ꓟ ꓥꓳ= ꓖꓳ ꓟ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓠꓬ ꓶꓼ ꓓꓰ ꓟ ꓠꓬ ꓟꓽ ꓒꓵꓽ ꓫꓵ ꓟꓽ ꓥ꓾ ꓡꓲꓹ ꓙꓰ ꓟ ꓡꓰ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓐꓰ ꓝꓮꓲ ꓫꓱꓹ ꓢꓲ ꓠꓬꓲ ꓝꓴꓲ ꓔꓯ ꓐꓲ ꓞꓹ ꓟ ꓗꓪ ꓐꓰ ꓡꓲꓹ ꓙꓰ ꓟ ꓚꓱꓹ ꓥ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓟ ꓥ ꓡꓳ=
ꓬꓲ ꓪꓴꓸ ꓗꓪ ꓐꓰ ꓝꓴꓲ ꓠꓬ ꓫꓸ ꓔꓳ ꓛꓬ ꓡꓰ ꓝꓲ ꓟ ꓥ ꓡꓳ꓾ ꓖꓳ ꓡꓱ ꓥ ꓟꓲ ꓖꓽ ꓖꓶ ꓟ꓾ ꓔꓱꓹ ꓟ ꓖꓽ ꓖꓶ_ ꓟ ꓠꓬ ꓔꓳꓹ ꓡ ꓟ ꓔꓯ ꓟꓽ ꓙꓳꓺ ꓙꓳ꓾ ꓚꓲ ꓛꓬ ꓣꓱ ꓬꓯꓼ ꓟ ꓔꓯ ꓔ ꓔꓳꓹ ꓐ ꓡ ꓠꓹ ꓟ ꓢꓯꓼ ꓖꓶ ꓔ ꓟ ꓡꓰ ꓥ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓡꓯ ꓐꓳ ꓔꓶꓸ ꓓꓴ ꓕꓯ ꓢꓲ ꓐꓯ ꓔ ꓟ ꓥꓪ ꓬꓲꓻ ꓙꓬ ꓢꓲꓼ ꓡꓳ꓾ ꓐꓯ_ ꓟ ꓠꓬ ꓠꓻ ꓓꓴ ꓔꓬ ꓟ ꓡ ꓞꓳ ꓜꓴ ꓐꓴ ꓶꓼ ꓓꓰ ꓔꓬ ꓟ ꓪꓴ-ꓢ ꓐꓰ ꓙꓻ ꓡꓯ ꓘꓳ ꓡꓰ ꓝꓲ_ ꓟ꓾ ꓪꓴ-ꓢ ꓠꓯꓼ ꓗꓪ ꓧꓳꓽ ꓪꓴꓸ ꓖꓶ_ ꓟ ꓬꓲ ꓚꓱꓹ ꓕꓲ ꓟ ꓥ ꓟ ꓤꓶꓻ ꓫꓵꓼ ꓢꓯꓼ ꓟꓬ ꓔꓯ ꓟꓸ ꓖꓶ ꓗꓷ ꓟ ꓥ ꓡꓳ=
ꓬꓲ ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓐꓲ ꓞꓹ ꓟ ꓟꓽ ꓙꓳ ꓢꓯꓼ ꓕꓵꓼ ꓠꓹ ꓟ꓾ ꓶꓼ ꓓꓰ ꓟ ꓗꓪ ꓟꓽ ꓙꓳꓺ ꓠꓹ ꓟ꓾ ꓬꓲꓼ ꓠꓬꓲ ꓤ ꓠꓵꓻ ꓠꓲꓹ ꓐꓰ ꓔꓱꓹ ꓟ꓾ ꓗꓹ ꓛꓲ ꓓꓴ ꓔꓯ ꓧꓪ ꓠꓹ ꓟ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓯꓼ ꓖꓶ ꓔ ꓢꓲ ꓠꓬꓲ ꓣꓳ ꓐꓰ ꓟꓽ ꓒꓵꓽ ꓐꓰ ꓓꓵꓽ ꓙ ꓔ ꓟ ꓔꓯ ꓥ ꓟꓲ ꓪꓴ-ꓢ ꓠꓯꓼ ꓗꓪ ꓟꓽ ꓫꓸ ꓔꓳ ꓔꓳ ꓶ ꓓꓰ ꓓꓴ ꓬꓰ ꓡꓯ= ꓣꓳ ꓡꓯꓽ ꓒꓯꓹ ꓔꓯ ꓛꓱꓺ ꓓꓳ ꓠꓹ ꓟ ꓔ ꓫꓸ ꓔꓳ꓾ ꓕꓱ ꓙꓽ ꓣꓳ_ ꓟ ꓠꓲꓹ ꓟ ꓘꓴꓽ ꓗꓪ ꓚꓬꓴ ꓙ ꓟꓶ ꓠꓹ ꓟ ꓔꓬ ꓟ ꓔꓯ ꓟꓳ ꓪ ꓡ ꓥꓳ=
