Carmelite ꓔꓲꓺ ꓒ ꓜꓴꓻ ꓖꓪ ꓙꓱ ꓜꓲꓼ ꓓꓴ ꓬꓰ ꓪꓴ. ꓔꓴˍ ꓟ ꓙꓵ, ꓕꓯ ꓔꓲꓺ ꓒ ꓪ ꓔꓲ. ꓠꓬ ꓒꓵꓽ ꓗ ꓕꓳꓽ ꓶ ꓕꓲ ꓒꓬꓽ ꓖꓶ ꓩꓴ ꓢꓲ꓾ ꓔꓲꓺ ꓒ ꓐꓴ ꓔꓯ ꓬꓲ ꓪ ꓣꓱꓽ ꓙˍ ꓟ꓾ ꓪꓽ ꓘꓴˍ ꓟ ꓐꓰ ꓪꓴ‐ꓢ ꓟꓬꓱꓽ ꓬꓰˍ ꓟ ꓗꓪ ꓢꓯꓼ ꓙꓳ ꓙꓳ ꓡꓰꓽ ꓝ. ꓢꓲ ꓣꓱꓽ ꓬꓰ ꓠ, ꓟ ꓢꓯꓼ ꓖꓶ ꓘꓶꓽ ꓫ. ꓕꓱ ꓗꓷꓳ꓿
9 ꓦ 9 ꓠꓬꓲ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ ꓲ‐ꓓꓳ‐ꓠꓲ‐ꓫ ꓗꓴꓷꓼ ꓗꓪ ꓬꓰˍ ꓟ Carmelite ꓔꓲꓺ ꓒ ꓜꓴꓻ ꓚꓰ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓠꓬ 9 ꓦ 16 ꓠꓬꓲ ꓠꓬꓲ ꓕꓯ ꓬꓰ ꓓꓳ ꓡꓰ ꓓꓴ ꓥꓳ꓿ ꓦꓬꓼ ꓠꓬꓲ ꓬꓲ ꓙꓵ, ꓕꓱ ꓟ ꓐꓱ ꓶ ꓔꓲꓺ ꓒ ꓪ ꓔꓲ. ꓡꓰꓳ (14) ꓡꓰ ꓜꓴꓻ ꓖꓳ ꓟ ꓗꓪ ꓧꓳꓽ ꓣꓱꓽ ꓢꓴ ꓕꓲ ꓣꓳ ꓥ ꓟ ꓔꓲꓺ ꓒ Miceal O’Neill ꓔꓬ ꓗꓪ ꓕꓳꓽ ꓶ ꓕꓱ ꓟ ꓖꓶ ꓩꓴ ꓗꓷ ꓟ ꓥ ꓡꓳ꓿
ꓢꓯꓼ ꓖꓶ ꓕꓳꓽ ꓶ ꓖꓳ ꓟ ꓘꓴꓽ ꓠꓯꓸꓼ ꓗꓪ ꓔꓲꓺ ꓒ ꓪ ꓔꓲ. ꓠꓬ ꓖꓪ ꓙꓱ ꓜꓲꓼ ꓓꓴ ꓗꓪ ꓐ ꓢꓴ ꓮ ꓙꓵꓽ ꓔꓯ ꓪꓽ ꓘꓴ ꓙ ꓖꓶ ꓗꓷ ꓢꓲ ꓠꓬꓲ꓾ ꓬꓲ ꓙꓵ, ꓕꓱ ꓟ ꓗꓪ ꓦ ꓕꓲ ꓒꓳ, ꓝꓮꓲ ꓕꓲ ꓧꓪ, ꓢꓯꓼ ꓧꓳꓽ ꓓꓴ ꓐꓱ ꓶ ꓣꓱꓽ ꓠ, ꓟ ꓢꓯꓼ ꓖꓶ ꓗꓷꓳ꓿ ʼꓪꓴ‐ꓢ ꓠꓲ, ꓡꓶꓽ ꓔꓯ ꓕꓲ ꓡꓰ, ꓪꓽ ꓘꓴ ꓓꓵꓽ ꓙꓽ ꓠꓬꓲ ꓢꓲ ꓠꓬꓲ꓾ ꓠꓲ, ꓧꓳ, ꓫꓵꓽ ꓧꓳ, ꓡꓯ ꓘꓳˍ ꓟ ꓗꓪ ꓐꓰ ꓔꓲꓺ ꓒ ꓐꓴ ꓠꓬ ꓚꓲ. ꓛꓬ ꓬꓰ ꓠ ꓔˍ ꓟ ꓟꓬꓱꓽ ꓔꓯ ꓫꓬꓽ ꓫꓬꓽ ꓡꓰꓽ ꓢꓷ. ꓐ ꓡˍ ꓡꓳ꓾ʼ ꓐꓯˍ ꓟ ꓣꓳ ꓖꓪ ꓙꓱ ꓜꓲꓼ ꓔꓬ ꓟ ꓬꓲ ꓕꓲꓽ ꓟꓴꓽ ꓠꓬ꓾ ꓔꓲꓺ ꓒ ꓜꓴꓻ ꓕꓱ ꓟ ꓗꓪ ꓟꓶ ꓔˍ ꓟ ꓣꓱꓽ ꓛꓰꓽ ꓓꓽ ꓟ ꓔꓯ ꓟꓳ. ꓖꓶˍ ꓟ ꓥ ꓢꓲ ꓠꓬꓲ꓾ ꓪꓽ ꓘꓴˍ ꓟ ꓗꓪ ꓐꓰ ꓔꓶ ꓔˍ ꓟ ꓤꓶꓻ ꓠꓬ ꓟꓲ ꓠꓯ ꓐꓱ ꓶ ꓬꓲ ꓪ ꓣꓱꓽ ꓙˍ ꓟ ꓣꓱꓽ ꓙ ꓚꓱ, ꓬꓲ ꓚꓰꓺ ꓥ ꓟ ꓔꓯ꓾ ꓡꓳ. ꓫꓬꓽ ꓡꓰ ꓝꓲˍ ꓡꓳ꓿
ꓔꓲꓺ ꓒ ꓪ ꓔꓲ. ꓡꓰꓳ ꓠꓬ ꓬꓲ ꓪ ꓐꓴ ꓔꓯ ꓕꓱ ꓡꓱ ꓣꓱꓽ ꓙˍ ꓟ ꓟꓬꓱꓽ ꓔꓯ ꓝ. ꓢꓲ ꓬꓰ ꓠ, ꓟ ꓕꓵꓼ ꓪ ꓖꓶ ꓗꓷꓳ꓿ ꓢꓲ ꓡꓲ ꓐꓰ ꓪꓽ ꓘꓴ ꓢꓲ ꓠꓬꓲ ꓕꓲ ꓣꓳ ꓐꓰ ꓕꓲ ꓣꓳ ꓠꓬꓲ ꓡꓳ. ꓗꓪꓼ ꓫꓵꓼˍ ꓟ ꓗꓪ ꓕꓶ ꓞ, ꓠ, ꓟ ꓬꓳ. ꓚꓵˍ ꓡꓳ ꓐꓰ ꓐꓯ ꓖꓶ ꓗꓷ ꓢꓲ꓾ Carmelite ꓔꓲꓺ ꓒ ꓜꓴ ꓔꓯ “ꓟꓬꓽ ꓠꓬꓲ ꓫ. ꓢꓴ ꓐꓴ ꓕꓲ ꓪꓽˍ ꓦꓰꓼ ꓔꓴ ꓢꓲ ꓬꓲ ꓪ ꓐꓴ ꓔꓳ, ꓜꓳꓽ ꓔꓬ ꓟ ꓗꓪ ꓐꓰ ꓕꓲ ꓝ. ꓪꓴ‐ꓢ ꓠꓲ, ꓡꓶꓽ ꓔꓯ ꓧꓪ ꓠ, ꓟ꓾” ꓕꓵꓼ ꓪ ꓖꓶ ꓗꓷꓳ꓿
Carmelite ꓙꓵꓽ ꓗ ꓠꓬ ꓟꓬꓱꓽ ꓬꓰ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓔꓲꓺ ꓒ ꓪ ꓔꓲ. ꓡꓰ ꓟꓬꓱꓽ ꓕꓱ ꓟ ꓠꓬ ꓡꓯꓽ ꓒꓯ, ꓡꓰ ꓬꓰ ꓪˍ ꓟ ꓟꓬꓱꓽ ꓕꓲ ꓟ ꓔꓯˍ ꓡꓰꓽ ꓐꓯˍ ꓟ ꓟꓽ ꓥ꓾ ꓚꓲ. ꓛꓬ ꓐꓰ ꓔꓳ, ꓜꓳꓽˍ ꓟ ꓡ ꓞꓳ ꓮ ꓙꓵꓽ ꓔꓯ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓫꓱ. ꓤ ꓠꓲ, ꓡꓰ ꓟꓳꓻ ꓗꓴ.ˍ ꓟ ꓠꓲ, ꓟ ꓙꓳ ꓠ, ꓟ꓾ ꓔꓯ ꓬꓲ ꓡꓰ ꓝ. ꓢꓲ ꓐꓯˍ ꓡꓳ꓿
Carmelite ꓔꓲꓺ ꓒ ꓐꓴ ꓐꓰ ꓔꓲꓺ ꓟ ꓐꓴ ꓠꓬ ꓬꓲ ꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓰ ꓠ ꓔˍ ꓟ ꓢꓷ. ꓠꓲ, ꓟ. ꓖꓶˍ ꓟ꓾ ꓦ ꓕꓲ ꓒꓳ, ꓗꓪ ꓟ. ꓖꓶˍ ꓟ꓾ ꓪꓽ ꓘꓴ ꓦꓲꓻ ꓗꓪ ꓣꓱꓽ ꓙˍ ꓟ ꓕꓱ ꓡꓱ ꓫꓵꓽ ꓟꓬꓱꓽ ꓔꓯ ꓬꓰ ꓢꓲ ꓠꓬꓲ꓾ ꓬꓲ ꓪ ꓗꓳ ꓡꓳ ꓗꓪ ꓟꓳꓻ ꓪˍ ꓟ ꓠꓵꓻ ꓠꓲ, ꓐꓰ ꓠꓲ, ꓧꓳ, ꓫꓵꓽ ꓧꓳ, ꓡꓯ ꓘꓳˍ ꓟ ꓠꓬ ꓪꓴ‐ꓢ ꓣꓱꓽ ꓛꓰꓽ ꓕꓲ ꓟ ꓥ ꓡꓳ꓾ ꓐꓯˍ ꓟ ꓔꓯ ꓟꓲ ꓠꓯ ꓔꓯ ꓟꓳ. ꓖꓶ ꓠ ꓗ, ꓟ ꓥ ꓡꓳ꓿ ꓟꓬꓽ ꓠꓬꓲ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓬꓲ ꓚꓱ. ꓐꓶꓽ ꓓꓻˍ ꓟ ꓟꓲ ꓠꓯ ꓗꓴꓷꓼ ꓜꓴꓻ ꓗꓪ ꓕꓱ ꓠꓲ, ꓧꓳ, ꓫꓵꓽ ꓧꓳ, ꓡꓯ ꓘꓳˍ ꓟ ꓠꓬ ꓔꓯꓺ ꓢꓳ ꓓꓴ ꓕꓲ ꓟ ꓒꓬꓱꓼ ꓡꓰ ꓠ ꓗ, ꓟ ꓥ ꓡꓳ꓿ ꓢꓯꓼ ꓖꓶꓽ ꓘꓶꓽ ꓕꓳꓽ ꓶ ꓬꓲ ꓟꓶꓽ ꓗꓪ ꓔꓲꓺ ꓒ ꓪ ꓔꓲ. ꓠꓬ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓕꓱ ꓟ ꓔꓯ ꓪꓴ‐ꓢ ꓡꓰ ꓠꓬꓲ ꓙ ꓡꓳ. ꓙˍ ꓟ ꓗꓪ ꓐꓰ Carmelite ꓜꓴꓻ ꓐꓱ ꓶ ꓗꓽ ꓕ. ꓙ ꓟꓶ ꓠ, ꓟ ꓐꓰ ꓢꓲ ꓡꓲ ꓟ ꓟꓶ ꓠ, ꓟ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷ ꓢꓲ꓾ Carmelite ꓜꓴꓻ ꓔꓲꓺ ꓒ ꓐꓴ ꓮ ꓙꓵꓽ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓗꓷꓳ꓿
