ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓴꓗꓣꓮꓲꓠꓰ ꓗꓴꓷꓼ ꓐꓰ ꓟꓲ ꓠꓯ ꓕꓯ ꓢꓲ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓑꓶ. ꓓꓴ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓗꓴꓷꓼ ꓮ ꓙꓵꓽ ꓢꓴ ꓐꓱ ꓶ ꓪꓽ ꓘꓴ ꓙ ꓖꓶ_ ꓟ
9 ꓦ ꓟ 7 ꓠꓬꓲ 2025 ꓘꓳꓼ ꓢꓲꓺ ꓒ ꓦꓬꓼ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓴꓗꓣꓮꓲꓠꓰ ꓗꓴꓷꓼ ꓐꓰ ꓟꓲ ꓠꓯ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓑꓶ. ꓓꓴ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓗꓴꓷꓼ ꓮ ꓙꓵꓽ ꓐꓱ ꓶ ꓢꓲ ꓡꓲ, ꓟꓶ ꓠ, ꓟ ꓪꓽ ꓘꓴ ꓙ ꓖꓶ ꓗꓷ ꓟ ꓥ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓦꓮꓔꓲꓚꓮꓠ ꓗꓴꓷꓼ ꓗꓪ ꓙꓳ ꓟ ꓝꓲ ꓓꓴ ꓒꓲ‐ꓕꓱ ꓪꓽ ꓘꓴ ꓦꓲꓻ ꓓꓽ ꓟ ꓗꓪ ꓐꓰ ꓪꓽ ꓘꓴ ꓖꓶ ꓟ ꓙꓵ, ꓕꓯ ꓐ, ꓐ ꓪꓴ‐ꓢ ꓠꓬ ꓟꓲ ꓠꓯ ꓢꓲ ꓡꓲ, ꓟ ꓔꓯ ꓠꓲ, ꓫꓵˍ ꓡꓳ ꓐꓰ ꓫ. ꓕꓱ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓪ ꓔꓲ ꓡꓰꓳ ꓠꓬ ꓝꓲ‐ꓓꓴ ꓒꓲ‐ꓕꓱ ꓪꓽ ꓘꓴ ꓦꓲꓻ ꓗꓪ ꓪꓽ ꓘꓴ ꓑꓮꓲꓽ ꓓꓽ ꓟ ꓬꓰ ꓗꓷ ꓟ ꓙꓵ, ꓕꓯ ꓙꓲꓻ ꓫꓬ ꓢꓴ ꓡ ꓞꓳ ꓬꓲ ꓫꓵꓼ ꓥ ꓟ ꓙꓲꓻ ꓫꓬ ꓢꓴ Giorgio Frassati ꓐꓰ ꓙꓲꓻ ꓫꓬ ꓢꓴ Carlo Acutis ꓐꓴ ꓠꓬꓲꓽ ꓣꓳ ꓔꓯ ꓥ ꓟꓲ ꓙꓲꓻ ꓫꓬ ꓢꓴ ꓡ ꓞꓳ ꓐꓰ ꓟꓬꓱꓺ ꓓꓳꓽ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓑꓮꓲꓽ ꓓꓽ ꓟ ꓗꓪ ꓔꓲꓺ ꓒ ꓪ ꓔꓲ ꓡꓰ ꓐ, ꓐ ꓪꓴ‐ꓢ ꓠꓬ ꓟꓯꓼ ꓢꓰꓼ ꓡꓯꓽ ꓘꓳ ꓟ ꓔꓯ ꓟꓽ ꓠꓲ, ꓫꓵ ꓟꓲ ꓠꓯ ꓢꓲ ꓡꓲ, ꓟ ꓔꓯ ꓡꓰ ꓠꓲ, ꓫꓵˍ ꓟ ꓪꓴ. ꓠꓬꓲ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓐꓱ ꓶ ꓮ ꓟꓬ, ꓛꓲ ꓪꓽ ꓘꓴ ꓠ, ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ. ꓕꓱ ꓗꓷ ꓟ ꓥ ꓡꓳ꓿
ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓴꓗꓣꓮꓲꓠꓰ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓯꓼ ꓢꓰꓼ ꓡꓯꓽ ꓘꓳ_ ꓟ ꓪꓴ. ꓠꓬꓲ ꓫ. ꓓꓴ ꓟꓷꓼ ꓓꓴ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓔꓳ, ꓜꓳ ꓔꓬ ꓟ ꓑꓶ. ꓓꓴ ꓬꓲ ꓔꓯ ꓪꓽ ꓘꓴ ꓙ ꓠ, ꓟ ꓐꓯ ꓗꓷꓳ꓿ ꓝꓮꓲ ꓟꓲ ꓠꓯ ꓗꓪ ꓗꓴꓷꓼ ꓙꓵꓽ ꓢꓴ ꓐꓴ ꓔꓯ ꓥ ꓟꓲ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓐꓱ ꓶ ꓟꓬꓱꓽ ꓬꓰ ꓠ, ꓟ ꓐꓰ ꓡ ꓞꓳ ꓢꓰꓼ ꓡꓯꓼ ꓘꓳ ꓟ ꓠꓬ ꓟꓲ ꓠꓯ ꓢꓲ ꓡꓲ, ꓟ ꓔꓯ ꓪ ꓟꓽ ꓓ ꓐꓰ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓗꓷ ꓟ ꓥ ꓡꓳ꓿ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵꓻ ꓡꓯꓽ ꓘꓳ ꓢꓲ ꓠꓬꓲ ꓠꓲ, ꓜꓳ ꓔꓯ ꓡꓳ ꓗꓷ ꓢꓲ ꓠꓬꓲ ꓕꓲ ꓪ ꓔꓬ ꓠ, ꓟ ꓐꓰ ꓬꓰ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓗꓷ ꓐꓰ (Vatican News) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
