ꓲꓠꓓꓲꓮ ꓗꓴꓷꓼ ꓗꓪ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓐꓴ ꓶꓼ ꓓꓳ ꓫꓱ, ꓓꓳꓽ ꓚꓺ ꓟ. ꓖꓶ ꓟ ꓚꓱ, (Jesuits in India)
ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓐꓴ ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓶꓼ ꓓꓳ ꓫꓱ, ꓓꓳꓽ ꓚꓺ ꓟ ꓗꓷ ꓚꓱ, ꓥ ꓡꓳ꓿ ꓧꓪꓽ ꓒꓴ ꓫꓵꓼ ꓞꓳ ꓫꓵꓼ ꓐꓴ ꓠꓬ ꓧꓪꓽ ꓒꓴ ꓫꓵꓼ ꓡꓲ ꓒꓰꓼ ꓣꓱ ꓢꓲ ꓠꓬꓲ ꓲꓠꓓꓲꓮ ꓗꓴꓷꓼ ꓪꓴ‐ꓢ ꓟꓬꓱꓽ ꓬꓰ ꓗꓷ ꓟ ꓙꓵ, ꓕꓯ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓟꓽ ꓙꓳ ꓡ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓧꓪꓽ ꓒꓴ ꓡꓲꓽ ꓒꓰꓼ ꓐꓰ ꓲꓠꓓꓲꓮ ꓡꓲꓽ ꓒꓰꓼ ꓠꓬ ꓟꓽ ꓫꓱ, ꓡꓯꓽ ꓘꓳ ꓟꓽ ꓪ ꓡꓯꓽ ꓘꓳ, ꓟ ꓑꓶ. ꓓꓴ ꓥ ꓡꓳ꓿
`ꓲꓠꓓꓲꓮ ꓗꓴꓷꓼ ꓘꓴꓽ ꓗꓪ ꓔꓬ ꓟ ꓑ ꓫꓬ ꓐꓴ ꓘꓴꓽ ꓗꓪ ꓞꓳ ꓫꓵꓽ ꓘꓶꓽ ꓟ ꓐꓰ ꓞꓳ ꓐꓳ ꓞꓳ ꓫ. ꓘꓶꓽ ꓟ ꓟꓲ ꓮ ꓟꓬ, ꓙꓳ ꓟ ꓥ ꓡꓳ꓿ ꓞꓳ ꓫꓵꓽ ꓕꓲ ꓠꓬꓲ ꓠꓬ ꓠꓱ. ꓐꓯꓼ ꓞꓳ ꓫꓵꓽ ꓕꓯ ꓢꓲ ꓞꓳ ꓒꓴ ꓡꓳ ꓐꓰ ꓓꓴ ꓙ ꓟ ꓠꓬ ꓮꓽ ꓠꓱ ꓟ ꓙꓵ, ꓗꓪ ꓐꓰ ꓠꓬꓲ. ꓠꓬꓲ ꓗꓪ ꓛꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓲꓠꓓꓲꓮ ꓞꓳ ꓫꓵꓽ ꓠꓬ ꓬꓲ ꓪ ꓡꓲꓽ ꓒꓰꓼ ꓐꓰ ꓟꓽ ꓪ ꓟ ꓙꓵꓻ ꓠꓲ, ꓔꓯ ꓟꓽ ꓘꓳ, ꓣꓴ ꓢꓴ ꓐꓴ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓲꓠꓓꓲꓮ ꓗꓴꓷꓼ ꓗꓪ ꓒꓬꓱꓼ ꓔꓬ ꓟ ꓫꓵꓽ ꓪꓴ ꓔꓯ ꓫꓬ, ꓠ, ꓟ ꓣꓳ‐ꓟ ꓞꓳ ꓫꓵꓽ ꓕꓲ ꓣꓳ ꓥ ꓟ ꓔꓲꓺ ꓒ de Napoli ꓠꓬ ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓙꓰ ꓗꓷꓳ꓿ ꓖꓳ ꓗꓪ ꓬꓲ ꓠꓬ ꓲꓠꓓꓲꓮ ꓞꓳ ꓫꓵꓽ ꓐꓴ ꓮ ꓡꓰ ꓐꓰ ꓞꓳ ꓙꓳ ꓟ ꓚꓱ, ꓔꓯ ꓢꓳꓻ ꓣꓴ ꓗꓷ ꓢꓲ ꓠꓬꓲ ꓬꓲ ꓠꓬ ꓢꓯ. ꓔꓬ ꓗꓷꓳ꓿ ꓬꓲ ꓠꓬ ꓲꓠꓓꓲꓮ ꓥꓳꓽ ꓫꓵꓽ ꓔꓯ ꓢꓳꓻ ꓣꓴ ꓝꓮꓲ ꓬꓲ ꓠꓬ ꓲꓠꓓꓲꓮ ꓞꓳ ꓫꓵꓽ ꓐꓴ ꓮ ꓡꓰ ꓞꓳ ꓙꓳ ꓟ ꓡꓰ ꓐꓰ ꓢꓯ. ꓔꓬ ꓗꓷꓳ꓿
ꓔꓲꓺ ꓒ ꓠꓬ ꓧꓪꓽ ꓟꓽ ꓜꓽ ꓬꓲ ꓠꓬ ꓪꓳꓽ ꓑꓬ ꓪꓳꓽ ꓟꓬ ꓡꓰ ꓜꓽ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓗꓷꓳ꓿ ꓖꓳ ꓗ. ꓠꓯ ꓢꓲ ꓲꓠꓓꓲꓮ ꓞꓳ ꓫꓵꓽ ꓐꓴ ꓠꓬ ꓔꓲꓺ ꓒ ꓡꓰ ꓚꓺ ꓟ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓒꓬꓱꓼ ꓡ ꓟ ꓥ ꓡꓳ꓿
ꓔꓲꓺ ꓒ ꓠꓬ ꓲꓠꓓꓲꓮ ꓞꓳ ꓫꓵꓽ ꓪꓴ ꓘꓴꓽ ꓗꓪ ꓐꓰ ꓢꓷ. ꓠꓲ, ꓙꓳ ꓒꓽ ꓐꓴ ꓡꓲ ꓦꓬꓼ ꓡꓲ ꓠꓬꓲ ꓫ. ꓕꓱ ꓔꓳ, ꓢꓷ. ꓠꓲ, ꓟ. ꓡꓯꓽ ꓘꓳ, ꓢꓲ ꓠꓬꓲ ꓬꓲ ꓟꓶ ꓕꓯ ꓔꓲꓺ ꓒ ꓠꓮ ꓑꓳꓡꓲ ꓧꓪ, ꓡꓰ ꓢꓲ ꓠꓬꓲ ꓲꓠꓓꓲꓮ ꓢꓷ. ꓠꓲ, ꓙꓳ ꓒꓽ ꓥ ꓟꓲ ꓪꓴ‐ꓢ ꓦꓻ ꓡꓱ ꓡ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷꓳ꓿
ꓔꓲꓺ ꓒ ꓐꓴ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷ ꓢꓲ ꓠꓬꓲ ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓗꓷ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓗꓪ ꓛꓲ ꓲꓠꓓꓲꓮ ꓗꓴꓷꓼ ꓗꓪ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓔꓬ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓫ. ꓟꓳ ꓪ꓿
