ꓣꓳ ꓠꓬ ꓣꓳ ꓤꓶꓻ ꓗꓪ ꓕꓲ ꓣꓳ ꓣꓳ ꓡꓰ ꓐꓯ ꓖꓶ ꓡˍ ꓟ꓾ ꓜꓻ ꓜꓽ ꓓꓳ ꓡꓰˍ ꓟ ꓝꓲ ꓖꓳ ꓓꓱꓽ ꓕꓽ ꓛꓲꓽ꓾ ꓕꓽ ꓬꓲꓼ ꓔ ꓕꓽ ꓔꓷ, ꓐꓰ ꓞꓳ ꓪꓴꓽ ꓐꓴ ꓡꓰ ꓐꓯ ꓖꓶ ꓡˍ ꓟ ꓔꓯ ꓑ ꓙꓽ ꓠꓬꓲˍ ꓥꓳ꓿ ꓥ ꓡꓳ꓾ ꓣꓳ ꓜꓻ ꓜꓽ ꓓꓳ ꓡꓰ ꓗ ꓠꓯ. ꓣꓳ ꓟꓽ ꓢꓷ. ꓢꓷ. ꓬꓰ ꓪ ꓡꓰ ꓟ ꓣꓱꓽ ꓬꓰ ꓚꓱ, ꓕꓲ ꓐꓱ ꓠꓽ ꓣꓳ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓜꓽ ꓓꓳ ꓡꓰ ꓗ ꓠꓯ. ꓖꓳ ꓓꓱꓽ ꓛꓲꓽ ꓟꓽ ꓓꓻ ꓟ꓾ ꓬꓲꓼ ꓔ ꓟꓽ ꓓꓻ ꓟ꓾ ꓔꓷ, ꓟꓽ ꓓꓻ ꓟ ꓕꓱ ꓟꓬ ꓙꓰꓽ ꓟꓽ ꓞꓲꓺ ꓠꓱ. ꓐꓯ ꓮ ꓟꓬ ꓚꓱ, ꓙꓳˍ ꓢꓰꓽ ꓡ ꓐꓯ ꓟ ꓔꓯ ꓠ ꓠ, ꓓꓴ ꓬꓰ ꓡꓯ꓿
ꓬꓲꓼ ꓔ ꓟ
ꓜꓻ ꓜꓽ ꓓꓳ ꓡꓰˍ ꓟ ꓝꓲ ꓞꓼ ꓞꓼ ꓬꓲꓼ ꓔ ꓗꓷ ꓠꓬ ꓦꓰꓽ ꓛꓲꓽ ꓗꓪ ꓙꓳˍ ꓟ ꓜꓽ ꓓꓴ ꓙꓲꓺ ꓖꓶˍ ꓟ ꓬꓲ ꓬꓲꓻ ꓠꓬ ꓕꓯꓽ ꓢꓲ ꓗꓪ ꓓꓯꓻ ꓡˍ ꓟ꓾ ꓳ ꓟꓶꓽ ꓞꓴ ꓞ,ˍ ꓟ꓾ ꓜꓽ ꓓꓴ ꓙꓲꓺ ꓟꓽ ꓘꓴ ꓟ ꓕꓱ ꓡꓱ ꓫꓵꓽ ꓒꓬꓱꓼ ꓡˍ ꓡꓳ꓿ ꓜꓽ ꓓꓳ ꓡꓰ ꓗ ꓠꓯ. ꓬꓲꓼ ꓟꓶ ꓟꓲꓽ ꓡꓰˍ ꓟ ꓥˍ ꓟꓲ ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓟꓬꓱꓽ ꓬꓰ ꓚꓱ, ꓠꓬ ꓮ ꓤ ꓮ ꓤ ꓗꓷ ꓡꓰ ꓢꓲ ꓠꓬꓲ ꓜꓽ ꓓꓴ ꓙꓲꓺˍ ꓟ ꓗꓪ ꓟꓶ ꓫꓵ ꓡꓰˍ ꓡꓳ꓿ ꓖꓳ ꓡꓱ ꓗꓷ ꓡꓰˍ ꓕꓯ ꓖꓳ ꓓꓱꓽ ꓗꓪ ꓟ ꓚꓮꓡꓳꓣꓲꓰ ꓔꓯ ꓥˍ ꓟꓲ ꓐꓬ ꓡꓰ ꓝꓲ ꓟꓽ ꓘꓴ ꓠꓬꓲ ꓖꓳ ꓓꓱꓽ ꓥˍ ꓟꓲ ꓒ. ꓡ ꓘꓪꓽ ꓡˍ ꓥꓳ꓿
ꓝꓮꓲ ꓜꓽ ꓓꓳ ꓡꓰ ꓗ ꓠꓯ. ꓬꓲꓼ ꓔ ꓟ ꓠꓬ ꓮ ꓡꓲ ꓫꓵꓽ ꓒꓬꓱꓼ ꓡˍ ꓡ ꓐꓯˍ ꓟ ꓚꓱ, ꓔꓯ ꓟꓳ. ꓧꓪ ꓟꓰ, ꓠꓬꓲ ꓔˍ ꓟ ꓗꓪ ꓠꓬ ꓜꓽ ꓓꓳ ꓡꓰ ꓗ ꓠꓯ. ꓬꓲꓼ ꓔ ꓢꓴ ꓐꓴ ꓗꓪ ꓬꓲꓼ ꓔ ꓔꓬ ꓕꓯ ꓢꓯꓼ ꓦˍ ꓟ ꓞꓼ ꓠꓽ ꓡꓰˍ ꓟ꓾ ꓡꓰ‐ꓒꓬꓯꓸꓼˍ ꓟ ꓒꓬꓱꓼ ꓡ ꓚꓱ, ꓟꓬꓽˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿ ꓖꓳ ꓡꓱ ꓠꓬꓲ ꓜꓽ ꓓꓳ ꓡ ꓗ ꓠꓯ. ꓫꓵꓽ ꓫꓵ 2 ꓙꓵ, ꓛꓲ ꓟꓶ ꓫꓵ ꓡꓰˍ ꓕꓯ ꓡꓰꓽ ꓬꓲꓼ ꓔ ꓠ ꓗˍ ꓡꓳ꓿
ꓙꓻ ꓖꓴ ꓫꓱꓽˍ ꓟ
ꓜꓽ ꓓꓳ ꓡꓰˍ ꓕꓯ ꓙꓻ ꓖꓴ ꓫꓱꓽˍ ꓟ ꓠꓬ ꓜꓽ ꓓꓴ ꓙꓲꓺ ꓘꓴˍ ꓟ ꓠꓬ ꓜꓳꓽˍ ꓥꓳ꓿ ꓖꓳ ꓡꓱ ꓥ ꓟꓲ ꓜꓽ ꓓꓳ ꓡꓰ ꓗ ꓠꓯ. ꓫꓵꓽ ꓫꓵ ꓕꓲ ꓐꓶꓽ ꓙꓳ ꓡꓰ ꓗ ꓠꓯ. ꓕꓯ ꓡꓰꓽ ꓙ ꓖꓴ ꓫꓱꓽ ꓠ ꓔ ꓥ꓿ ꓜꓽ ꓓꓳ ꓡꓰˍ ꓕꓯ ꓙ ꓖꓴ ꓮ ꓟꓬ, ꓫꓱꓽˍ ꓠꓬ ꓛꓲ ꓒꓯ, ꓔꓯ ꓛꓱꓽ ꓗꓪ ꓫꓵꓽ ꓬꓯꓼ ꓡꓰ ꓠꓬꓲ ꓦꓰꓼ ꓟ ꓕꓲ ꓚꓳ ꓡꓳ ꓗꓪ ꓫꓵꓽ ꓬꓲꓻ ꓚꓳˍ ꓟ ꓔꓯ ꓒꓲꓽ ꓡꓰ ꓝꓲ ꓢꓲ ꓦꓰꓼ ꓟ ꓙꓲꓺ ꓟꓽ ꓘꓴ ꓟ ꓒꓬꓱꓼ ꓡꓰ ꓝꓲˍ ꓡꓳ꓿ ꓖꓳ ꓡꓱ ꓠꓬꓲ ꓜꓽ ꓓꓳ ꓡꓰ ꓗ ꓠꓯ. ꓫꓵꓽ ꓫꓵ ꓕꓲ ꓐꓶꓽ ꓛꓲ ꓙꓳ ꓡꓰˍ ꓕꓯ ꓡꓰꓽ ꓙ ꓖꓴ ꓫꓱꓽ ꓠ ꓔˍ ꓡꓳ꓿
ꓖꓳ ꓓꓱꓽ ꓛꓲꓽˍ ꓟ
ꓖꓳ ꓓꓱꓽ ꓛꓲꓽ ꓗꓷˍ ꓠꓬ ꓖꓳ ꓓꓱꓽ ꓡꓱꓻˍ ꓟ ꓗꓪ ꓐꓰ ꓡꓬꓽ ꓡꓰˍ ꓟ ꓔꓯ ꓔꓲꓺ ꓟꓴ ꓗꓷ ꓡꓰ ꓝꓲ ꓠ, ꓟ ꓐꓱ ꓶ ꓫꓵꓽ ꓬꓲꓻˍ ꓟ ꓠꓬ ꓛꓲ ꓒꓯ,꓾ ꓡꓯꓽ ꓒꓯ, ꓐꓰ ꓧꓪꓽ ꓗꓴ, ꓙꓲ ꓐꓴ ꓗꓪ ꓪ ꓜꓲ ꓚꓳꓻ ꓙꓰˍ ꓟ ꓥ ꓡꓳ꓿ ꓦꓰꓼ ꓟ ꓗꓪ ꓠꓽ ꓓꓵꓽ ꓡꓰˍ ꓟ ꓠꓲ.ˍ ꓟ ꓑꓶ. ꓓꓴ ꓜꓽ ꓓꓳ ꓡꓰˍ ꓟ ꓝꓲ ꓖꓳ ꓓꓱꓽ ꓛꓲꓽˍ ꓕꓯ ꓠꓽ ꓜꓽ ꓓꓴ ꓙꓲꓺ ꓟꓽ ꓘꓴ ꓗꓷ ꓡꓰ ꓝꓲˍ ꓡꓳ꓿ ꓖꓳ ꓡꓱ ꓠꓬꓲ ꓜꓽ ꓓꓳ ꓡꓰ ꓗ ꓠꓯ. ꓫꓵꓽ ꓫꓵ ꓕꓲ ꓐꓶꓽ ꓛꓲ ꓟꓶ ꓫꓵ ꓡꓰˍ ꓕꓯ ꓡꓰꓽ ꓖꓳ ꓓꓱꓽ ꓛꓲꓽ ꓠ ꓔˍ ꓥ꓿
ꓬꓲꓻ ꓙꓬ ꓮ ꓟꓬ, ꓓꓳꓻˍ ꓟ
ꓜꓽ ꓓꓳ ꓡꓰ ꓗ ꓠꓯ. ꓬꓲꓻ ꓙꓬ ꓮ ꓟꓬ, ꓓꓳꓻˍ ꓟ꓾ ꓮ ꓘꓶ. ꓛꓵꓼˍ ꓟ ꓬꓲꓻ ꓙꓬ ꓓꓳꓻˍ ꓟ ꓥˍ ꓟꓲ ꓜꓽ ꓓꓴ ꓙꓲꓺˍ ꓟ ꓗꓪ ꓘꓶꓻ ꓡꓶ ꓡꓰ ꓝꓲˍ ꓡꓳ꓿ ꓬꓲ ꓙꓬ ꓡꓱꓻˍ ꓟ ꓔꓯ ꓮ ꓔꓲ. ꓤ ꓡꓰꓽ ꓓꓳꓻ꓿ ꓜꓽ ꓓꓳ ꓡꓰ ꓗ ꓠꓯ. ꓫꓵꓽ ꓫꓵ ꓕꓲ ꓐꓶꓽ ꓟꓶ ꓫꓵ ꓡꓰ ꓗ ꓠꓯ. ꓡꓰ ꓬꓲꓻ ꓙꓬ ꓟꓬꓽ ꓟꓬꓽ ꓓꓳꓻ ꓠ ꓔˍ ꓟ ꓥꓳ꓿
ꓚꓳꓝꓝꓰꓰ ꓓꓳꓻˍ ꓟ
ꓚꓳꓝꓝꓰꓰ꓾ ꓡꓯ‐ꓒꓯꓸꓼ‐ꓬꓰ꓾ ꓞꓽ ꓬꓰ, (ꓡꓽ‐ꓚꓬ.) ꓕꓱ ꓡꓱ ꓫꓵꓽ ꓠꓬ ꓖꓳ ꓓꓱꓽ ꓡꓰ ꓲꓣꓳꓠ ꓢꓯꓼ ꓛꓵꓼ ꓣꓴˍ ꓟ ꓐꓰ ꓑꓣꓳꓔꓰꓲꓠ ꓢꓯꓼ ꓙꓲꓺˍ ꓟ ꓗꓪ ꓘꓶꓻ ꓡꓶ ꓡꓰ ꓝꓲˍ ꓟ ꓪꓴ. ꓠꓬꓲ꓾ ꓕꓱ ꓡꓱ ꓓꓳꓻ ꓫꓵꓽ ꓔꓯ ꓓꓳꓻ ꓗꓴ. ꓢꓴ ꓥꓳ ꓐꓯ ꓕꓯ ꓠꓽ ꓜꓻ ꓜꓽ ꓓꓳ ꓡꓰ ꓗ ꓠꓯ. ꓫꓵꓽ ꓫꓵꓽ ꓕꓲ ꓐꓶꓽ ꓛꓲ ꓙꓳ ꓡˍ ꓕꓯ ꓡꓰꓽ ꓓꓳꓻ ꓠ ꓔˍ ꓥ꓾ ꓐꓰ ꓢꓷ. ꓪˍ ꓡꓳ꓿
ꓛꓵꓼ ꓡꓵ ꓛꓵꓼˍ ꓟ
ꓜꓽ ꓓꓴ ꓕꓲ ꓙꓰꓽ ꓙꓰꓽ ꓜꓽ ꓗꓷ ꓗ ꓠꓯ. ꓟꓷꓽ ꓠꓷ, ꓝꓱ꓾ ꓠ. ꓦꓴ ꓝꓱˍ ꓟ ꓑꓶ. ꓓꓴ ꓛꓵꓼ ꓡꓵ ꓛꓵꓼˍ ꓟ ꓥˍ ꓟꓲ ꓤ ꓟꓳ ꓠ ꓔ ꓓꓴ ꓕꓲ ꓟ ꓥ ꓡꓳ꓿ ꓜꓽ ꓓꓳ ꓡꓰˍ ꓟ ꓝꓲ ꓞꓼ ꓐꓰ ꓛꓵꓼ ꓡꓵ ꓛꓵꓼˍ ꓟ ꓠꓬ ꓠꓱ. ꓐꓯ ꓙꓵ, ꓗꓪ ꓛꓵꓼˍ ꓟ ꓢꓶ. ꓟꓽ ꓞꓲꓺ ꓖꓳ ꓓꓱꓽ ꓗꓪ ꓟꓽ ꓙꓲꓻ ꓗꓷ ꓡꓰˍ ꓝꓲˍ ꓟ ꓠꓬ (10) ꓝ. ꓛꓲ ꓙꓳˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿ ꓝꓮꓲ ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ꓾ ꓐꓵꓼ ꓟꓵ ꓚꓮꓠꓚꓰꓣ ꓒꓬꓱꓼ ꓡ ꓚꓱ, ꓔꓯ ꓥˍ ꓟꓲ ꓟꓴ ꓓꓯꓻ ꓡꓰ ꓝꓲˍ ꓡꓳ꓿ ꓜꓽ ꓓꓴ ꓐꓰ ꓫꓵꓽ ꓫꓵꓽ ꓕꓲ ꓐꓶꓽ ꓛꓲ ꓗꓷ, ꓡꓰˍ ꓕꓯ ꓡꓰꓽ ꓛꓵꓼ ꓠ ꓔˍ ꓡꓳ꓿
ꓢꓲ, ꓢꓶꓽ ꓜꓽˍ ꓟ
ꓟꓬꓽ ꓠꓬꓲ ꓠꓬ ꓜꓻ ꓜꓽ ꓓꓳ ꓡꓰˍ ꓟ ꓐꓰ ꓢꓲ, ꓢꓶꓽ ꓜꓽˍ ꓟ ꓬꓲ ꓡꓲꓽ ꓙꓳˍ ꓡꓳ꓿ ꓑꓮꓲꓽ ꓗꓪ ꓜꓻ ꓘꓴꓻ ꓖꓶ ꓜˍ ꓕꓯ ꓥ ꓟꓲ ꓟꓬꓽ ꓠꓬꓲ ꓠꓬ ꓜꓻ ꓜꓽ ꓓꓳ ꓡꓰ ꓗ ꓠꓯ. ꓢꓲ, ꓢꓶꓽ ꓲʼ ꓖꓶ ꓜꓽˍ ꓡꓳ꓿ ꓕꓱ ꓢꓲ, ꓢꓶꓽ ꓐꓴ ꓠꓬ ꓜꓽ ꓟꓽ ꓜꓳꓽ ꓕꓯ ꓣꓳ ꓦꓰꓼ ꓟ ꓙꓲꓺˍ ꓟ ꓟꓬꓱꓽ ꓬꓰ ꓚꓱ, ꓔꓯ ꓒꓲꓽ ꓡꓰ ꓝꓲ꓾ ꓮ ꓤ ꓤ ꓗꓷ ꓡꓰ ꓝꓲ ꓢꓲ ꓠꓬꓲ꓾ ꓦꓰꓼ ꓛꓲꓽ ꓔꓬ, ꓫ.ˍ ꓟ꓾ ꓟꓲꓽ ꓦꓲ ꓔꓴˍ ꓟ ꓔꓯ ꓒꓬꓱꓼ ꓡ ꓝꓲˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ, ꓢꓶꓽ ꓜꓽ ꓠꓲ, ꓫꓵˍ ꓠꓬ ꓜꓻ ꓟꓽ ꓜꓽ ꓧꓶ. ꓕꓯ ꓜꓽˍ ꓟ ꓠꓬ ꓪ ꓜꓲ ꓙꓲꓻˍ ꓡꓳ꓿ ꓜꓽ ꓓꓳ ꓡꓰ ꓗ ꓠꓯ. ꓢꓲ, ꓢꓶꓽ ꓜꓽˍ ꓥ ꓟꓲ ꓜꓽ ꓓꓴ ꓐꓰ (2) ꓙꓵ, ꓛꓲ ꓗꓶ, ꓢꓲ ꓜꓽ ꓠ ꓔˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓢꓶꓽ ꓛꓲ ꓞ, ꓟ (ꓢꓶꓽ ꓛꓲ ꓛꓲꓽˍ ꓟ)
ꓜꓽ ꓓꓳ ꓡꓰˍ ꓟ ꓝꓲ ꓢꓶꓽ ꓛꓲ ꓛꓲꓽˍ ꓠꓬ ꓟꓬꓽ ꓠꓬꓲ ꓝꓱ,ˍ ꓟ ꓜꓽ ꓓꓴ ꓔꓯ ꓜꓽ ꓗꓷ ꓗ ꓠꓯ. ꓢꓶꓽ ꓛꓲ ꓛꓲꓽˍ ꓠꓬ ꓢꓶꓽ ꓛꓲ ꓬꓲ ꓕꓯꓽ ꓢꓲ ꓕꓲ ꓔꓱ, ꓟ ꓐꓬ ꓡꓰ ꓢꓻˍ ꓡꓳ꓿ ꓖꓳ ꓟ ꓪꓴ. ꓠꓬꓲ ꓜꓽ ꓓꓳ ꓡꓰ ꓗ ꓠꓯ. ꓫꓵꓽ ꓫꓵ ꓕꓲ ꓐꓶꓽ ꓗꓶ, ꓡꓰˍ ꓕꓯ ꓡꓰꓽ ꓢꓶꓽ ꓛꓲ ꓛꓲꓽ ꓠ ꓔˍ ꓡꓳ꓿
ꓕꓯꓽ ꓢꓲ ꓗꓪ ꓐꓯ ꓡꓳ, ꓬꓰ ꓟ ꓠꓬ ꓜꓻ ꓜꓽ ꓓꓳ ꓡꓰ ꓗ ꓠꓯ. ꓬꓰ ꓟꓽ ꓓꓻ ꓟ ꓚꓱ, ꓥ ꓡꓳ꓿ ꓮ ꓙꓵꓽ ꓢꓴ ꓛꓳ ꓫꓱꓽ ꓢꓲ ꓗ, ꓛꓲꓽ ꓔꓬ, ꓢꓻˍ ꓟ ꓦꓬꓼ ꓠꓬꓲ ꓔꓯ ꓘꓳ ꓣꓴ ꓟꓶ ꓡꓰ ꓝꓲ꓿
