ꓮ‐ꓟꓰ‐ꓣꓲ‐ꓗ ꓗꓴꓷꓼ꓾ ꓟꓲ‐ꓠꓲ‐ꓢꓳ‐ꓔ ꓗꓴꓷꓼ ꓫꓴ꓾ Minneapolis ꓡꓳ ꓒꓱ ꓗꓪ 8 ꓦ 27 ꓠꓬꓲ꓾ ꓠꓽ ꓢꓽ ꓠꓬꓲ ꓠꓯꓼ ꓠꓯꓼ (8ꓽ30)ꓙꓵ, ꓪꓽ ꓘꓴ ꓔꓬ ꓕꓯ ꓡꓽ‐ꓛꓴ. ꓐꓶ꓾ ꓑꓳꓻ ꓑꓳˍ ꓟ ꓫꓵꓽ ꓪꓴꓽ ꓕꓲ ꓟ ꓒꓬꓱꓼ ꓗꓷ ꓢꓲ꓾ ꓫꓵꓽ ꓪꓴ ꓖꓳ ꓟ ꓗꓪ ꓤ ꓠꓱ ꓤ (2)ꓣꓳ ꓫꓵꓻ ꓢꓲ ꓠꓬꓲ (17) ꓣꓳ ꓠꓻ ꓓꓴ ꓓꓴ ꓡꓰ ꓟ ꓥ ꓡꓳ꓿ ꓡꓽ‐ꓛꓴ. ꓐꓶ ꓡ ꓢꓴ꓾ ꓑꓳꓻ ꓑꓳ ꓢꓴ ꓥˍ ꓟꓲ ꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓢꓰꓼ ꓗꓷꓳ꓾ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓯ ꓑꓶ ꓔ ꓡꓳ꓿
ꓤ ꓠꓱ ꓤ ꓫꓵꓻ ꓟ ꓔꓯ ꓡꓳ ꓒꓱ ꓙꓵꓽ ꓢꓲꓽ ꓒ ꓡꓰ ꓢꓷ. ꓙ ꓟꓳ ꓙ ꓗꓷ ꓢꓲ꓾ ꓟꓯꓼ ꓐꓴ ꓡꓰ ꓐꓯ ꓑꓶ ꓔ ꓟ ꓗꓪ ꓠꓬ ꓑꓳꓻ ꓑꓳ ꓢꓴ ꓐꓰ ꓕꓲ ꓪˍ 3 ꓣꓳ ꓫꓵꓻ ꓗꓷ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
ꓬꓲ ꓞꓲꓼ 20 ꓘꓳꓼ ꓖꓼ ꓡꓯ ꓖꓼ ꓙꓲ ꓙꓳˍ ꓟ ꓑꓳꓻ ꓑꓳ ꓢꓴ꓾ ꓡꓽ‐ꓛꓴ. ꓐꓶ ꓢꓴ ꓠꓬ Annunciation ꓟꓬꓱ ꓔ ꓟ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲ ꓗꓪ ꓢꓷ. ꓠꓲ, ꓢꓳ ꓤ ꓮ ꓟꓬ, ꓪꓽ ꓘꓴ ꓔꓬ ꓕꓯ ꓪꓽ ꓘꓴ ꓦꓲꓻ ꓗꓪ ꓑꓳꓻ ꓩꓴ ꓡˍ ꓟ ꓥ ꓡꓳ꓾ ꓐꓰ Minneapolis ꓟꓯꓼ ꓪꓴ. ꓓꓵ ꓐ‐ꓣꓮꓲ‐ꓬꓯ‐ꓳ‐ꓦ‐ꓣ ꓡꓰ ꓟꓰꓓꓲꓮ ꓐꓴ ꓔꓯ ꓐꓯ ꓖꓶ ꓗꓷꓳ꓿
ꓔꓲꓺ ꓒ ꓪ ꓔꓲ. ꓡꓰꓳ (14) ꓥˍ ꓟꓲ ꓫꓵꓽ ꓪꓴ ꓕꓱ ꓟ ꓑꓶ. ꓓꓴ “ꓮ ꓘꓶ. ꓠꓲ, ꓟ ꓫ. ꓔꓬ ꓡꓳ” ꓐꓰ 8 ꓦ 27 ꓠꓬꓲ ꓕꓯ ꓐꓯ ꓔ ꓡꓳ꓿
ꓝꓐꓲ ꓟꓯꓼ ꓪꓴ. ꓓꓵ ꓣꓱꓽ ꓢꓴ ꓕꓲ ꓣꓳ ꓥˍ ꓟꓲ꓾ ꓬꓲ ꓪ ꓜꓴꓻ ꓡꓰ ꓮ ꓟꓶ ꓒꓬꓱꓼ ꓗꓷ ꓟ ꓫꓵꓽ ꓪꓴ ꓠꓬ “ꓗꓴꓷꓼ ꓘꓴꓽ ꓗꓪ ꓟꓽ ꓓꓻ ꓟꓽ ꓞꓽ ꓬꓰˍ ꓟ ꓐꓰ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓔꓯ ꓟꓽ ꓠꓲ, ꓒꓴ ꓟ ꓪꓴ. ꓠꓬꓲ ꓬꓰˍ ꓟ” ꓥ ꓟꓽ ꓥ ꓚꓬ, ꓠꓬꓲ ꓔꓬ ꓡꓳ꓾ ꓐꓰ ꓐꓯ ꓔ ꓡꓳ꓿
ꓟꓲ‐ꓠꓲ‐ꓢꓳ‐ꓔ ꓗꓴꓷꓼ ꓫꓴ ꓗꓪ ꓪꓴꓽ ꓓꓰ ꓡꓰˍ ꓟ ꓡꓳ ꓒꓱ ꓥ ꓟ Minneapolis ꓡꓳ ꓒꓱ ꓐꓶꓻ ꓓꓳ ꓖꓴ ꓟꓶ. ꓕꓲ ꓛꓱꓽ ꓗꓪ ꓙꓳˍ ꓟ ꓞꓳ ꓘ, ꓕꓲ ꓘ, ꓗꓪ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲꓻ ꓐꓰ ꓝ. ꓔˍ ꓟ Annunciation Catholic School ꓢꓷ. ꓠꓲ, ꓢꓳ ꓦꓲꓻ ꓗꓪ ꓢꓳ ꓤ 195 ꓣꓳ ꓛꓲ ꓙꓳˍ ꓟ ꓥ ꓢꓲ꓾ ꓢꓳ ꓦꓲꓻ ꓒꓴ ꓗꓷ ꓗ ꓠꓯ. (2) ꓠꓬꓲ ꓕꓯ ꓮ ꓟꓶ ꓟ ꓡꓰ ꓫꓵꓽ ꓪꓴ ꓒꓬꓱꓼ ꓡˍ ꓟ ꓥ ꓡꓳ꓾ ꓐꓰ ꓢꓷ. ꓪˍ ꓡꓳ꓿
