ꓣꓳ ꓤꓶꓻ ꓗꓪ ꓮ ꓘꓶꓸ ꓛꓲ ꓠꓯ ꓞꓲꓹ ꓟ ꓙꓵꓹ ꓗꓪ ꓥ ꓟꓲ ꓠꓵꓻ ꓠꓲꓹ ꓐꓰ ꓖꓽ ꓖꓶ ꓠꓹ ꓟ ꓠꓬ ꓬꓲ ꓙꓵꓹ ꓞꓰ ꓡꓰ ꓫꓵ ꓟꓽ ꓙꓳ꓾
ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓢꓽ ꓠꓬꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓜꓲ ꓡꓯ ꓘꓳ ꓟ ꓙꓵꓹ ꓗꓪ ꓢꓲ ꓒꓽ ꓬꓰ-ꓢꓴ ꓠꓬ ꓬꓲ ꓔꓯ ꓬꓲ ꓗ ꓠꓯꓸ ꓢꓲ ꓗꓪ ꓐꓰ ꓬꓲ ꓔꓯ ꓢꓰꓼ_ ꓟ꓾ ꓪꓴꓽ ꓞ ꓟ꓾ ꓟꓽ ꓢꓷꓸ ꓐꓰ ꓐꓯ ꓔ ꓟ ꓕꓱ ꓡꓱ ꓫꓵ ꓮ ꓟꓬꓹ ꓔꓳꓹ ꓜꓳ ꓢꓲ ꓡꓯꓼ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓚꓰꓹ ꓗꓷ ꓥ ꓟꓲ ꓬꓲ ꓠꓬ ꓠꓵꓻ ꓠꓲꓹ ꓟꓸ ꓖꓶ ꓔ ꓡꓳ꓾ ꓬꓲ ꓟꓶꓽ ꓗꓪ ꓫ ꓕꓱ ꓔ ꓟ ꓠꓬ ꓟꓽ ꓙꓲ ꓟ ꓫ ꓕꓱ ꓘꓶꓽ ꓟꓽ ꓥ꓾ ꓠꓵꓻ ꓠꓲꓹ ꓗꓪ ꓐꓰ ꓡꓰ ꓫ ꓕꓱ ꓗꓷ ꓟ ꓥ ꓡꓳ=
ꓣꓳ ꓔꓯ ꓒꓰꓹ ꓗꓷꓳ ꓐꓰ ꓓꓵꓽ ꓙ ꓔꓬ ꓕꓯ ꓣꓳ ꓔꓯ ꓮ ꓡꓰ ꓕꓲ ꓣꓳ ꓥ ꓟꓲ ꓢꓷꓸ ꓡꓰ ꓓꓴ ꓟꓽ ꓬꓰ ꓐꓰ ꓓꓵꓽ ꓙ ꓔꓬ ꓟ ꓙꓵꓹ ꓗꓪ ꓢꓲ ꓒ ꓠꓯꓼ ꓗꓪ ꓐꓰ ꓖꓽ ꓖꓶ ꓠꓲꓹ ꓣꓱ ꓛꓰ ꓔꓯ ꓶꓽ ꓓꓰ ꓓꓴ ꓬꓰ ꓡꓯ=
ꓣꓳ-ꓟ ꓡꓳ ꓒꓱ ꓟꓬꓹ ꓟ ꓞꓻ ꓢꓯꓼ ꓑꓶ ꓓꓴ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓐꓰ ꓜꓲ ꓡꓯ ꓘꓳ ꓟ ꓔꓯ ꓔꓲꓺ ꓒ ꓪ ꓔꓲ ꓑꓮꓴꓡ ꓔꓧꓰ ꓦꓲ ꓘꓳꓹ ꓗꓪ ꓬꓰ ꓗꓷ ꓟ ꓥ ꓡꓳ= ꓬꓲ ꓘꓳꓹ ꓗꓪ ꓟꓽ ꓓꓰ ꓢꓴ ꓔꓯ ꓥ ꓟꓲ ꓔꓲꓺ ꓒ ꓪ ꓔꓲ ꓡꓰ ꓒꓵꓽ ꓗꓹ ꓬꓰ ꓗꓷ ꓟ ꓥꓳ=
ꓪꓴ-ꓢ ꓡꓰ ꓖꓽ ꓖꓶ_ ꓟ ꓠꓵꓻ ꓠꓲꓹ
ꓙꓴ-ꓐꓲ-ꓡꓲ-ꓘꓳꓼ ꓬꓲ ꓕꓲ ꓟꓴ ꓥ ꓟ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓥꓳ ꓡꓳꓸ ꓓꓴ ꓐꓯ ꓟ ꓔꓯ ꓕꓲ ꓠꓽ ꓡꓲ ꓕꓲ ꓠꓽ ꓙꓵꓻ ꓠꓲꓹ ꓟꓸ ꓖꓶ ꓟ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓡꓰ ꓫ ꓙꓵ ꓟꓷꓼ ꓙꓵ ꓟ꓾ ꓫꓵꓻ ꓗꓷ ꓟ ꓐꓰ ꓢꓯꓸ ꓬꓲꓼ ꓡ ꓟ ꓚꓱꓹ ꓔꓯ ꓟꓸ ꓖꓶ_ ꓟ ꓗꓪ ꓪꓴ-ꓢ ꓡꓰ ꓖꓽ ꓖꓶ_ ꓟ ꓠꓵꓻ ꓠꓲꓹ ꓚꓱꓹ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓗ ꓠꓯꓸ ꓢꓲ ꓗꓪ ꓐꓰ ꓬꓲ ꓔꓯ ꓢꓰꓼ ꓗꓷ ꓥ ꓟꓲ ꓬꓲ ꓟꓶꓽ ꓗꓪ ꓛꓲ ꓬꓲ ꓝꓲ ꓓꓴ ꓐꓴ ꓔꓯ ꓠꓵꓻ ꓠꓲꓹ ꓟꓸ ꓖꓶ ꓗꓷ ꓟ ꓥꓳ=
ꓬꓲ ꓟꓶꓽ ꓟꓶꓽ ꓘꓶꓼ ꓜ ꓜ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓗ ꓠꓯꓸ ꓢꓲ ꓗꓪ ꓪꓴꓽ ꓜ ꓡ ꓢꓴ ꓔꓯ ꓬꓲ ꓠꓬ ꓜ ꓓꓴ ꓓꓳ ꓓꓴ ꓖꓶ_ ꓡꓳ꓾ ꓕꓱ ꓟ ꓠꓬ ꓬꓲ ꓡꓰ ꓖꓶ ꓜ ꓟ ꓡꓰ ꓟꓽ ꓥ꓾ ꓬꓲ ꓔꓯ ꓕꓯ ꓡꓱ ꓬꓰ ꓡ ꓢꓴ ꓔꓯ ꓬꓲ ꓢꓷꓸ ꓥ ꓟꓲ ꓬꓲ ꓠꓵꓻ ꓠꓲꓹ ꓔꓯ ꓬꓲ ꓟꓶꓽ ꓗꓪ ꓛꓲ ꓟꓸ ꓖꓶ ꓗꓷ ꓟ ꓥꓳ= ꓠꓵꓻ ꓠꓲꓹ ꓕꓱ ꓟ ꓔꓯ ꓟꓽ ꓒꓰꓹ ꓗꓷ=
ꓬꓲꓸ ꓟꓶꓽ ꓗꓪ ꓛꓲ ꓠꓵꓻ ꓠꓲꓹ ꓟꓸ ꓖꓶ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓬꓲ ꓠꓲꓹ ꓟ ꓔꓯ ꓢꓷꓸ ꓟ ꓬꓲꓸ ꓚꓰ ꓓꓽ ꓟ ꓥ ꓡꓳ= ꓣꓳ ꓬꓰ ꓙ ꓢꓲ ꓣꓳ ꓔꓯ ꓟꓽ ꓢꓷꓸ ꓡ ꓥ ꓟꓲ꓾ ꓠꓲꓹ ꓟ ꓐꓬ ꓡꓰ ꓓꓴ ꓙꓳ ꓥ ꓟꓲ ꓮ ꓙꓵ ꓗꓪ ꓐꓰ ꓒꓰꓹ ꓗꓷ ꓡ ꓥ ꓟꓲ ꓮ ꓕꓯ ꓟꓲ ꓔꓬ ꓟ ꓬꓲ ꓠꓵꓻ ꓠꓲꓹ ꓥ ꓡꓳ=
ꓢꓲ ꓒ ꓬꓰ-ꓢꓴ ꓬꓲ ꓬꓲ ꓔꓳꓹ ꓜꓳ ꓡ ꓟ ꓔꓯ ꓬꓲ ꓢꓷꓸ_ ꓡꓳ꓾ ꓕꓱ ꓟ ꓔꓯ ꓬꓲ ꓡꓰ ꓠꓲꓹ ꓡꓱ ꓡꓱ ꓐꓰ ꓬꓲ ꓢꓲꓺ ꓗꓷ ꓟ ꓥ ꓡꓳ= ꓬꓲ ꓔꓯ ꓗ ꓠꓯ ꓢꓲ ꓗꓪ ꓐꓰ ꓛꓴ ꓙꓳ ꓡ ꓥ ꓟꓲ꓾ ꓫ ꓙꓵ ꓟꓷꓼ ꓙꓵ ꓡ ꓥ ꓟꓲ ꓕꓱ ꓟ ꓔꓯ ꓬꓲ ꓡꓰ ꓔꓳꓹ ꓢꓲ ꓠꓬꓲ ꓬꓲ ꓡꓰ ꓖꓶ ꓠ ꓔ ꓟ ꓠꓵꓻ ꓠꓲꓹ ꓔꓯ ꓬꓲ ꓢꓷꓸ ꓡꓳ= ꓬꓲ ꓢꓲꓺ ꓚꓰꓸ ꓗꓷ ꓟ ꓥꓳ=
ꓕꓱ ꓟ ꓔꓯ ꓬꓲ ꓡꓰ ꓔ ꓔꓳꓹ ꓗꓷ ꓟ ꓥ ꓡꓳ= ꓬꓲ ꓡꓰ ꓗ ꓕ ꓓꓴ ꓟꓽ ꓬꓰ꓾ ꓕꓱ ꓟ ꓗꓪ ꓐꓰ ꓙꓻ ꓫꓱꓽ ꓠꓲꓹ ꓫꓵ_ ꓡꓳ= ꓬꓲ ꓔꓯ ꓗ ꓠꓯ ꓢꓲ ꓗꓪ ꓐꓰ ꓛꓴꓽ ꓙꓳ ꓡ ꓢꓴ ꓔꓯ ꓬꓲ ꓛꓲ ꓒꓯꓹ ꓞꓲ ꓖꓶ_ ꓡꓳ=ꓑ ꓑ ꓔꓯ ꓖꓶ ꓜ ꓡꓳ= ꓬꓲ ꓡꓰ ꓢꓷꓸ ꓥ ꓟꓲ ꓬꓲ ꓟꓶꓽ ꓗꓪ ꓛꓲ ꓠꓵꓻ ꓠꓲꓹ ꓟꓸ ꓖꓶ_ ꓡꓳ=
ꓔꓱꓹ ꓟ ꓖꓽ ꓖꓶ ꓠꓲꓹ ꓔꓯ ꓟꓸ ꓖꓶ ꓗꓷ ꓟ ꓥ ꓡꓳ꓾ ꓒꓳꓹ ꓡꓲꓼ ꓡ ꓟ ꓗꓪ ꓛꓲ ꓟꓽ ꓡꓳꓸ ꓬꓲ ꓗꓪ ꓐꓰ ꓖꓽ ꓖꓶ ꓖꓶ_ ꓡꓳ= ꓕꓱ ꓟ ꓠꓬ ꓬꓲ ꓒꓵꓽ ꓖꓶ ꓟꓽ ꓛꓲ ꓟ ꓣꓱ ꓛꓰ ꓥ ꓡꓳ꓾ ꓣꓳ ꓟꓽ ꓘꓳꓹ ꓣꓴ ꓟ ꓙꓵꓹ ꓗꓪ ꓐꓰ ꓣꓳ ꓟꓲ ꓕꓯ ꓗꓪ ꓛꓲ ꓔꓬ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓬꓴ-ꓓ ꓠꓬ ꓢꓲ ꓒ ꓬꓰ-ꓢꓴ ꓠꓵꓻ ꓠꓲꓹ ꓔꓯ ꓬꓲ ꓟꓽ ꓢꓷꓸ꓾ ꓖꓳ ꓟ ꓑꓶ ꓓꓴ ꓢꓲ ꓫꓬ ꓕꓳ ꓶ ꓗꓪ ꓢ-ꓓꓯ ꓠꓬ ꓬꓲ ꓠꓯꓼ ꓗꓪ ꓓꓵꓽ ꓡꓰꓳ ꓐꓰ ꓢꓲ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓥ ꓡꓳ=
ꓬꓲ ꓟꓶꓽ ꓗꓪ ꓛꓲ ꓠꓵꓻ ꓠꓲꓹ ꓟꓸ ꓖꓶ ꓓꓳ ꓡꓰ ꓠꓬ꓾ ꓚꓬꓴ ꓙ ꓗꓷ ꓗ ꓠꓯꓸ ꓠꓵꓻ ꓠꓲꓹ ꓔꓯ ꓟꓽ ꓘꓳꓹ ꓣꓴ ꓗꓷ ꓟ ꓑꓶ ꓓꓴ ꓢ-ꓓꓯ ꓠꓬ ꓓꓵ ꓡ ꓟ ꓥ ꓡꓳ= ꓠꓲꓹ ꓠꓵ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓡꓰ ꓖꓶ ꓔ ꓟ ꓠꓬ ꓠꓵꓻ ꓠꓲꓹ ꓥ ꓡꓳ= ꓕꓱ ꓟ ꓠꓬ ꓣꓳ ꓔꓯ ꓢꓷꓸ ꓡꓰ ꓝꓲ_ ꓡꓳ= ꓪꓴ-ꓢ ꓡꓰ ꓖꓶ ꓡ ꓟ ꓔꓯ ꓣꓳ ꓘꓳꓹ ꓣꓴ ꓟꓶ ꓠꓹ ꓟ ꓬꓲ ꓠꓯꓼ ꓗꓪ ꓐꓰ ꓮ ꓙꓵ ꓬꓰ ꓖꓶ ꓓꓳ ꓡꓰ ꓟ ꓥꓳ= ꓣꓳ ꓬꓲ ꓔꓯ ꓒꓰꓹ ꓗꓷ ꓥ ꓟꓲ ꓬꓲ ꓠꓬ ꓡꓯ ꓒꓯ ꓛꓱꓻ ꓢꓲ ꓖꓶ ꓔ ꓟ ꓥ ꓡꓳ=
ꓪꓴ-ꓢ ꓡꓰ ꓖꓽ ꓖꓶ_ ꓟ ꓣꓱ ꓛꓰ ꓠꓬ ꓣꓳ ꓔꓱꓹ ꓟ ꓥꓳ ꓡꓳꓸ ꓓꓴ ꓔꓯ ꓟꓸ ꓖꓶ ꓔ ꓡꓳ= ꓕꓱ ꓟ ꓡꓰ ꓐꓰ ꓬꓲ ꓔꓯ ꓠꓲꓹ ꓠꓵꓻ ꓠꓹ ꓟ ꓣꓳ ꓔꓯ ꓢꓲꓺ ꓠꓹ ꓟ ꓖꓶ ꓔ ꓡꓳ= ꓢꓲ ꓒ ꓬꓰ-ꓢꓴ ꓔꓱꓹ ꓟ ꓠꓵꓻ ꓠꓲꓹ ꓠꓬ ꓟꓽ ꓙꓲ ꓟ ꓗꓪ ꓬꓲ ꓟꓶꓽ ꓟꓽ ꓗꓷ ꓡꓰ ꓡꓰ꓾ ꓫ ꓙꓵ ꓟꓷꓼ ꓙꓵ ꓟ ꓔꓯ ꓘꓳꓹ ꓣꓴ ꓢꓲ ꓠꓵꓻ ꓠꓲꓹ ꓟꓸ ꓖꓶ ꓗꓷ ꓟ ꓥ ꓡꓳ= ꓠꓲꓹ ꓠꓵꓻ ꓠꓹ ꓟ ꓮ ꓕꓯ ꓟꓲ ꓬꓲ ꓚꓱꓹ ꓕꓲ ꓚꓱꓹ ꓙꓳ_ ꓡꓳ= ꓕꓱ ꓬꓲ ꓠꓯꓹ ꓟ ꓔꓯ ꓣꓳ ꓐꓱ ꓶ ꓢꓲ ꓒ ꓬꓰ-ꓢꓴ ꓡꓰ ꓐꓲ ꓜꓲꓼ ꓡꓰ ꓝꓲ_ ꓡꓳ꓾ ꓣꓳ ꓔꓯ ꓥ ꓟꓲ ꓘꓴ ꓔ ꓡꓳ=
ꓠꓲꓹ ꓠꓵ ꓡꓳ ꓐꓰ ꓐꓯ ꓢꓲ ꓮ ꓟꓬ ꓛꓲ ꓐꓬ ꓡꓰ ꓡ꓾ ꓫ ꓕꓱ ꓠꓲꓹ ꓫꓵ ꓟ ꓟꓽ ꓫ ꓕꓱ ꓮ ꓟꓬ ꓛꓲ ꓡꓳꓼ ꓡꓰ ꓡ꓾ ꓣꓳ ꓤꓶꓻ ꓠꓯꓼ ꓗꓪ ꓐꓬ ꓡꓰ ꓝꓲ ꓟ ꓚꓱꓹ ꓮ ꓟꓬ ꓟꓬꓹ ꓡꓰ ꓡ꓾ ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓯ ꓔ ꓡꓳ꓾ ꓮ ꓙꓵ ꓠꓯꓼ ꓗꓪ ꓖꓶ_ꓟ꓾ ꓪ ꓟꓶ_ ꓟ ꓕꓱ ꓡꓱ ꓟꓽ ꓫꓱꓹ ꓥ ꓟꓲ ꓠꓲꓹ ꓠꓵ ꓠꓹ ꓟ ꓚꓱꓹ ꓠꓬ ꓮ ꓕꓯ ꓟꓲ ꓙꓳ_ ꓡꓳ꓾ ꓐꓰ ꓥ ꓡꓳ=
ꓖꓽ ꓖꓶ_ ꓟ ꓠꓬ ꓟꓽ ꓙꓲ_ ꓟ ꓔꓯ ꓒꓰꓹ ꓗꓷ ꓟ ꓟꓽ ꓥ꓾ ꓠꓱꓸ ꓐꓯꓼ ꓟꓽ ꓙꓲ_ ꓟ ꓟꓽ ꓟꓬ ꓡ ꓠꓹ ꓟ ꓐꓱ ꓶ ꓗ ꓕ ꓟ ꓥ ꓡꓳ= ꓟꓽ ꓙꓲ_ ꓟ ꓔꓯ ꓡ ꓠꓹ ꓟ ꓤꓶꓻ ꓗꓪ ꓕꓱ ꓟꓽ ꓙꓲ_ ꓟ ꓟꓽ ꓗꓷ ꓡꓰ ꓠꓹ ꓟ ꓐꓱ ꓶ ꓐ ꓡ ꓟꓬ ꓛꓲ ꓢꓯꓼ ꓕꓵꓼ ꓙ ꓫꓱ ꓠꓹ ꓟ ꓥ ꓡꓳ=
ꓫ ꓓꓴ ꓥ ꓟꓲ ꓙꓳ ꓡ ꓥꓳ꓾ ꓠꓯ ꓞꓲꓹ ꓟ ꓙꓵꓹ ꓥ ꓟꓲ ꓙꓳ ꓡ ꓥꓳ꓾ ꓦ ꓢꓯꓼ ꓐ ꓫꓵ ꓥ ꓟꓲ ꓙꓳ ꓡ ꓥꓳ꓾ ꓠꓲꓹ ꓟ ꓐꓬ ꓡꓰ ꓫꓵ ꓥ ꓟꓲ ꓙꓳ ꓡ ꓥꓳ꓾ ꓕꓲ ꓣꓳ ꓣꓳ ꓗꓪ ꓐꓰ ꓣꓳ ꓗ ꓠꓯꓸ ꓢꓲ ꓗꓪ ꓐꓰ ꓣꓳ ꓔꓯ ꓛꓴ ꓙꓳ ꓡꓳ ꓫꓵ ꓥ ꓟꓲ ꓙꓳ ꓡ ꓥꓳ꓾ ꓕꓱ ꓡꓱ ꓘꓶꓽ ꓡꓶꓽ ꓓꓴ ꓠꓬ ꓣꓳ ꓔꓯ ꓐꓲꓸ ꓞ ꓡ ꓥꓳ꓾ ꓣꓳ ꓔꓯ ꓣꓴ ꓞꓰ ꓡ ꓥꓳ꓾ ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓟꓲ ꓓꓳ ꓙꓰ ꓡꓲꓹ ꓙꓰ ꓠꓹ ꓟ ꓗ ꓘꓶꓽ ꓕꓲ ꓟ ꓒꓴ ꓖꓶ ꓡ ꓥꓳ꓾ ꓐꓰ ꓐꓯ_ ꓟ ꓥꓳ ꓡꓳꓸ ꓓꓴ ꓖꓶ ꓡ ꓟ ꓥ ꓡꓳ=
ꓣꓳ ꓔꓯ ꓒꓰꓹ ꓗꓷ ꓡ ꓥ ꓟꓲ ꓠꓲꓹ ꓠꓵꓻ ꓓꓴ ꓬꓰ ꓡꓯ꓾ ꓢꓲ ꓡꓲꓹ ꓙꓵꓻ ꓠꓲꓹ ꓐꓰ ꓔꓳꓹ ꓓꓴ ꓬꓰ ꓡꓯ꓾ ꓕꓱ ꓟ ꓠꓬ ꓠꓵꓻ ꓠꓲꓹ ꓔꓯ ꓟꓽ ꓒꓰꓹ ꓗꓷ ꓟꓬꓱꓺ ꓓꓳꓽ ꓐꓰ ꓙꓻ ꓫꓱꓽ ꓔꓬ ꓟ ꓥ ꓡꓳ= ꓒꓰꓹ ꓗꓷ ꓡ ꓟ ꓙꓵꓹ ꓗꓪ ꓖꓽ ꓖꓶ ꓐ ꓡ ꓠꓹ ꓟ ꓪꓴ-ꓢ ꓠꓯꓼ ꓗꓪ ꓐꓰ ꓣꓱ ꓛꓰ ꓔꓯ ꓶꓽ ꓓꓰ ꓓꓴ ꓬꓰ ꓡꓯ꓾ ꓠꓵꓻ ꓠꓲꓹ ꓠꓬ ꓡ ꓞꓳ ꓕꓲ ꓣꓳ ꓔꓯ ꓡꓲꓹ ꓙꓰ ꓝꓲ ꓡ ꓟ ꓥ ꓡꓳ=
ꓢꓲ ꓒ ꓬꓰ-ꓢꓴ ꓠꓬ ꓬꓲ ꓗꓸ ꓠꓯꓸ ꓢꓲ ꓗꓪ ꓐꓰ ꓛꓴ ꓙꓳ ꓡ ꓢꓴ ꓠꓯꓼ ꓗꓪ ꓥ ꓟꓲ ꓚꓬꓴ ꓙ ꓟꓶ ꓟ ꓬꓲ ꓚꓱꓹ ꓖꓶ_ ꓡꓳ= ꓖꓽ ꓖꓶ_ ꓟ ꓣꓱ ꓛꓰ ꓠꓬ ꓠꓲꓹ ꓟ ꓘꓴ ꓗꓪ ꓐꓰ ꓧꓪꓸ ꓡꓰ ꓟ ꓥ ꓡꓳ꓾ ꓕꓱ ꓣꓱ ꓛꓰ ꓠꓬ ꓮ ꓔꓳ ꓡꓰ ꓟꓽ ꓥ ꓟ ꓔꓯ ꓢꓷꓸ ꓠ ꓔ ꓡꓳ= ꓖꓽ ꓖꓶ_ ꓟ ꓠꓬ ꓠꓱꓸ ꓐꓯꓼ ꓢꓴ ꓟꓽ ꓘꓳꓹ ꓣꓴ ꓥ ꓟꓲ ꓠꓲꓹ ꓫ ꓟꓬ ꓫ ꓟ ꓔꓯ ꓟꓶꓽ ꓡꓰ ꓝꓲ_ ꓡꓳ꓾ ꓢꓲ ꓡꓲꓹ ꓗꓹ ꓛꓲ ꓟ ꓔꓯ ꓪ ꓟꓶ ꓡ ꓡꓳ꓾ ꓬꓲ ꓟꓽ ꓘꓳꓹ ꓣꓴ ꓠꓬ ꓕꓱ ꓢꓲ ꓡꓲꓹ ꓟ ꓠꓬ ꓣꓳ ꓠꓯꓼ ꓗꓪ ꓝꓮꓲ ꓒꓳꓹ ꓡ ꓡ ꓥꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓟ ꓥ ꓡꓳ=
