ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓠꓬ 8 ꓦ ꓟ 23 ꓠꓬꓲ ꓠꓽ ꓛꓳꓼ ꓠꓬꓲ ꓕꓯ ꓣꓳ-ꓟ ꓗꓪ ꓔꓬ ꓟ꓾ ꓔꓲꓺ ꓟ ꓜꓴꓻ ꓐꓴ ꓖꓪ ꓙꓱꓻ ꓜꓲꓼ ꓓꓴ ꓬꓰ ꓔꓬ ꓟ ꓔꓲꓺ ꓟ ꓜꓴꓻ (4) ꓜꓴꓻ ꓔꓯ ꓘꓳꓹ ꓣꓴ ꓜꓲ ꓗꓷ ꓟ ꓥꓳ= ꓕꓱ ꓔꓲꓺ ꓟ ꓜꓴꓻ ꓐꓴ ꓠꓬ꓾ ꓠꓮꓜꓰꓣꓰꓔꓧ ꓔꓲꓺ ꓟ ꓜꓴꓻ꓾the Daugthers of Nazareth ꓔꓲꓺ ꓟ ꓜꓴꓻ꓾ ꓢꓲ ꓫꓬ_ ꓟ ꓞꓳ ꓦꓲꓻ ꓔꓲꓺ ꓟ ꓜꓴꓻ (the Apostles of the Holy Family Institute)꓾ ꓫꓱꓸ ꓤ ꓢꓴ ꓟ-ꓡꓲ-ꓬ ꓔꓲꓺ ꓟ ꓜꓴꓻ ꓐꓴ ꓥ ꓡꓳ= ꓕꓱ ꓫꓱꓸ ꓤ ꓢꓴ ꓟ-ꓡꓲ-ꓬ ꓔꓲꓺ ꓟ ꓜꓴꓻ ꓔꓯ “ꓙꓲ_ ꓟ ꓢꓷꓸ ꓠꓲꓹ ꓖꓶ ꓗꓴꓸ ꓟ ꓔꓲꓺ ꓟ ꓜꓴꓻ” ꓐꓰ ꓥ ꓟꓲ ꓘꓴ ꓔ ꓡꓳ=
ꓕꓱ ꓔꓲꓺ ꓟ ꓜꓴꓻ 4 ꓜꓴꓻ ꓔꓯ ꓜꓲ ꓗꓷ ꓕꓯ ꓔꓲꓺ ꓒ ꓪ ꓔꓲ ꓡꓰ ꓪꓴ-ꓢ ꓔꓯ ꓡꓯꓼ ꓙꓱ ꓖꓶ ꓔ ꓟ ꓤꓶꓻ ꓠꓬ ꓢꓷꓸ ꓙ ꓟꓳ ꓙ ꓟ ꓐꓰ ꓥꓳ ꓡꓳꓸ ꓓꓴ ꓔꓯ ꓚꓺ ꓖꓶ ꓠꓹ ꓟ ꓘꓴ ꓔ ꓟꓶ ꓟ ꓤꓶꓻ ꓥ ꓟ꓾ ꓕꓱ ꓡꓱ ꓡꓯꓼ ꓙꓱ ꓔ ꓟ ꓤꓶꓻ ꓠꓬ ꓚꓲ ꓛꓬ ꓘꓴ ꓜꓲꓼ ꓞꓳ ꓐꓱ ꓶ ꓚꓲ ꓛꓬ ꓔꓲꓺ ꓟ ꓜꓴꓻ ꓐꓱ ꓶ ꓮ ꓘꓶꓸ ꓛꓲ ꓡꓳꓸ ꓐꓲ_ ꓟ ꓡꓯꓼ ꓫꓴ ꓥ ꓟ꓾ ꓜꓴꓻ ꓫꓬꓹ ꓔꓷ ꓢꓴ ꓐꓴ ꓠꓬ ꓬꓲ ꓪ ꓡꓰ ꓕꓲ ꓞꓸ ꓕꓲ ꓞꓸ ꓡꓯꓼ ꓙꓱ ꓖꓶ ꓔ ꓟ ꓢꓲ-ꓫꓬ-ꓟ-ꓦ ꓡꓯꓼ ꓫꓴꓻ ꓔꓯ ꓡꓯꓼ ꓙꓱ ꓖꓶ ꓔ ꓟ ꓥ ꓟ꓾ ꓕꓱ ꓡꓯꓼ ꓫꓴꓻ ꓠꓬ ꓮ ꓕꓯ ꓟꓲ ꓙꓽ ꓜꓲꓼ ꓠ ꓔ ꓟ꓾ ꓫ ꓔꓬ ꓢꓴ꓾ ꓠꓻ ꓔꓬ ꓢꓴ꓾ ꓐꓴ ꓠꓴ ꓪ ꓠꓯꓼ ꓗꓪ ꓛꓲ ꓡ ꓕꓯ ꓪꓴ-ꓢ ꓡꓰ ꓕꓲ ꓪ ꓔꓬ ꓟ ꓔꓯ ꓠꓴ ꓪ ꓗꓪ ꓐꓰ ꓕꓲ ꓞꓸ ꓢꓷꓸ ꓡꓰ ꓝꓲ_ ꓟ꓾ ꓘꓳꓹ ꓣꓴ ꓟꓶ_ ꓟ꓾ ꓕꓱ ꓟ ꓗꓪ ꓐꓰ ꓪꓴ-ꓢ ꓡꓰ ꓠꓴ ꓪ ꓔꓯ ꓖꓶ ꓔ ꓟ ꓡꓯꓼ ꓫꓴꓻ ꓔꓯ ꓙꓲ_ ꓟ ꓚꓱꓹ ꓗꓪ ꓐꓰ ꓝꓮꓲ ꓒꓳꓹ ꓡ_ ꓟ꓾ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ= ꓝꓮꓲ ꓜꓴꓻ ꓔꓯ ꓫꓬꓹ ꓔꓷ ꓢꓴ ꓐꓴ ꓬꓲ ꓪ ꓢꓯꓼ ꓕꓵꓼ ꓠꓲꓹ ꓔꓯ ꓥ ꓟꓲ ꓫꓱꓸ ꓖꓶ ꓢꓲ ꓠꓬꓲ ꓜꓴꓻ ꓗꓪ ꓐꓰ ꓛꓳ ꓚꓱꓹ ꓥ ꓟ ꓠꓮꓜꓮꓣꓰꓔꓧ ꓡꓳ ꓒꓱ ꓗꓪ ꓐꓰ ꓢꓲ ꓫꓬꓹ ꓟ ꓦꓲꓻ ꓕꓵ ꓛꓳ ꓚꓱꓹ꓾ ꓕꓲ ꓦꓲꓻ ꓢꓴ ꓬꓲ ꓒꓵꓽ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓥ ꓟꓲ ꓙꓻ ꓡꓯꓼ ꓘꓳ ꓠꓹ ꓟ ꓢꓯꓼ ꓕꓵꓼ ꓢꓯꓸ ꓔꓬ ꓟ ꓥ ꓟ꓾ ꓢꓲ ꓫꓬ_ ꓟ ꓞꓳ ꓦꓲꓻ ꓠꓬ ꓪꓽ ꓘꓴ_ ꓟ ꓗꓪ ꓬꓲ ꓚꓰ꓾ ꓠꓵꓻ ꓠꓲꓹ ꓐꓰ ꓢꓲ ꓫꓬ_ ꓟ ꓗꓪ ꓢꓴ ꓡꓰ ꓔꓯꓺ ꓢꓳ ꓓꓴ ꓬꓲ ꓚꓰ ꓗꓷ ꓠ ꓔ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ=
8 ꓦ 22 ꓠꓬꓲ ꓠꓽ ꓥꓪꓽ ꓠꓬꓲ꓾ ꓟꓹ ꓟ ꓟ-ꓡꓲ ꓑꓮꓲ ꓦꓬꓼ ꓠꓬꓲ ꓔꓯ ꓔꓲꓺ ꓒ ꓪ ꓔꓲ ꓡꓰ ꓢꓲ ꓡꓲꓹ ꓗꓹ ꓛꓲ ꓠꓹ ꓟ ꓐꓱ ꓶ ꓜ ꓚꓵꓸ ꓚꓵꓸ ꓪꓽ ꓘꓴ ꓠꓹ ꓟ ꓐꓯ ꓔ ꓡꓳ= ꓕꓱ ꓟ ꓐꓰ ꓕꓲ ꓪ ꓔꓲꓺ ꓒ ꓪ ꓔꓲ ꓡꓰ ꓝꓮꓲ ꓒꓳꓹ ꓔꓴ ꓠꓹ ꓟ ꓟꓽ ꓬꓰ꓾ ꓚꓲ ꓛꓬ ꓠꓲꓹ ꓟ ꓔꓯ ꓛꓴ ꓙꓳ ꓠꓲꓹ ꓟꓽ ꓙꓳ ꓫꓬ ꓫꓬ ꓡꓰ ꓔꓬ ꓓꓴ ꓬꓰ ꓡꓯ꓾ ꓣꓳ ꓮ ꓙꓵ ꓬꓲ ꓔꓶꓻ ꓙꓱꓼ ꓠꓬ ꓟꓽ ꓙꓲ_ ꓟ ꓔꓯ ꓙꓲ_ ꓟ ꓐꓰ ꓧꓪꓸ ꓡꓰ ꓐ ꓡꓰ ꓓꓴ ꓥ ꓟ꓾ ꓔꓲꓺ ꓒ ꓪ ꓔꓲ ꓡꓰ ꓢꓲ ꓡꓲꓹ ꓠꓹ ꓟ ꓐꓱ ꓶ ꓐꓯ ꓖꓶ ꓔ ꓟ ꓔꓯ ꓔꓲꓺ ꓒ ꓓꓽ ꓐꓴ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓮ ꓟꓬꓹ ꓔꓹ ꓡ ꓟ꓾ ꓟꓵꓽ ꓗꓳ ꓓꓵ ꓓꓵ ꓗꓪ ꓗꓴꓷꓼ ꓫꓵ ꓪꓴ ꓗꓷ ꓡꓰ ꓔꓬ ꓟ꓾ 65 ꓗꓴꓷꓼ ꓟꓽ ꓞꓲ ꓔꓬ ꓟ꓾ ꓢꓰꓼ ꓡꓯꓼ ꓘꓳ ꓓꓴ ꓑꓶ ꓓꓴ ꓢꓲ ꓡꓲꓹ ꓗꓹ ꓛꓲ ꓓꓴ ꓟꓽ ꓙꓳ ꓟ꓾ ꓫꓸ ꓓꓴ ꓟꓷꓼ ꓓꓴ ꓟꓬ ꓡ ꓟ꓾ ꓐꓬ ꓡꓰ ꓓꓴ ꓮ ꓟꓬꓹ ꓗꓷ ꓡꓰ ꓟ꓾ ꓔꓱꓹ ꓟ ꓖꓽ ꓖꓶ ꓠꓲꓹ ꓠꓬ ꓝꓴꓲ ꓣꓷꓠꓸ ꓠ ꓗꓪ ꓛꓲ ꓟꓽ ꓥꓳ ꓡꓳꓸ ꓚꓲ ꓛꓬ ꓗꓪ ꓐꓰ ꓟꓲ ꓕꓯ ꓖꓼ ꓖꓶ ꓠꓲꓹ ꓟꓸ ꓖꓶ ꓠ ꓔ ꓟ꓾ ꓖꓽ ꓖꓶ ꓐꓰ ꓐꓯ ꓕꓯ ꓟꓽ ꓙꓲ_ ꓟ ꓔꓯ ꓠꓬ ꓒꓰꓹ ꓗꓷ ꓟꓽ ꓐ ꓡ꓾ ꓖꓳ ꓡꓱ ꓥ ꓟꓲ ꓟꓽ ꓙꓲ_ ꓟ ꓔꓯ ꓝꓮꓲ ꓕꓲ ꓧꓪꓹ ꓟꓽ ꓗꓷ ꓡꓰ ꓠꓹ ꓟ ꓗꓽ ꓕ ꓟ ꓥ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=
