ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓶꓼ ꓓꓳ ꓫꓱ, ꓓꓳꓽ ꓚꓺ ꓢꓴ ꓙꓲꓻ ꓫꓬ ꓢꓴ Francis Xavier ꓚꓺ ꓟꓲꓽ (St. Francis Xavier)
ꓙꓲꓻ ꓫꓬ ꓢꓴ Francis Xavier ꓠꓬ ꓢꓑꓮꓲꓠ ꓗꓴꓷꓼ ꓗꓪ ꓪ ꓔꓲ ꓫꓵꓽ ꓤ ꓪꓳꓽ ꓤ ꓥ ꓡꓳ꓿ ꓬꓲ ꓔꓯ ꓮꓓ (1506) ꓘꓳꓼ ꓕꓯ ꓦꓵꓻ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Francis Xavier ꓠꓬ ꓙꓮꓑꓮꓠ ꓗꓴꓷꓼ ꓐꓰ ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓟ ꓗꓪ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿
St. Ignatius of Loyola ꓠꓬ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓔꓯ ꓒꓴ ꓗꓷ ꓟ ꓖꓳ ꓕꓲ ꓘꓳꓼ ꓕꓯ ꓙꓲꓻ ꓫꓬ ꓢꓴ ꓝꓣꓮꓠꓚꓲꓢ ꓠꓬ ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓥ ꓡꓳ꓿
ꓲꓠꓓꓲꓮ ꓗꓴꓷꓼ ꓗꓳ‐ꓮ ꓟꓬꓱꓺ ꓔ ꓟ ꓟꓵꓽ ꓗꓪ ꓓꓽ ꓪꓴ. ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓟ. ꓖꓶ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓗꓷ ꓟ ꓪꓴ. ꓠꓬꓲ ꓲꓠꓓꓲꓮ ꓗꓴꓷꓼ ꓗꓪ ꓪꓴ‐ꓢ ꓦꓻ ꓡꓱ ꓡ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓟꓬꓽ ꓡ ꓡꓳ꓿
ꓬꓲ ꓠꓬ ꓡꓳ ꓒꓱ꓾ ꓞꓳ ꓘ, ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱ, ꓮ ꓟꓬ, ꓔꓯ ꓥ ꓟꓲ ꓟ. ꓖꓶ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓲꓠꓓꓲꓮ ꓗꓴꓷꓼ ꓑꓶ ꓓꓳ ꓕꓲ ꓒꓳ,ꓗꓪ ꓪꓴ‐ꓢ ꓟꓬꓱꓽ ꓮ ꓟꓬ, ꓬꓰ ꓗꓷ ꓗ. ꓠꓯ ꓙꓮꓑꓮꓠ ꓗꓴꓷꓼ ꓗꓪ ꓝꓮꓲ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓙꓰꓢꓴꓲꓔ ꓔꓲꓺ ꓒ ꓜꓴꓻ ꓔꓯ ꓒꓴ ꓖꓶ ꓗꓷ ꓟ ꓥ ꓡꓳ꓿
ꓙꓲꓻ ꓫꓬ ꓢꓴ Francis Xavier ꓠꓬ ꓙꓮꓑꓮꓠ ꓗꓴꓷꓼ ꓗꓪ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓟ. ꓖꓶ ꓗꓷ ꓗ. ꓠꓯ ꓝꓮꓲ ꓧꓶꓽ ꓟꓵꓽ ꓗꓪ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓗꓷꓳ꓿
ꓖꓳ ꓡꓱ ꓥ ꓟꓲ ꓙꓲꓻ ꓫꓬ ꓢꓴ Francis Xavier ꓠꓬ ꓧꓶꓽ ꓟꓵꓽ ꓗꓪ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓙꓰ ꓟ ꓙꓻ ꓖꓴ ꓗꓪ ꓮꓓ 1552 ꓘꓳꓼ ꓕꓯ ꓢꓲꓺ ꓒ ꓠꓯꓼ ꓗꓪ ꓬꓲꓼ ꓟꓶ ꓡꓰꓳ꓿ ꓙꓲꓻ ꓫꓬ ꓢꓴ Francis Xavier ꓠꓬ ꓫꓵꓻ ꓗꓪ ꓛꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ. ꓖꓶ ꓢꓴ ꓥ ꓡꓳ꓿ ꓙꓲꓻ ꓫꓬ ꓢꓴ Francis Xavier ꓠꓬ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓚꓺ ꓟ ꓗꓪ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓴ ꓙꓲꓽ ꓫꓬ ꓢꓴ ꓕꓲ ꓣꓳ ꓥ ꓡꓳ꓿ ꓫ. ꓟꓳ ꓪ꓿
