ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓡꓰ ꓐꓰ ꓗꓽ ꓕꓽ ꓠꓯˍ ꓟ ꓚꓱ, (Care of the environment)
ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓡꓰ ꓐꓰ ꓗꓽ ꓕꓽ ꓠꓯˍ ꓟ ꓚꓱ, ꓗꓪ ꓐꓰ ꓥ ꓡꓳ꓿ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓚꓱ, ꓔꓯ ꓟꓳ ꓮ ꓡꓰ ꓬꓰ ꓠꓯˍ ꓟ ꓐꓰ ꓮ ꓡꓰ ꓗꓽ ꓕꓽ ꓠ, ꓟ ꓢꓯꓼ ꓕꓵꓼ ꓠꓯˍ ꓟ ꓚꓱ, ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ
꓿ ꓟꓲ ꓠꓯ ꓫ. ꓓꓴ ꓟꓷ ꓢꓴ ꓐꓴ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓫ. ꓡꓰ ꓝꓲ ꓟ ꓠꓬ ꓟꓲ ꓠꓯ ꓮ ꓘꓶ. ꓞ ꓡ ꓟ ꓥ ꓟ ꓪꓴ. ꓠꓬꓲ ꓥ ꓡꓳ꓿ ꓕꓱ ꓟ ꓔꓯ ꓗꓽ ꓕꓽ ꓠ, ꓟ ꓞꓼ ꓞꓼ ꓬꓰ ꓠ, ꓟ ꓣꓳꓺ ꓚꓵ ꓟ ꓥ ꓡꓳ꓿
ꓘꓴ ꓜꓲꓼ ꓞꓳ ꓗꓪ ꓐꓰ ꓥ ꓟꓲ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓗꓽ ꓕꓽ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓝꓮꓲ ꓠꓬꓲ. ꓠꓬꓲ ꓗꓴꓷꓼ ꓮ ꓟꓬ, ꓗꓪ ꓐꓰ ꓙꓼ ꓣꓱ ꓢꓲ ꓠꓬꓲ ꓟꓬꓱꓽ ꓬꓰ ꓟ ꓗꓴꓷꓼ ꓙꓵꓽ ꓢꓲꓽ ꓒꓽ ꓐꓴ ꓔꓯ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓟ ꓟꓬꓱꓽ ꓔꓯ ꓬꓰ ꓠ, ꓟ ꓐꓯ ꓟ. ꓖꓶ ꓠ ,ꓟ ꓟꓲꓽ ꓣꓳꓺ ꓚꓵ ꓟ ꓥ ꓡꓳ꓿ ꓝꓮꓲ ꓞꓳ ꓤ ꓮ ꓟꓬ, ꓐꓰ ꓪꓽ ꓡꓯ ꓘꓳ, ꓢꓲ ꓠꓬꓲ ꓕꓲ ꓠꓲ ꓕꓲ ꓪ ꓟꓬꓱꓽ ꓬꓰ ꓠ, ꓟ ꓟꓲ ꓣꓳꓺ ꓚꓵˍ ꓟ ꓥ ꓡꓳ꓿
ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓦꓮꓔꓲꓚꓮꓠ ꓚꓳꓴꓚꓲꓡꓰ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓬꓲ ꓙꓵ, ꓠꓬꓲ ꓣꓳ ꓔꓯ ꓧꓪ, ꓛꓵꓽ ꓖꓶ ꓡ ꓟ ꓐꓯ ꓟ ꓔꓯ ꓟꓬꓱꓽ ꓖꓶ ꓢꓲ ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓯꓼ ꓖꓶ ꓔ ꓟ ꓥ ꓡꓳ꓿ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓼ ꓡ ꓟ ꓬꓰ ꓠ, ꓟ ꓘꓴ ꓜꓲꓼ ꓞꓳ ꓬꓰ ꓠ, ꓟ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓬꓲ ꓟꓳ ꓓꓴ ꓠꓯˍ ꓘꓪ ꓗꓪ ꓣꓳ ꓟꓯꓻ ꓠ, ꓟ ꓔ ꓟ ꓶꓻ ꓐꓰ ꓣꓳ ꓬꓰ ꓠ, ꓟ ꓔ ꓟ ꓟꓬꓱꓽ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓔꓱ ꓚꓵˍ ꓟ ꓐꓰ ꓢꓷ. ꓠꓲ, ꓙꓳ ꓒꓽ ꓐꓴ ꓡꓰ ꓕꓲ ꓐꓰ ꓟꓵꓽ ꓘꓳꓼ ꓔꓯ ꓗꓽ ꓕꓽ ꓠ, ꓟ ꓟꓬꓱꓽ ꓔꓯ ꓬꓰ ꓠ, ꓔ ꓟ ꓥ ꓡꓳ꓿ ꓕꓱ ꓡꓱ ꓬꓰ ꓠ, ꓟ ꓬꓰ ꓚꓱ, ꓧꓪ ꓠ ꓟ ꓠꓬꓲꓽ ꓚꓱ, ꓙꓳ ꓟ ꓥ ꓡꓳ꓿
1. ꓫꓵꓽ ꓠꓬ ꓟꓲ ꓠꓯ ꓢꓷ. ꓠꓲ, ꓗꓪ ꓐꓰ ꓢꓷ. ꓟ ꓟꓳ ꓟ ꓐ ꓡ ꓠ, ꓟ ꓐꓰ ꓝꓮꓲ ꓠꓬ ꓞꓳ ꓤ ꓮ ꓙꓵꓽ ꓔꓯ ꓢꓷ. ꓡꓰ ꓠ, ꓟ ꓟ. ꓖꓶ ꓠ, ꓟ ꓥ ꓡꓳ꓿
ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓼ ꓠ, ꓟ ꓠꓬ ꓣꓳ ꓐꓱ ꓶ ꓟꓽ ꓙꓲ ꓟ ꓫꓵꓽ ꓪꓴꓽ ꓓꓽ ꓟ ꓒꓬꓱꓼ ꓡ ꓟ ꓥ ꓢꓲ ꓠꓬꓲ ꓡ ꓞꓳ ꓮ ꓟꓬ, ꓔꓯ ꓞꓳ ꓫ. ꓠꓯˍ ꓗꓪ ꓛꓲ ꓡꓰ ꓝꓲ ꓟ ꓫꓵꓽ ꓪꓴꓽ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓗꓪ ꓐꓰ ꓮ ꓘꓶ. ꓞꓼ ꓡ ꓟ ꓥ ꓡꓳ꓿
ꓡ ꓟ ꓦꓬꓼ ꓠꓬꓲ ꓕꓯ ꓦꓵꓻ ꓡ ꓢꓴ ꓣꓳ ꓡꓲ. ꓑ ꓡꓲ. ꓒꓲ ꓐꓴ ꓢꓷ. ꓡꓰ ꓠ, ꓟ ꓣꓳ ꓟ. ꓖꓶ ꓠ, ꓟ ꓶꓻ ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓟꓲ ꓠꓯ ꓞꓼ ꓡ ꓟ ꓔꓯ ꓚꓵ ꓚꓵ ꓘꓳ, ꓣꓴ ꓠꓬ ꓢꓲꓺ ꓒ ꓬꓰ‐ꓢꓴ ꓶꓼ ꓓꓳ ꓫꓱ, ꓓꓳ ꓡꓰ ꓐꓰ ꓫꓱ, ꓡꓯꓽ ꓘꓳ, ꓟ ꓥ ꓡꓳ꓿
ꓘꓴ ꓜꓲꓼ ꓞꓳ ꓠꓬ ꓟꓵꓽ ꓘꓳꓼ ꓞꓼ ꓡ ꓟ ꓔꓯ ꓡ ꓞꓳ ꓬꓲ ꓜꓴꓻ ꓔꓯ ꓐꓯ ꓟ. ꓖꓶ ꓐꓯ ꓒꓶ ꓐ ꓡ ꓠ, ꓟ ꓢꓯꓼ ꓪ ꓙꓳ ꓠ, ꓟ ꓮ ꓘꓶ. ꓣꓳꓺ ꓚꓵ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓮ. ꓔꓳ. ꓙꓼ ꓔꓯ ꓮꓽ ꓔꓳꓽ ꓣꓱ ꓟ ꓐꓯ ꓠꓲ, ꓫꓵˍ ꓟ ꓠꓬ ꓣꓱ ꓟꓽ ꓛꓲ ꓟ ꓔꓶ. ꓗꓪ ꓣꓱ ꓔꓯ ꓤ ꓟꓳ ꓠ, ꓟ ꓥ ꓡꓳ꓿ ꓝꓮꓲ ꓛꓲ ꓡ ꓟ ꓦꓬꓼ ꓠꓬꓲ ꓣꓳ ꓤ ꓠꓱ ꓐꓴ ꓗ, ꓛꓲ ꓛꓲ ꓡꓰ ꓢꓯ. ꓔꓬ ꓟ ꓟꓶ ꓠ, ꓟ ꓟꓵꓽ ꓘꓳꓼ ꓒꓳ, ꓡ ꓟ ꓔꓯ ꓗꓽ ꓕꓽ ꓠ, ꓟ ꓣꓳ ꓮ ꓙꓵꓽ ꓟꓬꓱꓽ ꓬꓰ ꓠ ,ꓟ ꓶꓻ ꓙꓳ ꓟ ꓥ ꓡꓳ꓿
