ꓟ, ꓟ ꓟ‐ꓡꓲ ꓔꓯ ꓟꓴ ꓗꓪ ꓛꓵꓽ ꓔꓯꓺ ꓙꓰ ꓟ ꓑꓮꓲꓽ
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ ꓟ, ꓟ ꓟ‐ꓡꓲ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓛꓴꓽ ꓔꓯꓺ ꓙꓰ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ (1ꓽ39‐56) ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟ, ꓟ ꓟ‐ꓡꓲ ꓠꓬ ꓬꓲ‐ꓡꓲ‐ꓫ‐ꓑꓷ ꓔꓬ ꓗꓪ ꓙꓰˍ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓟ, ꓟ ꓟ‐ꓡꓲ ꓠꓬ ꓞꓼ ꓐꓰ ꓪꓽ ꓚꓲ ꓟꓵꓽ ꓗꓪ ꓟ ꓬꓴ‐ꓔ ꓡꓳ ꓒꓱ ꓕꓲ ꓡꓳ ꓒꓱ ꓗꓪ ꓙꓰ ꓡꓳ꓿ ꓖꓳ ꓗꓪ ꓛꓲ ꓬꓰ ꓠꓬ ꓢ‐ꓚꓬ‐ꓡꓲ‐ꓬ ꓦꓲ ꓗꓪ ꓓꓵꓽ ꓡꓰ ꓢꓲ ꓬꓲ‐ꓡꓲ‐ꓫ‐ꓑꓷ ꓔꓯ ꓒꓵꓽ ꓗ ꓬꓰ ꓡꓳ꓿ ꓬꓲ‐ꓡꓲ‐ꓫ‐ꓑꓷ ꓠꓬ ꓢꓯꓼ ꓓꓽ ꓟ ꓡꓰ ꓤ ꓟꓶ ꓤ ꓮ ꓙꓵꓽ ꓢꓴ ꓕꓯ ꓢꓲ ꓶꓼ ꓙꓳ ꓫꓱ, ꓙꓳ ꓢꓴ ꓠꓬ ꓠꓴ ꓥ ꓡꓳ꓿ ꓠꓴ ꓖꓳ ꓓꓱ ꓗꓪ ꓶꓻ ꓞ, ꓟ ꓟꓲ ꓶꓼ ꓙꓳ ꓫꓱ, ꓙꓳˍ ꓡꓳ꓿
ꓥꓪ ꓢꓲ ꓒꓽ ꓬꓲ ꓟ, ꓟ ꓥꓪ ꓔꓯ ꓔꓱ, ꓠꓬꓲ ꓡˍ ꓟ ꓔꓯ ꓥꓪ ꓮ ꓡꓲ ꓘꓳ ꓣꓴ ꓒꓵꓽ ꓢꓰꓽ꓿ ꓢꓲ ꓒ ꓬꓲ ꓔꓯ ꓐꓯ ꓗꓷ ꓟ ꓮ ꓙꓵꓽ ꓐꓲ ꓡˍ ꓥꓳ ꓐꓰ ꓙꓵꓻ ꓢꓴ ꓤ ꓟꓶ ꓤ ꓠꓴ ꓠꓽ ꓶꓼ ꓙꓳ ꓫꓱ, ꓙꓳ ꓡꓳ ꓐꓰ ꓐꓯ ꓗꓷ ꓡꓳ꓿
ꓖꓳ ꓗ. ꓠꓯ ꓟ, ꓟ ꓠꓬ ꓐ, ꓐ ꓪꓴ‐ꓢ ꓔꓯ ꓫꓱ, ꓖꓶ ꓟ ꓠꓬ ꓥꓪ ꓶ ꓟꓬ ꓠꓬ ꓢꓲꓺ ꓒ ꓔꓯ ꓫꓱ, ꓖꓶ ꓔꓬ ꓡꓳ ꓥꓪ ꓦˍ ꓟꓲ ꓪꓴ‐ꓢ ꓥꓪ ꓚꓬꓴ ꓢꓲꓺ ꓒ ꓗ, ꓛꓲ ꓔꓬ ꓡꓳ ꓐꓰ ꓫꓱ, ꓖꓶ ꓡꓳ꓿ ꓟ, ꓟ ꓟ‐ꓡꓲ ꓠꓬ ꓬꓲ ꓫꓵꓽ ꓤ ꓧꓪ ꓤ ꓬꓲ‐ꓡꓲ‐ꓑꓷ ꓦꓲꓻ ꓗꓪ ꓦꓻ ꓐ ꓢ ꓟ ꓔꓬ ꓗꓷ ꓗ. ꓠꓯ ꓬꓲ ꓦꓲꓻ ꓗꓪ ꓡ ꓙꓰˍ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ, ꓟ ꓟ‐ꓡꓲ ꓔꓯ ꓔꓯꓺ ꓢꓳꓻ ꓢꓲ ꓠꓬꓲ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓘꓴ ꓔꓬ ꓟ ꓥ ꓡꓳ꓿ ꓟ, ꓟ ꓟ‐ꓡꓲ ꓠꓬ ꓬꓲ ꓫꓵꓽ ꓤ ꓧꓪ ꓤ ꓥ ꓬꓲ‐ꓡꓲ‐ꓫ‐ꓑꓷ ꓠꓬ ꓤ ꓠꓱ ꓶ ꓞ ꓟ ꓪꓴ. ꓠꓬꓲ ꓟꓬꓱꓽ ꓬꓰ ꓙ ꓠ, ꓟ ꓣꓱ ꓬꓯꓼ ꓔꓬ ꓟ ꓙꓵ, ꓕꓯ ꓪꓽ ꓚꓲ ꓪꓽ ꓐ ꓗꓪ ꓙꓰ ꓢꓲ ꓠꓬꓲ ꓬꓰ ꓙ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓠꓬ ꓟ, ꓟ‐ꓡꓲ ꓔꓯ ꓐ, ꓐ ꓪꓴ‐ꓢ ꓡꓰ ꓟꓴ ꓗꓪ ꓗꓴꓷꓼ ꓗꓪ ꓛꓵꓽ ꓔꓯꓺ ꓙꓰˍ ꓟ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓟ, ꓟ ꓟ‐ꓡꓲ ꓠꓬ ꓚꓬꓴ ꓢꓲꓺ ꓒ ꓔꓯ ꓦꓵꓻ ꓠ, ꓟ ꓢꓲ ꓔ ꓟ ꓪꓴ‐ꓢ ꓟ, ꓟ ꓥ ꓟꓲ ꓬꓲ ꓠꓬ ꓟꓬꓱꓺ ꓓꓳꓽ ꓟꓽ ꓧꓪ ꓬꓲ ꓠꓬ ꓙꓽ ꓣꓳ ꓟ ꓠꓲ, ꓟ ꓔꓯ ꓣꓱ ꓢꓲ ꓠꓬꓲ ꓟꓲ ꓠꓯ ꓗꓪ ꓢꓯ. ꓔꓬ ꓗꓷ ꓟ ꓥ ꓡꓳ꓿ ꓟ, ꓟ ꓟ‐ꓡꓲ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓬꓲ ꓧꓪꓽ ꓖꓳ ꓓꓱ ꓐꓰ ꓦꓻ ꓔꓯ ꓐ, ꓐ ꓪꓴ‐ꓢ ꓡꓰ ꓛꓵꓽ ꓔꓯꓺ ꓙꓰ ꓟ ꓥ ꓡꓳ꓿
ꓟ, ꓟ ꓟ‐ꓡꓲ ꓠꓬ ꓙꓽ ꓣꓳ ꓠꓲ, ꓟ ꓙꓳ ꓢꓴ ꓥ ꓟ ꓪꓴ. ꓠꓬꓲ ꓪꓴ‐ꓢ ꓡꓰ ꓬꓲ ꓔꓯ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓞꓳ ꓫꓵꓽ ꓞꓳ ꓙꓱ ꓮ ꓙꓵꓽ ꓐꓴ ꓟ, ꓟ ꓐꓰ ꓟꓬꓱꓺ ꓓꓳꓽ ꓖꓶ ꓟ ꓥ ꓡꓳ꓿ ꓟ, ꓟ ꓟ‐ꓡꓲ ꓠꓬ ꓙꓽ ꓣꓳ ꓟ ꓠꓲ, ꓟ ꓣꓱ ꓢꓲ ꓠꓬꓲ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓕꓯ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓐꓰ ꓝꓲ ꓓꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓢꓴ ꓥ ꓡꓳ꓿
ꓬꓲ ꓠꓬ ꓠꓲꓽ ꓛꓳꓽ ꓕꓲ ꓛꓳꓽ ꓔꓯ ꓮ ꓡꓰ ꓐꓰ ꓬꓰ ꓙ ꓠ, ꓟ ꓮ ꓫꓵꓽ ꓣꓱ ꓬꓯꓼ ꓔꓬ ꓡ ꓐꓰ ꓮ ꓕꓯ ꓥ ꓟꓲ ꓡꓳ. ꓢꓲ ꓠꓬꓲ ꓬꓰ ꓙ ꓢꓴ ꓥ ꓡꓳ꓿ ꓣꓱ ꓬꓯꓼ ꓔꓬ ꓟ ꓔꓯ ꓢꓷ. ꓢꓴ ꓝꓮꓲ ꓙꓽ ꓣꓳ ꓟ ꓠꓲ, ꓟ ꓡꓰ ꓬꓰ ꓙ ꓢꓴ ꓥ ꓡꓳ꓿
Assumption ꓐꓰ ꓐꓯ ꓟ ꓟꓴ ꓗꓪ ꓗꓴꓷꓼ ꓗꓪ ꓛꓵꓽ ꓔꓯ ꓙꓰ ꓟ ꓑꓮꓲꓽ ꓔꓯ ꓠꓬ ꓐ, ꓐ ꓪꓴ‐ꓢ ꓡꓰ ꓟ, ꓟ ꓟ‐ꓡꓲ ꓔꓯ ꓟꓬꓱꓺ ꓓꓳꓽ ꓖꓶ ꓟ ꓥ ꓡꓳ꓿ ꓟ‐ꓡꓲ ꓠꓬ ꓬꓲ ꓢꓯ. ꓔꓬ ꓟ ꓕꓲ ꓤꓶꓻ ꓡꓰ ꓪꓴ‐ꓢ ꓠꓲ, ꓡꓶꓽ ꓔꓯ ꓛꓳ ꓢꓴ ꓥ ꓡꓳ꓿ ꓬꓲ ꓠꓬ ꓙꓽ ꓣꓳ ꓟ ꓠꓲ, ꓟ ꓙꓳ ꓢꓴ ꓥ ꓟ ꓡꓰ ꓟꓽ ꓞꓲ ꓪꓴ‐ꓢ ꓔꓯ ꓗ, ꓛꓲ ꓛꓲ ꓡꓰ ꓟꓬꓱꓺ ꓓꓳꓽ ꓖꓶ ꓫꓱ, ꓖꓶ ꓢꓴ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓟ, ꓟ ꓟ‐ꓡꓲ ꓔꓯ ꓔꓯꓺ ꓢꓳꓻ ꓢꓲ ꓠꓬꓲ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓓꓴ ꓬꓰ ꓡꓯ꓿ ꓙ ꓣꓳ ꓟ ꓠꓲ, ꓟ ꓣꓱ ꓢꓲ ꓠꓬꓲ ꓣꓳꓺ ꓓꓰ ꓟ ꓟꓬꓱꓽ ꓔꓯ ꓬꓰ ꓓꓴ ꓬꓰ ꓡꓯ꓿
ꓟꓬꓱꓺ ꓓꓳꓽ ꓟꓽ ꓧꓪ ꓮ ꓫꓵꓽ ꓬꓰ ꓥ ꓟꓲ ꓪꓴ‐ꓢ ꓠꓵꓻ ꓠꓲ, ꓡꓰ ꓬꓰ ꓙ ꓔꓳ, ꓙ ꓓꓴ ꓬꓰ ꓡꓯ꓿ ꓣꓳ ꓮ ꓙꓵꓽ ꓠꓬ ꓪꓴ‐ꓢ ꓤ ꓠꓱ ꓤ ꓐꓴ ꓥ ꓡꓳ꓿ ꓐ, ꓐ ꓪꓴ‐ꓢ ꓡꓰ ꓬꓲ ꓤ ꓠꓱ ꓤ ꓐꓴ ꓒꓬꓱꓼ ꓡ ꓠ, ꓟ ꓢꓲ ꓔ ꓟ ꓪꓴ. ꓠꓬꓲ ꓣꓳ ꓥ ꓟꓲ ꓪꓴ‐ꓢ ꓤ ꓠꓱ ꓐꓴ ꓘꓴ ꓟꓶ ꓠ, ꓟ ꓒꓵꓽ ꓟ ꓪꓴ‐ꓢ ꓤ ꓠꓱ ꓐꓴ ꓒꓬꓱꓼ ꓡ ꓠ, ꓟ ꓢꓯ. ꓔꓬ ꓓꓴ ꓬꓰ ꓡꓯ꓿ ꓪꓴ‐ꓢ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
