ꓕꓳ,‐ꓙꓷꓼ (ꓗꓴ‐ꓠꓬꓳ.) ꓐꓯˍ ꓟ ꓔꓯ ꓟꓶꓽ‐ꓛꓲ‐ꓔꓶ. ꓛꓵ꓾ ꓢꓲ, ꓟꓶꓽ ꓜꓲ ꓛꓵˍ ꓡꓰ ꓐꓰ ꓚꓬ. ꓗꓷ ꓛꓴ ꓗꓷ ꓢꓲ ꓜꓽ ꓓ, ꓟ ꓠꓽ ꓟꓽ ꓥ꓿ ꓬꓲ ꓛꓵ ꓔꓯ ꓚꓺ ꓗꓷ꓾ ꓡꓬꓽ ꓡꓰ ꓠ ꓗꓷ ꓔ ꓢꓲ ꓠꓬꓲ ꓜꓽˍ ꓟ ꓥ ꓡꓳ꓿ ꓖꓳ ꓟ ꓔꓯ ꓐꓽ ꓐꓽ ꓤ ꓪꓳ ꓗꓷ ꓢꓲ ꓡꓱ ꓜ꓾ ꓗꓳꓺ ꓜꓽ꓾ ꓦ‐ꓓꓴ‐ꓢꓶꓽ ꓡ, ꓝꓲꓼ ꓐꓰ ꓑꓯ. ꓗꓷ ꓢꓲ ꓜꓽ ꓓˍ ꓟ ꓔꓯ ꓠꓬ ꓣꓳ ꓢꓷ. ꓔ ꓟ ꓥꓳ꓿ ꓕꓱ ꓡꓱ ꓜꓽ ꓐ ꓡˍ ꓟ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓠꓬ ꓮ ꓡꓲ ꓫꓵꓽ ꓙꓲꓻ ꓖꓴ ꓖꓶˍ ꓡ ꓐꓯ ꓟ ꓔꓯ ꓠ ꓠ, ꓓꓴ ꓬꓰ ꓡꓯ꓿
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓐꓯˍ ꓟ ꓠꓬ ꓬꓲ ꓢꓯꓼ ꓒ ꓐꓲ ꓓꓯ,ˍ ꓟ ꓬꓲ ꓛꓵ ꓕꓲ ꓙꓰꓽ ꓥꓳ꓿ ꓢꓲ, ꓟꓶ ꓜꓲ ꓬꓲ ꓝꓳꓽ ꓐꓰ ꓮꓽ ꓡ, ꓕꓲ ꓡꓰ, ꓛꓲˍ ꓥꓳ꓿ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓜꓲ ꓠꓬ ꓮꓢꓲꓮ ꓗꓴꓷꓼ ꓗꓪ ꓬꓲ ꓪꓴ. ꓔꓴˍ ꓟ ꓬꓲ ꓜꓲ ꓥ ꓢꓲ ꓠꓬꓲ ꓔꓲ‐ꓣꓲ‐ꓡꓲꓠ‐ꓗ꓾ ꓑꓧꓲꓡꓡꓲꓑꓲꓠꓰ꓾ ꓧꓶꓽ ꓗꓴꓷꓼ ꓖꓴ ꓟꓶ. ꓐꓰ ꓠ‐ꓬꓴ,‐ꓖꓲ‐ꓠꓲ ꓐꓴ ꓗꓪ ꓣꓱꓻˍ ꓟ ꓬꓲ ꓜꓲ ꓥꓳ꓿ ꓣꓳ ꓖꓳ ꓓꓱꓽ ꓐꓱ ꓶ ꓙꓲꓻˍ ꓟ ꓬꓲ ꓢꓯꓼ ꓮ ꓟꓬ, ꓙꓳˍ ꓟ ꓥ ꓡꓳ꓿
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵ ꓗꓪ ꓠꓬ ꓕꓱ ꓡꓱ ꓫꓵꓽ ꓬꓲ ꓢꓯꓼ ꓓꓯ,ˍ ꓟ ꓥ ꓡꓳ꓿ ꓢꓮꓔꓚꓧ (ꓗ‐ꓢꓲ ꓢꓯꓼ)꓾ ꓬꓲꓻ ꓙꓬ ꓢꓯꓼ꓾ ꓬꓲ ꓞꓶꓻ ꓢꓯꓼ꓾ ꓑꓣꓳꓔꓰꓲꓠ꓾ ꓝꓲꓐꓰꓣ ꓢꓯꓼ꓾ ꓑꓳꓔꓮꓢꓢꓲꓴꓟ꓾ ꓚꓮꓡꓚꓲꓴꓟ꓾ ꓲꓣꓳꓠ ꓢꓯꓼ꓾ ꓟꓮꓖꓠꓰꓢꓲꓴꓟ꓾ ꓢꓳꓓꓲꓴꓟ꓾ ꓜꓲꓠꓚ ꓐꓰ ꓚꓳꓑꓑꓰꓣ ꓢꓯꓼ ꓐꓴ ꓓꓯ,ˍ ꓟ ꓥ ꓡꓳ꓿
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓙꓲꓻ ꓖꓴ ꓙꓳˍ ꓟ ꓚꓱ, ꓐꓴ ꓠꓬ ꓾
ꓫꓵꓽ ꓘꓴꓽ ꓗꓪ ꓟ ꓗꓳ‐ꓡꓯ‐ꓢ‐ꓕ‐ꓣꓮꓪ ꓢꓯꓼ ꓐꓴ ꓔꓯ ꓞꓰꓻ ꓡꓰ ꓝꓲˍ ꓡꓳ꓾
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓗꓪ omega-3 fatty acids ꓢꓯꓼ ꓓꓯ,ˍ ꓟ ꓑꓶ. ꓓꓴ ꓫꓵꓽ ꓘꓴꓽ ꓗꓪ ꓟꓽ ꓙꓲꓻ ꓟ ꓬꓲ ꓞꓶꓻ ꓐꓴ ꓔꓯ ꓣꓴ ꓦ ꓖꓶ ꓢꓲ ꓙꓲꓻˍ ꓟ ꓗꓳ‐ꓡꓯ‐ꓢ‐ꓕ‐ꓣꓮꓪ ꓢꓯꓼ ꓔꓯ ꓟꓴ ꓓꓯ ꓝꓲ ꓐ ꓡˍ ꓡꓳ꓿ ꓖꓳ ꓟ ꓑꓶ. ꓓꓴ ꓫꓵꓽ ꓘꓴꓽ ꓗꓪ ꓗꓳ‐ꓡꓯ‐ꓢ‐ꓕ‐ꓣꓮꓪ ꓟꓬꓽˍ ꓟ ꓔꓯ ꓓꓻ ꓡꓰ ꓝꓲ ꓠ, ꓟ ꓐꓱ ꓶ ꓥˍ ꓟꓲ꓾ ꓟꓽ ꓙꓲꓻ ꓟ ꓗꓳ‐ꓡꓯ‐ꓢ‐ꓕ‐ꓣꓮꓪ ꓐꓴ ꓔꓯ ꓗꓽ ꓕ. ꓓꓴ ꓐꓱ ꓶ ꓥˍ ꓟꓲ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓔꓯ ꓜꓽ ꓐ ꓡˍ ꓡꓳ꓿
ꓚꓱ ꓡꓰ ꓝꓲ ꓐ ꓡˍ ꓡꓳ꓾
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓗꓪ ꓝꓲꓐꓰꓣ ꓢꓯꓼ ꓒ ꓐꓲ ꓓꓯ,ˍ ꓟ ꓪꓴ. ꓠꓬꓲ ꓦꓰꓼ ꓟꓶ ꓢꓻˍ ꓟ ꓟꓽ ꓙꓳ ꓙꓳ꓾ ꓦꓰꓽ ꓛꓲ ꓗꓪ ꓟꓶ ꓤ ꓐꓳ ꓔꓬ ꓝꓲ ꓐ ꓡ ꓢꓲ꓾ ꓚꓱ ꓡ ꓠ, ꓟ꓾ ꓟꓽ ꓒ. ꓢꓺ ꓡꓰ ꓟꓽ ꓘꓪꓽ ꓢꓺ ꓡꓰ ꓠ, ꓟ ꓬꓰ ꓙ ꓖꓶˍ ꓡꓳ꓿
ꓫꓵꓽ ꓙꓴꓽ ꓐꓱ ꓶ ꓥˍ ꓟꓲ ꓙꓲˍ ꓡꓳ꓾
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓠꓬ ꓫꓵꓽ ꓘꓴꓽ ꓗꓪ ꓟ ꓬꓲ ꓞꓶꓻ ꓔꓯ ꓠꓲ. ꓡꓰ ꓝꓲ ꓢꓲ ꓫꓵꓽ ꓙꓴꓽ ꓔꓯ ꓠꓴꓽ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ ꓫꓵꓽ ꓬꓲꓻ ꓚꓳꓻˍ ꓟ ꓗꓪ ꓢꓯꓼ ꓖꓶˍ ꓟ ꓑꓶ. ꓓꓴ ꓠꓲ, ꓟ ꓫꓵꓽ ꓙꓴꓽ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓡ ꓝꓲ ꓢꓲ ꓠꓲ, ꓟ ꓗꓪ ꓫꓵꓽ ꓬꓲꓻ ꓓꓵꓽ ꓡꓰˍ ꓟ ꓗꓪ ꓬꓰ ꓙ ꓔꓳ, ꓙ ꓖꓶ ꓐ ꓡˍ ꓡꓳ꓿ ꓠꓲ, ꓟ ꓔꓷ,ˍ ꓟ ꓞꓼ ꓐꓰ ꓠꓽ ꓡꓰˍ ꓟ꓾ ꓠꓲ, ꓟ ꓫꓵꓽ ꓙꓴꓽ ꓛꓵꓽ ꓡꓰˍ ꓟ ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶˍ ꓡꓳ꓿
ꓳʼˍ ꓟ ꓔꓯ ꓫꓱꓺ ꓡꓰ ꓝꓲ ꓐ ꓡˍ ꓟ꓾
ꓮꓠꓔꓲꓳꓫꓲꓓꓮꓠꓔ ꓬꓲ ꓢꓯꓼ ꓮ ꓟꓬ, ꓓꓯ,ˍ ꓟ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓠꓬ ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓐꓰ꓾ ꓖꓳ ꓓꓱꓽ ꓠꓱ ꓫꓳ. ꓟ. ꓗꓪ ꓳʼˍ ꓟ ꓔꓯ ꓓꓻ ꓡꓰ ꓝꓲ ꓢꓲ ꓫꓵꓽ ꓙꓴꓽ ꓔꓯ ꓥˍ ꓟꓲ ꓔꓬ, ꓢꓻ ꓝꓲ ꓐ ꓡˍ ꓡꓳ꓿
ꓚꓮꓠꓚꓰꓣ ꓠꓻ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲˍ ꓡꓳ꓾
ꓝꓲꓐꓰꓣ ꓢꓯꓼ ꓒ ꓐꓲ ꓓꓯ,ˍ ꓟ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓠꓬ ꓝꓲꓐꓰꓣ ꓢꓯꓼ ꓐꓰ ꓦꓲꓔꓮꓟꓲꓠ ꓮ ꓢꓯꓼ ꓓꓯ,ˍ ꓟ ꓠꓬ ꓬꓲ ꓪꓴꓻ ꓓꓽ ꓟ ꓚꓮꓠꓚꓰꓣ꓾ ꓐꓵꓼ ꓟꓵ ꓐꓰ ꓟꓷꓽ ꓠꓷ, ꓚꓮꓠꓚꓰꓣ ꓐꓰ ꓕꓲ ꓪꓽˍ ꓚꓮꓠꓚꓰꓣ ꓠꓻ ꓬꓲ ꓫꓵꓽ ꓬꓲ ꓙꓰꓽ ꓒꓬꓱꓼ ꓡ ꓚꓱ, ꓔꓯ ꓠꓲ. ꓡꓰ ꓝꓲ ꓐ ꓡˍ ꓡꓳ꓿
ꓟꓳꓽ ꓡꓰ ꓢꓻˍ ꓟ ꓔꓯ ꓗꓽ ꓕ. ꓙ ꓖꓶˍ ꓡꓳ꓾ ꓟꓳꓽ ꓑꓴ. ꓡꓰ ꓝꓲˍ ꓡꓳ꓾
ꓝꓲꓐꓰꓣ ꓢꓯꓼ ꓮ ꓟꓬ, ꓓꓯ,ˍ ꓟ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓠꓬ ꓦꓲꓔꓮꓟꓲꓠ ꓚ ꓓꓯ,ˍ ꓟ ꓑꓶ. ꓓꓴ ꓧꓪꓽ ꓗꓴ, ꓙꓲꓻ ꓔꓯ ꓫꓬꓽ ꓡꓰ ꓝꓲ ꓐ ꓡˍ ꓟ ꓡꓰꓽ ꓟꓽ ꓞꓲ꓾ ꓧꓪꓽ ꓗꓴ, ꓙꓲꓻ ꓬꓲ ꓚꓱ, ꓔꓯ ꓓꓻ ꓡꓰ ꓝꓲ ꓢꓲ ꓞꓼ ꓞꓼ ꓟꓳꓽ ꓡꓰ ꓢꓻˍ ꓟ ꓗꓪ ꓐꓰ ꓗꓽ ꓕ. ꓙ ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓔꓲꓺ ꓟꓴ. ꓬꓰ ꓖꓶˍ ꓡꓳ꓾
ꓝꓲꓐꓰꓣ ꓢꓯꓼ ꓮ ꓟꓬ, ꓓꓯ,ˍ ꓟ ꓠꓬ ꓜꓽ ꓓꓴ ꓜꓽ ꓓꓳ ꓡꓰˍ ꓕꓯ ꓞꓼ ꓐꓰ ꓫꓵꓽ ꓘꓴꓽ ꓗꓪ ꓞꓼ ꓛꓵꓻ ꓢꓯꓼ ꓟꓴꓺ ꓓꓯꓻ ꓡꓰˍ ꓟ ꓫꓵꓽ ꓪꓴ ꓟꓽ ꓒꓬꓱꓼ ꓡ ꓠ, ꓟ ꓬꓰ ꓙ ꓖꓶˍ ꓡꓳ꓿
ꓖꓳ ꓓꓱꓽ ꓠꓯꓸꓼ ꓗꓪ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶˍ ꓡꓳ꓾
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓠꓬ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬ, ꓙꓳˍ ꓟ ꓥ ꓢꓲ ꓖꓳ ꓓꓱꓽ ꓘꓴꓽ ꓗꓪ ꓙꓳˍ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓐ ꓡˍ ꓡꓳ꓿
ꓖꓳ ꓓꓱꓽ ꓘꓴꓽ ꓠꓯꓸꓼ ꓗꓪ ꓢꓯꓼ ꓙꓳ ꓡ ꓝꓲˍ ꓡꓳ꓾
ꓑꓣꓳꓔꓰꓲꓠ ꓢꓯꓼ ꓓꓯ,ˍ ꓟ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓠꓬ ꓖꓳ ꓓꓱꓽ ꓠꓯꓸꓼ ꓗꓪ ꓢꓯꓼ ꓪꓽ ꓠꓬꓲ ꓡ ꓝꓲ ꓠꓬꓲ ꓠꓲ, ꓟ ꓐꓰ ꓖꓳ ꓓꓱꓽ ꓔꓬ, ꓢꓻ ꓠ, ꓟ ꓬꓰ ꓙ ꓖꓶ ꓐ ꓡˍ ꓡꓳ꓿
ꓕꓳ,‐ꓙꓷꓼ (ꓗꓴ‐ꓠꓬꓳ.) ꓛꓵꓻ ꓐꓰ ꓗꓴ. ꓙꓲꓽ ꓙꓳ ꓢꓲ ꓣꓳ ꓚꓲ. ꓔ ꓓꓴ ꓠꓬ꓾ ꓕꓳ,‐ꓙꓷꓼ (ꓗꓴ‐ꓠꓬꓳ.) ꓠꓬ ꓣꓳ ꓐꓱ ꓶ ꓙꓲꓻˍ ꓡꓳ ꓐꓯˍ ꓥ ꓟꓲ ꓕꓲ ꓧꓪ,ˍ ꓡꓰ ꓮ ꓟꓬ, ꓜꓽ ꓪ ꓡꓰˍ ꓕꓯ ꓠꓽ
ꓡꓰ ꓐꓰ ꓠꓬꓲ ꓟꓵˍ ꓟ (ꓡꓰ ꓐꓰ ꓞꓰꓺˍ ꓟ)
ꓦꓰꓼ ꓟ ꓙꓲꓺ ꓟꓽ ꓘꓴ ꓟ
ꓔꓬ, ꓫ. ꓟ
ꓒꓰꓼˍ ꓟ
ꓦꓰꓽ ꓛꓲ ꓧꓳ,ˍ ꓟ꓾ ꓕꓱ ꓡꓱ ꓫꓵꓽ ꓒꓬꓱꓼ ꓡ ꓗꓴ.ˍ ꓡꓳ꓿
ꓮꓽ ꓟ ꓠꓬ ꓜꓽ ꓟꓽ ꓓꓻ ꓡ ꓐꓯˍ ꓠꓬ꓾ ꓦꓰꓼ ꓟ ꓙꓲꓺ ꓟꓽ ꓘꓴ ꓢꓴ ꓐꓴ꓾ ꓠꓻ ꓕꓲ ꓫꓵꓽ ꓫꓵꓽ ꓙꓳ ꓢꓴ ꓐꓴ꓾ ꓤ ꓶꓻ ꓔꓬ ꓢꓴ ꓐꓴ꓾ ꓮ ꓚꓵ, ꓛꓵꓼ ꓤ ꓙꓳˍ ꓟ ꓤ ꓠꓱ ꓟ ꓐꓴ ꓠꓬ ꓠꓯꓻ ꓞꓲꓼ ꓟ. ꓒ ꓐꓰ ꓖꓪ ꓙꓱꓻ ꓢꓲ ꓜꓽ ꓠ ꓔˍ ꓟ ꓥ ꓡꓳ꓿
ꓠꓻ ꓟꓽ ꓙꓳ ꓢꓴ ꓐꓴ ꓥˍ ꓟꓲ ꓢꓺ ꓡꓰ ꓠ ꓜꓽˍ ꓟ ꓗꓪ ꓐꓰ ꓤ ꓟꓳ ꓠ ꓔˍ ꓡꓳ꓿
