ꓢꓯꓸ ꓔꓬ ꓟ ꓤꓶꓻ ꓗꓪ ꓐꓰ ꓬꓲꓸ ꓒꓵꓽ ꓪꓴꓽ ꓓꓰ ꓡꓰ_ ꓟ ꓠꓵꓻ ꓠꓲꓹ ꓐꓰ ꓫꓱꓸ ꓤ ꓠꓲꓹ ꓔꓯ ꓡꓴꓽ ꓗꓶ ꓔ ꓓꓴ ꓬꓰ ꓡꓯ꓾
ꓠꓴ ꓪ ꓒꓴ ꓫꓵꓺ ꓡꓰ ꓟꓽ ꓞꓲ ꓠꓴ ꓪ ꓬꓲ ꓙꓵꓹ꓾ ꓕꓲ ꓪ ꓔꓬ ꓟ ꓐꓰ ꓫꓱꓹ ꓤ ꓠꓲꓹ ꓔꓯ ꓣꓱꓽ ꓬꓯꓼ ꓢꓴ ꓐꓴ ꓐꓱ ꓶ ꓬꓰ ꓙ ꓟ ꓗꓪ ꓐꓰ ꓡꓴꓽ ꓘꓶ ꓔ ꓓꓴ ꓬꓰ ꓡꓯ ꓐꓰ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓐꓯ ꓖꓶ ꓔ ꓡꓳ=
ꓕꓲ ꓠ ꓡꓲ ꓕꓲ ꓠ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵꓹ ꓗꓪ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓠꓴ ꓪ ꓤꓶꓻ ꓗꓪ ꓒꓵ ꓓꓰ ꓡꓰ_ ꓟ ꓔꓯ ꓠꓴ ꓪ ꓮ ꓡꓰ ꓐꓰ ꓟꓬ ꓡ ꓠꓹ ꓟ ꓡꓴꓽ ꓗꓶ ꓔ ꓡ꓾ ꓐꓰ ꓡꓴ-ꓘ ꓕꓳ ꓶ ꓗꓪ ꓐꓰ ꓔꓱꓹ ꓕ ꓢꓲ ꓠ ꓠꓬꓲ ꓗꓷ ꓟ ꓥꓳ=
ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓟ꓾ “ꓠꓴ ꓪ ꓙꓳ_ ꓟ ꓪꓴꓽ ꓗꓷ ꓢꓲ ꓞꓳ ꓫꓸ ꓔꓯ ꓖꓶ꓾” ꓐꓯ ꓟ ꓬꓲ ꓝꓲꓸ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓪꓴ-ꓢ ꓗꓪ ꓐꓰ ꓪ ꓟꓶ_ ꓟ ꓣꓱ ꓛꓰ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓖꓶ ꓠꓹ ꓟ ꓐꓱ ꓶ ꓠꓲꓹ ꓡꓱ ꓡꓱ ꓐꓰ ꓣꓱꓽ ꓓꓴ ꓬꓰ ꓡꓯ꓾ ꓣꓱ ꓬꓯꓼ ꓢꓴ ꓐꓴ ꓔꓯ ꓬꓰ ꓙ ꓠꓹ ꓟ ꓐꓱ ꓶ ꓢꓯꓼ ꓖꓶ ꓔ ꓡꓳ=
ꓥꓪ ꓐꓯ ꓠꓲꓹ ꓫꓵ_ ꓟ ꓠꓬ꓾ ꓠꓴ ꓪ ꓠꓯꓼ ꓗꓪ ꓙꓳ_ ꓟ ꓒꓴ ꓫꓵꓺ ꓔꓯ ꓡꓰ ꓐꓯ_ ꓟ ꓟꓽ ꓥ꓾ ꓠꓴ ꓪ ꓫꓱꓹ ꓤ ꓠꓲꓹ꓾ ꓬꓲ ꓙꓵꓹ ꓐꓰ ꓠꓴ ꓪ ꓢꓷꓸ ꓔ ꓟ ꓢꓷꓸ ꓠꓲꓹ ꓕꓱ ꓟ ꓔꓯ ꓥ ꓟꓲ ꓠꓱꓸ ꓐꓯꓼ ꓢꓴ ꓐꓴ ꓐꓱ ꓶ ꓣꓱ ꓠꓹ ꓟ ꓬꓰ ꓙ ꓠꓹ ꓟ ꓐꓯ ꓔ ꓟ ꓥ ꓡꓳ=
ꓪꓴ-ꓢ ꓬꓲ ꓟꓬꓱꓽ ꓗꓪ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓠꓬ ꓪꓴꓽ ꓓꓰ ꓡꓰ_ ꓟ ꓣꓱꓽ ꓛꓰ ꓟꓶ ꓢꓴ ꓡꓰ ꓥ ꓡꓳ= ꓕꓱ ꓣꓱ ꓛꓰ ꓥ ꓟ ꓢꓯꓸ ꓔꓬ ꓐ ꓡ ꓟ ꓐꓰ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓒꓵ ꓓꓰ ꓡꓰ ꓟ ꓣꓱ ꓛꓰ ꓔꓯ ꓟꓬ ꓡ ꓠꓹ ꓟ ꓐꓱ ꓶ ꓔꓶ ꓔ ꓢꓲ ꓡꓴꓽ ꓗꓶ ꓠ ꓔ ꓡꓳ= ꓕꓱ ꓡꓱ ꓡꓴꓽ ꓗꓶ ꓔ ꓟ ꓟꓽ ꓙꓳ ꓠꓬ꓾ ꓐꓬ ꓡꓰ ꓡ ꓥꓳ꓾ ꓬꓲ ꓒꓵ ꓟꓽ ꓙꓳ ꓗꓷ ꓡ ꓥꓳ=
ꓪꓴ-ꓢ ꓡꓰ ꓖꓶ ꓔ ꓟ ꓣꓱ ꓛꓰ ꓔꓯ ꓒꓵꓽ ꓠ ꓔ ꓡꓳ= ꓣꓱ ꓬꓯꓼ ꓟ ꓬꓲ ꓔꓶꓸ ꓕꓲ ꓟ ꓔꓯ ꓬꓰ ꓙ ꓠ ꓔ ꓡꓳ= ꓪꓴ-ꓢ ꓐꓰ ꓫꓱꓹ ꓡꓯ ꓘꓳ ꓠ ꓔ ꓡꓳ= ꓕꓱ ꓟ ꓓꓰ ꓢ ꓪꓴ-ꓢ ꓔꓯ ꓠꓵꓻ_ ꓟ ꓠꓵꓻ ꓠꓲꓹ ꓟꓬ ꓡ ꓠ ꓔ ꓡꓳ= ꓕꓱ ꓟ ꓠꓬ ꓪꓴ-ꓢ ꓐꓰ ꓟꓬ ꓠꓬꓲ ꓫꓱꓹ ꓡ ꓟ ꓥꓳ=
ꓢꓲ ꓒ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓲ_ ꓟ ꓚꓱꓹ ꓗꓪ ꓬꓲ ꓕꓲ ꓤꓶꓻ ꓡꓱꓼ ꓔꓯ ꓡꓯ ꓐꓳ ꓔꓶꓸ ꓓꓴ ꓗꓪ ꓫꓵꓻ ꓙ ꓗꓷ ꓓꓴ ꓥꓳ ꓐꓰ ꓓꓵꓽ ꓙ ꓞꓷꓹ ꓗꓷ ꓟ ꓚꓱꓹ ꓬꓲ ꓔꓳꓹ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓫꓱꓹ ꓤ ꓟ ꓟꓬꓱꓽ ꓠꓬ ꓠꓲꓹ ꓡꓱ ꓡꓱ ꓙꓳ ꓟ꓾ ꓬꓲ ꓒꓵ ꓟꓬ ꓠꓬꓲ ꓪ ꓟ꓾ ꓣꓳ ꓤꓶꓻ ꓐꓱ ꓶ ꓡꓴꓽ ꓗꓶ ꓔ ꓟ ꓬꓲ ꓔꓶꓸ ꓥ ꓟ꓾ ꓢꓲ ꓫꓬ ꓕꓳ ꓶ ꓗꓪ ꓓꓲ-ꓠ-ꓣꓲ 2 ꓑꓬꓸ ꓡꓰ ꓗꓶ_ ꓟ ꓟꓶ ꓛꓲ ꓟ ꓚꓱꓹ ꓗꓪ ꓐꓰ ꓣꓳꓺ ꓓꓰ ꓡꓰ ꓥ ꓟꓲ ꓪꓴ ꓓꓰ ꓡꓰ_ ꓟ ꓡꓯꓼ ꓫꓴ ꓔꓯ ꓪ ꓟ ꓔꓯ ꓐꓯ ꓔ ꓟ ꓥꓳ=
ꓞꓳ ꓤ ꓠꓬ꓾ ꓒꓴ ꓗꓪ ꓐꓰ ꓫꓵꓺ ꓕꓱ ꓡꓱ ꓪ ꓡ ꓕꓯ ꓗꓹ ꓛꓲ_ ꓡꓳ= ꓠꓵꓻ ꓠꓲꓹ ꓐꓰ ꓖꓶ ꓗꓷ ꓟ ꓠꓬ ꓕꓱ ꓟ ꓓꓰ ꓢ ꓪꓴ ꓓꓰ ꓡꓰ ꓟ ꓥ ꓢꓲ ꓠꓬꓲ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓔꓯ ꓟꓲ ꓪ ꓟꓶ ꓡ ꓥꓳ= ꓕꓱ ꓟ ꓠꓬ ꓬꓰ ꓙ ꓔꓳꓹ ꓙ ꓢꓴ ꓐꓴ ꓬꓲ ꓪ ꓤꓶꓻ ꓔꓯ ꓒꓳꓹ ꓡꓶꓸ ꓖꓶ ꓡ ꓥꓳ꓾ ꓐꓰ ꓢꓲ ꓫꓬ ꓢꓴ ꓢꓔꓸ ꓮꓴꓖꓴꓢꓔꓲꓠꓰ ꓡꓰ ꓐꓯ ꓘꓶꓽ ꓗꓪ ꓐꓰ ꓢꓯꓼ ꓖꓶ ꓗꓷ ꓟ ꓥꓳ=
ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓥ ꓟꓲ ꓔꓱꓹ ꓟ ꓔꓯ ꓟꓳ ꓠꓹ ꓟ ꓛꓳ ꓓꓴ ꓬꓰ ꓡꓯ꓾ ꓕꓲ ꓣꓳ ꓐꓰ ꓕꓲ ꓣꓳ ꓠꓵꓻ ꓠꓲꓹ ꓟꓸ ꓖꓶ꓾ ꓮꓽ ꓐ ꓮ ꓟ ꓐꓰ ꓤ ꓠꓱ ꓠꓵꓻ ꓠꓲꓹ ꓟꓸ ꓖꓶ_ ꓟ ꓠꓬ ꓣꓳ ꓠꓶꓽ ꓛꓳ ꓕꓲ ꓛꓳ ꓗꓪ ꓥ ꓟꓲ ꓙꓲ_ ꓟ ꓬꓲ ꓔꓯ ꓥꓳꓽ ꓥ ꓡꓳ= ꓖꓳ ꓟ ꓑꓶ ꓓꓴ ꓣꓳ ꓠꓬ ꓦꓲꓻ ꓗꓪ ꓔꓬ ꓥ ꓟꓲ꓾ ꓪꓽ ꓘꓴ ꓦꓲꓻ ꓗꓪ ꓔꓬ ꓥ ꓟꓲ ꓕꓳ ꓶ ꓢꓳ ꓙꓳ ꓗꓪ ꓔꓬ ꓥ ꓟꓲ ꓬꓲ ꓟꓬꓱꓽ ꓗꓪ ꓔꓬ ꓥ ꓟꓲ ꓕꓲ ꓣꓳ ꓐꓰ ꓕꓲ ꓣꓳ ꓠꓵꓻ ꓠꓲꓹ ꓟꓸ ꓖꓶ ꓓꓴ ꓬꓰ ꓡꓯ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓮ ꓕꓯ ꓟꓲ ꓠꓲꓹ ꓠꓵꓻ ꓟ ꓡꓰ ꓐꓰ ꓣꓳ ꓥ ꓟꓲ ꓠꓱꓸ ꓐꓯꓼ ꓢꓴ ꓔꓯ ꓮ ꓕꓯ ꓟꓲ ꓠꓲꓹ ꓠꓵꓻ ꓠ ꓔ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓗꓷ ꓟ ꓥꓳ=
