Suwon ꓡꓳ ꓒꓱ St. Vincent de Paul ꓫꓱ. ꓤˍ ꓟ ꓔꓲꓺ ꓟ ꓜꓴꓻ (Sisters of Charity) ꓗꓪ꓾ ꓟꓬ‐ꓟ ꓮ. ꓟꓲꓽ ꓤ ꓠꓬꓲꓽ ꓣꓳ ꓔꓲꓺ ꓟ ꓙꓵꓽ ꓪ ꓘꓳ ꓣꓴˍ ꓟ ꓑꓮꓲꓽ ꓬꓰ ꓗꓷꓳ꓿
ꓑꓮꓲꓽ ꓕꓱ ꓟ ꓔꓯ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓶꓻ ꓒꓬꓱꓽ ꓑꓶ. ꓡꓰˍ ꓟ ꓑꓮꓲꓽ ꓥ ꓟ (6.8.2025) ꓠꓽ ꓢꓽ ꓠꓬꓲ ꓠꓯꓼ ꓠꓯꓼ 10ꓽ00 ꓙꓵ, ꓕꓯ꓾ ꓬꓮꓥ‐ꓖꓳꓥ ꓡꓳ ꓒꓱ ꓲꓠꓢꓰꓲꓠ ꓗꓪ ꓙꓳˍ ꓟ St. Peter and St. Paul ꓪꓽ ꓘꓴ ꓦꓲꓻ ꓗꓪ ꓬꓰ ꓗꓷꓳ꓿
ꓑꓮꓲꓽ ꓟꓲ‐ꓢ ꓔꓯ ꓬꓮꓥ‐ꓖꓳꓥ ꓔꓳ, ꓙ ꓔꓲꓺ ꓒ ꓓꓽ Noel Saw Naw Aye ꓡꓰ ꓧꓳꓽ ꓪꓴ. ꓟꓳ ꓢꓲ ꓠꓬꓲ ꓬꓰ ꓗꓷ ꓟ ꓥ ꓡꓳ꓿ ꓔꓲꓺ ꓒ ꓓꓽ Noel Saw Naw Aye ꓡꓰ ꓪꓴ‐ꓢ ꓟꓬꓱꓽ ꓕꓱ ꓟ ꓐꓰ ꓗꓴ. ꓙꓲꓽ ꓙꓳ ꓢꓲ ꓠꓬꓲ꓾ ꓓꓵꓽ ꓙ ꓮʼ ꓓꓴ ꓕꓲ ꓟˍ ꓡꓰ ꓐꓯ ꓗꓷ ꓢꓲ꓾ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓟ ꓞꓳ ꓡꓱ ꓐꓴ ꓠꓬ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓮ ꓘꓶ. ꓫ. ꓔꓬ ꓟ ꓙꓵ, ꓗꓪ ꓕꓱ ꓡꓱ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓓꓵꓽ ꓙꓽ ꓞꓷ, ꓗꓷ ꓟ ꓠꓬ ꓓꓵꓽ ꓙ ꓟꓶ ꓓꓴ ꓥꓳ꓾ ꓐꓯˍ ꓡꓳ꓿ ꓝꓮꓲ ꓬꓲ ꓡꓰ ꓔꓲꓺ ꓟ Maria Vicentia Naw Ni Ni Aung ꓐꓰ Maria Louise Moe Thitza Oo ꓐꓴ ꓡꓰ꓾ ꓪꓴ‐ꓢ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓐꓱ ꓶ ꓚꓲ. ꓛꓬ ꓖꓳ ꓓꓱꓽ ꓔꓯ ꓠꓲ, ꓡꓱꓻ ꓡꓱꓻ ꓡꓰꓽ ꓔꓲꓺ ꓖꓶ ꓐ ꓡˍ ꓟ ꓔꓯ ꓓꓳ ꓟꓴ, ꓗꓷꓳ꓿
ꓟꓮꓪ‐ꓡ‐ꓟꓬꓮꓲꓠꓖ ꓢꓽ‐ꓢꓶ‐ꓠꓽ ꓙꓵꓽ ꓔꓲꓺ ꓒ ꓓꓽ ꓥ ꓟ ꓔꓲꓺ ꓒ ꓓꓽ Maruice Nyunt Wai ꓡꓰ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓗꓪ ꓕꓱ ꓔꓲꓺ ꓟ ꓬꓲ ꓫꓵꓼ (2) ꓣꓳ ꓔꓯ ꓖꓴ ꓢꓲ ꓠꓬꓲ꓾ ꓢꓲꓺ ꓒ ꓬꓰ‐ꓢꓴ ꓬꓲ ꓶꓻ ꓒꓬꓱꓽ ꓑꓶ. ꓡꓰˍ ꓟ ꓑꓮꓲꓽ ꓐꓰ ꓔꓯꓺ ꓢꓲ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ. ꓖꓶ ꓗꓷꓳ꓿
“ꓬꓲ ꓪ ꓶꓼ ꓖꓪꓽ ꓑꓶ. ꓓꓴ ꓬꓲ ꓪ ꓔꓯ ꓡꓳ. ꓐꓲꓻ ꓡꓰ ꓝꓲˍ ꓟ ꓟꓽ ꓥ꓾ ꓬꓲ ꓪ ꓪꓴ‐ꓢ ꓟꓬꓱꓽ ꓬꓰˍ ꓟ ꓗꓪ ꓠꓲ, ꓒꓴ ꓗ, ꓛꓲꓽˍ ꓟ ꓑꓶ. ꓓꓴ ꓡꓰꓽ ꓬꓲ ꓪ ꓔꓯ ꓐꓲꓻ ꓫꓴꓽ ꓖꓶˍ ꓟ ꓥ ꓡꓳ꓿ ꓪꓴ‐ꓢ ꓐꓰ ꓪ ꓜꓲ ꓠꓶꓽ ꓡˍ ꓟ ꓡꓰ ꓬꓲ ꓪ ꓒꓬꓱꓽ ꓐꓲꓻˍ ꓟ ꓠꓬ ꓪ ꓜꓲ ꓐꓬꓱꓼ ꓡꓱꓼ ꓡꓱꓼ ꓒꓬꓱꓼ ꓡˍ ꓟ ꓥ ꓡꓳ꓾” ꓐꓰ ꓔꓲꓺ ꓒ ꓓꓽ ꓡꓰ ꓐꓯˍ ꓡꓳ꓿
ꓔꓲꓺ ꓟ ꓬꓲ ꓫꓵꓼ (2) ꓣꓳ ꓠꓬ꓾ ꓑꓬꓲ ꓢꓽ‐ꓢꓶ‐ꓠ ꓗꓪ ꓟ ꓔꓲꓺ ꓟ Maria Vicentia Naw Ni Ni Aung ꓐꓰ꓾ ꓗ‐ꓬꓲꓠ ꓗꓴꓷꓼ ꓫꓴ ꓔꓮꓴꓠꓖꓴ ꓢꓽ‐ꓢꓶ‐ꓠ ꓗꓪ ꓟ Maria Louise Moe Thitza Oo ꓐꓴ ꓥ ꓡꓳ꓿
St. Vincent de Paul ꓫꓱ. ꓤˍ ꓟ ꓔꓲꓺ ꓟ ꓜꓴꓻ (Sisters of Charity) ꓔꓯ ꓠꓬ꓾ 1841 ꓘꓳꓼ ꓕꓯ ꓙ‐ꓟ‐ꓠꓲ ꓗꓴꓷꓼ Paderborn ꓗꓪ ꓬꓲ ꓪꓴ. ꓔꓶꓻ ꓗꓷ ꓟ ꓥ ꓢꓲ ꓠꓬꓲ꓾ 1965 ꓘꓳꓼ ꓕꓯ ꓠꓬ ꓗꓳ‐ꓣꓲ‐ꓬ ꓗꓴꓷꓼ ꓗꓪ ꓛꓲ ꓡ ꓗꓷꓳ꓿ 2006 ꓘꓳꓼ ꓕꓯ ꓠꓬ ꓟꓬ‐ꓟ ꓗꓴꓷꓼ ꓗꓪ ꓛꓲ ꓡ ꓗꓷ ꓟ ꓥ ꓢꓲ ꓪꓴ‐ꓢ ꓟꓬꓱꓽ ꓬꓰ ꓪꓴ. ꓔꓴ ꓗꓷ ꓟ ꓥ ꓡꓳ꓿
ꓜꓴꓻ ꓬꓲ ꓔꓶ ꓙꓱꓼ ꓠꓬ “ꓞꓳ ꓫ. ꓐꓴ ꓠꓬ ꓣꓳ ꓟ. ꓒꓽ ꓐꓰ ꓣꓳ ꓢꓲꓺ ꓒ ꓥ ꓡꓳ” ꓐꓰ ꓐꓯˍ ꓟ ꓐꓯ ꓘꓶꓽ ꓗꓪ ꓐꓰ ꓫ. ꓢꓴ ꓐꓴ꓾ ꓠꓻ ꓒꓬꓽ ꓔꓬ ꓢꓴ ꓐꓴ ꓐꓰ ꓣꓱꓽ ꓞ, ꓔꓬ ꓢꓴ ꓐꓴ ꓔꓯ ꓫꓱ. ꓤ ꓠꓲ, ꓡꓰ ꓬꓰ ꓙ ꓠ, ꓟ ꓥ ꓡꓳ꓿
ꓮ ꓟꓶ ꓬꓲ ꓪ ꓠꓬ꓾ ꓬꓮꓥ‐ꓖꓳꓥ ꓐꓰ ꓠꓱ. ꓐꓯ ꓡꓳ ꓒꓱ ꓐꓴ ꓗꓪ ꓬꓲ ꓒꓵꓽ ꓟꓽ ꓣꓴ ꓣꓴ ꓠꓻ ꓫꓬ, ꓖꓶˍ ꓟ꓾ ꓗꓳ‐ꓣꓲ‐ꓬ ꓐꓰ ꓕꓲ ꓛꓳˍ ꓬꓰ ꓢꓲ St. Vincent ꓠꓯ ꓞꓲꓼ ꓦꓲꓻ ꓒꓴ ꓔˍ ꓟ꓾ ꓢꓳ ꓜꓲꓼ ꓓꓴ Center ꓒꓴˍ ꓟ꓾ ꓜꓽ ꓓꓴ ꓐꓰ ꓖꓪꓽ ꓓꓴ ꓐꓱꓻ ꓖꓶˍ ꓟ꓾ ꓤ ꓛꓵꓽ ꓤ ꓐꓴ ꓐꓰ ꓡꓳ ꓔ ꓟꓶˍ ꓟ ꓤ ꓟꓶ ꓤ ꓐꓴ ꓔꓯ ꓠꓬꓲ ꓡꓳ. ꓗꓪꓼ ꓫꓵꓼ ꓖꓶˍ ꓟ꓾ ꓐꓱ ꓓꓴꓽ ꓗꓪ ꓐꓱ ꓟꓶ ꓔ ꓢꓴ ꓐꓴ ꓠꓬ ꓟꓬꓱꓽ ꓬꓰ ꓢꓴ ꓐꓴ ꓔꓬ ꓗꓪ ꓙꓰ ꓢꓲ ꓬꓰ ꓙ ꓖꓶˍ ꓟ꓾ ꓕꓱ ꓡꓱ ꓫꓵꓽ ꓟꓬꓱꓽ ꓐꓴ ꓔꓯ ꓬꓰ ꓔꓬ ꓟ ꓥ ꓡꓳ꓿
ꓮ ꓟꓶ ꓬꓲ ꓫꓵꓼ ꓒꓬꓱꓼ ꓡ ꓗꓷ ꓟ ꓔꓲꓺ ꓟ (2) ꓣꓳ ꓐꓰ ꓕꓲ ꓪˍ St. Vincent de Paul ꓫꓱ. ꓤˍ ꓟ ꓔꓲꓺ ꓟ ꓜꓴꓻ (Sisters of Charity) ꓗꓪ ꓟꓬ‐ꓟ ꓞꓳ ꓫꓵꓽ ꓔꓲꓺ ꓟ (15) ꓣꓳ ꓙꓳ ꓡ ꓗꓷ ꓟ ꓥ ꓡꓳ꓿ ꓬꓲ ꓪ ꓐꓴ ꓠꓬ ꓮ‐ꓟꓰ‐ꓣꓲ‐ꓗꓯ꓾ ꓗꓳ‐ꓣꓲ‐ꓬ꓾ ꓐꓮꓠꓖꓮꓡꓮꓓꓰꓢꓧ ꓐꓰ ꓑꓧꓲꓡꓲꓑꓑꓲꓠꓰ ꓗꓴꓷꓼ ꓐꓴ ꓗꓪ ꓙꓳˍ ꓟ ꓔꓲꓺ ꓟ ꓐꓴ ꓐꓰ ꓕꓲ ꓡꓰ, ꓞꓳ ꓫ. ꓐꓴ ꓐꓱ ꓶ ꓢꓲꓽ ꓫꓬˍ ꓟ ꓟꓬꓱꓽ ꓬꓰˍ ꓟ ꓤꓶꓻ ꓗꓪ ꓓꓵꓽ ꓙꓰ ꓓꓴ ꓥꓳ꓿
News from RVA Sgaw Karen
