ꓟ‐ꓚꓲ‐ꓠ ꓔꓲꓺ ꓒ ꓓꓽ ꓙꓳꓧꓠ ꓡꓮ‐ꓢꓮꓟ ꓠꓬ ꓠ‐ꓟ‐ꓓꓲ ꓟꓯꓼ ꓘꓰ, ꓑꓬ ꓔꓬ ꓢꓴ ꓐꓴ ꓔꓬ ꓔꓶ. ꓗꓪ ꓙꓰ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓜꓲ ꓗꓷ ꓟ ꓓꓳꓽ

8 ꓦ ꓟ 1ꓳ ꓠꓬꓲ 2025 ꓘꓳꓼ ꓕꓯ ꓟ‐ꓚꓲ‐ꓠ ꓔꓲꓺ ꓒ ꓓꓽ ꓙꓳꓧꓠ ꓡꓮ‐ꓢꓮꓟ ꓠꓬ ꓠ‐ꓟ‐ꓓꓲ ꓗꓪ ꓟꓯꓼ ꓘꓰ, ꓟꓯꓼ ꓑꓬ ꓔꓬ ꓢꓴ ꓐꓴ ꓔꓶ. ꓗꓪ ꓙꓰ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓜꓲ ꓗꓷꓳ ꓐꓰ ꓢꓷ. ꓪ ꓡꓳ꓿ ꓔꓲꓺ ꓒ ꓓꓽ ꓠꓬ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠ‐ꓟ‐ꓓꓲ ꓗꓪ ꓫꓬ, ꓔ ꓟ ꓙꓲꓻ ꓫꓬ ꓢꓴ ꓔꓰꓣꓰꓢꓮ ꓟꓯꓼ ꓘꓰ, ꓟꓯꓼ ꓑꓬ ꓔꓶ. ꓗꓪ ꓙꓰ ꓗꓷ ꓟ ꓥ ꓡꓳ꓿

ꓕꓱ ꓟꓯꓼ ꓘꓰ, ꓟꓯꓼ ꓑꓬ ꓔꓶ. ꓗꓪ ꓙꓲ‐ꓢꓴ ꓢꓲꓺ ꓤ (300) ꓣꓳ ꓟꓽ ꓞꓲ ꓔꓬ ꓡꓳ ꓐꓰ ꓢꓷ. ꓪ ꓡꓳ꓿ ꓝꓮꓲ ꓟꓯꓼ ꓘꓰ, ꓟꓯꓼ ꓔꓬ ꓢꓴ ꓐꓴ ꓘꓴꓽ ꓗꓪ ꓐꓰ ꓤ ꓠꓱ ꓤ ꓐꓴ ꓐꓰ ꓞꓲꓼ ꓪꓴꓽ ꓟ ꓞꓳ ꓟꓳ ꓐꓴ ꓔꓯ ꓥ ꓟꓲ ꓢꓯꓼ ꓖꓶ ꓪꓽ ꓖꓶ ꓗꓷ ꓟ ꓥ ꓡꓳ꓿

ꓔꓲꓺ ꓒ ꓓꓽ ꓡꓰ ꓟꓯꓼ ꓘꓰ, ꓟꓯꓼ ꓔꓬ ꓢꓴ ꓐꓴ ꓐꓱ ꓶ ꓟꓲ‐ꓢ ꓔꓶ ꓖꓶ ꓗꓷ ꓟ ꓙꓵ, ꓕꓯ ꓢꓯꓼ ꓖꓶ ꓪꓽ ꓖꓶ ꓟ ꓟ. ꓟꓲꓽ ꓠꓬ ꓣꓳ ꓠꓬ ꓚꓬꓴ ꓢꓲꓺ ꓒ ꓐꓰ ꓕꓲ ꓪ ꓡꓲ ꓕꓲ ꓟ ꓗꓪ ꓤꓶꓻ ꓢꓲ ꓠꓬꓲ ꓞꓳ ꓫꓱ, ꓔꓬ ꓢꓴ ꓐꓴ ꓥ ꓡꓳ꓿ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓥ ꓟꓲ ꓢꓲꓺ ꓒ ꓐꓰ ꓕꓲ ꓪ ꓢꓯ. ꓔꓬ ꓠ, ꓟ ꓮ ꓘꓶ. ꓛꓲ ꓣꓳꓺ ꓚꓵ, ꓟ ꓚꓱ, ꓔꓯ ꓢꓯꓼ ꓖꓶ ꓗꓷꓳ꓿

ꓮ ꓟꓶ ꓟ ꓙꓵ, ꓗꓪ ꓗ‐ꓛꓲ ꓗꓴꓷꓼ ꓫꓴꓻ ꓗꓪ ꓟꓶ ꓦ ꓦ ꓟ ꓙꓵ, ꓥ ꓟ ꓪꓴ. ꓠꓬꓲ ꓠ‐ꓟ‐ꓓꓲ ꓟꓯꓼ ꓘꓰ, ꓟꓯꓼ ꓑꓬ ꓔꓬ ꓗꓪ ꓠꓬ ꓬꓲꓻ ꓙꓬ ꓮ ꓟꓬ, ꓙꓳ ꓢꓲ ꓠꓬꓲ ꓮ ꓘꓶ. ꓛꓲ ꓔꓬ ꓫ. ꓔꓬ ꓡꓳ ꓐꓰ ꓣꓦꓮ ꓗꓮꓚꓧꓲꓠ ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿