ꓙꓵꓻ ꓠꓲ, ꓔꓯ ꓗꓽ ꓕꓽ ꓖꓶ ꓢꓴ ꓙꓲꓻ ꓫꓬ ꓢꓴ Ambrose ꓚꓺ ꓟꓲꓽ (Church history)
ꓙꓲꓻ ꓫꓬ ꓢꓴ Ambrose ꓠꓬ ꓲꓔꓮꓡꓬ ꓗꓴꓷꓼ ꓟꓲ‐ꓡ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓮ ꓟꓬ, ꓛꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓗꓷ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿ ꓙꓲꓻ ꓫꓬ ꓢꓴ Ambrose ꓠꓬ ꓮ ꓟꓬ, ꓙ ꓣꓳ ꓟ ꓠꓲ, ꓟ ꓙꓳ ꓢꓴ ꓥ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓢꓴ ꓥ ꓡꓳ꓿
ꓬꓲ ꓐ, ꓐ ꓠꓬ ꓒꓵꓽ ꓫꓵ ꓮ ꓟꓬ, ꓙꓳ ꓢꓴ ꓥ ꓢꓲ ꓠꓬꓲ ꓬꓲ ꓠꓬ ꓬꓲ ꓪ ꓦꓲꓻ ꓗꓪ ꓐꓰ ꓤ ꓓꓰ ꓥ ꓡꓳ꓿ ꓬꓲ ꓔꓯ (340) ꓘꓳꓼ ꓕꓯ ꓦꓵꓻ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Ambrose ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓫꓵꓽ ꓪꓴꓽ ꓫꓬ, ꓠ, ꓟ ꓟꓲ ꓠꓯ ꓢꓷ. ꓠꓲ, ꓔꓯ ꓢꓳꓻ ꓣꓴ ꓗꓷ ꓟ ꓥ ꓡꓳ꓿ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓓꓳ ꓡꓰ ꓗ. ꓠꓯ ꓲꓔꓮꓡꓬ ꓗꓴꓷꓼ ꓗꓪ ꓡ ꓡ ꓗꓷꓳ꓿ ꓬꓲ ꓢꓳꓻ ꓣꓴ ꓗꓷ ꓟ ꓢꓷ. ꓠꓲ, ꓔꓯ ꓣꓱ ꓢꓲ ꓠꓬꓲ ꓲꓔꓮꓡꓬ ꓗꓴꓷꓼ ꓗꓪ ꓟꓬꓱꓽ ꓬꓰ ꓟ ꓥ ꓡꓳ꓿
ꓖꓳ ꓕꓲ ꓙꓵ, ꓗꓪ ꓬꓲ ꓫꓵꓽ ꓪꓴꓽ ꓫꓬ, ꓟ ꓟꓬꓱꓽ ꓔꓯ ꓬꓰ ꓗꓷ ꓟ ꓙꓵ, ꓕꓯ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓬꓲ ꓕꓯ ꓲꓔꓮꓡꓬ ꓗꓴꓷꓼ ꓑꓶ ꓓꓳ ꓕꓲ ꓒꓳ, ꓔꓯ ꓙꓵꓽ ꓠ, ꓟ ꓙꓵꓽ ꓪꓽ ꓖꓶ ꓗꓷꓳ꓿ ꓖꓳ ꓡꓱ ꓥ ꓟꓲ ꓬꓲ ꓔꓯ ꓲꓔꓮꓡꓬ ꓗꓴꓷꓼ ꓟꓲ‐ꓡ ꓡꓳ ꓒꓱ ꓗꓪ ꓡꓰ ꓔꓬ ꓢꓲ ꓠꓬꓲ ꓟꓬꓱꓽ ꓬꓰ ꓗꓷ ꓟ ꓥ ꓡꓳ꓿
ꓲꓔꓮꓡꓬ ꓗꓴꓷꓼ ꓟꓲ‐ꓡ ꓡꓳ ꓒꓱ ꓗꓪ ꓔꓬ ꓟ ꓔꓲꓺ ꓒ ꓓꓽ ꓠꓬ Arenas ꓡꓰ ꓚꓺ ꓟ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓕꓲ ꓣꓳ ꓥ ꓡꓳ꓿ ꓮꓣꓰꓠꓮꓢ ꓜꓴꓻ ꓙꓵꓻ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓟꓽ ꓥ ꓐꓰ ꓙꓵꓻ ꓟ ꓙꓵꓻ ꓠꓲ, ꓚꓱ, ꓥ ꓡꓳ꓿ ꓔꓲꓺ ꓒ ꓓꓽ ꓟꓲ ꓠꓯ ꓗꓪ ꓐꓰ ꓧꓪ ꓖꓳꓽ ꓓꓱ ꓡꓳ. ꓬꓰ ꓗ. ꓠꓯ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓮꓣꓰꓠꓲꓰꓢ ꓜꓴꓻ ꓔꓯ ꓘꓳ, ꓣꓴ ꓢꓴ ꓐꓰ ꓟꓽ ꓘꓳ, ꓣꓴ ꓢꓴ ꓐꓴ ꓫꓵꓽ ꓪꓴꓽ ꓒꓬꓱꓼ ꓡ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓙꓲꓻ ꓫꓬ ꓢꓴ Ambrose ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓙꓰ ꓢꓲ ꓠꓬꓲ ꓟ. ꓟꓲꓽ ꓚꓺ ꓟ. ꓖꓶ ꓗꓷꓳ꓿
ꓞꓳ ꓜꓴꓻ ꓔꓯ ꓟ. ꓟꓲꓽ ꓚꓺ ꓟ ꓙꓵ, ꓕꓯ ꓬꓲ ꓠꓬ ꓖꓳꓽ ꓓꓱ ꓔꓲ ꓠ, ꓟ ꓙ ꓖꓶ ꓔꓬ ꓟ ꓙꓵ, ꓟꓲ ꓥ ꓡꓳ꓿ ꓙꓲꓻ ꓫꓬ ꓢꓴ Ambrose ꓠꓬ ꓖꓳꓽ ꓓꓱ ꓔꓲ ꓟꓶ ꓡꓰ ꓟ ꓦꓲ ꓠꓬꓲꓽ ꓕꓯ ꓔꓲꓺ ꓒ ꓙꓵꓽ ꓪ ꓘꓳ, ꓣꓴ ꓟꓶ ꓡꓰ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓬꓲ ꓠꓬ ꓲꓔꓮꓡꓬ ꓗꓴꓷꓼ ꓟꓲ‐ꓡ ꓡꓳ ꓒꓱ ꓗꓪ ꓔꓬ ꓗꓷ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓟꓬ, ꓬꓰ ꓙ ꓗꓷꓳ꓿
ꓕꓱ ꓡꓰ ꓐꓰ ꓬꓲ ꓠꓬ ꓟꓽ ꓔꓱ ꓟꓽ ꓜꓳ ꓢꓴ ꓐꓴ ꓡꓰ ꓚꓺ ꓟ ꓟ. ꓟꓲ ꓔꓯ ꓗꓽ ꓕꓽ ꓗꓷ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓡꓳ꓿
