ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐ ꓮ ꓫꓵꓽ ꓑꓶ. ꓓꓴ ꓟꓶ ꓞꓺ ꓮ ꓟꓬ, ꓞꓺ ꓡ ꓟ ꓚꓱ,
ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓮ ꓫꓵꓽ ꓑꓶ. ꓓꓴ ꓟꓶ ꓞꓺ ꓮ ꓟꓬ, ꓞꓺ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥꓳ꓿ ꓗꓳ. ꓗꓷ ꓟ (2024) ꓘꓳꓼ ꓗꓪ ꓐꓰ ꓟꓲ ꓠꓯ ꓚꓺ ꓟꓲꓽ ꓗꓪ ꓐꓰ ꓟꓶ ꓞꓺ ꓮ ꓟꓬ, ꓞꓺ ꓟ ꓘꓳꓼ ꓕꓲ ꓘꓳꓼ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓵꓽ ꓞꓺ ꓠꓬ ꓮ ꓫꓵꓽ ꓑꓶ. ꓓꓴ ꓕꓱ ꓟ ꓟꓬ ꓛꓲ ꓞꓺ ꓡ ꓟ ꓔꓯ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓟꓶ ꓞꓺ ꓮ ꓟꓬ, ꓞꓺ ꓡ ꓟ ꓪꓴ. ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓮ ꓟꓬ, ꓫ. ꓙꓲˍ ꓓꓴ ꓮ ꓟꓬ, ꓔꓳ, ꓜꓳ ꓗꓷ ꓟ ꓥ ꓡꓳ꓿ ꓴꓢꓮ ꓗꓴꓷꓼ ꓗꓪ ꓮ. ꓔꓳ. ꓙꓱ ꓟ ꓮ. ꓔꓳ. ꓐꓬ ꓡꓰ ꓟ ꓮ ꓟꓬ, ꓔꓳ, ꓜꓳ ꓗꓷ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓟꓲ ꓠꓯ ꓬꓲ ꓔꓶ. ꓮ ꓟꓬ, ꓗꓪ ꓮ. ꓔꓳ. ꓐꓬ ꓟ ꓮ ꓟꓬꓽ ꓛꓲ ꓔꓳ, ꓜꓳ ꓗꓷꓳ꓿ ꓮ. ꓔꓳ. ꓔꓯ ꓮ ꓡꓰ ꓥ ꓟꓲ ꓢꓰꓼ ꓧꓪ. ꓟꓽ ꓓꓽ ꓠ, ꓟ ꓛꓲ ꓔꓳ, ꓜꓳ ꓗꓷ ꓟ ꓥ ꓡꓳ꓿
ꓟꓶ ꓞꓺ ꓮ ꓟꓬ, ꓞꓺ ꓡ ꓟ ꓠꓬ ꓢꓲ, ꓠꓯ ꓟꓲ ꓓꓽ ꓟ ꓗꓪ ꓮ ꓘꓶ. ꓛꓲ ꓞꓺ ꓡ ꓟ ꓑꓶ. ꓓꓴ ꓮ. ꓔꓳ. ꓐꓬ ꓡꓰ ꓟ ꓥ ꓡꓳ꓿ ꓝꓮꓲ ꓮꓝꓣꓲꓚꓮ ꓗꓴꓷꓼ ꓗꓪ ꓡꓳ. ꓠꓬꓲ ꓥ ꓟꓲ ꓚ‐ꓑꓴ ꓮ ꓟꓬ, ꓠꓬ ꓦ ꓟꓲ ꓓꓲ ꓗꓪ ꓡ ꓢꓲ ꓠꓬꓲ ꓔꓶ ꓫꓵꓽ ꓔꓶ ꓙꓵꓽ ꓮ ꓟꓬ, ꓔꓯ ꓐꓬ ꓡꓰ ꓝꓲ ꓟ ꓒꓬꓱꓼ ꓡ ꓟ ꓥ ꓡꓳ꓿ ꓕꓱ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿
ꓝꓮꓲ ꓣꓳ ꓔꓬ ꓟ ꓮ‐ꓫ ꓗꓴꓷꓼ ꓗꓪ ꓥ ꓟꓲ ꓔꓶ ꓜꓽ ꓔꓶ ꓓꓳ ꓚꓱ, ꓗꓪ ꓗꓳ. ꓗꓷ ꓟ ꓙꓵ, ꓠꓬ ꓔꓶ ꓜꓽ ꓔꓶ ꓓꓳ ꓟꓽ ꓙꓲ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓕꓱ ꓟ ꓠꓬ ꓟꓲ ꓠꓯ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓺ ꓡ ꓟ ꓪꓴ. ꓠꓬꓲ ꓒꓬꓱꓼ ꓡ ꓟ ꓫꓵꓽ ꓪꓴꓽ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓕꓱ ꓡꓱ ꓒꓬꓱꓼ ꓡ ꓟ ꓔꓯ ꓗꓽ ꓕꓽ ꓠ, ꓟ ꓣꓳ ꓮ ꓙꓵꓽ ꓶꓻ ꓙꓳ ꓟ ꓥ ꓡꓳ꓿
ꓣꓳ ꓔꓬ ꓟ ꓟꓲ ꓠꓯ ꓕꓱ ꓟ ꓠꓬ ꓮ ꓘꓶ. ꓛꓲ ꓐꓽ ꓟ ꓬꓲ ꓐꓵ ꓐ ꓕꓲ ꓟ ꓡꓰ ꓫꓱ, ꓡꓯꓽ ꓘꓳ, ꓟ ꓥ ꓡꓳ꓿ ꓬꓲ ꓐꓵ ꓕꓱ ꓟ ꓠꓬ ꓟꓲ ꓟꓲ ꓗꓪ ꓐꓰ ꓡ ꓟ ꓟꓶ ꓞꓺ ꓔꓯ ꓬꓲ ꓐꓵ ꓡꓰ ꓗꓽ ꓕꓽ ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓠꓬ ꓮ. ꓔꓳ. ꓟꓵꓽ ꓘꓴꓽ ꓣꓱ꓾ ꓖꓮꓢ꓾ ꓣꓱ ꓠꓬ ꓕꓱ ꓮ. ꓔꓳ. ꓔꓯ ꓗꓽ ꓟ ꓬꓲ. ꓐꓵ ꓠꓬ ꓐꓽ ꓡꓰ ꓟ ꓐꓬ ꓡꓰ ꓟ ꓪꓴ. ꓠꓬꓲ ꓣꓳ ꓔꓯ ꓟꓶ ꓞꓺ ꓮ ꓟꓬ, ꓞꓺ ꓡ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓟꓵꓽ ꓘꓴꓽ ꓣꓱ ꓓꓳ ꓡ ꓠ, ꓟ ꓟꓬꓱꓽ ꓬꓰ ꓟ ꓔꓯ ꓤ ꓟꓳ ꓠ, ꓟ ꓐꓰ ꓟꓵꓽ ꓘꓳꓼ ꓒꓳ, ꓟ ꓚꓱ, ꓮ ꓟꓬ, ꓔꓯ ꓤ ꓟꓳ ꓠ, ꓟ ꓣꓳ ꓶꓻ ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓐꓰ ꓠꓴ ꓥꓪ ꓐꓰ ꓣꓳ ꓒ ꓕꓲ ꓗꓪ ꓙꓳ ꓟ ꓢꓲ, ꓜꓲ ꓢꓲ ꓠꓯ ꓮ ꓙꓵꓽ ꓔꓯ ꓠꓲ, ꓠꓵ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓔꓬ ꓟ ꓟꓲ ꓠꓯ ꓔꓯ ꓠꓲ, ꓠꓵ ꓓꓴ ꓬꓰ ꓡꓯ ꓫ. ꓟꓳ ꓪ꓿
