ꓞꓳ ꓤ ꓠꓬ ꓫꓵꓻ ꓗꓸ ꓠꓯꓸ ꓝꓮꓲ ꓕꓲ ꓧꓪꓹ ꓢꓯꓸ ꓬꓲꓼ ꓡ ꓟ ꓮ ꓡꓰ ꓥ ꓡ꓾ ꓮ ꓡꓰ ꓫꓵ ꓡ ꓞꓳ ꓠꓬ ꓢꓯꓸ ꓬꓲꓼ ꓡ ꓡ꓾ ꓮ ꓫꓵ ꓑꓶ ꓓꓴ ꓢꓯꓸ ꓬꓲꓼ ꓡ ꓡ꓾ ꓐꓯ_ ꓟ ꓔꓯ ꓠ ꓠꓹ ꓓꓴ ꓬꓰ ꓡꓯ= ꓫꓵꓻ ꓟ ꓗꓪ ꓐꓰ ꓝꓮꓲ ꓢꓯꓸ ꓬꓲꓼ ꓡ ꓐꓯ ꓟ ꓮ ꓫꓵ ꓬꓲ ꓬꓲ ꓢꓷ ꓥ ꓡ꓾ ꓮ ꓫꓵ ꓔꓯ ꓐꓯ_ ꓡ꓾ ꓞꓳ ꓤ ꓠꓬ ꓫꓵꓻ ꓳ꓾ ꓐꓰ ꓐꓯ ꓕꓯ ꓬꓲ ꓦ ꓠꓬ ꓬꓲ ꓖꓳ ꓓꓱ ꓗꓪ ꓐꓰ ꓓꓳ ꓙꓰ ꓢꓲ ꓠꓬꓲ ꓪꓴ-ꓢ ꓔꓯ ꓟꓳ ꓙꓰ ꓡꓳ= ꓬꓲ ꓦ ꓠꓬ ꓪꓴ-ꓢ ꓔꓬ ꓗꓪ ꓙꓰ ꓢꓲ ꓠꓬꓲ ꓬꓲ ꓧꓪ ꓖꓳ ꓓꓱ ꓠꓬ ꓟꓲ ꓠꓯ ꓕꓱ ꓟ ꓗꓪ ꓕꓵꓸ ꓗꓷ ꓢꓲ ꓕꓲ ꓠꓬꓲ ꓙꓳ ꓠꓬ ꓪꓴ-ꓢ ꓡꓰ ꓬꓯꓼ ꓡ ꓟ ꓬꓲ ꓦ ꓐꓰ ꓧꓪ ꓖꓳ ꓓꓱ ꓕꓱ ꓟ ꓗꓳꓸ ꓗꓷ ꓟ ꓦꓬꓼ ꓠꓬꓲ ꓕꓱ ꓟ ꓔꓯ ꓐꓯ ꓟ ꓥ ꓡꓳ= ꓮꓽ ꓟ ꓠꓬ ꓢꓯꓸ ꓬꓲꓼ ꓡ ꓡ꓾ ꓮ ꓙꓵ ꓠꓬ ꓢꓯꓸ ꓬꓲꓼ ꓡ ꓥꓳ= ꓮ ꓡꓰ ꓐꓰ ꓢꓯꓸ ꓬꓲꓼ ꓡ ꓡ꓾ ꓣꓳ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ ꓙꓲ_ ꓟ ꓬꓰ ꓢꓴ ꓙꓵꓻ ꓠꓲꓹ ꓠꓯꓼ ꓗꓪ ꓛꓳ ꓫꓱꓽ ꓢꓴ ꓟꓲ ꓢꓯꓸ ꓬꓲꓼ ꓡ ꓥꓳ= ꓝꓮꓲ ꓟꓽ ꓙꓲ ꓢꓴ ꓥꓶ_ ꓟ ꓬꓰ ꓢꓴ ꓥ ꓟꓲ ꓢꓯꓸ ꓬꓲꓼ ꓡ ꓥꓳ= ꓮ ꓡꓰ ꓐꓰ ꓢꓯꓸ ꓬꓲꓼ ꓡ ꓡ꓾ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓢꓯꓸ ꓬꓲꓼ ꓡ ꓟ ꓡꓰ ꓐꓰ ꓣꓳ ꓢꓯꓸ ꓬꓲꓼ ꓡ ꓥꓳ=
ꓢꓲ ꓒ ꓬꓰ-ꓢꓴ ꓠꓬ ꓞꓳ ꓤ ꓮ ꓙꓵ ꓘꓴ ꓠꓯꓼ ꓗꓪ ꓤ ꓪꓴ ꓥ ꓡꓳ꓾ ꓬꓲ ꓮ ꓡꓰ ꓬꓰ ꓮ ꓡꓰ ꓞꓳ ꓤ ꓥ ꓟꓲ ꓕꓱ ꓡꓱ ꓗꓷ ꓡꓰ_ ꓥꓳ= ꓮꓲ ꓒ ꓬꓰ-ꓢꓴ ꓠꓬ ꓢꓽ ꓠꓬꓲ ꓗꓪ ꓐꓰ ꓝꓮꓲ ꓢꓯꓸ ꓬꓲꓼ ꓡ ꓗ ꓠꓯꓸ ꓬꓲ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓛꓲ ꓒꓯꓹ ꓡꓯ ꓒꓯꓹ ꓟꓳꓸ ꓖꓶ_ ꓡꓳ= ꓥꓪ ꓡꓯ ꓒꓯꓹ ꓔꓯ ꓫꓱ ꓠꓬꓲ ꓥꓪ ꓠꓬ ꓧꓪ ꓙꓳ_ ꓡꓳ꓾ ꓪꓴ ꓔꓳ ꓙꓳ_ ꓡꓳ꓾ ꓐꓯ ꓗꓷꓳ= ꓕꓱ ꓟ ꓠꓬ ꓞꓳ ꓤ ꓮ ꓙꓵ ꓠꓬ ꓬꓲ ꓡꓰ ꓐꓰ ꓢꓯꓸ ꓬꓲꓼ ꓡ ꓟ ꓥ ꓡꓳ= ꓞꓳ ꓤ ꓮ ꓙꓵ ꓟ ꓘꓴ ꓠꓯꓼ ꓗꓪ ꓤ ꓪꓴ ꓥ ꓟ ꓢꓲ ꓒ ꓬꓰ-ꓢꓴ ꓡꓰ ꓐꓰ ꓢꓯꓸ ꓬꓲꓼ ꓡ ꓥꓳ=
ꓔꓧꓰ ꓡꓮꓢꓔ ꓓꓮꓬ ꓐꓰ ꓐꓯ_ ꓟ ꓐꓯ ꓟꓴ ꓘꓶ_ ꓟ ꓦꓬꓼ ꓠꓬꓲ ꓬꓲ ꓟꓶꓽ ꓕꓯ ꓢꓯꓸ ꓬꓲꓼ ꓡ ꓥꓳ= ꓮꓽ ꓠꓱ ꓕꓯ ꓫꓵꓻ ꓢꓴ ꓮ ꓙꓵ ꓥ ꓟꓲ ꓖꓳ ꓟ ꓔꓯ ꓦꓴ ꓠꓬ ꓔꓬ ꓡꓳ꓾ ꓡꓳꓸ ꓔꓬ ꓡꓳ= ꓫꓵꓻ ꓢꓴ ꓢꓯꓸ ꓢꓴ ꓮ ꓙꓵ ꓥ ꓟꓲ ꓖꓳ ꓟ ꓔꓯ ꓥꓳ ꓡꓳꓸ ꓢꓲ ꓠꓬꓲ ꓢꓯꓸ ꓔꓬ ꓟ ꓥ ꓡꓳ= ꓬꓲ ꓠꓬꓲ ꓬꓲ ꓦꓬꓼ ꓠꓬꓲ ꓗꓼ ꓐꓯ_ ꓟ ꓠꓬ ꓮꓽ ꓟ ꓟꓲ ꓟꓽ ꓢꓷꓸ ꓪꓴ-ꓢ ꓡꓰ ꓢꓷꓸ_ ꓡꓳ= ꓕꓲ ꓠꓬꓲ ꓙꓳ ꓠꓬ ꓙꓲ_ ꓟ ꓬꓰ ꓢꓴ ꓥ ꓟꓲ ꓟꓽ ꓙꓲ ꓟ ꓬꓰ ꓢꓴ ꓥ ꓟꓲ ꓝꓮꓲ ꓕꓲ ꓧꓪꓹ ꓧꓪꓽ ꓖꓳ ꓓꓱ ꓐꓰ ꓦ ꓑꓳꓸ ꓡꓯ ꓘꓳ ꓗꓸꓷ ꓢꓲ ꓠꓬꓲ ꓪꓴ-ꓢ ꓟꓲ ꓕꓯ ꓗꓪ ꓐꓯ ꓟꓴ ꓘꓶ_ ꓟ ꓟꓶ_ ꓥꓳ= ꓪꓴ-ꓢ ꓔꓯ ꓙꓵꓻ ꓢꓲ ꓠꓬꓲ ꓙꓵꓻ ꓠꓲꓹ ꓚꓱꓹ ꓗꓪ ꓛꓳ ꓫꓱ ꓢꓲ ꓠꓬꓲ ꓟꓴ ꓗꓪ ꓗꓴꓷꓼ ꓗꓪ ꓓꓯ ꓙꓰ_ ꓥꓳ꓾ ꓪꓴ-ꓢ ꓔꓯ ꓟꓽ ꓙꓵꓻ ꓪꓴ-ꓢ ꓙ ꓖꓴ ꓘꓴꓽ ꓠꓯꓼ ꓗꓪ ꓟꓽ ꓛꓳ ꓫꓱꓽ ꓢꓴ ꓥ ꓠꓬ ꓛꓬꓼ ꓟꓵ ꓗꓪ ꓙꓰ ꓪ ꓥꓳ ꓐꓰ ꓫ ꓫ ꓡꓰ ꓐꓳ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓲ ꓠꓯ ꓗꓪ ꓛꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓕꓱ ꓟꓲ ꓠꓯ ꓗꓪ ꓕꓲ ꓑꓹ ꓞ ꓥ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓙꓳ_ ꓢꓰ ꓥ ꓐꓯ_ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓣꓳ ꓬꓰ_ ꓟ ꓣꓳ ꓛꓳ ꓫꓱ_ ꓟ ꓗꓪ ꓢꓯꓼ ꓪ ꓟꓶ ꓢꓲ ꓙꓵꓻ ꓠꓲꓹ ꓠꓯꓼ ꓗꓪ ꓛꓳ ꓫꓱꓽ ꓐ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=
