ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓟ ꓚꓱ,
ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓚꓺ ꓟꓲꓽ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓪꓴ‐ꓢ ꓶꓼ ꓓꓳ ꓫꓱ, ꓓꓳ ꓚꓺ ꓟ ꓚꓱ, ꓔꓯ ꓣꓳ ꓡꓳ ꓠꓬꓲ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓥ ꓟ ꓢꓲꓽ ꓫꓬ ꓕꓳ ꓶ ꓐꓳ ꓒꓽ ꓝꓲ ꓓꓴ ꓬꓳ‐ꓦ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓢꓯ. ꓔꓬ ꓗꓷ ꓟ ꓥ ꓡꓳ꓿
ꓝꓮꓲ ꓝꓲ ꓓꓴ ꓬꓳ‐ꓦ ꓠꓬ ꓢꓲꓺ ꓒ ꓬꓰ‐ꓢꓴ ꓟ, ꓟ ꓥ ꓟ ꓟ, ꓟ ꓟ‐ꓡꓲ ꓐꓰ ꓕꓲ ꓪ ꓔꓬ ꓗꓷ ꓟ ꓠꓬ ꓟ, ꓟ ꓟ‐ꓡꓲ ꓫꓵꓻ ꓗꓪ ꓛꓲ ꓥ ꓡꓳ꓿ ꓖꓳ ꓗ. ꓠꓯ ꓬꓲ ꓠꓬ ꓬꓲ‐ꓩ‐ꓢꓳ ꓡꓳ ꓒꓱ ꓗꓪ ꓞꓳ ꓙꓳ ꓢꓯ. ꓔꓬ ꓗꓷ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓮ ꓟꓬ, ꓬꓰ ꓗꓷꓳ꓿ ꓬꓲ ꓠꓬ ꓬꓲ‐ꓩ‐ꓢꓳ ꓡꓳ ꓒꓱ ꓗꓪ ꓔꓲꓺ ꓒ ꓓꓽ ꓙꓵꓽ ꓪ ꓔꓯ ꓥ ꓟꓲ ꓘꓳ, ꓣꓴ ꓗꓷ ꓟ ꓥ ꓡꓳ꓿
ꓬꓲ ꓝꓲ ꓓꓴ ꓬꓳ‐ꓦ ꓔꓯ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓡꓰ ꓮ ꓘꓶ. ꓛꓲ ꓞ ꓟ ꓮ. ꓔꓳ ꓒꓱ ꓗꓪ ꓞꓰ ꓗꓷ ꓥ ꓟꓲ ꓬꓲ ꓔꓯ ꓪꓴ‐ꓢ ꓡꓰ ꓡꓳ. ꓙ ꓟ ꓪꓴ. ꓠꓬ ꓟꓽ ꓫꓵꓻ ꓟ ꓥ ꓡꓳ꓿ ꓖꓳ ꓕꓲ ꓙꓵꓽ ꓗꓪ ꓣꓳ‐ꓟ ꓗꓴꓷꓼ ꓗꓪ ꓪ ꓔꓲ ꓠꓬ (Empire Domitian’s) ꓠꓬ ꓪ ꓔꓲ ꓣꓱ ꓟ ꓥ ꓡꓳ꓿
ꓖꓳ ꓕꓲ ꓙꓵ, ꓗꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓝꓴꓲ ꓮ ꓟꓬ, ꓛꓲ ꓧꓪ ꓢꓲ ꓠꓬꓲ ꓫꓵꓽ ꓪꓴꓽ ꓮ ꓟꓬ, ꓛꓲ ꓖꓶ ꓟ ꓥ ꓡꓳ꓿ ꓝꓲ ꓓꓴ ꓬꓳ‐ꓦ ꓔꓯ ꓥ ꓟꓲ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓡꓰ ꓑ‐ꓟꓳ ꓟꓬꓱꓺ ꓔ ꓟ ꓟꓵꓽ ꓗꓪ ꓔꓬ ꓝꓲ ꓟ ꓥ ꓡꓳ꓿
ꓝꓲ ꓓꓴ ꓬꓳ‐ꓦ ꓠꓬ ꓑ‐ꓟꓳ ꓟꓵꓽ ꓗꓪ ꓢꓲꓽ ꓫꓬ ꓕꓳ ꓶ ꓮ ꓟꓬ, ꓔꓯ ꓐꓳ ꓖꓶ ꓗꓷ ꓟ ꓥ ꓡꓳ꓿ ꓝꓮꓲ ꓟꓳ ꓖꓶ ꓓꓴ ꓕꓳ ꓶ ꓔꓯ ꓥ ꓟꓲ ꓕꓱ ꓗꓪ ꓐꓳ ꓗꓷ ꓟ ꓥ ꓡꓳ꓿ ꓝꓲ ꓓꓴ ꓬꓳ‐ꓦ ꓠꓬ ꓮꓓ (100) ꓘꓳꓼ ꓕꓯ ꓬꓲ‐ꓩ‐ꓢꓳ ꓡꓳ ꓒꓱ ꓗꓪ ꓢꓲꓺ ꓒ ꓠꓯ, ꓗꓪ ꓬꓯꓼ ꓟꓶ ꓡꓰ ꓟ ꓥ ꓡꓳ꓿
ꓝꓲ ꓓꓴ ꓬꓳ‐ꓦ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓡꓳ ꓬꓰ ꓗ. ꓠꓯ ꓝꓲ ꓓꓴ ꓬ‐ꓗꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓔꓲꓺ ꓒ ꓓꓽ ꓙꓵꓽ ꓪ ꓘꓳ, ꓣꓴ ꓟꓶ ꓡꓰꓳ꓿ ꓝꓲ ꓓꓴ ꓬ‐ꓗꓴ ꓠꓬ ꓪꓴ‐ꓢ ꓐꓰ ꓮ ꓕꓯ ꓥ ꓟꓲ ꓙ ꓡꓯ ꓘꓳ, ꓢꓲ ꓠꓬꓲ ꓪꓴ‐ꓢ ꓶ ꓓꓳꓽ ꓫꓱ, ꓔꓯ ꓚꓺ ꓢꓴ ꓝꓲ ꓓꓴ ꓕꓲ ꓣꓳ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓠꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓟꓽ ꓙꓲ ꓢꓴ ꓐꓴ ꓡꓰ ꓢꓰꓼ ꓗꓷ ꓟ ꓔꓯ ꓔꓳ, ꓜꓳ ꓡꓰ ꓢꓴ ꓐꓴ ꓥ ꓡꓳ꓿ ꓬꓲ ꓠꓬ ꓫꓵꓻ ꓗꓪ ꓛꓲ ꓢꓲꓺ ꓒ ꓬꓰ‐ꓢꓴ ꓶꓼ ꓓꓳ ꓫꓱ, ꓓꓳ ꓔꓯ ꓚꓺ ꓢꓴ ꓐꓴ ꓥ ꓡꓳ꓿ ꓫ. ꓟꓳ ꓪ꓿
