ꓟꓵꓽ ꓘꓳꓼ ꓔꓯ ꓣꓳ ꓮ ꓡꓰ ꓐꓰ ꓠꓲ, ꓚꓵˍ ꓝꓲ ꓐ ꓡ ꓟ ꓚꓱ, (Environment program)
ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓟꓵꓽ ꓘꓳꓼ ꓔꓯ ꓣꓳ ꓮ ꓡꓰ ꓐꓰ ꓠꓲ, ꓚꓵˍ ꓝꓲ ꓐ ꓡ ꓟ ꓚꓱ, ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿ ꓣꓳ ꓙꓲˍ ꓟ ꓙ ꓫꓱ, ꓠꓲ, ꓗꓪ ꓐꓰ ꓥ ꓟꓲ ꓟꓵꓽ ꓘꓳꓼ ꓔꓯ ꓮ ꓡꓰ ꓐꓰ ꓠꓲ, ꓚꓵˍ ꓝꓲ ꓐ ꓡ ꓔꓯ ꓣꓳ ꓡꓳ. ꓠꓬꓲ ꓓꓴ ꓬꓰ ꓡꓯ꓿ ꓣꓳ ꓮ ꓫꓵꓽ ꓬꓰ ꓥ ꓟꓲ ꓓꓴ ꓙ ꓟꓬꓽ ꓓꓴ ꓟꓽ ꓙꓳ ꓙꓳ ꓮ ꓫꓵꓽ ꓔꓯ ꓥ ꓟꓲ ꓕꓲ ꓟ ꓕꓲ ꓟ ꓢꓽ ꓢꓽ ꓡꓰ ꓣꓳ ꓬꓰ ꓠꓬ ꓣꓳ ꓢꓯ. ꓔꓬ ꓟ ꓣꓳ ꓞꓳ ꓙꓳ ꓟꓲ ꓠꓯ ꓠꓬ ꓠꓲ, ꓚꓵˍ ꓚꓵˍ ꓐꓰ ꓗꓷ ꓡꓰ ꓟ ꓥ ꓡꓳ꓿
ꓬꓲ ꓪꓴ. ꓕꓲ ꓫꓵꓽ ꓟ ꓠꓬ ꓣꓳ ꓓꓵꓽ ꓙ ꓚꓱ, ꓥ ꓡꓳ꓿ ꓣꓳ ꓠꓲ, ꓟ ꓠꓯ, ꓗꓪ ꓓꓵꓽ ꓙ ꓟꓬꓽ ꓓꓴ ꓟꓽ ꓙꓳ ꓠꓲ, ꓟ ꓫ. ꓓꓴ ꓟꓽ ꓙꓳ ꓐꓰ ꓞꓳ ꓙꓳ ꓠꓬ ꓣꓳ ꓬꓰ ꓟ ꓮ ꓙꓵꓽ ꓥ ꓟꓲ ꓙꓲ ꓟ ꓚꓱ, ꓒꓬꓱꓼ ꓡ ꓢꓲ ꓠꓬꓲ ꓟꓵꓽ ꓘꓳꓼ ꓔꓯ ꓥ ꓟꓲ ꓙꓲ ꓡꓰ ꓝꓲ ꓟ ꓒꓬꓱꓼ ꓡ ꓟ ꓥ ꓡꓳ꓿ ꓟꓲ ꓠꓯ ꓗꓪ ꓣꓳ ꓞꓳ ꓙꓳ ꓟ ꓗꓪ ꓓꓵꓽ ꓟꓬꓽ ꓓꓴ ꓮ ꓟꓬ, ꓙꓳ ꓕꓯ ꓢꓲꓟꓑꓡꓰ ꓡꓲꓝꓰ ꓐꓯ, ꓟ ꓮ ꓟꓬ, ꓟ ꓗꓪ ꓕꓲ ꓫꓵꓽ ꓠꓬꓲꓽ ꓫꓵꓽ ꓔꓯ ꓡꓰ ꓢꓲ, ꓔ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓠ, ꓟ ꓣꓳ ꓚꓵˍ ꓡꓳ꓿
ꓟꓲ ꓠꓯ ꓗꓪ ꓡ ꓞꓳ ꓮ ꓙꓵꓽ ꓠꓬ ꓣꓳ ꓓꓵꓽ ꓔ ꓟ ꓮ ꓙꓵꓽ ꓒꓬꓱꓼ ꓡ ꓬꓰ ꓐ ꓡ ꓟ ꓫ. ꓔ ꓟ ꓥ ꓡꓳ꓿ ꓝꓮꓲ ꓕꓲ ꓫꓵꓽ ꓟ ꓠꓬ ꓣꓳ ꓜ ꓓꓴ ꓥ ꓡꓳ꓿ ꓜꓽ ꓓꓴ ꓔꓯ ꓣꓳ ꓜꓽ ꓟꓽ ꓘꓴ ꓗꓪ ꓛꓲ ꓪꓴˍ ꓔ ꓢꓲ ꓠꓬꓲ ꓡꓳ ꓗꓷ ꓠꓬ ꓟꓵꓽ ꓘꓳꓼ ꓔꓯ ꓟꓽ ꓙꓲ ꓡꓰ ꓒꓬꓱꓼ ꓡꓰ ꓝꓲ ꓟ ꓥ ꓡꓳ꓿ ꓜꓽ ꓓꓴ ꓓꓳ ꓓꓴ ꓔꓯ ꓮ ꓟꓬ, ꓪꓴꓽ ꓔ ꓢꓲ ꓠꓬꓲ ꓜ ꓟꓽ ꓘꓴꓽ ꓗꓪ ꓛꓲ ꓪꓴꓽ ꓔ ꓟ ꓥ ꓟꓲ ꓟꓵꓽ ꓘꓳꓼ ꓔꓯ ꓒꓳ, ꓡꓰ ꓝꓲ ꓟ ꓥ ꓡꓳ꓿
ꓖꓪꓽ ꓓꓴ ꓐꓵ ꓞꓶꓽ ꓟꓶ ꓚꓵˍ ꓥ ꓟꓲ ꓮ ꓟꓬ, ꓙꓳ ꓥ ꓟꓲ ꓮ ꓟꓬ, ꓪꓴꓽ ꓟ ꓠꓬ ꓟꓵꓽ ꓘꓳꓼ ꓔꓯ ꓠꓽ ꓓꓴ ꓡꓰ ꓝꓲ ꓟ ꓐꓰ ꓣꓳ ꓢꓯ. ꓔꓬ ꓟ ꓟꓲ ꓠꓯ ꓔꓯ ꓮ ꓟꓬ, ꓛꓲ ꓫꓵꓽ ꓪꓴꓽ ꓒꓬꓱꓼ ꓡꓰ ꓝꓲ ꓟ ꓥ ꓡꓳ꓿ ꓣꓳ ꓟꓬꓱꓽ ꓬꓰ ꓟ ꓥ ꓟꓲ ꓣꓳ ꓢꓯ. ꓔꓬ ꓠ, ꓟ ꓟꓬꓱꓽ ꓬꓰ ꓟ ꓥ ꓡꓳ꓿ ꓣꓳ ꓢꓯ. ꓔꓬ ꓟ ꓠꓬ ꓟꓬꓱꓽ ꓬꓰ ꓠ, ꓟ ꓟꓽ ꓥ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓢꓯ. ꓔꓬ ꓟ ꓙꓵ, ꓕꓯ ꓙꓲ ꓟ ꓟꓬꓱꓽ ꓗꓪ ꓬꓰ ꓐ ꓡ ꓠ,ꓟ ꓢꓯꓼ ꓕꓵꓼ ꓡꓯ꓿
ꓓꓵꓽ ꓙ ꓪꓴꓽ ꓧꓶ ꓓꓴ ꓮ ꓟꓬ, ꓙꓳ ꓕꓯ ꓙꓲ ꓟ ꓛꓳꓽ ꓒꓯ, ꓪ ꓟꓽ ꓓꓽ ꓟ ꓥ ꓡꓳ꓿ ꓝꓮꓲ ꓙꓲ ꓟ ꓕꓲ ꓦꓲꓻ ꓡ ꓞꓳ ꓪꓽ ꓟꓽ ꓓꓽ ꓟ ꓟꓲ ꓥ ꓡꓳ꓿ ꓣꓳ ꓠꓲ, ꓟ ꓠꓯ, ꓗꓪ ꓟꓽ ꓙꓲ ꓟ ꓔꓯ ꓡꓰ ꓝꓮꓲ ꓠꓲ, ꓫ. ꓟꓬꓽ ꓫ. ꓟ ꓔꓯ ꓓꓴ ꓚꓱ, ꓡꓰ ꓣꓳ ꓠꓯ, ꓗꓪ ꓙꓳ ꓟ ꓪꓴ. ꓠꓬꓲ ꓥ ꓡꓳ꓿
ꓕꓱ ꓟ ꓠꓬ ꓟꓵꓽ ꓘꓳꓼ ꓐꓰ ꓮ ꓡꓰ ꓐꓰ ꓗꓳ ꓙꓲ ꓙꓳˍ ꓡ ꓐꓰ ꓐꓯ ꓠꓬ ꓣꓳ ꓠꓲ, ꓟ ꓗꓪ ꓢꓲ ꓡꓲ ꓟ ꓙꓳ ꓕꓯ ꓢꓲ ꓡꓰ ꓣꓳ ꓢꓲ ꓜꓲ ꓔꓯ ꓠꓲ, ꓠꓵ ꓟ ꓥ ꓡꓳ꓿ ꓢꓲ ꓔꓶ ꓟ ꓔꓯ ꓥ ꓟ ꓠꓲ, ꓟ ꓐ ꓐ ꓡꓰ ꓣꓳ ꓔꓶ ꓟ ꓥ ꓡꓳ꓿ ꓣꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓞꓳ ꓙꓳ ꓚꓱ, ꓗꓪ ꓓꓵꓽ ꓙ ꓟꓬꓽ ꓓꓴ ꓟꓽ ꓙꓳ ꓠ, ꓟ ꓣꓳ ꓢꓯ. ꓔꓬ ꓟ ꓙꓵ, ꓕꓯ ꓣꓳ ꓬꓰ ꓐ ꓡ ꓟ ꓐꓰ ꓣꓳ ꓠꓯ, ꓗꓪ ꓙꓳ ꓟ ꓔꓯ ꓠꓲ, ꓠꓵ ꓢ ꓠꓬꓲ ꓢꓯ. ꓔꓬ ꓡꓯ꓿ ꓣꓳ ꓠꓯ, ꓗꓪ ꓙꓳ ꓟ ꓔꓯ ꓒꓵꓽ ꓓꓴ ꓬꓰ ꓡꓯ꓿ ꓟꓵꓽ ꓘꓳꓼ ꓕꓯ ꓠꓲ, ꓠꓵ ꓡꓯ꓿ ꓫ. ꓟꓳ ꓪ꓿
