ꓟꓮꓠꓓꓮꓡꓮꓬ ꓔꓲꓺ ꓒ ꓓꓽ ꓙꓵꓽ ꓔꓶꓸ ꓗꓪ ꓕꓲ ꓦꓲꓻ ꓡ ꓞꓳ ꓐꓴ ꓐꓰ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓐꓱ ꓶ ꓙꓴ-ꓐꓲ-ꓡꓲ ꓑꓮꓲ ꓬꓰ_ ꓟ꓾
ꓟꓬ-ꓟ ꓗꓴꓷꓼ꓾ ꓟꓮꓠꓓꓮꓡꓮꓬ ꓔꓲꓺ ꓒ ꓓꓽ ꓙꓵꓽ ꓔꓶꓸ ꓗꓪ 7 ꓦ ꓟ 26 ꓠꓬꓲ 2025 ꓘꓳꓼ (ꓠꓽ ꓛꓳꓼ ꓠꓬꓲ) ꓕꓯ ꓡꓮꓝꓳꓠ꓾ ꓢꓔꓸ ꓙꓳꓢꓰꓑꓧ ꓪꓽ ꓘꓴ ꓦꓲꓻ ꓗꓪ ꓕꓲ ꓦꓲꓻ ꓡ ꓞꓳ ꓐꓴ ꓙꓴ-ꓐꓲ-ꓡꓲ ꓐꓰ ꓥꓪꓽ ꓧꓪꓹ ꓕꓲ ꓧꓪꓹ ꓟ ꓟꓵꓽ ꓗꓳꓸ ꓓꓵ ꓓꓵ ꓞꓲꓼ ꓪꓴꓽ ꓢꓴ ꓐꓴ ꓔꓯ ꓟꓬꓱꓺ ꓓꓳꓽ ꓖꓶ ꓒꓵꓽ ꓗꓹ ꓬꓰ ꓖꓶ_ ꓟ ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓬꓰ ꓓꓳ ꓡꓰ ꓟ ꓥꓳ=
ꓙꓴ-ꓐ-ꓡꓲ ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓠꓯꓼ 7ꓽ00 ꓙꓵꓹ ꓕꓯ ꓬꓰ ꓢꓲ ꓠꓬꓲ ꓟꓮꓠꓓꓮꓡꓮꓬ ꓔꓲꓺ ꓒ ꓓꓽ Marco Tin Win ꓡꓰ ꓟꓲ-ꓢ ꓪꓽ ꓘꓴ ꓙꓵꓹ ꓔꓯ ꓧꓳꓽ ꓪꓴꓸ ꓟꓴ ꓢꓲ ꓟꓮꓠꓓꓮꓡꓮꓬ ꓡꓳ ꓒꓱ ꓗꓪ ꓐꓰ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓐꓰ ꓫꓵ ꓫꓵ ꓪ ꓪ ꓐꓰ ꓬꓰ ꓓꓳ ꓡꓰ ꓟ ꓥꓳ=
ꓕꓱ ꓑꓮꓲ ꓗꓪ ꓢꓲ ꓫꓬ ꓟ ꓕꓲ ꓦꓲꓻ ꓡ ꓞꓳ ꓘꓴꓽ ꓐꓰ ꓘꓴ ꓜꓲꓼ ꓞꓳ ꓐꓰ ꓟꓲ ꓠꓯ ꓡ ꓞꓳ ꓚꓱꓹ ꓘꓴꓽ ꓗꓪ ꓕꓱ ꓞꓲꓼ ꓪꓴꓽ ꓡꓰ ꓢꓴ ꓐꓴ ꓠꓬ ꓮ ꓘꓶꓸ ꓣꓳꓸ ꓚꓵ_ ꓟ ꓕꓲ ꓒꓳꓹ ꓗꓪ ꓐꓰ ꓐ_ ꓟ ꓔꓯ ꓐꓯ ꓖꓶ ꓔ ꓡꓳ=
ꓔꓲꓺ ꓒ ꓓꓽ ꓶꓼ ꓓꓳ ꓫꓱꓸ ꓓꓳ ꓚꓺ ꓟ ꓗꓪ ꓙꓲ ꓢꓴ ꓢꓲ ꓤ ꓐꓴ ꓥꓳ ꓡꓳꓸ ꓓꓴ ꓐꓰ ꓙꓲ ꓢꓴ ꓢꓲ ꓤ ꓐꓴ ꓛꓳ ꓠꓹ ꓟ ꓠꓲꓹ ꓟ ꓕꓲ ꓒꓳꓹ ꓗꓪ ꓐꓰ ꓔꓯ ꓢꓳꓺ ꓠꓹ ꓟ ꓚꓱꓹ ꓔꓯ ꓐꓯ ꓖꓶ ꓗꓷ ꓟ ꓥꓳ=
“ꓥꓳ ꓡꓳꓸ ꓓꓴ ꓔꓯ ꓟꓽ ꓟꓶ ꓠꓹ ꓟ ꓢꓯꓼ ꓕꓵꓼ ꓟ ꓠꓬ ꓣꓱ ꓛꓰ ꓥ ꓡꓳ꓾” ꓐꓰ ꓢꓯꓼ ꓖꓶ ꓔ ꓡꓳ= ꓞꓲꓼ ꓪꓴ ꓡꓰ ꓢꓴ ꓐꓴ ꓔꓯ ꓠꓲꓹ ꓡꓱ ꓡꓱ ꓪꓽ ꓘꓴ ꓖꓶ ꓢꓲ ꓠꓬꓲ ꓬꓰ ꓙ ꓔꓳꓹ ꓙ ꓠꓹ ꓟ ꓢꓯꓼ ꓖꓶ ꓗꓷ ꓢꓲ ꓠꓬꓲ ꓙꓲ_ ꓟ ꓚꓱꓹ ꓗꓪ ꓐꓰ ꓡꓰ ꓧꓳꓽ ꓪꓴꓸ ꓢꓲ ꓔꓯ ꓢꓳꓺ ꓓꓴ ꓟꓸ ꓖꓶ ꓠꓹ ꓟ ꓔꓬ ꓠꓹ ꓟ ꓐꓯ ꓖꓶ ꓔ ꓡꓳ=
ꓢꓲ ꓒ ꓬꓰ-ꓢꓴ ꓬꓲ ꓮ ꓑ ꓮ ꓣ ꓥ ꓟ ꓢꓔꓸ ꓙꓳꓮꓚꓧꓲ ꓐꓰ ꓮꓠꓠꓰ ꓗꓪ ꓐꓰ ꓢꓯꓼ ꓪ ꓣꓴ ꓡꓯ꓾ “ꓟꓹ ꓟ ꓟ-ꓡꓲ ꓠꓬ ꓬꓲ ꓐꓹ ꓐ ꓟꓹ ꓟ ꓠꓯꓼ ꓗꓪ ꓐꓰ ꓔꓱꓹ ꓟ ꓔꓯ ꓢꓳꓺ ꓣꓴ ꓟ ꓡꓰ ꓐꓰ ꓞꓲꓼ ꓪꓴ ꓢꓴ ꓠꓬ ꓣꓳꓺ ꓢꓴ ꓐꓴ ꓬꓲ ꓪ ꓐꓱ ꓶ ꓔꓯꓺ ꓢꓳꓺ ꓓꓴ ꓒꓬꓱꓼ ꓡꓰ ꓠ ꓟꓸ ꓖꓶ ꓠ ꓔ ꓡꓳ꓾ ꓐꓰ ꓢꓯꓼ ꓖꓶ ꓔ ꓟ ꓥꓳ=
ꓔꓧꓰ ꓡꓮꓲꓔꓬ ꓐꓰ ꓝꓮꓟꓲꓡꓬ ꓚꓳꓟꓟꓳꓢꓢꓲꓳꓠ ꓗꓪ ꓐꓰ Director ꓥ ꓟ ꓙꓳꓧꓠ ꓢꓳꓰ ꓠꓮꓲꓠꓖ ꓡꓰ ꓕꓱ ꓑꓮꓲ ꓮ ꓘꓶꓸ ꓣꓳ ꓚꓵ_ ꓟ ꓚꓱꓹ ꓐꓯ ꓖꓶ ꓗꓷ ꓟ ꓥꓳ= ꓕꓱ ꓟ ꓠꓬ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ 2021 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓗꓷ ꓢꓲ ꓠꓬꓲ ꓟꓵꓽ ꓗꓳꓸ ꓓꓵ ꓓꓵ ꓚꓵꓸ ꓟꓶ ꓓꓴ ꓗꓪ ꓐ_ ꓟ ꓔꓯ ꓐꓯ ꓔ ꓡꓳ= ꓕꓱ ꓟ ꓠꓬ ꓥꓪꓽ ꓧꓪꓹ ꓕꓲ ꓧꓪꓹ ꓟ ꓚꓵꓸ ꓶ ꓓꓴ ꓦꓬꓼ ꓠꓬꓲ ꓥ ꓡꓳ꓾ ꓟꓮꓠꓓꓮꓡꓮꓬ ꓔꓲꓺ ꓒ ꓓꓽ ꓙꓵꓽ ꓔꓶꓸ ꓗꓪ ꓬꓰ ꓟ ꓠꓬ ꓢ ꓧꓪꓹ ꓕꓲ ꓧꓪꓹ ꓟ ꓥ ꓡꓳ=
ꓗꓴꓷꓼ ꓫꓵ ꓪꓴ ꓑꓶ ꓓꓴ 2025 ꓘꓳꓼ 3 ꓦ ꓟ 28 ꓠꓬꓲ ꓕꓯ ꓗꓷ ꓡꓰ ꓟ ꓟꓵꓽ ꓚꓴ ꓙꓵꓹ ꓟ꓾ ꓬꓲꓻ ꓙꓬ ꓙꓵ_ ꓟ ꓕꓱ ꓡꓱ ꓮ ꓟꓬꓹ ꓫꓵ ꓘꓴꓽ ꓗꓪ ꓐꓰ ꓙꓴ-ꓐꓲ-ꓡꓲ ꓑꓮꓲ ꓔꓯ ꓬꓰ_ ꓟꓟ ꓥꓳ ꓐꓰ ꓐꓯ ꓔ ꓡꓳ= ꓕꓱ ꓕꓲ ꓘꓳꓼ ꓠꓬ ꓔꓲꓺ ꓒ ꓙꓵꓽ ꓔꓶꓸ ꓮ ꓙꓵ ꓗꓪ ꓑꓮꓲ ꓬꓰ ꓟꓽ ꓐ ꓡ ꓥ ꓟꓲ ꓮ ꓟꓶ ꓡꓰ ꓐꓰ ꓟꓮꓠꓓꓮꓡꓮꓬ ꓡꓳ ꓒꓱ ꓗꓪ ꓬꓰ ꓐ ꓡꓰ ꓟ ꓑꓶ ꓓꓴ ꓫ ꓟꓳ ꓐꓰ ꓐꓯ ꓔ ꓡꓳ=
7 ꓦ ꓟ 26 ꓠꓬꓲ ꓢꓔꓸ ꓙꓳꓮꓚꓧꓲꓟ ꓐꓰ ꓮꓠꓠꓰ ꓑꓮꓲ ꓦꓬꓼ ꓠꓬꓲ ꓠꓯꓼ ꓗꓪ ꓬꓰ ꓠꓹ ꓟ ꓑꓮꓲ ꓦꓬꓼ ꓠꓬꓲ ꓔꓯ ꓢꓲꓺ ꓔ ꓟ ꓬꓲ ꓔꓶꓻ ꓙꓱꓼ ꓙꓳ_ ꓡꓳ꓾ ꓠ ꓦꓬꓼ ꓠꓬꓲ ꓕꓯ ꓢꓲꓺ ꓕꓯ ꓠꓬ꓾ꓔꓲꓺ ꓒ ꓐꓴ ꓑꓮꓲ ꓗꓪ ꓮ ꓟꓬꓹ ꓟꓽ ꓐ ꓪ ꓡ ꓟ ꓑꓶ ꓓꓴ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓫ ꓓꓴ ꓔꓬ ꓥ ꓟꓲ ꓑꓮꓲ ꓔꓯ ꓕꓱ ꓡꓱ ꓬꓰ ꓖꓶ ꓐ ꓡꓰ ꓟ ꓑꓶ ꓓꓴ ꓫꓱꓸ ꓖꓶ ꓫ ꓟꓳ ꓡꓳ ꓐꓰ ꓐꓯ ꓔ ꓡꓳ=
ꓔꓲꓺ ꓒ ꓑꓮꓴꓡ ꓔꓧꓰꓔ ꓗꓧꓮꓲꓠꓖ ꓥ ꓟꓲ ꓕꓲ ꓦꓲꓻ ꓡ ꓞꓳ ꓐꓴ ꓐꓹ ꓐ ꓟꓹ ꓟ ꓐꓴ ꓔꓯ ꓬꓲ ꓪ ꓮ ꓘꓶꓸ ꓣꓳꓸ ꓚꓵ_ ꓟ ꓕꓲ ꓒꓳꓹ ꓔꓯ ꓐꓯ ꓖꓶ ꓗꓷ ꓟ ꓥꓳ= “ꓠꓴ ꓔꓶꓻ ꓔ ꓟ ꓡꓰ ꓠꓴ ꓖꓳ ꓫ ꓟꓶ_ ꓥꓳ꓾” ꓐꓰ ꓐꓯ ꓔ ꓟ ꓡꓰ ꓐꓰ ꓐꓹ ꓐ ꓟꓹ ꓟ ꓥ ꓟꓲ ꓣꓳ ꓤ ꓠꓱ ꓔꓯ ꓠꓵꓻ ꓠꓲꓹ꓾ ꓪꓽ ꓘꓴ ꓟ꓾ ꓙꓲ_ ꓟ ꓔꓯ ꓡꓰ ꓛꓳ ꓫꓱ ꓠꓹ ꓟ ꓐꓰ ꓟꓸ ꓖꓶ ꓠꓹ ꓟ ꓥꓳ= ꓐꓹ ꓐ ꓟꓹ ꓟ ꓐꓴ ꓥ ꓟꓲ ꓚꓲ ꓛꓬ ꓟꓬꓱꓽ ꓙꓵ ꓪ ꓔꓯ ꓐꓲ ꓜꓲꓼ ꓠ ꓬꓰ ꓠꓬ ꓤ ꓚꓵ ꓞ ꓔꓬ ꓔꓶꓸ ꓟꓽ ꓣꓱ ꓬꓯꓼ ꓡ꓾ “ꓣꓳ ꓤ ꓠꓱ ꓔꓯ ꓢꓯꓼ ꓖꓶ ꓓꓴ ꓬꓰ ꓡꓯ꓾ ꓬꓲ ꓪ ꓔꓯ ꓣꓴ ꓞꓰ ꓗꓷ_ ꓟ ꓐꓯ ꓘꓶꓽ ꓮ ꓕꓯ ꓟꓲ ꓕꓽ ꓫꓸ ꓕꓱ“ ꓐꓰ ꓢꓯꓼ ꓖꓶ ꓔ ꓡꓳ= ꓤ ꓠꓱ ꓤ ꓐꓴ ꓗꓪ ꓐꓰ ꓥ ꓟꓲ ꓮ ꓑ ꓮ ꓣ ꓐꓴ ꓬꓲ ꓪ ꓠꓬꓲ ꓙ ꓔꓳꓹ ꓙ ꓗꓷ ꓟ꓾ ꓬꓲ ꓪ ꓡꓰ ꓙꓲ_ ꓟ ꓚꓱꓹ ꓧꓳꓽ ꓪꓴꓸ ꓗꓷ ꓟ ꓐꓱ ꓶ ꓫꓱꓸ ꓖꓶ ꓓꓴ ꓬꓰ ꓡꓯ꓾ ꓫ ꓟꓳ ꓓꓴ ꓬꓰ ꓡꓯ꓾ꓬꓲ ꓪ ꓔꓯ ꓒꓵꓽ ꓗꓹ ꓬꓰ ꓓꓴ ꓬꓰ ꓡꓯ꓾” ꓐꓰ ꓔꓲꓺ ꓒ ꓡꓰ ꓢꓯꓼ ꓖꓶ ꓔ ꓡꓳ=
ꓟꓵꓽ ꓗꓳꓸ ꓓꓵ ꓓꓵ ꓞꓲꓼ ꓪꓴ ꓡꓰ ꓢꓴ ꓐꓴ ꓦꓬꓼ ꓠꓬꓲ ꓐꓱ ꓶ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓐꓯ ꓑꓶ ꓗꓷ ꓟ ꓐꓯ ꓘꓶꓽ ꓔꓯ ꓵ ꓢꓲ ꓠꓬꓲ ꓬꓲꓸ ꓟꓶꓽ ꓢꓰꓼ ꓗꓷ ꓟ ꓥꓳ= 70 ꓘꓳꓼ ꓡꓳꓼ ꓡꓰ ꓢꓴ ꓐꓴ ꓔꓯ ꓡꓯꓼ ꓫꓴ ꓖꓶ ꓢꓲ ꓠꓬꓲ ꓟꓳꓼ ꓡꓳ ꓜ ꓐꓰ ꓖꓶ ꓜ ꓗꓷ ꓟ ꓥꓳ=
