ꓐꓬꓽ ꓬꓲꓻ ꓗꓪ ꓔꓲ, ꓔ ꓟ ꓥ‐ꓟ‐ꓢꓶꓽ ꓔꓯ ꓠꓬ ꓟꓬ‐ꓟ ꓗꓴꓷꓼ ꓡꓰꓽ ꓟꓽ ꓞꓲ ꓮꓢꓲꓮ ꓗꓴꓷꓼ ꓐꓴ ꓥ ꓟ ꓕꓮꓲ,꓾ ꓡ‐ꓳ꓾ ꓗꓯ‐ꓐꓳ‐ꓓꓲ‐ꓬ꓾ ꓲ‐ꓓꓲ‐ꓬ꓾ ꓲꓠ‐ꓓꓳ‐ꓠꓲ‐ꓫꓬ.꓾ ꓟ‐ꓡꓰ,‐ꓫꓬ. ꓐꓴ ꓗꓪ ꓟꓬꓽ ꓠꓬꓲ ꓜꓽ ꓔꓬ ꓟ ꓜꓽ ꓫꓵꓽ ꓥꓳ꓿
ꓐꓬꓽ ꓬꓲꓻ ꓗꓪ ꓔꓲ, ꓔ ꓟ ꓥ‐ꓟ‐ꓢꓶꓽ ꓐꓯˍ ꓟ ꓕꓲ ꓡꓰ,꓾ ꓥ‐ꓟ‐ꓢꓶꓽ ꓔꓯ ꓪꓳꓻ ꓗꓷ ꓢꓲ ꓠꓬꓲ ꓬꓲ ꓕꓴꓽ ꓗꓪ ꓧꓳꓽ ꓗꓷ꓿ ꓖꓳ ꓗ ꓠꓯ. ꓥ‐ꓟ‐ꓢꓶꓽ ꓔꓵ. ꓡꓰˍ ꓗꓪ ꓛꓲ ꓐꓬꓽ ꓬꓲꓻ ꓧꓳ. ꓧꓳꓽ꓿ 3 ꓠꓬꓲ ꓛꓲ ꓔꓲ, ꓗꓷ ꓠꓬ ꓜꓽ ꓓ ꓡˍ ꓟ ꓥ ꓡꓳ꓿ ꓬꓲ ꓕꓴꓽ ꓖꓳ ꓟ ꓔꓯ ꓫˍ ꓕꓯ ꓦꓲꓻ ꓗꓪ ꓝꓣꓲꓓꓖꓰ ꓙꓳˍ ꓠꓬ ꓪ ꓜꓲ ꓙꓲˍ ꓥ꓿ ꓟꓽ ꓙꓳ ꓕꓯ ꓠꓽ ꓟꓶ ꓛ ꓣꓳ ꓟꓽ ꓛꓲ ꓡ ꓟ ꓗꓪ ꓗꓶ ꓔ ꓠꓯ, ꓡꓳ꓿ 3 ꓠꓬꓲ ꓗꓪ ꓐꓰ 5 ꓠꓬꓲ ꓛꓲ ꓔꓲ, ꓗꓷ ꓠꓬ ꓙꓲꓻ ꓖꓴ ꓮ ꓟꓬ, ꓙꓳˍ ꓟ ꓜꓽ ꓓꓴ ꓕꓲꓽ ꓟ ꓒꓬꓱꓼ ꓡꓺꓳ꓿
ꓠꓯꓼ ꓜꓻ ꓟꓽ ꓜꓽ ꓕꓯ ꓕꓲꓽ ꓟ ꓠꓬꓲꓽ ꓟ ꓜꓽ ꓢꓲ ꓬꓲꓻ ꓡꓱ ꓡꓱ ꓡꓱ ꓡꓰꓽ ꓓꓳꓻ ꓖꓶ꓿ ꓟꓽ ꓥ ꓠꓬ ꓟꓶꓽ ꓘꓶꓽ ꓟꓽ ꓬꓲꓼ ꓔ ꓢꓰꓽ ꓕꓯ ꓜꓽ ꓖꓶ ꓐ ꓡˍ ꓡꓳ꓿
ꓣꓳ ꓐꓱ ꓶ ꓙꓲꓻ ꓖꓴ ꓮ ꓟꓬ, ꓙꓳˍ ꓟ ꓐꓬꓽ ꓬꓲꓻ ꓗꓪ ꓔꓲ, ꓔ ꓟ ꓥ‐ꓟ‐ꓢꓶꓽ ꓠꓬ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ꓾ ꓐꓯ ꓟ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓢꓯꓼ ꓐꓲ ꓡꓰ ꓝꓲˍ ꓟ
ꓞꓼ ꓛꓵ ꓢꓯꓼ (ꓞꓼ ꓐꓳ ꓐꓬꓽ) ꓢꓯꓼ ꓥ ꓟ (ꓝꓣꓴꓔꓳꓢꓰ꓾ ꓖꓡꓴꓚꓳꓢꓰ) ꓐꓰ ꓑꓳꓔꓮꓢꓢꓲꓴꓟ ꓢꓯꓼ ꓓꓯ,ˍ ꓟ ꓑꓶ. ꓓꓴ ꓖꓳ ꓓꓱꓽ ꓗꓪ ꓢꓯꓼ ꓐꓲ ꓡꓰ ꓝꓲ ꓢꓲ ꓠꓬꓲ ꓢꓯꓼ ꓐꓽˍ ꓟ ꓔꓯ ꓠꓲ. ꓡꓰ ꓝꓲˍ ꓡꓳ꓿
ꓦꓰꓼ ꓟ ꓙꓲꓺ ꓢꓻ ꓝꓲˍ ꓟ
ꓥ‐ꓟ‐ꓢꓶꓽ ꓗꓪ ꓝꓲꓐꓰꓣ ꓢꓯꓼ ꓐꓰ ꓑꓣꓳꓐꓲꓳꓔꓲꓚꓢ ꓓꓯ,ˍ ꓟ ꓥ ꓢꓲ꓾ ꓬꓲ ꓪꓴꓻ ꓚꓱ, ꓔꓯ ꓔꓬ, ꓢꓻ ꓠ, ꓟ꓾ ꓜꓽ ꓓꓴ ꓙꓲꓺ ꓢꓻ ꓠ, ꓟ ꓬꓰ ꓙ ꓖꓶˍ ꓡꓳ꓿
ꓖꓳ ꓓꓱꓽ ꓠꓯꓸꓼ ꓗꓪ ꓠꓻ ꓒꓬꓽ ꓟꓽ ꓓꓵꓽ ꓡ ꓠ ꓗꓽ ꓙ ꓖꓶˍ ꓟ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ꓿
ꓥ‐ꓟ‐ꓢꓶꓽ ꓐꓬꓽ ꓬꓲꓻ ꓔꓲ, ꓗꓪ ꓦꓲꓔꓮꓟꓲꓠ ꓚ꓾ ꓦꓲꓔꓮꓟꓲꓠ ꓐ6꓾ ꓲꓣꓳꓠ ꓢꓯꓼ ꓐꓴ ꓓꓯ,ˍ ꓟ ꓥ ꓢꓲ ꓠꓻ ꓤ ꓒꓬꓽ ꓤ ꓔꓯ ꓖꓼ ꓓꓳ ꓖꓶˍ ꓟ ꓢꓯꓼ ꓟꓴ ꓓꓯ ꓡ ꓝꓲˍ ꓡꓳ꓿
ꓬꓲ ꓢꓯꓼ ꓮ ꓟꓬ, ꓓꓯ,ˍ ꓟ
ꓟꓮꓖꓠꓰꓢꓴꓟ꓾ ꓑꓳꓔꓮꓢꓢꓲꓴꓟ ꓐꓰ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓓꓳꓑꓮꓟꓲꓠꓰ ꓐꓴ ꓓꓵˍ ꓟ ꓥ ꓡꓳ꓿
ꓛꓶꓽ ꓚꓵ.ˍ ꓟ ꓔꓯ ꓓꓻ ꓡꓰ ꓝꓲˍ ꓟ
ꓐꓬꓽ ꓬꓲꓻ ꓗꓪ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓖꓶˍ ꓟ ꓬꓲ ꓢꓯꓼ ꓐꓰ ꓡꓰ ꓐꓰ ꓠꓬꓲ ꓟꓵˍ ꓟ (ꓞꓰ,ˍ ꓟ) ꓔꓯ ꓓꓻ ꓡꓰ ꓝꓲˍ ꓟ ꓬꓲ ꓢꓯꓼ ꓙꓳˍ ꓡꓳ꓿
ꓐꓬꓽ ꓬꓲꓻ ꓔꓲ, ꓔ ꓟ ꓥ‐ꓟ‐ꓢꓶꓽ ꓔꓯ ꓮꓽ ꓟ ꓜꓽ ꓓꓻˍ ꓡ꓾ ꓐꓯˍ ꓠꓬ
ꓤ ꓠꓱ ꓤ ꓐꓴ꓾ ꓚꓵ. ꓬꓲꓻ ꓓꓳ ꓠ ꓢꓯꓼ ꓩꓴ ꓪ ꓢꓴ ꓐꓴ꓾ ꓔꓬ, ꓟꓽ ꓢꓻ ꓢꓲ ꓢꓯꓼ ꓤꓪꓽ ꓔꓬ ꓢꓴ ꓐꓴ꓾ ꓦꓰꓼ ꓟ ꓙꓲꓺ ꓫ. ꓢꓴ ꓐꓴ꓾ ꓞꓼ ꓐꓳ ꓐꓬꓽ ꓟꓽ ꓥ ꓟ ꓬꓲ ꓛꓵꓻ ꓔꓯ ꓜꓽ ꓠꓲ, ꓫꓵ ꓢꓴ ꓐꓴ꓾ ꓢꓯꓼ ꓟꓽ ꓙꓳ ꓟ ꓞꓳ ꓟꓳꓽ ꓐꓴ ꓥ ꓡꓳ꓿
ꓮꓽ ꓟ ꓠꓬ ꓜꓽ ꓟꓽ ꓓꓻ ꓡ꓾ ꓐꓯˍ ꓠꓬ
ꓢꓰ,‐ꓛꓬꓳ ꓠꓻ ꓙꓳ ꓢꓴ ꓐꓴ
ꓐꓬꓽ ꓬꓲꓻ ꓐꓰ ꓥ‐ꓟ‐ꓢꓶꓽ ꓐꓴ ꓗꓪ ꓞꓼ ꓛꓵꓻ ꓢꓯꓼ (ꓞꓼ ꓐꓳ ꓐꓬꓽ ꓢꓯꓼ) ꓮ ꓘꓶ. ꓮ ꓟꓬ, ꓓꓯ,ˍ ꓟ ꓑꓶ. ꓓꓴ ꓫꓵꓽ ꓘꓴꓽ ꓗꓪ ꓟ ꓞꓼ ꓐꓳ ꓐꓬꓽ ꓢꓯꓼ ꓔꓯ ꓞꓼ ꓞꓼ ꓟꓴ ꓓꓯꓻ ꓡ ꓝꓲˍ ꓟ ꓪꓴ. ꓠꓬꓲ ꓥ ꓡꓳ꓿
ꓦꓯ. ꓠꓲ, ꓫꓵ ꓢꓴ꓾ ꓚꓱ ꓠꓲ, ꓫꓵ ꓢꓴ ꓐꓴ ꓥ ꓟꓲ꓾ ꓚꓮꓡꓳꓣꓲꓰꓢ ꓢꓯꓼ ꓮ ꓟꓬ, ꓓꓵˍ ꓟ ꓐꓬꓽ ꓬꓲꓻ ꓐꓰ ꓥ‐ꓟ‐ꓢꓶꓽ ꓔꓲ, ꓔ ꓟ ꓜꓽ ꓟꓽ ꓓꓻ ꓟ ꓥ ꓡꓳ꓿
ꓐꓬꓽ ꓬꓲꓻ ꓐꓰ ꓟꓽ ꓕꓽ ꓢꓴ ꓐꓴ꓾ ꓐꓰ 1 ꓘꓳꓼ ꓠꓯ. ꓘꓪ ꓟ ꓤ ꓠꓱ ꓤ ꓐꓴ ꓥˍ ꓟꓲ ꓐꓬꓽ ꓬꓲꓻ ꓔꓲ, ꓔ ꓟ ꓥ‐ꓟ‐ꓢꓶꓽ ꓔꓯ ꓜꓽ ꓟꓽ ꓓꓻ꓾ ꓐꓰ ꓢꓷ. ꓪ ꓡꓳ꓿
ꓫꓵꓽ ꓓꓯꓻ ꓢꓲ ꓠꓯꓻ ꓞꓲꓼ ꓓꓳꓻ ꓔꓬ ꓪ ꓢꓴ ꓐꓴ
ꓥ‐ꓟ‐ꓢꓶꓽ ꓗꓪ ꓑꓳꓔꓮꓢꓢꓲꓴꓟ ꓢꓯꓼ ꓮ ꓟꓬ, ꓓꓯ,ˍ ꓟ ꓪꓴ. ꓠꓬꓲ ꓠꓯ. ꓞꓲꓼ ꓢꓯꓼ ꓔꓯ ꓪ ꓜꓲ ꓟꓬꓽ ꓡ ꓝꓲˍ ꓟ ꓑꓶ. ꓓꓴ ꓫꓵꓽ ꓟꓽ ꓓꓯꓻ ꓠꓯꓻ ꓞꓲꓼ ꓓꓳꓻ ꓔꓬ ꓪ ꓢꓴ ꓐꓴ ꓠꓬ ꓜꓽ ꓟꓽ ꓓꓻ ꓟ ꓥ ꓡꓳ꓿ ꓐꓬꓽ ꓬꓲꓻ ꓔꓲ, ꓔ ꓟ ꓥ‐ꓟ‐ꓢꓶꓽ ꓕꓲ ꓧꓪ, ꓔꓲ, ꓗꓷ ꓠꓬ 2 ꓠꓽ ꓗꓪ ꓛꓲˍ ꓡꓰ ꓜꓽ ꓓ,ˍ ꓟ ꓥ ꓡꓳ꓿ 2 ꓠꓽ ꓗꓳ. ꓙꓰˍ ꓠꓬ ꓡꓳ ꓩꓴ ꓠ ꓔ ꓟ ꓥ ꓡꓳ꓿ 2 ꓠꓽ ꓗꓳ. ꓙꓰ ꓗ ꓠꓯ. ꓬꓲ ꓐꓵꓼ ꓐꓵꓼ ꓡˍ ꓟ ꓑꓶ. ꓓꓴ ꓜꓽ ꓟꓽ ꓓꓻ ꓟ ꓥ ꓡꓳ꓿ ꓤ ꓟꓳ ꓢꓲ ꓜꓽ ꓓꓴ ꓬꓰ ꓡꓯ꓿
