ꓗ‐ꓔꓳ‐ꓡꓲꓗ ꓔꓲꓺ ꓒ ꓜꓴꓻ ꓥ ꓟ (ꓚꓳꓟꓰꓚꓰ) ꓜꓴꓻ ꓠꓬ ꓴꓗꓣꓮꓲꓠꓰ ꓗꓴꓷꓼ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓜꓲꓼ ꓢꓲ ꓠꓬꓲ ꓢꓯꓼ ꓖꓶ ꓡꓰ ꓟ ꓓꓳꓽ
7 ꓦ ꓟ 20 ꓠꓬꓲ 2025 ꓘꓳꓼ ꓕꓯ ꓗ‐ꓔꓳ‐ꓡꓲꓗ ꓔꓲꓺ ꓒ ꓜꓴꓻ ꓥ ꓟꓲ (ꓚꓳꓟꓰꓚꓰ) ꓜꓴꓻ ꓠꓬ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓴꓗꓣꓮꓲꓠꓰ ꓗꓴꓷꓼ ꓗꓪ ꓙꓰ ꓢꓲ ꓠꓬꓲ ꓙꓲ ꓢꓴ ꓢꓲꓺ ꓤ ꓐꓴ ꓔꓯ ꓜꓲꓼ ꓢꓲ ꓠꓬꓲ ꓢꓯꓼ ꓖꓶ ꓪ ꓠ, ꓟ ꓖꓶ ꓙꓰ ꓗꓷ ꓟ ꓥ ꓡꓳ꓿ ꓔꓲꓺ ꓒ ꓐꓴ ꓜꓴꓻ ꓠꓬ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓴꓗꓣꓮꓲꓠꓰ ꓗꓴꓷꓼ ꓮ ꓡꓰ ꓐꓬ ꓡꓰ ꓟ ꓔꓯ ꓐꓰ ꓮ ꓫꓵꓽ ꓔꓳ, ꓜꓳ ꓔꓬ ꓟ ꓔꓯ ꓡꓳ. ꓟꓳ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓓꓽ ꓠꓬ ꓣ‐ꓫ ꓗꓴꓷꓼ ꓡꓰ ꓴꓗꓣꓮꓲꓠꓰ ꓗꓴꓷꓼ ꓔꓯ ꓟꓯꓼ ꓢꓰꓼ ꓡ ꓟ ꓪꓴ. ꓠꓬꓲ ꓝꓴꓲ. ꓟꓽ ꓙꓳ ꓟ ꓑ ꓫꓬ ꓐꓴ ꓫꓵꓻ ꓡꓰ ꓟ ꓐꓰ ꓮ ꓘꓶ. ꓛꓲ ꓟꓽ ꓙꓲ ꓟ ꓟꓬꓱꓽ ꓔꓯ ꓬꓰ ꓗꓷ ꓟ ꓔꓯ ꓬꓲ ꓟꓬ ꓢꓶꓽ ꓗꓪ ꓐꓰ ꓡꓳ. ꓟꓳ ꓡꓰ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
(ꓚꓳꓟꓰꓚꓰ) ꓔꓲꓺ ꓒ ꓜꓴꓻ ꓠꓬ ꓴꓗꓣꓮꓲꓠꓰ ꓗꓴꓷꓼ ꓘꓴꓽ ꓗꓪ ꓔꓬ ꓢꓲ ꓠꓬꓲ ꓬꓰ ꓙ ꓔꓳ, ꓙ ꓢꓴ ꓐꓴ ꓜꓴꓻ ꓔꓯ ꓥ ꓟꓲ ꓜꓲ ꓡꓯꓽ ꓘꓳ ꓗꓷꓳ꓿ ꓝꓮꓲ ꓟꓯꓼ ꓒꓽ ꓐꓴ ꓫꓵꓻ ꓡꓰ ꓟ ꓔꓯ ꓪꓽ ꓘꓴ ꓙ ꓟ ꓪꓽ ꓘꓴ ꓙꓵ, ꓗꓪ ꓥ ꓟꓲ ꓐ ꓗꓷ ꓢꓲ ꓠꓬꓲ ꓙꓲ ꓢꓴ ꓢꓲꓺ ꓤ ꓐꓴ ꓮ ꓫꓵꓽ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓟ ꓔꓯ ꓡꓳ. ꓟꓳ ꓪ ꓡꓰ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓜꓴꓻ ꓠꓬ ꓮ ꓫꓵꓽ ꓑꓶ. ꓓꓴ ꓴꓗꓣꓲꓠꓰ ꓗꓴꓷꓼ ꓗꓪ ꓡ ꓗꓷ ꓥ ꓐꓯ ꓠꓬ ꓟꓯꓼ ꓟꓽ ꓢꓰꓼ ꓡꓯꓽ ꓘꓳ ꓟ ꓙꓵ, ꓕꓯ (ꓚꓳꓟꓰꓚꓰ) ꓔꓲꓺ ꓒ ꓜꓴꓻ ꓠꓬ ꓴꓗꓣꓮꓲꓠꓰ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓒꓽ ꓕꓲ ꓗꓪ ꓔꓬ ꓗꓷ ꓢꓴ ꓐꓴ ꓥ ꓡꓳ꓿ ꓝꓮꓲ ꓣ‐ꓫ ꓗꓴꓷꓼ ꓡꓰ ꓟꓯꓼ ꓢꓰꓼ ꓡ ꓟ ꓔꓯ ꓔꓳ, ꓢꓴ ꓐꓴ ꓥ ꓡꓳ꓿ ꓔꓱ ꓚꓵˍ ꓟ ꓐꓰ ꓢꓲ ꓡꓲ, ꓟ ꓔꓯ ꓠꓵꓻ ꓠꓲ, ꓢꓴ ꓐꓴ ꓥ ꓡꓳ꓿ ꓝꓮꓲ ꓴꓗꓣꓮꓲꓠꓰ ꓗꓴꓷꓼ ꓘꓴꓽ ꓗꓪ ꓙꓳ ꓟ ꓪꓽ ꓘꓴ ꓦꓲꓻ ꓐꓴ ꓮ ꓡꓰ ꓐꓰ ꓒꓬꓱꓼ ꓔꓬ ꓟ ꓔꓯ ꓡꓳ. ꓟꓳ ꓗꓷꓳ꓿
ꓝꓮꓲ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓟꓽ ꓙꓲ ꓟ ꓬꓰ ꓔꓬ ꓟ ꓔꓯ ꓠꓽ ꓗꓷ ꓠ, ꓟ ꓐꓰ ꓢꓲ ꓡꓲ, ꓟꓶ ꓠ, ꓟ ꓟꓬꓱꓽ ꓔꓯ ꓬꓰ ꓠ, ꓟ ꓠꓲ, ꓠꓵ ꓟ ꓥ ꓡꓳ꓿ ꓴꓗꓣꓮꓲꓠꓰ ꓗꓴꓷꓼ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓢꓲ ꓡꓲ, ꓟꓶ ꓠ, ꓟ ꓟꓬꓱꓽ ꓔꓯ ꓮ ꓡꓰ ꓬꓰ ꓔꓬ ꓡ ꓐꓰ ꓐꓯ ꓠꓬ ꓴꓗꓣꓮꓲꓠꓰ ꓗꓴꓷꓼ ꓘꓴꓽ ꓗꓪ ꓪꓽ ꓘꓴ ꓦꓲꓻ ꓮ ꓟꓬ, ꓗꓪ ꓫ. ꓢꓴ ꓟꓷꓼ ꓢꓴ ꓐꓴ ꓔꓬ ꓔꓶ. ꓐꓰ ꓟꓶ ꓙ ꓗꓪ ꓐꓰ ꓡ ꓡ ꓟ ꓟꓯꓼ ꓒꓽ ꓐꓴ ꓐꓱ ꓶ ꓔꓬ ꓔꓶ. ꓮ ꓟꓬ, ꓫꓬ, ꓔ ꓢꓲ ꓠꓬꓲ ꓣꓱ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓬ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓝꓮꓲ ꓢꓲ ꓡꓲ, ꓟꓶ ꓠ, ꓟ ꓟꓬꓱꓽ ꓔꓯ ꓮ ꓕꓯ ꓥ ꓟꓲ ꓟꓬꓱꓽ ꓬꓰ ꓔꓬ ꓟ ꓥ ꓡꓳ ꓐꓰ (Vatican ) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
