ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓖ‐ꓜ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓔꓯ ꓠꓽ ꓗꓷ ꓠ, ꓟ ꓓꓰꓽ ꓟ ꓓꓳꓽ

7 ꓦ ꓟ 20 ꓠꓬꓲ 2025 ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓡꓰꓳ (14) ꓠꓬ ꓬꓯ‐ꓢꓲ‐ꓡꓲ ꓟꓯꓼ ꓐꓴ ꓡꓰ ꓖ‐ꓜ ꓟꓵꓽ ꓗꓪ ꓙꓳˍ ꓟ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲꓻ (Holy Family) ꓪꓽ ꓘꓴ ꓐꓬ ꓡꓰ ꓝꓲˍ ꓟ ꓪꓴ. ꓠꓬꓲ ꓝꓴꓲ ꓟꓽ ꓙꓳ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓫꓵꓻ ꓡꓰ ꓝꓲ ꓟ ꓔꓯ ꓮ ꓘꓶ. ꓛꓲ ꓠꓲ, ꓟ ꓟꓽ ꓢ ꓔꓬ ꓟ ꓔꓯ ꓫ. ꓕꓱ ꓗꓷꓳ꓿

ꓔꓲꓺ ꓒ ꓪ ꓔꓲ ꓡꓰ ꓠꓽ ꓡꓲ. ꓠꓬꓲ ꓕꓯ ꓖ‐ꓜ ꓟꓵꓽ ꓗꓪ ꓬꓯ‐ꓢꓲ‐ꓡꓲ ꓟꓯꓼ ꓐꓴ ꓡꓰ ꓢꓰꓼ ꓡ ꓟ ꓪꓴ. ꓠꓬꓲ ꓪꓽ ꓘꓴ ꓦꓲꓻ ꓗꓪ ꓔꓬ ꓟ ꓝꓴꓲ ꓟꓽ ꓙꓳ ꓟ ꓙꓲ‐ꓢꓴ ꓢꓲꓺ ꓤ (600) ꓣꓳ ꓘꓴꓽ ꓗꓪ ꓐꓰ ꓢꓽ ꓣꓳ ꓫꓵꓻ ꓡꓰ ꓢꓲ ꓠꓬꓲ ꓔꓲꓺ ꓒ ꓕꓲ ꓣꓳ ꓥ ꓟꓲ ꓠꓻ ꓓꓴ ꓡꓰ ꓟ ꓥ ꓡꓳ꓿

ꓮ ꓟꓶ ꓟ ꓙꓵ, ꓗꓪ ꓖ‐ꓜ ꓟꓵꓽ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓪꓽ ꓘꓴ ꓦꓲꓻ ꓮ ꓟꓬ, ꓔꓯ ꓬꓯ‐ꓢꓲ‐ꓡꓲ ꓟꓯꓼ ꓐꓴ ꓡꓰ ꓐꓳ ꓗꓪ ꓐꓰ ꓐꓬ ꓡꓰ ꓟ ꓔꓯ ꓡꓳ. ꓟꓳ ꓟ ꓪꓴ. ꓠꓬꓲ ꓠꓲ, ꓟ ꓫ. ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓗꓷ ꓟ ꓥ ꓡꓳ꓿

ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓟꓽ ꓙꓲ ꓟ ꓟꓬꓱꓽ ꓡ ꓞꓳ ꓢꓰꓼ ꓟ ꓟꓬꓱꓽ ꓔꓯ ꓞꓼ ꓞꓼ ꓠꓽ ꓗꓷ ꓢꓲ ꓠꓬꓲ ꓢꓲ ꓡꓲ, ꓟꓶ ꓠ, ꓟ ꓟꓬꓱꓽ ꓔꓯ ꓬꓰ ꓠ, ꓟ ꓐꓱ ꓶ ꓓꓰꓽ ꓔ ꓡꓳ꓿

ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓔꓯ ꓬꓲ ꓜꓴꓻ ꓬꓲ ꓜꓴꓻ ꓢꓰꓼ ꓟ ꓐꓰ ꓑ ꓫꓬ ꓐꓴ ꓔꓯ ꓠꓱ. ꓐꓯꓼ ꓟꓵꓽ ꓗꓪ ꓔꓬ ꓡꓰ ꓝꓲ. ꓟ ꓐꓰ ꓫ. ꓢꓴ ꓟꓷꓼ ꓢꓴ ꓔꓯ ꓬꓰ ꓙ ꓢꓴ ꓜꓴꓻ ꓔꓯ ꓗꓽ_ ꓟ ꓔꓯ ꓕꓽ ꓬꓰ ꓠ, ꓟ ꓐꓯ ꓔ ꓟ ꓥ ꓡꓳ꓿

ꓝꓮꓲ ꓔꓲꓺ ꓒ ꓪ ꓔꓲ ꓡꓰꓳ ꓐꓰ ꓬꓯ‐ꓢꓲ‐ꓡꓲ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓓꓽ (Netayahu) ꓐꓰ ꓫ. ꓕꓱ ꓡꓯꓽ ꓘꓳ, ꓢꓲ ꓠꓬꓲ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓔꓯ ꓠꓽ ꓗꓷ ꓠ, ꓟ ꓐꓰ ꓝꓴꓲ ꓟꓽ ꓙꓳ ꓢꓴ ꓑ ꓫꓬ ꓐꓴ ꓐꓰ ꓪꓽ ꓘꓴ ꓦꓲꓻ ꓔꓯ ꓗꓽ ꓕꓽ ꓖꓶ ꓠ, ꓟ ꓫ. ꓕꓱ ꓗꓷ ꓐꓰ (Vatican news) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿