ꓪꓽ ꓡꓽ ꓠꓬ ꓔꓶ ꓜꓽ ꓔꓶ ꓓꓳ ꓚꓱ, ꓗꓪ ꓙꓲ ꓖꓴ ꓙꓳˍ ꓟ ꓚꓱ, (Environment program)
ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓪꓽ ꓡꓽ ꓠꓬ ꓔꓶ ꓜꓽ ꓔꓶ ꓓꓳ ꓚꓱ, ꓗꓪ ꓙꓲ ꓖꓴ ꓙꓳ ꓟ ꓚꓱ, ꓔꓯ ꓠꓬꓲ. ꓠꓬꓲ ꓣꓦꓮ ꓡꓲ‐ꓢꓴ ꓢꓯꓼ ꓔꓯ ꓠ ꓠ, ꓢꓴ ꓐꓴ ꓐꓱ ꓶ ꓐꓯ ꓟ. ꓖꓶ ꓓꓴ ꓥ ꓡꓳ꓿ ꓕꓱ ꓟ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓐꓰ (food agriculture) ꓜꓴꓻ ꓡꓰ ꓧꓪ ꓔ ꓟ ꓚꓱ, ꓥ ꓡꓳ꓿
ꓬꓲ ꓪ ꓡꓰ ꓪꓽ ꓡꓽ ꓠꓬ ꓢꓽ ꓘꓪ ꓗꓪ ꓓꓳ ꓡ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓔꓶ. ꓔ ꓟ ꓜꓽ ꓟꓲ ꓓꓲ ꓟꓲ ꓗꓪ ꓙꓰ ꓢꓲ ꓠꓬꓲ ꓮ ꓘꓶ. ꓛꓲ ꓙꓲ ꓖꓴ ꓙꓳ ꓟ ꓚꓱ, ꓔꓯ ꓖꓶ ꓟ ꓔꓯ ꓡꓳ. ꓟꓳ ꓟ ꓥ ꓡꓳ꓿ ꓪꓽ ꓡꓽ ꓮ ꓟꓬ, ꓔꓬ ꓟ ꓔꓶ. ꓗꓪ ꓜꓽ ꓔꓶ ꓕꓯ ꓜꓽ ꓢꓲ ꓮ ꓟꓬ, ꓙꓲ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿
ꓪꓽ ꓡꓽ ꓐꓴ ꓠꓬ ꓜꓽ ꓜꓲ ꓗꓪ ꓔꓬ ꓟ ꓑꓶ. ꓓꓲ ꓡꓯ ꓓꓲ ꓐꓴ ꓔꓯ ꓜ ꓗꓷ ꓟ ꓡꓰ ꓟꓽ ꓞꓲ ꓬꓲ ꓪ ꓗꓪ ꓐꓰ ꓓꓳ ꓡ ꓟ ꓬꓲ ꓒꓴꓽ ꓠꓬ ꓜꓽ ꓜꓲ ꓔꓯ ꓫꓵꓻ ꓡꓰ ꓝꓲ ꓟ ꓑꓶ ꓓꓲ ꓡꓯ, ꓓꓲ ꓔꓯ ꓫꓵꓻ ꓡꓰ ꓝꓲ ꓟ ꓪꓴ. ꓠꓬꓲ ꓜ ꓟꓲ (ꓓꓲ ꓟꓲ) ꓠꓬ ꓮ ꓘꓶ. ꓛꓲ ꓙꓲ ꓡ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓪ ꓜꓴꓻ ꓕꓲ ꓐꓱ ꓠꓬ ꓪꓽ ꓡꓽ ꓔꓯ ꓜ ꓔꓶ. ꓟ ꓔꓶ. ꓗꓪ ꓦꓲꓻ ꓫꓬ, ꓖꓶ ꓢꓲ ꓠꓬꓲ ꓔꓬ ꓝꓲ ꓢꓲ ꓠꓬꓲ ꓜ ꓙꓲ ꓠ, ꓟ ꓢꓯꓼ ꓕꓵꓼ ꓗꓷꓳ꓿ ꓪꓽ ꓡꓽ ꓠꓬ ꓮ ꓟꓶ ꓡꓳ ꓒꓱ ꓓꓽ ꓗꓪ ꓮ ꓟꓬ, ꓟꓽ ꓔꓬ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓡꓳ ꓒꓱ ꓗꓪ ꓮ. ꓔꓳ ꓠꓬ ꓟꓳꓼ ꓡꓳ ꓢ ꓘꓪ ꓮ ꓕꓯ ꓥ ꓟꓲ ꓮ. ꓔꓳ ꓡꓯ ꓔꓬ ꓟ ꓪꓴ. ꓠꓬꓲ ꓪꓽ ꓡꓽ ꓐꓴ ꓐꓱ ꓶ ꓮ ꓘꓶ. ꓔꓬ ꓫ. ꓟ ꓪꓴ. ꓠꓬꓲ ꓡꓳ ꓒꓱ ꓗꓪ ꓟꓽ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓡꓲ‐ꓢꓴ ꓫꓵꓻ ꓐꓴꓽꓳ ꓪꓽ ꓡꓽ ꓔꓯ ꓡꓳ. ꓟꓳ ꓕꓯ ꓕꓽ ꓢꓰꓼ ꓠ, ꓟ ꓐꓱ ꓶ ꓣꓳ ꓚꓵˍ ꓟ ꓥ ꓡꓳ꓿ ꓬꓲ ꓪ ꓠꓬ ꓜꓽ ꓜꓲ ꓔꓯ ꓮ ꓘꓶ. ꓛꓲ ꓙꓲ ꓡꓰ ꓝꓲ ꓟ ꓣꓳ ꓔꓯ ꓟꓲ ꓠꓯ ꓡ ꓞꓳ ꓔꓯ ꓬꓰ ꓙ ꓢꓴ ꓐꓴ ꓥ ꓡꓳ꓿ ꓫ. ꓟꓳ ꓪ꓿
