ꓣꓳ ꓗꓳ ꓡꓳ ꓗꓪ ꓙꓳˍ ꓟ ꓮ ꓙꓵꓽ ꓠꓬ ꓕꓲ ꓖ ꓟꓽ ꓥ ꓕꓲ ꓖ ꓗꓪ ꓙꓲꓻ ꓖꓴ ꓖꓶ ꓔꓬ ꓟ ꓥ ꓡꓳ꓿ ꓪꓳꓽ ꓐꓱ ꓟꓲ ꓗꓪ ꓙꓳˍ ꓟ ꓟꓳꓼ ꓤ ꓫꓵ. ꓤ ꓐꓴ ꓥˍ ꓟꓲ ꓣꓳ ꓖꓳ ꓓꓱꓽ ꓠꓯꓻ ꓞꓲꓼ ꓒꓬꓱꓼˍ ꓟ ꓔꓯ ꓥ ꓟꓲ ꓣꓳ ꓑ ꓙꓽ ꓠꓬꓲˍ ꓡꓳ ꓟꓽ ꓥ ꓡ꓿ ꓖꓳ ꓡꓱ ꓥ ꓠꓬ ꓣꓳ ꓬꓲ ꓢꓶꓽ ꓡꓰꓽ ꓜꓽ ꓔꓬ ꓟ ꓟ‐ꓡꓰ‐ꓗ ꓢꓶꓽ ꓬꓲ ꓒꓬꓽ ꓥ ꓟꓲ ꓙꓲꓻ ꓖꓴ ꓮ ꓟꓬ, ꓙꓳˍ ꓡꓳ ꓐꓯ ꓟ ꓔꓯ ꓠꓬ ꓢꓷ. ꓢꓴ ꓙꓳˍ ꓟ ꓡꓰ ꓐꓰ꓾ ꓟꓽ ꓢꓷ. ꓡꓰ ꓢꓴ ꓐꓴˍ ꓟꓲ ꓙꓳˍ ꓥꓳ꓿ ꓖꓳ ꓡꓱ ꓐꓯ ꓕꓯ ꓟ‐ꓡꓰ‐ꓗ ꓒꓬꓽ ꓔꓯ ꓜꓽ ꓓꓻˍ ꓡ꓾ ꓐꓯ ꓟ ꓔꓯ ꓐꓯ ꓖꓶ ꓠꓲ, ꓫꓵˍ ꓡꓳ꓿
ꓟ‐ꓡꓰ‐ꓗ ꓒꓬꓽ ꓐꓯˍ ꓟ ꓠꓬ ꓣꓳ ꓮ ꓕꓯ ꓟꓲ ꓟꓽ ꓜꓽ ꓔꓬ ꓟ ꓬꓲ ꓒꓬꓽ ꓕꓲ ꓙꓰꓽ ꓥ꓿ ꓕꓲ ꓖ ꓕꓲ ꓧꓪ, ꓬꓲ ꓒꓬꓽ ꓡꓯ.ˍ ꓟ ꓔꓯ ꓠꓯꓻ ꓞꓲꓼ ꓐꓱ ꓶ ꓜꓽˍ ꓟ ꓟꓲ ꓙꓳˍ ꓡꓳ꓿
ꓥꓪ ꓞꓲꓼ ꓣꓳˍ ꓟ ꓦꓬꓼ ꓠꓬꓲ ꓗꓪ꓾ ꓦꓰꓽ ꓛꓲ ꓮ ꓘꓶ. ꓧꓳ,ˍ ꓕꓯ ꓥꓪ ꓮꓽ ꓐ ꓮ ꓟ ꓠꓬ ꓟ‐ꓡꓰ‐ꓗ ꓒꓬꓽ ꓬꓲ ꓪꓴꓽ ꓬꓲꓻ ꓛꓵ, ꓗꓷ ꓢꓲ ꓐꓬꓽ ꓬꓲꓻ ꓐꓰ ꓑꓯ. ꓗꓷ ꓢꓲ ꓠꓬꓲ꓾ ꓦꓰꓽ ꓛꓲ ꓧꓳ,ˍ ꓟ ꓓꓻ ꓡꓰ ꓠ, ꓟ ꓐꓱ ꓶ ꓖꓶ ꓓꓳꓻ ꓡˍ ꓟ ꓔꓯ ꓚꓲ. ꓟꓶˍ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓗꓪ ꓠꓬ ꓟ‐ꓡꓰ‐ꓗ ꓒꓬꓽ ꓙꓲꓻ ꓖꓴ ꓙꓳˍ ꓟ ꓚꓱ, ꓐꓴ ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
- ꓢꓰ,‐ꓛꓬꓳ ꓐꓱ ꓶ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓡꓳ꓾
ꓙ‐ꓑꓯ ꓗꓴꓷꓼ ꓗꓪ ꓐꓰ ꓠꓯꓻ ꓞꓲꓼ ꓔꓯ ꓟꓳ. ꓧꓪ ꓟꓰ, ꓠꓬꓲ ꓢꓴ ꓐꓴ ꓡꓰ ꓧꓪ ꓟꓶ ꓔ ꓟ ꓗꓪ꓾ ꓟ‐ꓡꓰ‐ꓗ ꓒꓬꓽ ꓠꓬ alpha-glucosidase enzyme ꓟꓬꓱꓽ ꓬꓰˍ ꓟ ꓔꓯ ꓠꓲ. ꓡꓰ ꓝꓲˍ ꓟ ꓑꓶ. ꓓꓴ ꓫꓵꓽ ꓘꓴꓽ ꓗꓪ ꓟ ꓬꓲ ꓛꓵꓻ ꓢꓯꓼ ꓔꓯ ꓞꓰꓻ ꓡꓰ ꓝꓲˍ ꓟ ꓥ ꓡꓳ꓿ ꓖꓳ ꓓꓱꓽ ꓗꓪ ꓐꓰ ꓞꓼ ꓛꓵꓻ ꓢꓯꓼ (ꓞꓼ ꓐꓳ ꓐꓬꓽ ꓢꓯꓼ) ꓔꓯ ꓛꓵꓼ ꓣꓴ ꓚꓵ, ꓣꓴˍ ꓟ ꓗꓪ ꓐꓰ ꓗꓽ ꓕ. ꓙ ꓖꓶˍ ꓡꓳ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ‐ꓡꓰ‐ꓗ ꓒꓬꓽ ꓔꓯ ꓚꓬ. ꓗꓷ ꓢꓲ ꓕꓲ ꓠꓬꓲ ꓠꓬꓲꓽ ꓧꓪ, ꓓꓳꓻ ꓖꓶˍ ꓠꓬ꓾ 2 ꓠꓽ ꓛꓲ ꓙꓳ ꓡˍ ꓕꓯ ꓫꓵꓽ ꓘꓴꓽ ꓗꓪ ꓟ ꓬꓲ ꓛꓵꓻ ꓢꓯꓼ ꓞꓰꓻ ꓡꓰ ꓬꓯꓼ ꓡꓰˍ ꓟ ꓔꓯ ꓟꓳꓻ ꓪˍ ꓥꓳ꓾ ꓐꓰ ꓐꓯ ꓔ ꓡꓳ꓿
- ꓗꓳ‐ꓡꓯ.‐ꓢ‐ꓕ‐ꓣꓮꓪ ꓞꓰꓻ ꓡꓰ ꓝꓲˍ ꓟ
ꓟ‐ꓡꓰ‐ꓗ ꓒꓬꓽ ꓚꓬ. ꓔ ꓟ ꓬꓲ ꓬꓲꓻ ꓔꓯ ꓕꓲ ꓠꓬꓲ ꓠꓬꓲꓽ ꓧꓪ, ꓓꓳꓻ ꓖꓶˍ ꓠꓬ꓾ ꓦ ꓐ 3 ꓟ ꓙꓳ ꓡˍ ꓕꓯ ꓫꓵꓽ ꓘꓴꓽ ꓗꓪ ꓟꓽ ꓙꓲꓻ ꓟ ꓗꓳ‐ꓡꓯ.‐ꓢ‐ꓕ‐ꓣꓮꓪ(Cholesterol) ꓐꓴ ꓔꓯ ꓞꓰꓻ ꓡꓰ ꓠꓲ. ꓡꓰ ꓝꓲˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓫꓵꓽ ꓒꓬ. ꓔꓯ ꓥˍ ꓟꓲ ꓢꓯꓼ ꓡꓴꓽ ꓖꓶˍ ꓡꓳ꓾ ꓐꓰ ꓢꓷ. ꓪ ꓡꓳ꓿
- ꓢꓶꓽ ꓛꓲ ꓠꓻˍ ꓟ ꓐꓰ ꓡꓰ‐ꓐꓰ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓾
ꓟ‐ꓡꓰ‐ꓗ ꓒꓬꓽ ꓠꓬ ꓐꓶꓽ ꓓꓲꓻ ꓢꓰꓼ ꓢꓯꓼ ꓙꓳˍ ꓟ ꓑꓶ. ꓓꓴ ꓢꓶꓽ ꓛꓲ ꓘꓳꓼ ꓠꓻˍ ꓟ ꓔꓯ ꓓꓻ ꓡꓰ ꓝꓲ ꓢꓲ꓾ ꓟ‐ꓡꓰ‐ꓗ ꓒꓬꓽ ꓚꓬ. ꓔ ꓟ ꓪꓴꓽ ꓬꓲꓻ ꓐꓰ ꓟꓷꓽ ꓠꓷ, ꓡꓯ, ꓖꓶˍ ꓠꓬ ꓡꓰ‐ꓐꓰ ꓐꓰ ꓠꓰꓼ ꓠꓰ ꓠꓻ (ꓢꓶꓽ ꓛꓲ ꓤꓶꓼ ꓦꓲꓻ) ꓠꓻ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ꓿ ꓖꓳ ꓟ ꓪꓴ. ꓠꓬꓲ ꓟ‐ꓡꓰ‐ꓗ ꓒꓬꓽ ꓔꓯ ꓢꓶꓽ ꓛꓲ ꓞꓲꓽ ꓠꓯ ꓞꓲꓼ ꓗꓪ ꓧꓳꓽˍ ꓟ ꓥ ꓡꓳ꓿
ꓟꓷꓽ ꓠꓷ, ꓡꓯ, ꓓꓴ ꓐꓱ ꓶ ꓠꓬ ꓟ‐ꓡꓰ‐ꓗ ꓒꓬꓽ ꓬꓲ ꓟꓳꓽ 10ꓽ ꓒꓬ ꓔꓯ ꓧꓼ ꓗꓷ ꓢꓲ꓾ ꓬꓲꓻ ꓙꓬ ꓐꓰ ꓫꓬꓻ ꓫꓬꓻ ꓡꓰꓽ ꓞꓲꓽ ꓗꓷ ꓢꓲ ꓠꓬꓲ ꓚꓬ. ꓗꓷ꓿ ꓚꓬ. ꓓꓳ ꓡꓰˍ ꓕꓯ ꓬꓲ ꓪꓴꓽ ꓬꓲꓻ ꓔꓯ ꓡꓬꓽ ꓡꓰ ꓗꓪ ꓛꓲ ꓗꓷ ꓔ ꓢꓲ ꓟꓷꓽ ꓠꓷ, ꓡꓯ, ꓖꓶ ꓐ ꓡˍ ꓡꓳ꓿
- ꓤꓲꓽ ꓒꓴꓽ ꓚꓮꓠꓚꓰꓣ ꓐꓱ ꓶ ꓙꓲꓻˍ ꓟ
ꓤꓲꓽ ꓒꓴꓽ ꓳʼˍ ꓟ ꓐꓰ ꓤꓲꓽ ꓒꓴꓽ ꓚꓮꓠꓚꓰꓣ ꓠꓻ ꓙꓳ ꓢꓴ ꓐꓴ ꓥˍ ꓟꓲ ꓟ‐ꓡꓰ‐ꓗ ꓒꓬꓽ ꓚꓬ. ꓪꓴꓽ ꓬꓲꓻ ꓔꓯ ꓓꓳꓻ ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓕꓱ ꓟ ꓠꓬ ꓟ‐ꓡꓰ‐ꓗ ꓒꓬꓽ ꓗꓪ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬ, ꓓꓯ,ˍ ꓟ ꓑꓶ. ꓓꓴ ꓚꓰꓡꓡ ꓐꓴ ꓔꓯ ꓐꓬ ꓡꓰ ꓝꓲˍ ꓟ ꓟꓽ ꓥ ꓥ꓾ ꓚꓮꓠꓚꓰꓣ ꓚꓰꓡꓡ ꓪꓴꓽ ꓡ ꓖꓪ ꓡˍ ꓟ ꓟꓽ ꓒꓬꓱꓼ ꓡ ꓠ ꓗꓽ ꓙ ꓖꓶˍ ꓟ ꓡꓰꓽ ꓟꓽ ꓞꓲꓺ꓾ ꓠꓱ. ꓐꓯ ꓚꓮꓠꓚꓰꓣ ꓠꓻ ꓒꓬꓱꓼ ꓡ ꓚꓱ, ꓔꓯ ꓥ ꓟꓲ ꓠꓲ. ꓡꓰ ꓝꓲˍ ꓟ ꓥ ꓡꓳ꓿
- ꓬꓲ ꓑꓻ ꓐꓰ ꓐꓶꓽ ꓓꓲꓻ ꓓꓵꓽ ꓡꓰˍ ꓟ ꓐꓱ ꓶ ꓥˍ ꓟꓲ ꓙꓲꓻˍ ꓟ
ꓬꓲ ꓑꓻ ꓓꓻ ꓡꓰ ꓢꓻ ꓝꓲˍ ꓟ ꓬꓲ ꓢꓯꓼ ꓙꓳˍ ꓟ ꓪꓴ. ꓠꓬꓲ ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓠꓬ ꓟ‐ꓡꓰ‐ꓗ ꓒꓬꓽ ꓚꓬ. ꓪꓴꓽ ꓬꓲꓻ ꓔꓯ ꓓꓳꓻ ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ ꓐꓶꓽ ꓓꓲꓻ ꓢꓰꓼˍ ꓟ ꓬꓲ ꓢꓯꓼ ꓙꓳˍ ꓟ ꓑꓶ. ꓓꓴ ꓐꓮꓚꓔꓰꓣꓲꓮ ꓐꓶꓽ ꓓꓲꓻ ꓓꓵꓽ ꓡˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ꓿ ꓠ. ꓑꓳ ꓗꓪ ꓠ. ꓛꓵꓽ ꓛꓵꓽ ꓢꓴ꓾ ꓠ. ꓑꓳ ꓗꓪ ꓐꓰ ꓘꓶꓻ ꓓꓲꓻ ꓢꓴ ꓐꓴ ꓥˍ ꓟꓲ ꓟ‐ꓡꓰ‐ꓗ ꓒꓬꓽ ꓚꓬ. ꓪꓴꓽ ꓬꓲꓻ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓓꓳꓻ ꓖꓶ ꓐ ꓡˍ ꓡꓳ꓿ ꓬꓲ ꓒꓬꓽ ꓬꓲ ꓜꓲꓽ ꓔꓯ ꓠꓵˍ ꓗꓷ ꓚꓴ, ꓧꓶꓽ ꓗꓷ ꓢꓲ ꓬꓲ ꓑ ꓗꓪ ꓟꓰ ꓖꓶˍ ꓟ ꓟꓲ ꓬꓰ ꓐ ꓡˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
- ꓦꓰꓼ ꓟ ꓙꓲ ꓢꓻ ꓝꓲˍ ꓟ
ꓟ‐ꓡꓰ‐ꓗ ꓬꓲ ꓒꓬꓽ ꓚꓬ. ꓪꓴꓽ ꓬꓲꓻ ꓠꓬ ꓜꓽ ꓓꓴ ꓙꓲˍ ꓟ ꓰꓠꓜꓬꓟꓰ ꓐꓴ ꓔꓯ ꓢꓯꓼ ꓙꓳ ꓡ ꓝꓲ ꓢꓲ ꓦꓰꓼ ꓟ ꓙꓲꓺ ꓢꓻ ꓡꓰ ꓝꓲˍ ꓡꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓐꓶꓽ ꓓꓲꓻ ꓢꓰꓼ ꓢꓯꓼ ꓙꓳˍ ꓟ ꓪꓴ. ꓠꓬꓲ ꓬꓲ ꓪꓴꓻ ꓚꓱ, ꓗꓪ ꓙꓳˍ ꓟ ꓐꓶꓽ ꓓꓲꓻ ꓐꓴ ꓔꓯ ꓫꓵꓻ ꓝꓲ ꓢꓲ ꓦꓰꓼ ꓟ ꓳʼˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿ ꓦꓰꓼ ꓟ ꓠꓻˍ ꓟ ꓓꓻ ꓡꓰ ꓠ, ꓟ ꓐꓱ ꓶ ꓬꓲꓻ ꓙꓬ 1 ꓡꓲ‐ꓔ ꓐꓶꓽ ꓗꓪ ꓟ‐ꓡꓰ‐ꓗ ꓒꓬꓽ 8 ꓒꓬꓽ ꓔꓯ ꓚꓬ. ꓗꓷ ꓢꓲ꓾ ꓕꓲ ꓠꓬꓲ ꓗꓪ 3 ꓧꓪ, ꓓꓳꓻ ꓖꓶ ꓐ ꓡˍ ꓡꓳ꓾ ꓐꓰ ꓢꓷ. ꓪ ꓡꓳ꓿
- ꓞꓲꓼ ꓟꓽ ꓟꓳꓽ ꓡ ꓕꓯ ꓡꓰ ꓒꓬꓱꓽ ꓟꓳꓻ ꓡˍ ꓟ ꓔꓯ ꓗꓽ ꓕ. ꓙ ꓖꓶˍ ꓟ
ꓟ‐ꓡꓰ‐ꓗ ꓒꓬꓽ ꓗꓪ ꓮꓠꓔꓲꓳꓫꓲꓓꓮꓠꓔ ꓢꓯꓼ ꓙꓳˍ ꓟ ꓪꓴ. ꓠꓬꓲ ꓧꓪꓽ ꓗꓴ, ꓙꓲ ꓔꓯ ꓐꓬ ꓡꓰ ꓝꓲˍ ꓟ ꓚꓳꓟꓑꓳꓴꓠꓓꓢ ꓐꓴ ꓗꓪ ꓐꓰ ꓗꓽ ꓙ ꓖꓶˍ ꓡꓳ꓿ ꓧꓪꓽ ꓖꓳ ꓓꓱꓽ ꓚꓰꓡꓡꓢ ꓐꓴ ꓟꓳꓽ ꓡˍ ꓟ ꓔꓯ ꓗꓽ ꓙ ꓖꓶˍ ꓡꓳ꓾ ꓐꓰ ꓢꓷ. ꓪ ꓡꓳ꓿
- ꓪꓴ. ꓞꓱ ꓞꓰˍ ꓟ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓟ꓾
ꓮꓠꓔꓲꓳꓫꓲꓓꓮꓠꓔ ꓢꓯꓼ ꓮ ꓟꓬ, ꓓꓯ,ˍ ꓟ ꓟ‐ꓡꓰ‐ꓗ ꓒꓬꓽ ꓠꓬ ꓳꓫꓲꓓꓮꓔꓲꓦꓰ ꓢꓔꓣꓰꓢꓢ ꓪꓴ. ꓠꓬꓲ ꓪꓴ. ꓞꓱ ꓞꓰˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ꓿ ꓧꓪ ꓟꓰ, ꓠꓬꓲ ꓓꓴ ꓕꓲ ꓟ ꓗꓪ ꓠꓬ ꓟ‐ꓡꓰ‐ꓗ ꓒꓬꓽ ꓗꓪ ꓳʼˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓝꓡꓮꓦꓳꓠꓳꓲꓓꓢ ꓓꓯ,ˍ ꓟ ꓥ ꓢꓲ ꓪꓴ. ꓞꓱ ꓚꓰ ꓔꓯ ꓢꓯꓼ ꓙꓳ ꓝꓲ ꓢꓲ ꓪꓴ. ꓞꓱ ꓣꓱꓽ ꓡ ꓝꓲˍ ꓡꓳ꓾ ꓐꓰ ꓐꓯ ꓔ ꓡꓳ꓿
ꓟ‐ꓡꓰ‐ꓗ ꓒꓬꓽ 3 ꓒꓬꓽ 4 ꓒꓬꓽ ꓛꓲ ꓔꓯ ꓮ. ꓕꓽ ꓡꓰ ꓐꓽ ꓐꓽ ꓤ ꓪꓳ ꓗꓷ ꓢꓲ ꓬꓲꓻ ꓛ ꓛ ꓛˍ ꓡꓰꓽ ꓗꓪ 10 ꓧꓶ, ꓛꓲ ꓚꓬ. ꓗꓷ꓿ ꓬꓲ ꓬꓲꓻ ꓖꓳ ꓟ ꓡꓬꓽ ꓡꓰˍ ꓕꓯ ꓪꓴ. ꓞꓱ ꓐꓰ ꓪꓴ. ꓓꓵ ꓗꓴ, ꓙꓲ ꓗꓪ ꓟꓰ ꓖꓶ ꓗꓷ꓿ ꓖꓳ ꓠꓯ. 10 ꓧꓶ, 15 ꓧꓶ, ꓛꓲ ꓗꓶ ꓔ ꓢꓲ ꓠꓬꓲ ꓪꓴ. ꓓꓵ ꓞꓲꓽ ꓗꓷ꓾ ꓠ ꓗ, ꓡꓳ꓿ ꓟ‐ꓡꓰ‐ꓗ ꓬꓲ ꓒꓬꓽ ꓠꓬ ꓣꓳ ꓮ ꓕꓯ ꓟꓲ ꓜꓽ ꓔꓬ ꓟ ꓜꓽ ꓓꓴ ꓟꓽ ꓥ ꓐꓯˍ ꓥ ꓟꓲ꓾ ꓮ ꓠꓱ ꓕꓯ ꓡꓰ ꓣꓱꓽ ꓩꓴ ꓡˍ ꓟ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓡꓳ꓿ ꓕꓯꓽ ꓢꓲ ꓗꓪ ꓐꓯ ꓗꓷ ꓟ ꓡꓰ ꓠꓯꓻ ꓞꓲꓼ ꓐꓱ ꓶ ꓣꓱꓽˍ ꓕꓯ ꓠꓬ ꓣꓳ ꓐꓱ ꓶ ꓙꓲꓻ ꓖꓴ ꓮ ꓟꓬ, ꓖꓶˍ ꓟ ꓬꓲ ꓒꓬꓽ ꓕꓲ ꓙꓰꓽ ꓥ ꓡꓳ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
