ꓔꓲꓺ ꓒ ꓪ ꓔꓲ. ꓡꓰꓳ (14) ꓠꓬ ꓖ‐ꓜ ꓗꓪ ꓟ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓗ‐ꓔꓳ‐ꓡꓲꓗ ꓢꓲ ꓤ ꓐꓴ (Holy Family Catholic Parish) ꓐꓴ ꓔꓯ ꓕꓳꓽ ꓶ ꓖꓶ ꓩꓴ ꓗꓷꓳ꓿
ꓖ‐ꓜ ꓗꓪ ꓟ ꓑ ꓫꓬ ꓐꓴ ꓠꓬ꓾ ꓪꓽ ꓘꓴ ꓦꓲꓻ ꓗꓪ ꓟꓯꓼ ꓛꓰ, ꓑꓬ ꓔꓬ ꓟ ꓥ ꓢꓲ ꓠꓬꓲ꓾ 2025 ꓘꓳꓼ 7 ꓦ 17 ꓠꓬꓲ ꓠꓯꓼ ꓠꓯꓼ (10:20) ꓙꓵ, ꓕꓯ ꓲꓢꓣꓮꓰꓡ ꓐꓴ ꓡꓰ ꓑꓳ ꓩꓴ ꓡˍ ꓟ ꓪꓴ. ꓠꓬꓲ (3) ꓣꓳ ꓫꓵꓻ ꓗꓷ ꓢꓲ꓾ 10 ꓣꓳ ꓟꓽ ꓞꓲꓺ ꓠꓻ ꓓꓴ ꓓꓴ ꓡꓰ ꓟ ꓥ ꓡꓳ꓿ ꓪꓽ ꓘꓴ ꓦꓲꓻ ꓖꓳ ꓟ ꓠꓬ ꓖ‐ꓜ ꓗꓪ ꓙꓳˍ ꓟ ꓕꓲꓽ ꓟˍ ꓟ ꓗ‐ꓔꓳ‐ꓡꓲꓗ ꓪꓽ ꓘꓴ ꓦꓲꓻ ꓥ ꓡꓳ꓾ ꓐꓰ ꓢꓷ. ꓪˍ ꓡꓳ꓿
Vatican ꓠꓱ. ꓐꓯ ꓗꓴꓷꓼ ꓐꓰ ꓙꓻ ꓡꓯ ꓘꓳ ꓟꓬꓱꓽ ꓬꓰ ꓢꓴ ꓥ ꓟ Cardinal Pietro Parolin ꓬꓲ ꓡꓯꓼ ꓟꓼ ꓗꓪ ꓐꓰ ꓔꓲꓺ ꓒ ꓪ ꓔꓲ. ꓬꓲ ꓛꓲꓺ ꓐꓯ ꓑꓶˍ ꓟ ꓕꓳꓽ ꓶ ꓗꓪ ꓠꓬ ꓞꓳ ꓜꓴ ꓔꓯ ꓛꓴꓽ ꓙꓳˍ ꓟ ꓑꓶ. ꓓꓴ ꓫꓵꓻ ꓢꓴ ꓐꓴ ꓐꓰ ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓐꓱ ꓶ ꓐꓯ ꓟꓽ ꓠ ꓗꓪ ꓛꓲ ꓠꓲ, ꓟ ꓫ. ꓙ ꓔꓬ ꓡꓳ꓾ ꓐꓰ ꓐꓯ ꓔ ꓡꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓔꓲꓺ ꓒ ꓪ ꓔꓲ. ꓠꓬ ꓕꓱ ꓑꓳ ꓩꓴ ꓡˍ ꓟ ꓗꓪ ꓠꓻ ꓓꓴ ꓓꓴ ꓡꓰ ꓟ Holy Family ꓔꓲꓺ ꓒ ꓙꓵꓽ ꓔꓶ. ꓗꓪ ꓧꓳꓽ ꓪꓴ. ꓟꓴ ꓢꓴ ꓥ ꓟ ꓔꓲꓺ ꓒ Gabriel Romanelli ꓐꓰ ꓕꓲ ꓪˍ ꓘꓴ ꓜꓲꓼ ꓞꓳ ꓢꓲ ꓤ ꓮ ꓙꓵꓽ ꓔꓯ ꓥ ꓟꓲ ꓦꓻ ꓕꓲ ꓒꓳ, ꓗꓪ ꓢꓯꓼ ꓖꓶ ꓪ ꓖꓶ ꓗꓷꓳ꓿
ꓔꓲ ꓒ ꓪ ꓔꓲ. ꓡꓰ ꓫꓵꓻ ꓢꓴ ꓐꓴ ꓦ ꓠꓬ ꓐ, ꓐ ꓪꓴ‐ꓢ ꓬꓲ ꓫꓱ. ꓤ ꓠꓲ, ꓠꓯꓸꓼ ꓗꓪ ꓡꓯꓼ ꓙꓱ ꓗꓷ ꓢꓲ ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓠꓲ, ꓞ ꓓꓻ ꓡꓰ ꓠ, ꓟ ꓐꓰ ꓠꓲ, ꓫ. ꓟꓬ ꓫ. ꓔꓬ ꓢꓴ ꓐꓴ ꓠꓲ, ꓗꓴ ꓟꓬ ꓗꓴ ꓟꓶ ꓠ, ꓟ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷꓳ꓿
ꓡꓳ, ꓬꓰˍ ꓕꓯ ꓔꓲꓺ ꓒ ꓪ ꓔꓲ. ꓠꓬ꓾ ꓟꓵꓽ ꓘꓴ ꓠꓯꓸꓼ ꓗꓪ ꓠꓲ, ꓧꓳ, ꓫꓵꓽ ꓧꓳ, ꓡꓯ ꓘꓳˍ ꓟ꓾ ꓕꓲ ꓠꓲ, ꓕꓲ ꓪ ꓬꓰ ꓠ, ꓟ ꓐꓰ ꓕꓶ ꓞ, ꓟ ꓢꓲ ꓡꓲ ꓟ ꓟꓶ ꓠ, ꓟ ꓐꓰ ꓶ ꓥꓳ ꓡꓳ. ꓢꓲ ꓠꓬꓲ꓾ ꓓꓶꓽ ꓡꓯ ꓘꓳ ꓢꓰꓼ ꓡꓯ ꓘꓳˍ ꓟ ꓠꓽ ꓗꓷ ꓠ, ꓟ ꓐꓰ ꓢꓲ ꓡꓲ ꓟ ꓟꓶ ꓡꓰ ꓠ, ꓟ ꓝꓮꓲ ꓕꓲ ꓧꓪ, ꓓꓰꓽ ꓗꓷꓳ꓿
ꓖ‐ꓜ ꓠꓯꓻ ꓞꓲꓼ ꓢꓲꓽ ꓒ ꓟꓬꓱꓽ ꓬꓰ ꓜꓴ ꓗꓪ ꓐꓰ ꓐꓯ ꓑꓶ ꓔ ꓟ ꓗꓪ ꓠꓬ꓾ 2023 ꓘꓳꓼ 10 ꓦ 7 ꓠꓬꓲ ꓗꓪ ꓐꓰ ꓪꓴ. ꓔꓴ ꓢꓲ ꓠꓬꓲ꓾ ꓑ‐ꓡꓯ.‐ꓢ‐ꓔꓮꓲ, ꓗꓴꓷꓼ ꓡ ꓞꓳ 58,313 ꓣꓳ ꓐꓰ ꓲ‐ꓢꓷ‐ꓡꓰ ꓗꓴꓷꓼ ꓡ ꓞꓳ 1,983 ꓐꓰ ꓕꓲ ꓪˍ꓾ ꓡ ꓞꓳ ꓮ ꓙꓵꓽ 60,200 ꓣꓳ ꓟꓽ ꓞꓲꓺ ꓫꓵꓻ ꓗꓷꓳ꓾ ꓐꓰ ꓐꓯ ꓔ ꓡꓳ꓿
News Credit to Vatican News https://loom.ly/OwDjhr4
