ꓟꓵꓽ ꓗꓳꓸ ꓓꓵ ꓓꓵ ꓗꓪ ꓐꓰ ꓗ-ꓕꓳ-ꓡꓲꓗ ꓓꓳꓽ ꓫꓵꓽ

Papua News Guinea ꓐꓰ Solomon ꓗꓴꓷꓼ ꓗ-ꓕꓳ-ꓡꓲꓗ ꓔꓲꓺ ꓒ ꓓꓽ ꓜꓴ ꓡꓰ Peter To Rot ꓬꓲ ꓑꓮꓲ ꓦꓬꓼ ꓠꓬꓲ ꓔꓯ ꓬꓰ ꓖꓶ ꓗꓷ ꓟ ꓥꓳ= ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓬꓲ ꓔꓯ 10 ꓦ 19 ꓠꓬꓲ 2025 ꓘꓳꓼ ꓕꓯ ꓢꓲ ꓫꓬ ꓢꓴ ꓕꓲ ꓣꓳ ꓐꓰ ꓟꓬꓱꓺ ꓓꓳ ꓖꓶ ꓠꓹ ꓟ ꓥ ꓡꓳ= ꓬꓲ ꓠꓬ Papua News Guinea ꓗꓴꓷꓼ ꓗꓪ ꓬꓲꓸ ꓪꓴꓸ ꓕꓲ ꓣꓳ ꓟ ꓢꓲ ꓫꓬ ꓢꓴ ꓒꓬꓱꓼ ꓡ ꓟ ꓥꓳ=

ꓬꓲ ꓠꓬ ꓘꓴ ꓜꓲꓼ ꓞꓳ ꓟꓸ ꓒꓽ ꓕꓲ ꓣꓳ ꓥ ꓢꓲ ꓪꓴ-ꓢ ꓟꓬꓱꓽ ꓟꓯ ꓔꓬ ꓟ ꓙꓵꓹ ꓗꓪ (1945) ꓕꓯ ꓢꓴ ꓡꓰ ꓢꓰꓼ ꓗꓷ ꓟ ꓥꓳ= ꓙꓮꓑꓮꓠ ꓐꓴ ꓡꓰ ꓙꓵ_ ꓟ ꓙꓵꓹ ꓗꓪ ꓪꓴ-ꓢ ꓶ ꓓꓳꓽ ꓫꓱꓹ ꓓꓳ ꓔꓯ ꓟꓽ ꓚꓺ ꓠꓹ ꓟ ꓕꓵꓼ ꓪ ꓖꓶ ꓔ ꓟ ꓥ ꓡꓳ꓾ ꓮ ꓕꓯ ꓟꓲ ꓐꓱ ꓓꓴ ꓗꓪ ꓐꓱ ꓖꓶ ꓟꓶ ꓡꓰ ꓟ ꓥ ꓡꓳ= ꓬꓲ ꓠꓬ ꓖꓳ ꓕꓲ ꓟꓵ ꓗꓪ ꓐꓰ ꓓꓽ ꓪꓴꓸ ꓟ ꓢꓲ ꓫꓬ ꓢꓴ ꓒꓬꓱꓼ ꓡ ꓟ ꓥꓳ= ꓬꓲ ꓠꓬ ꓙꓵꓻ ꓠꓲꓹ ꓮ ꓘꓶꓸ ꓕꓷ ꓞꓹ ꓢꓴ ꓥ ꓡꓳ= ꓝꓲ ꓓꓴ ꓟꓬꓱꓽ ꓗꓪ ꓮ ꓘꓶꓸ ꓢꓯꓼ ꓕꓵꓼ ꓢꓴ ꓥ ꓡꓳ= ꓕꓱ ꓡꓱ ꓬꓲ ꓒꓳꓹ ꓒꓳꓹ ꓗꓪ ꓢꓯꓼ ꓕꓵꓼ ꓢꓲ ꓙꓲ_ ꓟ ꓔꓯ ꓧꓳꓽ ꓪꓴꓸ ꓐ ꓡ ꓟ ꓠꓬ ꓬꓲ ꓐꓰ ꓕꓲ ꓪ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓐꓴ ꓐꓰ ꓕꓲ ꓪ ꓟꓬꓱꓽ ꓟꓯ ꓔꓬ ꓢꓴ ꓐꓴ ꓑꓶ ꓓꓴ ꓥ ꓡꓳ=

ꓬꓲ ꓐꓹ ꓐ꓾ ꓟꓹ ꓟ ꓠꓬ ꓙꓵꓻ ꓠꓲꓹ ꓔꓯ ꓮ ꓘꓶꓸ ꓕꓷ ꓞꓹ ꓢꓴ ꓐꓴ ꓥ ꓡꓳ= ꓬꓲ ꓐꓹ ꓐ ꓠꓬ ꓞꓳ ꓫꓵꓽ ꓪꓴꓸ ꓓꓵ ꓣꓱꓽ ꓢꓴ ꓟꓲ ꓥ ꓡꓳ= ꓞꓳ ꓫꓵꓽ ꓪꓴꓸ ꓓꓵ ꓣꓱꓽ ꓢꓴ ꓥ ꓟ ꓬꓲ ꓚꓲ ꓛꓬ ꓖꓳ ꓓꓱ ꓔꓲꓹ ꓟ ꓔꓯ ꓘꓳꓹ ꓣꓴ ꓟ ꓗꓪ ꓐꓰ ꓞꓳ ꓘꓹ ꓢꓴ ꓐꓴ ꓟꓲ ꓙꓵꓻ ꓢꓲ ꓘꓳꓹ ꓣꓴ ꓗꓷ ꓟ ꓥꓳ= ꓬꓲ ꓐꓹ ꓐ ꓟꓬꓱꓺ ꓠꓬ꓾ Angelo To Puia ꓥ ꓢꓲ ꓪꓽ ꓘꓴ ꓦꓲꓻ꓾ ꓙꓳ ꓦꓲꓻ ꓕꓱ ꓡꓱ ꓫꓵ ꓫꓬꓹ ꓠꓹ ꓟ ꓐꓱ ꓶ ꓟꓲ ꓠꓯ ꓔꓯ ꓠꓲꓹ ꓡꓱ ꓡꓱ ꓖꓶ ꓗꓷ ꓢꓲ ꓢꓯꓼ ꓕꓵꓼ ꓢꓴ ꓥ ꓡꓳ=

ꓟꓬꓱꓺ ꓓꓳ ꓙꓳ ꓢꓴ Peter To Rot ꓔꓯ ꓒꓵꓽ ꓗꓹ ꓬꓰ_ ꓟ ꓡꓰ ꓐꓰ ꓕꓱ ꓑꓮꓲ ꓐꓰ ꓕꓲ ꓪ ꓢꓳꓡꓳꓟꓳꓠ ꓬꓲꓻ ꓗꓳ ꓡꓳ ꓟꓵꓽ (47) ꓧꓪꓹ ꓟ ꓢꓲꓹ ꓡꓲꓹ ꓟꓶ ꓟ ꓦꓬꓼ ꓠꓬꓲ ꓟꓲ ꓥ ꓡꓳ꓾ ꓝꓸ ꓢꓲ ꓗꓴꓷꓼ ꓢꓲ ꓡꓲꓹ ꓡꓲꓹ ꓐꓰ ꓔꓬ ꓟꓶ ꓠꓹ ꓟ ꓐꓱ ꓶ ꓟꓲ-ꓢ ꓪꓽ ꓘꓴꓽ ꓙꓵꓹ ꓗꓪ ꓪꓽ ꓘꓴ ꓖꓶ ꓗꓷ ꓟ ꓥꓳ=